“O Ai le Aposetolo o Paulo?,” Liahona, Aok. 2023.
Sau, Mulimuli Mai ia te A’u
O Ai le Aposetolo o Paulo?
Ua Talai Atu e Paulo le Talalelei i Isi Nuu, saunia e Paul Mann
Tuāāta
-
Igoa Iutaia: Saulo
-
Sa soifua mai i Tasesa, o se aai i Take i ona po nei
-
Maua le tagatanuu o Roma i le fanau mai
-
Na soifua a’e i se aiga faaaloalogia ma lolotu
-
Sa auina atu e aoga i Ierusalema ma avea ma se Faresaio
-
Sa vaai le au Faresaio i le faaKerisiano o se faaseseina o le faa-Iutaia, o lea na “soona saua ai Saulo i le ekalesia” (Galuega 8:3) i se taumafaiga e puipuia lana tapuaiga
Liua
A o malaga atu Saulo i Tamaseko e pue faapagotaina soo sulufai o Keriso, “ona pupula faataaliolio mai ia te ia o le malamalama mai le lagi” (Galuega 9:3). Ina ua pau o ia i le eleele, sa ia “faalogo atu i le siufofoga o loo faapea mai ia te ia, Saulo, Saulo e, se a le mea ua e saua mai ai ia te au?” (Galuega 9:4). Na poloaiina e Keriso ia Saulo, lea ua tauaso mai le faaaliga, e alu i Tamaseko ma faatalitali mo nisi faatonuga.
Ina ua mavae aso e tolu o le tauaso, sa asia Saulo e le soo o Anania, o lē sa faamaloloina lana vaai (tagai Galuega 9:17–18). Ona papatisoina lea o Saulo ma alu atu i Ierusalema, ae o le au soo “ua fefefe i latou uma lava ia te ia, fa te i latou e le se soo o ia” (Galuega 9:26).
Sa valaauina Saulo e auauna atu i Nuuese, ma mai lena lava taimi, o loo faasino le Tusi Paia ia te ia o Paulo, lona suafa Latina. O le liua o Paulo o se molimau o le talalelei a Iesu Keriso o loo avanoa mo i latou uma o e salamo ma “po o fea lava o tatou i ai, po o a foi mea sa tatou faia, e leai se mea e ta’u o le lē toefoi.”1
Aisea na filifilia ai Paulo?
O Paulo o se Aposetolo e mafai ona aoao atu “nuuese i laueleele e le o ni Iutaia, o e sa mafai ona tetee atu i faitioga a ona lava tagatanuu (e oo lava i le Ekalesia), ma sa i ai le poto ma aoaoga e aoao atu ai Iutaia ma nuuese o tulaga faaagafesootai uma i le malo atoa o Roma.”2
O Paulo, o se tagatanuu Roma ma o se Faresaio sa tautala i le gagana Eperu, Eleni, ma sina faa-Latina, sa tulaga ese le agavaa e faataunuu lenei faatautaiga (tagai Galuega 9:15).
Savali Tutotonu
I le avea ai ma se Aposetolo, sa tu Paulo o se molimau ia Iesu Keriso ma Lona mana togiola. “O le autu tutotonu o ana tusitusiga uma o le ala na togiolaina ai e Iesu Keriso le lalolagi ma le ala e mafai ai e le Au Paia ona olioli i faamanuiaga o Lana Togiola.”3