“Mata e Fetaui Le Tau?,” Liahona, Aok. 2023.
O Leo o le Au Paia o Aso e Gata Ai
Mata e Fetaui le Tau?
Sa ou iloaina le leo o le Agaga Paia ma taliaina le tau a le avetaavale la’u pasese e ave i matou i le lotu.
Ata o le aiga mai faaaloaloga a le tusitala
Mo mafuaaga e faatatau i le galuega, sa ou auina atu ai la’u fanau teine e toatolu e faaalu le 15 aso faatasi ma lo’u tina i le taulaga laitiiti o Itarema, i le setete o Pasila o Ceará. O le iunite sili ona latalata O Le Ekalesia a Iesu Keriso o le Au Paia o Aso e Gata Ai e tusa ma le 55 maila (60 km) le mamao—o se paranesi i Itapipoca.
Sa ou popole ne’i le aai ma feinu la’u fanau teine i le faamanatuga mo Aso Sa e lua. O lo’u tina o se tagata faamaoni o le ekalesia, ae o le a le mafai ona ia malaga i le lotu faatasi ma la’u fanau teine e toatolu ma le fanau teine e toatolu a lo’u uso, o e sa asiasi ane foi.
Ina ua mavae le lua vaiaso, sa ou malaga i se Aso Toonai i Itarema e toe aumai la’u fanau teine. Ina ua ou taunuu atu, sa ou fesili i se avetaavale laupasese, “E fia le totogi e ave ai lo’u tina, fanau e toaono, ma a’u i Itapipoca ma le toe foi mai taeao?”
O lana tali na ou faanoanoa ai. O le a alu ai le toetoe lava o tupe uma na ia te au. A o ou mafaufau loloto i le pasese, sa oo mai se fesili i lo’u mafaufau: “O le a le taua ia te oe o le ai ma inu i le faamanatuga?” Sa ou iloaina le leo o le Agaga ma taliaina le tau a le avetaavale laupasese.
Ua ou aoaoina la’u fanau teine o le falaoa ma le vai o le faamanatuga o loo ufitia i se ie papae e fesoasoani tatou te mafaufau ai i le tino ma le toto o le Faaola, mea ua Ia faia mo i tatou, ma le taua o le manatuaina o Ia. Ua faamanatu mai e le faamanatuga ia te au o loo i ai o Ia iina mo au ma ou te fia i ai iina faatasi ma Ia.
O le aso na sosoo ai ina ua matou savavali atu i totonu o le potu Peraimeri a le Paranesi o Itapipoca ma se fanau e toaono, sa foliga mai na faapitoa lava le faafetai o le peresitene o le Peraimeri. I ni nai minute mulimuli ane, na taunuu mai ai uo mai la’u uarota tumau i Fortaleza ma le la fanau e toafa.
Ina ua mae’a le Peraimeri, sa matou olioli i faamanuiaga o le aai ma feinu i le faamanatuga ma faafou a matou feagaiga ma le Alii. Ina ua mae’a le faamanatuga, sa matou aoaoina le mafuaaga na matua fiafia ai le peresitene o le Peraimeri e vaai ia i matou. O lena Aso Sa sa tuuina atu ai e le Peraimeri le polokalama o le sauniga faamanatuga, ae sa na o ni nai tamaiti sa i ai i le Peraimeri.
“Sa tali mai le Atua i a’u tatalo,” na saunoa ai le peresitene o le Peraimeri, ma faalauiloa atu le polokalama. “Na ia auina mai nisi tamaiti se toa 10 ua saunia e usu ma auai i le polokalama.”
Sa ou olioli ona sa ou faalogo i musumusuga a le Agaga i le po na muamua atu. O le aai ma feinu i le faamanatuga ma le mauaina o lena aafiaga faaleagaga e le mafaatauina, sa matua talafeauga ai le ositaulaga tautupe.