Mauaina o le Faamoemoe ma le Alofa Pe a Tauivi ma Ponokalafi

Saunia e Brian J. Willoughby, PhD

Polofesa, A’oga o le Olaga Faaleaiga, Iunivesite o Polika Iaga

E i ai pea le faamoemoe pe a e iloa ni laasaga manino e uia i luga o le auala i le toe faaleleia.

O Le Aao o le Atua, saunia e Yongsung Kim, e le mafai ona kopiina

I le avea ai ma se polofesa e sailiili i aafiaga o le faaaogaina o ponokalafi ma se polofesa o le olaga faaleaiga i le Iunivesite o Polika Iaga, e omai ia te au le toatele o tagata o loo tauivi ma le faaaogaina o ponokalafi po o i latou o loo sailia se fesoasoani mo e pele. O nisi taimi ou te maua ai fesili e pei o le “Pe o le a ou faatoilaloina ea lo’u faafitauli i ponokalafi?” po o le “E afaina moni lava pe a ou matamata i ponokalafi?” O nei fesili e faaalia ai le lavelave o le taumafai e talanoaina le faaaogaina o ponokalafi.

Ua aoao mai tusitusiga paia ma perofeta o aso e gata ai e faapea ua ofo mai e Iesu Keriso le faamoemoe ma le alofa i tagata uma, e tusa lava po o a o latou puapuaga po o agasala o i ai nei. Na aoao mai le perofeta o Eteru e faapea “soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua” (Eteru 12:4). O lenei faamoemoe mautinoa, e fanau mai i le faatuatua, ua folafola mai ai se lumanai sili atu mo i latou uma o e faaaoga lo latou faatuatua i le Tama Faalelagi ma Iesu Keriso.

E moni foi ua lapatai mai pea lava pea taitai o le Ekalesia i le gasologa o tausaga e uiga i tulaga lamatia o le faaaogaina o ponokalafi.¹ E faapena foi, o sailiiliga maumaututu ua fautua mai ai o le matamata i ponokalafi e mafai ona faatamaia ai tagata taitoatasi ma faavaivaia ai sootaga.² E ui o upumoni autu nei, ae o le moni o le talanoaina po o le faatoilaloina o ponokalafi e mafai i nisi taimi ona luitauina.

I le avea ai ma se tasi na faaaluina ni tausaga e taumafai ai ia malamalama i aafiaga o ponokalafi, ua manino mai ia te au o le maimoaina ma le loto i ai o anomea faaponokalafi e i ai ni aafiaga matuia i tagata taitoatasi ma aiga. Ua manino foi ia te au e toatele o loo tauivi e saili auala e taumamao ai mai le faaaogaina o ponokalafi ma ia solaese mai le pogisa lea o le a faalavelaveina ai i taimi uma lo latou fiafia. O le mauaina o le faamoemoe e mafai ona faigata pe a aunoa ma le iloaina o laasaga manino e uia i luga o le ala i le toe faaleleia. Mo lena mafuaaga, ou te faasoa atu i lalo nisi o laasaga patino e ono faia e se tasi e alu ese ai mai ponokalafi.

E ui o loo i ai nisi o mamanu masani i le toe faaleleia—e aofia ai le faatuatua i le Atua, faamaoni, ma le sailia o le fesoasoani—o laasaga patino i le toe faaleleia e ono foliga eseese e faavae i le tulaga o le aafia ai o se tagata i ponokalafi. Na faamatalaina e Peresitene Dallin H. Oaks, Fesoasoani Muamua i le Au Peresitene Sili, ia tulaga e fa o le aafia ai i ponokalafi: (1) le mafai ona puleaina po o le fai ma vaisu, (2) faateleina le faaaogaina, (3) faaaogaina i nisi taimi, ma le (4) faaalia faafuasei.³ Mo tulaga muamua e tolu o le auai ai, o le a ou fautua atu ni laasaga lelei e mafai e oe ma e pele ia te oe ona faia i lau faigamalaga i le taulimaina o le faaaogaina o ponokalafi.

1. Taulimaina o le le Mafai ona Pulea le Faaaogaina (Vaisu)

O le faaaogaina o ponokalafi i le aluga o taimi e masani ona fatuina ai ni uunaiga malolosi ma faamalosi i totonu ia te oe e matamata pe faalogologo i nisi anomea faaponokalafi ma faaaoga soo. O le vaisu i ponokalafi e faatapulaa ai lou saolotoga e filifili ai. Afai e fai ma vaisu, atonu o le a e tauivi e mafaufau po o le auai foi ma isi i gaoioiga po o sootaga taua, e aofia ai aiga ma uo. E ui e mafai i taimi uma le salamo ma le toe foi atu i le ala o feagaiga, ae o le vaisu i ponokalafi e mafai ona e lagona ai le leai o se faamoemoe, faanoanoa, ma le atuatuvale.

Laasaga Aoga

Taulai atu i lou faasinomaga paia. O le taulai atu i lou faasinomaga o se atalii po o se afafine o le Atua e mafai ona fesoasoani e toefaatuina lou talitonuga e te mafaia mea silisili, e aofia ai le faatoilaloina o le faaaogaina o ponokalafi. E ui o le toatele o loo tauivi ma le vaisu o ponokalafi e lagona le leai o se faamoemoe, afai e te manatua lou faasinomaga paia ma le faamoemoega, e mafai ona e maua atili le malosi e maua ai le faatuatua i le Alii ma faatino (tagai Filipi 4:13).

Talanoa i isi e uiga i lenei faafitauli. O le oo i faaosoosoga ma uunaiga e matamata i ponokalafi e mafai ona saofagā i se lagona loloto o le tuuatoatasi. O se tasi o auala sili e puipuia ai le taupulea mai le natia ma faateteleina le leaga o le talanoa sa’o lea e uiga i lou faaaogaina o ponokalafi. Saili le lagolago mai tagata o le aiga, uo, ma taitai o le Ekalesia, faapea foi ma punaoa faapolofesa, e fai ai lau taua o se vaega e le o faia na o oe.

Saili se fofo i le lotoifale e faapitoa i vaisu faalefeusuaiga. O tagata tomai faapitoa o le soifua maloloina faalemafaufau e mafai ona fesoasoani ia te oe ia malamalama i mafuaaga atonu e te liliu atu ai i ponokalafi. E mafai ona latou fesoasoani ia te oe e talanoaina mamanu faigata atonu o loo faatapulaaina ai lou tomai e faaaoga ai lou faitalia e maua ai le olioli ma le fiafia.

Auai i se vaega toe faaleleia o vaisu. O sauniga a vaega o le toe faaleleia o olaga mai le tagofia o mea ua fai ma vaisu ma isi punaoa a faalapotopotoga e mafai ona fesoasoani e faafesootai ai i latou o loo sailia le toe faaleleia ma e mafai ona tuuina atu ia te oe ni faufautua, savali o le faamoemoe, ma faataitaiga lelei.⁴ E eseese faigamalaga a tagata uma i vaisu, ae a o e faalogo i tala ma tauiviga a isi, e mafai ona e aoaoina e le faapea e tatau ona e feagai ma tofotofoga na o oe ma e mafai ona siitia ma faamalosiauina e isi sa i ai i ni tulaga talitutusa faapena.

2. Talanoaina o le Tele o le Faaaogaina

E le o tagata uma e maua i mailei o ponokalafi e fai ma vaisu. Atonu na maileia oe i se mamanu o le matamataina o ponokalafi ae le ausia ai le faauigaga faafomai o vaisu. Atonu e te manatu i ai o se “mausa leaga” faifaipea o le faaaogaina o ponokalafi. E ui o taunuuga e faatatau i lenei tulaga o le aafia i ponokalafi atonu e le matuia tele nai lo le vaisu, ae o loo i ai pea ni aafiaga le lelei i lou olaga.

Mo se faataitaiga, o le faaaogaina soo o ponokalafi e osofaia ai lou gafatia e lagona ai le alofa mama ma e mafai ona fatuina ai ni uiga le talafeagai e agai atu i sootaga vavalalata ma le alofa faalefeusuaiga. E mafai ona avea ou mafaufauga ma lagona e uiga i sootaga vavalalata ia sili atu ona manatu faapito, ma atili ai ona faigata ia te oe ona lagona ma faailoa atu le ituaiga alofa lea e faalolotoina ma faamalosia ai au sootaga. E mafua lenei mea ona e oo lava i le faaaogaina i nisi taimi o ponokalafi e siitia ai le tuinanau, o se sui mo le alofa lea e faavae i manaoga ma amioga manatu faapito e feteenai ma le finagalo o le Atua.⁵ Na aoao mai le Alii, “O ia o lē e vaai atu i se fafine i le manao ia te ia, o le a faafiti e ia le faatuatua, ma o le a lē maua e ia le Agaga” (Mataupu Faavae ma Feagaiga 42:23).

Laasaga Aoga

Aapa atu mo se fesoasoani. O le lagonaina o le saisaitia i se faiga masani o ponokalafi e mafai ona le fiafia. Atonu e te lagona e pei o lou faaogaina o ponokalafi e le faamaonia ai le lagolago o le soifua maloloina o le mafaufau, pe e te lagona le fefe e liliu atu i uo ma tagata o lou aiga mo se lagolago po o se fesoasoani. E taua le manatua o le sailia o nei punaoa o se laasaga taua muamua lea. Atonu e mafai e e pele ona fesoasoani e mataitu le telefoni po o le faaaogaina o le initoneti ma fatuina se lagona o le tali atu i lou olaga. O le faia o ni talanoaga masani ma asiasi i se tagata alofa o le aiga po o se uo o se isi auala lea e mafai ai e lenei lagolago faaagafesootai ona fesoasoani e faalavelave i le malosi o le faaaogaina o ponokalafi.

Aoao po o a mea e tutupu po o lagona e faaosofia ai lou manao e matamata i ponokalafi. Mo le tele o tagata, o lenei manaoga e mafai ona faaosoina e le atuatuvale, teena, po o isi lagona le lelei. Atonu e aoga ia te oe le faailoa o tulaga e te ono lagona ai le manao e matamata i ponokalafi. A uma loa ona faailoaina, e mafai ona fesoasoani lenei malamalama i tagata uma e aofia ai ia iloa tulaga e aloese ai ma pe o afea foi e te ono manaomia ai le lagolago sili ma le faamalosiauga.

Fiafia i gaoioiga faafiafia lelei. Talu ai o le tele o le faaaogaina o ponokalafi e masani ona mafua mai i lagona le lelei, o le isi laasaga aoga o le taulai atu lea i gaoioiga lelei e faafiafia ai po o mea e fiafia i ai lea e aveesea ai le atuatuvale ma toe faafou ai oe. E ui o nei lava gaoioiga o le a le aveesea ai le faaosoosoina e matamata i ponokalafi, ae o le tuuina o taumafaiga i ni gaoioiga lelei e mafai ona fesoasoani e faaitiitia ai nei tulaga pe a tulai mai se manao e matamata i ponokalafi. O nei gaoioiga e mafai ona aumaia ai le fiafia ma le malologa i lou olaga.

Valaaulia le malamalama o le Atua i lou olaga. Mafaufau e tuu faatasi ni mea lelei e fiafia i ai ma se gauai faateleina i le malamalama faaleagaga lea e sau mai le auai i le talalelei. O lenei malamalama o le talalelei e mafai ona sau mai le faitauina o tusitusiga paia, tatalo i aso uma, ma, pe a mafai, auai i le malumalu. Na ta’ua e Elder Dieter F. Uchtdorf o le Korama a Aposetolo e Toasefululua e faapea “Ua folafola mai e le Atua le faamoemoe o Lona malamalama—Ua Ia folafola mai e faamalamalama le ala o loo i o tatou luma atu ma faaali mai ia i tatou le auala e alu ese ai mai le pogisa.”⁶

3. Talanoaina o le Faaaogaina i Nisi Taimi

Mo nisi, o le faaaogaina o ponokalafi e le o se mausa masani po o se vaisu. E mafai ona e matamata i ponokalafi iinei ma iina ae i ni auala eseese. E ui atonu e faaosoosoina oe ia le popole i lenei vaega o le faaaogaina na o ni nai taimi, ae sa aoao mai Peresitene Oaks, ”E pei lava o soo se amioga e tumu i le agasala, o le faaaogaina ma le loto i ai o ponokalafi e tuliesea ai le Agaga Paia.”⁷ O lenei tafiesea o lou nofouta faaleagaga o se aafiaga le lelei tele lea o le na ona faaaogaina o ponokalafi i nisi taimi. E manao Satani e faaaoga ponokalafi e faatamaia ai lou sootaga i le alofa ma le mana faaleagaga lea e tuuina mai e le Agaga Paia.

Laasaga Aoga

Saili atu i le Agaga. O se laasaga autu i le aveeseina o le faaaogaina o ponokalafi i nisi taimi o le taumafai lea e faalatalata atu i le Agaga o le Atua i aso uma. Ona e silafia lelei oe e lou Tama Faalelagi, ua Ia silafia le ala e fesoasoani atoatoa ai ia te oe. Afai e te lagona ua e le toe fesootai ma le Agaga, ia tautino atu i le asō e taulai atu ia Keriso, manatua ma tausia au feagaiga, ma amata le faagasologa o le salamo ina ia mafai ai e le Agaga Paia ona toe tuuina atu ia te oe le taitaiga ma le lagolago. O le faalogo i uunaiga i aso taitasi mai le Agaga Paia ma lagonaina le alofa i aso taitasi o Iesu Keriso ma le Tama Faalelagi e mafai ona fesoasoani ia te oe e tali lelei atu ai i faaosoosoga po o manaoga e matamata i ponokalafi e ono oo mai.

Fatu ma faatumauina ni tuaoi manino pe a oo i lou faaaogaina o ponokalafi. O le aveesea o telefoni feaveai mai lou moega i le po po o le faaogaina o faatulagaga po o isi polokalama faakomepiuta faatuatuaina i au masini faaeletonika e mafai ona tuu ai ni papupuni i le va o oe ma le anoanoai o mea faaponokalafi i luga o le initaneti. E ui o na tuaoi e masani lava e le lava e suia ai le faaaogaina o ponokalafi masani, ae e mafai ona latou fesoasoani e tuuitiitia ai le toe foi i tua ma faaitiitia ai faaosoosoga.

Faamoemoe ia Keriso

Po o fea lava po o le a le tulaga o e i ai i le faaaogaina o ponokalafi, e i ai lava laasaga e mafai ona e faia ma faaiuga e mafai ona e faia e faamalosia ai oe lava e faasaga i ponokalafi ma iu ai ina faatoilaloina. E mafai ona e toe aumaia le faamoemoe i lou olaga e ala i le faaaogaina o lou faitalia e faia ai faaiuga manino e le gata ia aloese mai ponokalafi ae ia faia foi ni laasaga mataala e faaleleia ai lou lava malosi faaletagata lava ia.

Ua folafola mai e le talalelei ia i tatou faamanuiaga matagofie pe a tatou tuu atu lo tatou faamoemoe ia Iesu Keriso. Na molimau mai Elder Uchtdorf, “E tusa lava pe o le a le faaletonu e foliga mai o loo i ai nei o tatou olaga, ae ona o le soifua ma le taulaga a Iesu Keriso, ua mafai ai ona tatou faamoemoe, ma mautinoa o le faaiuga o le tusi o o tatou olaga, o le a matuai sili atu nai lo o tatou faamoemoega sili ona matagofie.”⁸ Ma na aoao mai Peresitene M. Russell Ballard, o le Sui Peresitene o le Korama a Aposetolo e Toasefululua, “Pe a oo ina i ai lo tatou faamoemoe ia Keriso, ona tatou iloa lea pei ona manaomia ona tatou osia ma tausia feagaiga paia, e mafai ona faataunuuina mea e sili ona tatou faananau i ai, e ala ia te Ia.”⁹

Pe o i ai se aafiaga le lelei i o tatou olaga ona o le maimoaina ma le loto i ai o ponokalafi? O tali mai o tatou perofeta o aso nei ma saienisi o ona po nei ua ogatusa: ioe. O lona uiga la o i latou o loo tauivi ma ponokalafi ua faamoemoeina i se olaga e le faamalieina ma matautia? E leai. O le matagofie o le talalelei o loo taoto lea i le folafolaga e mafai ona tatou salamo i taimi uma, alualu i luma i luga o le ala o feagaiga, ma toe olioli i le Agaga Paia ma le alofa o le Atua i o tatou olaga. Ua folafola mai ia i tatou e ”mafaia mea uma lava i le faamalosi mai o Keriso [ia te i tatou]” (Filipi 4:13). O ponokalafi e mafai ona faataumaoia ai le tele o mea e paia ma lelei, ae e mafai ona tatou aveesea mai o tatou olaga e ala i le faalagolago ia Iesu Keriso ma Lona mana faamalolo ma e ala i le faaaogaina o fautuaga o loo otooto atu i lenei tusiga.

O se Savali o le Faamoemoe ma le Faamalologa

Ua faasoa mai e se tane ma se ava le auala na aafia ai i laua i ponokalafi ma le auala o loo la taulimaina ai:

O Le A Oo Mai le Filemu

I le mavae ai o tausaga o tauiviga ma se vaisu o ponokalafi, sa ou aoaoina ai o le salamo e le o se mea e tupu ae o se faagasologa. O le toe tepa i tua, ua ou vaai ai i le aao o le Atua i lo’u olaga, o taitaia a’u. O le faatuatua, tatalo, ma le lagolago a lo’u toalua ma lo’u aiga na fesoasoani tele ia te a’u nai lo le mea o le a latou iloaina. Faatasi ai ma le fesoasoani a le Atua, ou te faamoemoe e avea ma se tane ma se tamā ua tatau ai i taimi uma.

E ala i o’u tauiviga, sa saunia ai a’u ma lo’u aiga e le Tama Faalelagi ia maua le olioli ma le faamalologa sili atu. Sa ou aoaoina o le Faaola lava ia o le puna o le malosi ma le sulufaiga lea o le a maua ai le faamalologa ma le toe faaleleia. Sa na o le taimi lava na ou liliu atu ai i le Tama Faalelagi ma Iesu Keriso ma le faamoemoe atoa o le loto lea na faamalosia ai au e faatoilalo la’u vaisu. O se gaoioiga i aso taitasi le ofuina o le ofutau atoatoa o le Atua ma faatumu lou olaga i mea e valaaulia ai le Agaga Paia, ae o le faia o lena mea ua aumaia ai ia te au le filemu ma le olioli.

Tuuina Atu o Lenei Avega i le Alii

Ina ua mavae le 13 tausaga o tauivi lo’u toalua ma ponokalafi, sa ou lagonaina le mou atu o lo’u faamoemoe. Sa ou lelava i le tiga, ole le talitonuina. Sa ou lagonaina e lei taliina mai a’u tatalo i le mavae ai o tausaga o le tatalo mo ia ina ia faatoilaloina lenei vaisu ma lo’u loto ina ia faamaloloina. I lenei taimi o le latalata i le leai o se faamoemoe, sa ou tootuli ai i ou tulivae, ma aioi atu i le Alii e fesoasoani mai ia te au e tuu atu ia te Ia. Sa o se taimi faagaeetia faaleagaga lenei mo a’u. Toetoe lava o le taimi lava lena, ina ua uma la’u tatalo, sa ou lagonaina le māmā. Na iu lava ina ou tuuina atu lenei avega i le Alii. Sa faafouina lo’u faamoemoe. O le ki mo a’u e agai ai i luma o le taimi na ou iloa ai e le o sa’u galuega le faaleleia o lo’u toalua pe tauaveina le mamafa o lana vaisu. Sa mafai ona ou taliaina mulimuli ane le mana gafatia o le Togiola a Keriso ma faatagaina o Ia e faamalolo au.

Faamatalaga

1. Tagai, mo se faataitaiga, Jeffrey R. Holland, “Ia Lē Toe Ulu Mai I Lo’u Agaga Lē Ita Mai ia te Au,” Liahona, Me 2010, 44–46; Neil L. Andersen, “Mana o le Perisitua,” Liahona, Nov. 2013, 92–95; Linda S. Reeves, “Puipuiga mai Ponokalafi—o se Aiga e Taulai Atu ia Keriso,” Liahona, Me 2014, 15–17.

2. Tagai, mo se faataitaiga, Brian J. Willoughby ma isi, “Curvilinear Associations between Pornography Use and Relationship Satisfaction, Sexual Satisfaction, and Relationship Stability in the United States,’ Computers in Human Behavior, vol. 125 (Dec. 2021), sciencedirect.com; Samuel L. Perry ma Cyrus Schleifer, “Till Porn Do Us Part? A Longitudinal Examination of Pornography Use and Divorce,” Journal of Sex Research, vol. 55, nu. 3 (Mar./Ape. 2018), 284–96, tandfonline.com.

3. Tagai Dallin H. Oaks, “Faamaloloina Mai le Mailei o Ponokarafi,” Liahona, Oke. 2015, 50–55.

4. O le polokalama o le toe faaleleia o vaisu e lagolagoina e le Ekalesia e mafai ona maua i le addictionrecovery.ChurchofJesusChrist.org. E mafai ona e auai i se vaega i luga o le initoneti pe vaai pe fono se vaega i la outou eria.

5. Tagai, mo se faataitaiga, Joshua J. Perkey, “Alofa ma le Tuinanau,” Liahona, Oke. 2016, 30–35.

6. Dieter F. Uchtdorf, “O le Faamoemoe o le Malamalama o le Atua,” Liahona, Me 2013, 70.

7. Dallin H. Oaks, “Faamaloloina Mai le Mailei o Ponokarafi,” 53.

8. Dieter F. Uchtdorf, “O Le Mana e Lē I’u o le Faamoemoe,” Liahona, Nov. 2008, 22–23.

9. M. Russell Ballard, “Faamoemoe ia Keriso,” Liahona, Me 2021, 54.