O Faamanatu e Lima mo le Faasoaina Atu o le Talalelei

Saunia e Victoria Alliaud

Mekasini a le Ekalesia

O nei manatu e lima e mafai ona fesoasoani ia i tatou e faasoa atu ai le talalelei i auala masani ma faalenatura ma valaaulia ai isi e o mai ia Keriso.

Ata

o se faatulagaga o ata o tagata o loo auauna atu i auala eseese

I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua ia i tatou le tiutetauave ma le faamanuiaga e faasoa atu le talalelei i fanau uma a le Tama Faalelagi. E alofa atoatoa le Tama Faalelagi i Ana fanau taitoatasi ma e finagalo ia mafai e i latou taitoatasi ona maua Ana faamanuiaga uma. O se tasi o auala e mafai ona tatou faaalia ai lo tatou alolofa mo Ia o le “valaaulia o tagata uma ia talia le talalelei, [lea] e aofia ai:

Auai i le galuega faafaifeautalai ma auauna atu o ni faifeautalai.
Fesoasoani i tagata fou ma tagata ua toe foi mai i le Ekalesia ia alualu i luma i luga o le ala o feagaiga.”¹

A o tatou alolofa ma auauna atu i o tatou uso ma tuagane, o le a faatumulia i tatou i se manao e fesoasoani ia i latou ia lagonaina le “olioli tele” lea e sau mai le ola ai i le talalelei a Iesu Keriso (Alema 36:24). O le faasoaina o le talalelei e ono lofituina i nisi taimi, peitai “e lē tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” (1 Nifae 3:7). E mafai ona tatou talitonu o le a Ia fesoasoani mai ia i tatou pe a tatou uai atu i Lana valaau e “fafaga a’u mamoe” (Ioane 21:16–17).

A o tatou taumafai e valaaulia isi e o mai ia Keriso, e mafai ona tatou mafaufau i mataupu faavae nei.

Faasoa Atu le Talalelei o se Vaega o a Tatou Feagaiga

E pei ona a’oa’o mai Peresitene Russell M. Nelson: “O tagata uma ua osia ni feagaiga ma le Atua ua folafola atu e tausia isi ma auauna atu ia i latou o ē manaomia le fesoasoani. E mafai ona tatou faaali atu le faatuatua i le Atua ma saunia i taimi uma e tali atu ia i latou e fesili mai e uiga ‘i le faamoemoe o loo ia te [i tatou]’ [1 Peteru 3:15]. E tofu i tatou ma se matafaioi e fai i le faapotopotoina o Isaraelu.”²

Manatua e lē manaomia ona avea i tatou ma ni faifeautalai faamisiona e faasoa atu le talalelei. Na faamanatu mai ia i tatou e Peresitene M. Russell Ballard, o le Sui Peresitene o le Korama a le Toasefululua, o le “suesueina o le talalelei ma le faasoaina atu i aso taitasi e mafai ona faataunuuina e soo se tasi e i ai pe aunoa foi ma se valaauga aloaia. Faamolemole ia manatua e lē tau manaomia se pine o le igoa e fai ai le galuega faafaifeautalai!”³ Ma sa a’oa’o mai fo’i Elder Neil L. Andersen o le Korama a Aposetolo e Toasefululua, “Afai e le o oe o se faifeautalai faamisiona e i ai se pine faifeautalai e faamau i lou pelaue, o le taimi la lenei e vali ai se pine i lou loto— ia vali e pei ona fai mai Paulo, ‘e le tusia i le vaitusi, a o le Agaga o le Atua soifua’ [2 Korinito 3:3].”⁴

A o tatou saili e faasoa atu le talalelei, ua tatou fesoasoani e faataunuu a tatou feagaiga o le papatisoga, lea e aofia ai le “tutu o ni molimau a le Atua i taimi uma ma i mea uma, ma i nofoaga uma atonu tou te i ai” (Mosaea18:9).

Valaaulia Tagata Uma ia O Mai ia Keriso

“E le faailogaina tagata” e Iesu Keriso (Galuega 10:34). E pei lava ona sa Ia valaaulia le taulealea mauoa i aso ua leva, ua Ia valaaulia tagata uma ia “sau, mulimuli mai ia te au” (Luka 18:22). E mafai foi ona tatou faia lea lava mea e tasi—valaaulia soo se tasi ma tagata uma e mulimuli ia Keriso e aunoa ma le faamasinoina po o ai tatou te manatu o le a taliaina pe lē taliaina foi le valaaulia. O Ia o le tali o loo sailia e le toatele o tagata.

E pei ona a’oa’o mai Peresitene Russell M. Nelson: “O Lana talalelei e na o le pau lea o le tali i taimi ua toatele tagata i le lalolagi ua faateia i le fefe. Ua faamamafaina e lenei mea le manaoga faananati mo i tatou ia mulimuli i le faatonuga a le Alii i Ona soo ia “o atu ia … i le lalolagi uma , ma talai atu le talalelei i tagata uma ’ [Mareko 16:15; faaopoopo le faamamafa]. Ua ia i tatou le tiutetauave paia e faasoa atu le mana ma le filemu o Iesu Keriso i tagata uma o le a faalogo ma ē o le a faamuamua le Atua i o latou olaga.”⁵

O i latou tatou te faasoa atu i ai le talalelei e mafai pe lē mafai fo’i ona taliaina a tatou valaaulia po o molimau. Ae e lē iloa ai e lena mea lo tatou manuia. Tatou te faia le galuega a le Atua i le faasoaina atu.

Faatuatua i le Agaga Paia e Molimau Atu

O le faasoaina atu o o tatou talitonuga sili ona pele ma paia e mafai ona taufaafefe i nisi taimi. Ae ua folafola mai e le Alii o le a Ia taialaina i tatou ma fesoasoani ia i tatou e fesootai atu i se ala o le a aumaia ai le Agaga. E mafai ona tatou faatuatuaina le Agaga Paia e taiala a tatou upu pe a tatala o tatou gutu e faasoa atu. O la tatou matafaioi o le faasoa atu, ma o le matafaioi a le Agaga Paia le molimau atu ia Iesu Keriso.

E pei ona a’oa’o mai i le Mataupu Faavae ma Feagaiga 100:5–8: “O lea, e moni Ou te fai atu ia te oulua, ia siitia aʼe o oulua leo i lenei nuu; tautala atu mafaufauga o le a Ou tuu i o oulua loto, ma o le a lē faafememeaiina oulua i luma o tagata;

“Aua o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai.

“Ae Ou te tuu atu ia te oulua se poloaiga, ia oulua alaga atu soo se mea lua te alaga atu i lo’u igoa, i le mamalu o le loto, i le agaga o le agamalu, i mea uma.

“Ma Ou te tuu atu ia te oulua le folafolaga lenei, o le tulaga e oo i ai le lua faia o lenei mea, o le a liligi atu le Agaga Paia e molimau i mea uma o soo se mea lua te fai atu ai.”

Manatua le mea na aoao mai e Elder Dieter F. Uchtdorf o le Korama a Aposetolo e Toasefululua:

“Faatuatua i le Alii e faia Ana vavega. Ia e malamalama e lē o sau galuega le faaliliu o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou loto ma ola e tusa ai ma ou talitonuga.

“O lea, aua ne’i e lotovaivai pe afai e lē taliaina vave e se tasi le savali o le talalelei. E le o se toilalo patino.

“O le mea lena e i le va o le tagata ma le Tama Faalelagi.

“Ae o oe, ia alofa i le Atua ma ou tuaoi, o Ana fanau.

“Talitonu, alofa, fai.”⁶

Ia Fai o se Tulaga ua Masani ai le Talanoaina o le Talalelei

O le faasoaina atu o le talalelei e lē faapea e tatau ona lavelave. E mafai ona tatou, e pei ona uunaia e Elder Uchtdorf, “valaaulia tagata—i auala masani ma faalenatura—ia o mai ma vaai, o mai ma fesoasoani, ma o mai ma auai.”⁷ E mafai ona tatou maua auala e faaaoga ai le talalelei a o tatou talanoa e uiga i mea tatou te fiafia i ai, o mea tatou te fiafia e fai, o tatou tauiviga, ma faamanuiaga tatou te oo i ai e ala i le matafaioi a Iesu Keriso i o tatou lava olaga.

Na fautua mai Peresitene Ballard: “Aua e te fefe e faasoa atu i isi lau tala, lou aafiaga o se soo o le Alii o Iesu Keriso. E tofu uma lava tatou ma tala matagofie na faatosina ai lo tatou faasinomaga. O le faasoa atu o na tala o se ala e le taufaamata‘u e talanoa ai i isi. E mafai foi ona e fesoasoani e faatoilalo le tele o vaaiga sese e uiga i le Ekalesia e ala i lau lio o faatosinaga.”⁸.

Afai e te lē lagonaina le mautinoa i ou gafatia e faasoa atu ai le talalelei, ia manatua le fautuaga lenei mai ia Elder Uchtdorf:

“E lē o manaomia lava e le Alii ni taumafaiga faafaifeautalai tomai faapitoa ma atoatoa. Ae, ‘e manaomia e le Alii le loto ma le mafaufau malie’ [Mataupu Faavae ma Feagaiga 64:34]. …

“O le mea e taua ia e lē faavaivai; ia taumafai pea ia faia ia sa’o. O le a i’u lava ina e lelei atili, fiafia atili ma sili ona faamaoni. O le talanoa faatasi ma isi e uiga i lou faatuatuaga o le a oo ina avea o se mea masani ma natura. O le mea moni, o le talalelei o le a avea ma se vaega taua, ma faapelepele o o outou olaga lea o le a lagona ai o se mea e lē masani ai le lē talanoa i isi e uiga i le talalelei. Atonu e lē tupu lena mea i se taimi vave—o se taumafaiga i le olaga atoa. Ae o le a tupu lava.”⁹

Ola i le Talalelei e Faasoa Atu ai le Talalelei

Pe ua e faalogo i le fasifuaitau “e leotele atu amioga nai lo upu”? Na aoao mai Elder Gary E. Stevenson o le Korama a Aposetolo e Toasefululua e faapea “soo se taimi lava tatou te faaali atu ai le alofa faa-Keriso i o tatou tuaoi, tatou te talai atu le talalelei—e tusa lava pe tatou te lē faaleoina se upu se tasi.”¹⁰

Na tuuina mai foi e Elder Stevenson se faataitaiga faigofie mo le faasoaina atu o le talalelei: “O le poloaiga sili a le Faaola e mafai ona ausia e ala i mataupu faavae faigofie ma malamalama gofie ua aoaoina ia i tatou taitoatasi mai le olaga faatamaitiiti: alofa, faasoa, ma valaaulia.”¹¹

E mafai foi ona tatou mulimuli i le fautuaga a Peresitene Nelson ia “pulea [a tatou] molimau.”¹² Ma e pei ona aoao mai Elder Quentin L. Cook o le Korama a Aposetolo e Toasefululua, o le liua o se vaega taua foi o le ola ai i le talalelei e ala i faataitaiga: “Mo le poloaiga a le Faaola e faasoa atu le talalelei ia avea ma se vaega o le tagata ua avea ai i tatou, e manaomia ona tatou liua i le finagalo o le Atua; e manaomia ona tatou alolofa i o tatou tuaoi, faasoa atu le talalelei toefuataiina a Iesu Keriso, ma valaaulia tagata uma ia o mai ma vaai.”¹³

A o tatou saili e “tautalatala e uiga ia Keriso, … olioli ia Keriso, … talai atu e uiga ia Keriso, [ma] vavalo e uiga ia Keriso” (2 Nifae 25:26), e mafai ona tatou faatuatuaina o Ia e fesoasoani ia i tatou. E mafai foi ona tatou maua le malosi i lenei folafolaga mai ia Elder Stevenson: “Ou te valaaulia outou e mafaufau i auala e mafai ona e alofa ai, faasoa atu, ma valaaulia. A o e faia, o le a e lagonaina se fuataga o le olioli i le iloa o loo e uai atu i upu a lo tatou Faaola pele.”¹⁴