O Upu Faatusa a Paulo e uiga i le Faaolataga i o Latou Anotusi Anamua

Saunia e Jason R. Combs

Polofesa Fesoasoani o Tusitusiga Paia Anamua, Iunivesite a Polika Iaga

I lana Tusi i Roma, sa faaaoga ai e le Aposetolo o Paulo ia manatu faavae e masani ai tagata o lona taimi e fesoasoani ai ia latou malamalama i le galuega o le faaolataga a Iesu Keriso.

E faapefea e se tasi ona faamatala i upu mea uma na faia e Iesu Keriso mo i tatou? Mo Paulo, o le tali o le faaaoga lea o manatu faavae sa masani ai i lona taimi ma e mafai ona faatatau ia Iesu Keriso—manatu faavae e pei o le tauamiotonuina, alofa tunoa, ma le faamalieina/togiola.

E ui atonu o nisi taimi e lē malamalama ai nei manatu faavae taitasi i aso nei, ae i le Roma 3:24–25, sa faaaoga e Paulo ni upu faatusa e faamatala ai le faaolataga i faaupuga atonu e sili atu ona malamalama i ai soo o Keriso i lena taimi. O le mea lea, o le iloa atili e uiga i uluai matālālaga o nei upu e mafai ona fesoasoani tatou te malamalama atili ai i aoaoga a Paulo e uiga i lo tatou faaolataga ia Iesu Keriso.

Tauamiotonuina

O le upu tauamiotonuina sa faaaoga i le Feagaiga Tuai e aoao ai Isaraelu e uiga i la latou sootaga ma le Atua.¹ O le manatu e sau mai se matālālaga faaletulafono. Mo se faataitaiga, i le Teuteronome 16:18–20, ua poloaiina Isaraelu e tofi ni faamasino e tuu atu ni faaiuga “amiotonu” ma tulitulimatagauina le mea e “tonu atoa” (i le uluai gagana Eperu e faitauina, tuliloa le “faamasinotonu, faamasinotonu,” e toe fai faalua le upu faamasinotonu mo le faamamafa). O le upuamiotonu ma le faamasinotonu e omai mai aa lava e tasi o le faa-Eperu ma le faa-Eleni o le tauamiotonuina.

Sa faaaoga e perofeta le faatusa o se faamasinoga faaloia, faatasi ai ma le Atua o se faamasino, e lapataia ai Isaraelu ma ona atunuu tuaoi (tagai Isaia 3:13–14; 41:1–9, 21–24; Mika 6:1–5). I le Isaia 43:9, o loo valaauina ai e le Atua ia atunuu ia tutu atu i Ona luma e peiseai o i ai i le faamasinoga: “Ia potopoto tagata: … ia tuu atu ia te i latou e aumai a latou molimau, ina ia tauamiotonuina i latou.”² Ina ia tauamiotonuina (tautino atu le amiotonu po o le faamagaloina) o le faamoemoe lea o soo se tasi e aumaia i le faamasinoga.

Ae sa popole nisi o tusitala o le Feagaiga Tuai e faapea i le “faamasinotonu,” a le Atua po o Lana “amiotonu” (o faaliliuga uma o le upu lava e tasi i le gagana Eperu ma le faa-Eleni), o le a tausalaina ai tagata. Ua faailoa mai e le fai salamo, “Aua e leai se tagata ola e amiotonu i ou luma” (Salamo 143:2). O loo faasino Paulo i lenei salamo i le Roma 3:20: “E le ta’uamiotonu se tagata e toatasi i ona [Atua] luma i galuega o le tulafono [a Mose].” Ona tuuina atu lea e Paulo o le fofo. O le Atua, lo tatou Faamasino sili faalelagi, ua filifili e ta’utino i tatou e amiotonu (po o le amiotonu) ona o Keriso: ua “ta’uamiotonuina fua i lona alofa tunoa e ala i le togiola e a Keriso Iesu” (Roma 3:24).

O le asō, pe a tatou faalogo i upu faamasino, faamasinotonu po o le faamasinoga, e iu ina tatou lē manatunatu i faiga faaletulafono a Iutaia po o Roma anamua ae na o faiga faaletulafono i o tatou lava atunuu. Mo se faataitaiga, na aoao mai Peresitene Dallin H. Oaks, Fesoasoani Muamua i le Au Peresitene Sili: “I le olaga nei ua tatou usiusitai i tulafono a tagata ma tulafono a le Atua. Sa ou oo i le aafiaga e lē masani ai o le faamasinoina o amioga matuiā i lalo uma o nei tulafono e lua—i le amataga a o avea ma se faamasino o le Faamasinoga Maualuga i Iuta ma i le taimi nei o se uso o le Au Peresitene Sili. O le eseesega na ou lagonaina i le va o tulafono a tagata ma tulafono a le Atua ua faalauteleina ai lo’u talisapaia o le moni ma le mana o le Togiola a Iesu Keriso. I lalo o tulafono a tagata, o se tagata ua ta’usalaina i solitulafono sili ona matuiā e mafai ona falepuipui i le olaga atoa e aunoa ma se avanoa e palola ai. Ae e ese i lalo o le fuafuaga o le alofa mutimutivale a se Tama Faalelagi alofa. Ua ou molimauina o nei agasala mamafa lava e tasi e mafai ona faamagaloina i le olaga nei ona o le taulaga togiola a lo tatou Faaola mo agasala a “i latou uma o e ua i ai le loto momomo ma le agaga salamo” (2 Nifae 2:7). E togiola e Keriso, ma e moni Lana Togiola.”³

Alofa tunoa

O lealofa tunoa o le isi faaupuga lea na faaaogaina e Paulo e faamatala ai le galuega faaola a Iesu Keriso. O le upu alofa tunoa sa lē o se faaupuga faalelotu muamua. I le taimi o Paulo, o le alofa tunoa (i le faa-Eleni, charis) sa masani ona faaaoga e faamatala ai le sootaga i le va o se tagata e tuuina atu le lagolago ma se tagata o loo tausia. Sa i ai i se tagata e tuuina atu le lagolago le mana, pule, po o mea tautupe e tuuina atu ai se meaalofa i tagata o loo tausia e lē mafai ona latou mauaina mo i latou lava pe toe totogi atu i se foai alofa. Sa lagona e tagata o loo tausia le matafaioi e faamamalu lo latou tagata o loo tuuina atu le lagolago e ala i le faaalia faalauaitele o lo latou lotofaafetai ma le faamaoni.

Mo se faataitaiga, i le TA 90 na auina atu ai e le aai o Aphrodisias se aumalaga i Efeso e faatu se faatagata e faamamalu ai taitai Roma. O le upuvane i luga o lena faatagata e faitauina faapea: “O Tagata o Aphrodisias, e faamaoni ia Kaisa, ua saoloto ma tutoatasi mai le amataga e ala i le alofa tunoa o le au Augusti, na faatuina [lenei faatagata] e ala i se [faatinoga o le] alofa tunoa.”⁴ O lenei upuvane ua faaaoga ai le alofa tunoa i ni auala se lua: muamua e faamatala ai le meaalofa o le au Augusti—e faapea o le aai o Aphrodisias o le a saoloto ma tuto’atasi—ma lona lua e faamatala ai le meaalofa laitiiti o se faatagata e folafola atu ai le faamaoni o tagata ma faaalia ai lo latou lotofaafetai.

I le tusi a Roma, o loo faamanino mai ai e Paulo po o fea o nei ituaiga o alofa tunoa e lua o loo ia faamatalaina: “Ua ta’uamiotonuina fua i lona alofa tunoa” (Roma 3:24; ua faaopoopo le faamamafa). Sa faamamafa mai e Paulo o le meaalofa lenei a le Atua i le avea ai ma o tatou tagata e tuuina mai le lagolago e lē mafai ona tatou toe totogia ma e tatau ona taliaina faatasi ma faalauiloaga faalauaitele o lo tatou lotofaafetai ma le faamaoni.

Faafetai ia Paulo ma tusitusiga a isi perofeta ma tusitala anamua ma aso nei, ua tatou malamalama atili ai i nei aso i le “alofa tunoa” o le galuega faaola a Iesu.

I lana faaliliuga musuia o le Roma 3:24, sa faamamafa mai ai e Iosefa Samita o loo tatou faalagolago atoa atu i le Faaola: “Ua ta’uamiotonuina e ala i lona alofa tunoa ” (i le Roma 3:24, vaefaamatalaga a; faaopoopo le faamamafa).

Na aoao mai Elder Dieter F. Uchtdorf o le Korama a Aposetolo e Toasefululua:

“O le taulaga a le Faaola ua matala ai le faitotoa o le faaolataga mo tagata uma ia toe foi atu ai i le Atua. … O Lona alofa tunoa o le mana gafatia lea e mafai ai ona ulufale atu i malo o le faaolataga a le Atua. …

“Ae o le alofa tunoa o le Faaola e mafai ona faia le tele o mea mo i tatou. I le avea ai ma tagata o Le Ekalesia a Iesu Keriso o le Au Paia o Aso e Gata Ai, ua tatou mananao ai i se mea e lē mafaamatalaina lona maoae atu. O le faaeaga lea i le malo selesitila. …

“… Ou te tatalo o le a faapea ona tatou “… faatagaina le alofa tunoa o Keriso e siitia ma tauave i tatou i le taimi o la tatou malaga mai le mea ua tatou i ai nei i lo tatou taunuuga mamalu i le afioaga o lo tatou Tama.”⁵

Faamalieina/Togiola

O loo faaauau pea ona faamatala e Paulo le galuega faaola a Keriso i le upu faatusa mulimuli e tasi:

“Ua tuuina mai i luma e le Atua [Keriso Iesu] o le e finagalo malie ai i le faatuatua i lona toto” (Roma 3:25).

O le upu ua faaliliuina o le “faamalieina” e mafai foi ona faaliliuina o le “togiola” po o le “nofoa o le alofa mutimutivale.” I le taimi o Paulo, ina ua faalogo le toatele o Iutaia i le upu togiola, o le a latou mafaufau muamua lava i le galuega a faitaulaga i le malumalu.

Mo se faataitaiga, i le Levitiko 16 o loo faamatala mai ai le ala e sausauina ai e le faitaulaga sili, i le Aso o le Togiola, le toto o le taulaga i manu “i luga o le nofoa o le alofa” e “fai ai le togiola” (Levitiko 16:15–16). Ua faaaoga e Paulo le upu togiola e faatusatusa ai le galuega faaola a Iesu Keriso i se mea na masani ai lana aufaitau: o le galuega a faitaulaga i le malumalu e aveese ai agasala a tagata ma faalelei ai ma le Atua. Peitai, ua faamanino mai e Paulo e lē o le toto o manu e faasaoina ai ae o le “finagalo malie ai i le faatuatua i le toto o [Keriso]” (Roma 3:25).

I totonu o fuaiupu pupuu e lua (Roma 3:24–25), ua valaaulia ai i tatou e Paulo e mafaufau (1) Ua tauamiotonuina i tatou e le Atua i se faamasinoga faaloia ona o lo tatou togiolaina ia Iesu Keriso, (2) Ua avea le Atua ma o tatou tagata e fesoasoani ona o Lana meaalofa o le alofa tunoa, lea e tatau ona tatou usiusitai ai ia te Ia ma faafetai faalauaitele atu ia te Ia, ma (3) o le Atua o loo galue o se ositaulaga, ua faapaiaina ai i tatou e ala i lo tatou faatuatua i le toto togiola o Keriso.

Pe a faatatau i o tatou olaga ma tapuaiga o ni tagata O Le Ekalesia a Iesu Keriso o le Au Paia o Aso e Gata Ai i aso nei, o nei ata taitasi e mafai ona fesoasoani ia i tatou e vaai ai i le mana o le taulaga togiola a lo tatou Faaola ma le alofa ua Ia faaali mai ma lo tatou Tama Faalelagi ia i tatou e ala i le ofoina mai ia i tatou o se meaalofa ofoofogia.