“Ua Ia te Oe le Malumalu,” Liahona, Aok. 2023.
O Leo o le Au Paia o Aso e Gata Ai
Ua Ia te Oe le Malumalu
Ou te faafetai ona ou te maua i taimi uma le malosi mai le auauna atu i le malumalu o le Alii.
Atatusi o le Malumalu o Tokyo Iapani na saunia e Alan Klay
Sa ou iloaina le talalelei mai faifeautalai faamisiona ma sa papatisoina i le 17 o ou tausaga i le 1972. I le tolu tausaga mulimuli ane, i le avea ai ma se ta okeni, sa ou i ai i le malae o Budokan i Tokyo ina ua faasilasila mai e Peresitene Spencer W. Kimball (1895–1985) le fausiaina o le Malumalu o Tokyo Iapani.
Ina ua uma ona faapaiaina le malumalu i le 1980, sa ou tausavali mai Sendai i le malumalu i masina taitasi. Ou te tuua le galuega i afiafi o aso Faraile ina ia ou auai i le malumalu i le aso e sosoo ai. Sa faateleina le malosi o lo’u manao e auai i le malumalu, o lea sa ou siitia atu ai i Tokyo i le 1981.
E lei umi lava ona ou faaipoipo, ae valaauina lo’u toalua, o Osamu, e avea ma peresitene o le siteki. Sa ia auauna atu ma le filiga ma sa aofia ai i le fausiaina o le vaega faaopoopo o le malumalu. Faatasi ai ma lana fesoasoani ma le fesoasoani a le ma fanau, ma faatasi ai ma le taitaiga a le Alii, sa auai o’u matua i le Ekalesia i le 20 tausaga talu ona uma lo’u papatisoga.
Nobuko ma Osamu Maeda i le 1996.
Ata pu’e mai faaaloaloga a le tusitala
Ina ua mavae lo laua liliu mai, sa faia so’u taotoga mo le kanesa i lo’u auvae pito i luga. I le aso o lo’u taotoga, o le peresitene o le malumalu, lea sa ou auauna atu ai o se ta okeni ma se tagata faigaluega i sauniga, sa anapopogi ma tatalo mo a’u. Ina ua mae’a lo’u taotoga, sa faigata ia te a’u ona ou tautala, ’ai, pese, ma faia isi mea masani.
“Afai e le mafai ona e tautala,” na saunoa mai ai le peresitene o le malumalu ia te a’u, “e mafai lava ona avea pea oe ma ta okeni!”
O lena saunoaga na u’unaia ai a’u e toe faaauau la’u auaunaga ina ua ou malosi. A o ou taina le okeni i le falesa o le malumalu, sa faatumulia au i le Agaga o le Alii ma lagonaina le faamalosiaina faaleagaga ma le faaletino. Sa masani ona ou faafetai ma tatalo le leoa i upu o viiga.
I le sefulu tausaga talu ona uma lo’u ta’otoga, sa maua foi lo’u toalua i le kanesa. Sa le’i umi ae alu ma toe sau o ia mai le falemai. A o lei maliu o ia, sa ia tu’ua a’u ma upu nei: “Ua ia te oe le malumalu, o le a e le afaina.”
O loo i ai pea le malumalu i le totonugalemu o faaiuga taua uma sa ou faia i lo’u olaga o le faatuatua. A o o’u taina le okeni i le falesa o le malumalu i aso uma, ua ou malamalama atili ai i le fuafuaga o le togiola a le Alii—aemaise lava ina ua uma ona valaauina lo’u toalua i talaatu o le veli.
Ou te faafetai ona ou te maua i taimi uma le malosi mai le auauna atu i le malumalu o le Alii. I totonu o le malumalu e taialaina ma faamalosiaina i tatou e onosaia puapuaga ma faigata o lenei olaga.