Ua Na’o Tusiga Faaeletonika: Autalavou Matutua
Ou te Le’i Lagonaina le Fia Alu i le Malumalu. Ae sa Ou Lagonaina le Tele o Faamanuiaga mai le Alu Pea
E mafai ona tatou maua le mafanafana i le Alii pe a tatou auai i le malumalu ma auai i le galuega sili a le Atua mo Ana fanau.
Na ou iloaina sa manaomia ona ou alu i le malumalu. Sa lē mamao tele le mea na ou nofo ai mai le malumalu aupito lata ane, ae ou te lei toe alu i ai mo ni masina.
I se tasi po, sa ou faitau ai i le saunoaga a Elder Neil L. Andersen mai le konafesi aoao ia Oketopa 2022. O se fuaiupu na taula’i i ai la’u faitau: “A o tatou ulu atu i le malumalu, e faasa’olotoina i tatou mo se taimi mai tosinaga faalelalolagi e fetuleni faasaga mai ia i tatou a o tatou aoao ai i lo tatou faamoemoega o le olaga ma meaalofa e faavavau ua ofoina mai mo i tatou e ala mai i lo tatou Faaola, o Iesu Keriso.”1
Sa ou manao ia lagona le saoloto mai le lalolagi. I le taia ai i se naunautaiga malosi, sa ou faatulagaina ai se taimi e fai ai sauniga amata sui.
I le aso o le taimi faatulagaina, sa ou sau ai i le fale mai le galuega ma le lagona o le vaivai ma le lē fiafia e aunoa ma se mafuaaga. Sa leai so’u lagona e fia alu i le malumalu.
Ae sa ou manatuaina lo’u manaoga i le taimi ua tuanai, e tusa lava pe ou te lei lagonaina i lena taimi. Sa ou toe alu atu i fafo i la’u taavale ma amata ona aveina le taavale.
O le luasefulu minute mulimuli ane, na ou vaaia ai le malumalu.
Sa maligi o’u loimata. I lena taimi, sa toe foi mai ai lo’u manao. O le malumalu o le nofoaga lea sa manaomia ona ou i ai i lena po. Sa tatau ona taofiofi ou loimata ina ia lē galo ai ia te au le auala.
O le malumalu o se nofoaga o le sulufaiga mai faatosinaga faalelalolagi ma tauiviga i o tatou olaga. Ua talosagaina i tatou e Russell M. Nelson e “fausia se mamanu o le auai e lē aunoa i le malumalu.”2 A tatou faia, o le a tatou olioli i faamanuiaga o le toe foi mai pea lava pea i le maota o le Alii.
O nisi nei o faamanuiaga na ou matauina mai le auai atu i le malumalu i lena aso:
Lagonaina o le Mafanafana
Ina ua ou auai i le malumalu i lena aso, sa aveesea lou lagona lē lelei. Sa suia e “le manuia foi mai le Atua, o loo silisili lava i mea uma e manatu i ai” (Filipi 4:7).
O le filemu tatou te maua i le malumalu e sau sa’o mai le Atua. E mafai ona tatou fesootai atu i le Atua i soo se mea e ala i Lona Agaga, ae ua tulaga ese le malumalu mo i tatou e fesootai sa’o ai ma le Alii.
Na aoao mai Peresitene Nelson: “[O le malumalu] o Lona maota. E faatumulia i Lona mana. … Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e lē mafai e se isi lava mea ona faia.”3 O le auai i le malumalu e mafai ai ona tatou lagonaina le mana o le Atua. O lena mana e mafai ona oo mai o se faaaliga, o se manino o le mafaufau, po o se lagona o le mafanafana.
Lagonaina o le Malosi mai A’u Feagaiga
E lē gata i le lagonaina o le filemu, sa ou manatuaina foi feagaiga na ou osia muamua. A o o’u galue o se sui i le sauniga amata, sa ou taulai atu i upu o le sauniga. O na upu na faamanatu mai ai ia te a’u o le a tuuina mai e le Atua ia te au le malosi ma o le a fesoasoani ia te au e tumau ai i o’u tofotofoga.
Pe a tatou toe foi atu i le malumalu, tatou te manatua folafolaga tatou te faia i le Atua ma folafolaga e faavavau na Ia faia ia i tatou.
Na aoao mai Elder David A. Bednar o le Korama a Aposetolo e Toasefululua: “Tatou te lē fauina pe ulu atu i malumalu paia ina ia maua ai se aafiaga lē mafaagaloina faaletagata po o le aiga. Ae, o feagaiga e mauaina ma sauniga e faatinoina i totonu o malumalu e taua i le faapaiaina o o tatou loto ma mo le faaeaga mulimuli o atalii ma ni afafine o le Atua.”4
Auai i le Galuega a le Atua
E ui tatou te maua faamanuiaga patino i totonu o le malumalu, e tatau foi ona tatou manatua le galuega tatou te faia mo e ua maliliu. Pe a tatou faia sauniga sui, e mo le faaolataga o i latou e i tua atu o le veli.
O igoa o tagata na ou fesoasoani i ai na tuuina mai ia te au e le malumalu. Ou te lei iloa se tasi o tamaitai sa ou tu ai e fai ma sui mo lena aso. Ae sa ou lagonaina le mana paia na tuuina atu ia i latou e ala i le sauniga amata.
O lo tatou auai atu i le malumalu e fesoasoani e faalautele ai le fuafuaga a le Atua mo Ana fanau. I la tatou lava ala itiiti, o loo tatou auai i le galuega “ia aumaia le tino ola pea ma le ola faavavau o le tagata” (Mose 1:39). Na aoao mai Elder Bednar, “A o tatou auai ma le naunautai i lenei galuega paia, ua tatou usitai i poloaiga ia alolofa atu ma auauna atu i le Atua ma o tatou tuaoi [tagai i le Mataio 22:34–40].”5
Faatauvaa ae Mamana
Mo i tatou o e nonofo latalata i se malumalu, atonu e faigofie ona galo ia faamanuiaga e maua mai le auai atu i le malumalu. E pei ona folafola mai e Peresitene Russell M. Nelson, “O le faateleina o le taimi i totonu o le malumalu o le a faamanuiaina ai lou olaga i auala e leai se isi lava mea e mafai ona faia.”6 Mo i latou o e nonofo mamao mai se malumalu, atonu e faigata ona ofi asiasiga i le malumalu i a tatou taimi faatulagaina. Ae o le mana o le auai i le malumalu e faifai pea, ma e moni faamanuiaga.
A o tatou faaaluina le tele o le taimi i le malumalu, e mafai ona tatou maua le malologa mai o tatou luitau ma o tatou tiga. E mafai ona tatou fesootai ma le Atua ma avea o se vaega o Lana galuega tele—mo o tatou lava agaga ma agaga o Ana fanau uma.