Savali Faaleautaitai i le Eria
O Lo Tatou Gafatia Paia
O loo i ai se faataitaiga iloga e masani ona ta’ua i tusi1 faaosofia lea na iloa ai e saienitisi e mafai ona latou aoaoina filī [fleas] e aua le oso. Sa latou tuuina filī i totonu o se fagu tioata ma se tapuni. O le taimi muamua lava sa taumafai filī e oso i fafo o le fagu ae o taimi luma lava latou te oso ai, e tau o latou ulu i le tapuni, ma mafua ai ona latou le fiafia ma tiga. Ina ia aloese mai lenei mea, sa amata ona fetuutuunai e filī lo latou oso i se tulaga i lalo tonu ifo lava o le pito i luga o le fagu. Na iloa e saienitisi afai latou te tuuina filī i le fagu mo ni nai aso, o le a avea lea fetuutuunai ma se mea tumau—o le a le maualuga atu le oso o filī nai lo le tulaga o le fagu, e tusa lava pe aveese le tapuni. O le mea e malie ai o le a faia foi e a latou tama le mea lava e tasi, e tusa lava pe latou te maua le gafatia e oso maualuga ai.
Pe o tatou pei ea o filī i nisi o taimi lea ua uma ona faatulagaina i le siosiomaga o loo siomia ai i tatou? Pe ua tatou malamalama moni ea po o ai i tatou ma le gafatia ua tatou maua e avea ai faapei o lo tatou Tama Faalelagi? E pei ona aoao mai Peresitene Russell M. Nelson: “O le lu’i mo oe ma a’u ia mautinoa o le a ausia e i tatou taitoatasi lona lava gafatia paia. O aso nei ua tele ina tatou faalogo e uiga i ‘se taeao fou.’ Afai e te mana’o moni lava e opogi se taeao fou, ou te valaaulia oe ia faateleina le liliu atu o lou loto, mafaufau, ma le agaga i lo tatou Tama Faalelagi ma Lona Alo, o Iesu Keriso. Ia avea lena mea ma ou taeao fou.”2
E faapei o filī e mafai foi ona tatou fetuutuunaia a tatou masani i se auala sili atu ona maualuga ma paia. Na aoao mai Elder Peter M. Johnson: “O outou o atalii ma afafine filifilia o le Atua. O loo ia te outou le mana e faatoilalo ai le fili. Peitai, ua iloa e le fili po o ai outou. Na te iloa lou tupuga faalelagi ma e saili ina ia faamuta lou gafatia faalelalolagi ma faalelagi e ala i le faaaogaina o le . . . faasese, faalavefau ma le faalotovaivai.”3
Ae peitai o le tala fiafia e silafia foi e lo tatou Tama Faalelagi po o ai i tatou ma o loo i ai i auiliiliga o o tatou o laga. O i tatou o Ana fanau ma o Lona faamoemoega paia ia “aumaia [lo tatou] tino ola pea ma ola faavavau.”4 Ona ua Ia silafia ma alofa ia i tatou, na Ia auina mai ai Lona Alo e Toatasi na Fanaua e maliu mo i tatou ina ia ala i Lona alofa mutimutivale ma le alofa tunoa, o le a tatou toetutu uma ai ma maua le avanoa mo le ola faavavau faatasi ma le Atua.
A o tatou aai ma feinu i le faamanatuga i vaiaso taitasi, ua faamanatu mai ai ia i tatou lo tatou gafatia paia lea e mafai ona maua e ala i le taulaga a lo tatou Faaola ma le Togiola, o Iesu Keriso. A o tatou ‘aai i le areto tatou te manatua Lona tino, mafatiaga faaletino, maliu, ma le toetu. Na Ia faatoilaloina le oti faaletino ma faamanuiaina i tatou uma i le meaalofa o le ola faavavau. A o tatou fetagofi atu i le vai (po o le uaina) tatou te manatua Lona toto na faamaligiina mo i tatou e le gata i luga o le satauro ae i le Faatoaga o Ketesemane. O iina, sa Ia mafatia ai i tiga matuitui faaleagaga ma mafatia a o Ia ave i Ona luga ia agasala, faanoanoaga ma tiga o tagata uma. E ala i Lana Togiola e le iu ua mafai ai ona tatou maua se faamagaloga o agasala a o tatou faatinoina le faatuatua e salamo ai ma osia ma tausia feagaiga paia.
O le avea ma soo e aumaia ai suiga i o tatou olaga a o tatou “o mai ia Keriso, ma [ua] faaatoatoaina ia te ia.”5 Ae peitai, ia manatua, “o le fiaatoatoa e le tutusa ma le faaatoatoaina ia Keriso. . . .
“O le faaatoatoaina ia Keriso o…le faagasologa…o le avea atili e faapei o le Faaola. O tulaga faatonuina ua faatulagaina e se Tama Faalelagi agalelei ma silafia mea uma ma ua faamanino mai i feagaiga ua valaaulia i tatou e talia. E aveesea ai i tatou mai avega o le tausalaina ma le le atoatoa, ma faamamafaina ai pea po o ai i tatou i le silafaga a le Atua. E ui o lenei faagasologa e siitia i tatou ma uunaia i tatou ia lelei atili, ae ua fuaina i tatou i lo tatou tuuto patino atu i le Atua lea tatou te faaalia i a tatou taumafaiga e mulimuli ia te Ia i le faatuatua. A o tatou taliaina le valaaulia a le Faaola e o mai ia te Ia, e le pine ae tatou iloa o lo tatou lelei silisili ua lava lea ma o le alofa tunoa o se Faaola alofa o le a faia ai se eseesega i auala e le mafai ona tatou mafaufauina.”6
A o tatou latalata atu i lenei vaitau o le Kerisimasi, ua tatou aufaatasi ma Kerisiano i le lalolagi atoa i le manatuaina o le soifua mai o le Alo moni o le Atua, le Alo e Toatasi na Fanaua e le Tama. O tulaga o Lona soifua sa le’i matagofie pe tulaga ese, ae sa olioli le lagi, ma pepese aufaipese a agelu. O le amataga lea o le olaga atoatoa lea o le a faaiuina i lena taulaga maoae ma mulimuli, lea e le iu ma faavavau, e mafai ai e tatou taitoatasi ona ausia lo tatou gafatia paia.
“Ma o le a faapea ona aumai e ia le faaolataga ia i latou uma o e e talitonu i lona suafa; ona o le faamoemoe lea o lenei taulaga mulimuli, e aumai ai le liuliualo o le alofa mutimutivale, ia ua faatoilalo le faamasinotonu, ma aumai ai auala i tagata e mafai ai ona latou maua le faatuatua e salamo ai..
Ma faapea ona mafai ai e le alofa mutimutivale ona faamalie manaoga o le faamasinotonu, ma siosiomia ai i latou i lima o le saogalemu, a’o le na te le faatino se faatuatua e salamo ai, ua aliali atu i le tulafono atoa o manaoga o le faamasinotonu; o lea ua na o le ua i ai le faatuatua e salamo ai, ua aumai ai le fuafuaga tele ma faavavau o le togiolaina..”7
I upu a C.S. Lewis: “O se mea matautia le ola i se sosaiete o atua ma atua fafine . . . E leai ni tagata masani. E te le’i talanoa lava i se tagata ola.”8
O i tatou taitoatasi o ni tagata ola pea ma gafatia e le faatapulaaina e avea ai faapei o lo tatou Tama o i le Lagi. O lea, ia tatou fusia faatasi ai ma le olioli i tatou lava i le Faaola o Iesu Keriso ao tatou tausia ma osia feagaiga paia. E ala atu ia te Ia e mafai ai ona tatou faatoilaloina lenei lalolagi ma ausia moni ai lo tatou gafatia paia.