40 Tagata o le Au Paia—40 Faamanuiaga—E Leai ni Mea e Tutupu Faafuase’i!

Saunia e Tessa Dewsbury

O le fuainumera 40 sa taua faafaatusa i tagata Eperu anamua. I tusitusiga paia e faa 146 ona ta’ua ma e mafai ona fai ma sui ‘o se vaitaimi umi’. Mo se faataitaiga, na ola Mose mo le 40 tausaga i Aikupito, ona sosoo ai lea ma le 40 tausaga i le vao ina ua ia taitaia lona nuu mai le nofopologa. Na anapogi le Faaola mo le 40 aso ina ua uma ona faaosoosoina e le tiapolo, ma isi. Mo le Au Paia i le Atu Kuki, e toatele na faatalitali mo se taimi umi lava ina ia maua a latou faamanuiaga faapeteriaka—ma ia Aperila 2023, e 40 tagata o le ekalesia sa maua o latou faamanuiaga. E tele ni vavega na vaaia i lea vaiaso faapitoa.

O le amataga o lenei tausaga, ina ua fuafua taitai o le Misiona a Niu Sila Aukilani e asiasi i le motu maotua o le Atu Kuki mo le konafesi faaleafatausaga a le itu, sa latou valaauliaina le Peteriaka o le Siteki a Aukilani Niu Sila Harbour, o Steven Stebbings, e auai faatasi ma i latou e tuuina atu se avanoa mo tagata o le ekalesia iina ina ia maua o latou faamanuiaga faapeteriaka.

Na taunuu Peteriaka Stebbings ma lona faletua, o Kathy, o le aao tusitusi foi mo ia, i le atunuu i le taimi o le mamafa o timuga. Atonu e manatu se tasi o le a faavaivaia e lena mea tagata mai le o i fafo . . . e leai se tulaga faapena. E toalua faifeautalai tama na tuuina atu ma le fiafia le la taavale mo Peteriaka Stebbings ma Sister Stebbings e faaaoga ao la i ai i le motu. Sa sili le fiafia o faifeautalai e faaaoga uila mo le vaiaso.

Na o mai le Au Paia i le mamafa o timuga . . . sa latou o mai ma loto ua tumu i le agaga faafetai ma le fiafia mo le mea o le a tupu. Sa latou o mai e faalogologo ma lagona le alofa o lo latou Tama Faalelagi ma Lona Alo, o Iesu Keriso. Sa latou o mai e aoao atili e uiga i o latou gafatia ma faamanuiaga ua faapolopolo mai e le Alii mo i latou taitoatasi. Sa faaauau pea ona o mai tagata—sa malosi le Agaga, na sa lagona e le au Stebbings le olioli suamalie lea na oo mai i le auauna atu i le Alii.

E masani Peteriaka Stebbings i le tuuina atu pe a ma le fa faamanuiaga i le vaiaso; sa ia manatu o le a ia faatalanoaina ma faamanuia ni tagata e toa 15–20, o lea sa sili atu ai ona faateia o ia ona o tagata e toa 40 o le ekalesia i le vaitausaga o le 12–74 na o mai mai motu i tua i Rarotoga ina ia maua o latou faamanuiaga.

Fai mai Sister Stebbings sa amata ona latou vave galulue i taeao taitasi ma umi ona galulue e oo i le po—ma i lo latou vaivai, na lagolagoina ma faamalosia i latou e le Alii ina ia mafai ona faataunuu mea uma na latou faia.

Na amata le aafiaga ia Fepuari 2023 ina ua taunuu Elder Doneal White ma Sister Claudia White i le Atu Kuki e auauna atu i se misiona lea sa leai se Peteriaka a le Siteki. I se vasega seminare i le vaveao, sa la faalogo ai o ta’u atu e ni tamaiti aoga e toa 14 i lo latou faiaoga latou te le’i mauaina ni o latou faamanuiaga faapeteriaka. Sa faagaoioia lea tulaga ma e le’i uma ae ua faatagaina Peteriaka Stebbings e malaga i le Atu Kuki e tuuina atu ia faamanuiaga na manaomia.

Na saunoa Elder ma Sister White sa la tatalo mo le au Stebbings ia i ai iina—i le Atu Kuki, ma sa fetaui lelei le taimi—ma le konafesi faaleitu i lena taimi, ma o le tuuaga o aoga—ma le isi o se tauvaga soka a le autalavou i le vaiaso na sosoo ai ma e lua ni vaega o tagata o le ekalesia na auina atu mo le tauvaga—ma mafai ai ona maua o latou faamanuiaga.

Na saunoa Peteriaka Stebbings faapea, o faamanuiaga faapeteriaka e tuuina atu i tagata agavaa o le Ekalesia ma e aofia ai ni apoapoaiga patino mai le Atua. “O lenei faamanuiaga ua faamoemoe e avea pei se faafanua o le auala e fesoasoani e taialaina ai se tagata i o latou olaga,” na ia saunoa ai.

“I le avea ai ma se peteriaka, e leai ni o’u faamanuiaga e tuuina atu,” na saunoa ai Stebbings. “Pe a tuu o’u lima i luga o le ulu o se tagata, ou te maua musumusuga ma faaaliga mo i latou e ala i le mana o le Agaga Paia, ona avea lea ma o latou faamanuiaga.”

“O nei faamanuiaga e le tatau ona gaugaua lelei ma teuina ma faagaloina, ma e le tatau ona faavaaina pe lolomiina,” o le saunoaga lea a Stebbings. “E tatau ona faitauina, mulimuli ma fiafia i ai, ma o le a fesoasoani i se tagata i o latou taimi sili ona faigata, ma taitaia i latou i tulaga uma o le olaga.”