Itulau i le Lotoifale
Mauaina e se Palarina e taitaia e le Agaga se Ala e le’i Mafaufauina
Ua taialaina se tagata siva palarina Ausetalia i ni vaifofo fatufatuai mo le tausia ia Mamalu o le Aso Sapati.
“Sa ou amata siva palei i le fitu tausaga ona sa ou manao e avea o se purinisese,” o le tala lea a Bianca Carnovale, mai Sini, Ausetalia. E le’i umi talu ona ia amata aoao e siva, sa ia iloaina e le taofia le lalolagi o siva ina ia manatua le aso Sapati. Sa tatau ona ia filifili po o fea e na te tu ai.
I le avea ai ma se tagata o Le Ekalesia a Iesu Keriso o le Au Paia o Aso e Gata Ai, sa tauivi Bianca e taofi le Aso Sa mai galuega ma isi gaoioiga lea e aveesea ai o ia ma le tapuai. Pe o taaloga po o le faatinoga o siva, o le filifiliga mo Tagata o le Au Paia e faataatiaese nei gaoioiga mai le Sapati e mafai ona luitauina faalelagona i nisi taimi.
O le le mana’o ia le fiafia se tasi, i le iloaina o vaega o le Aso Sa e tatau ona faia e aunoa ma ia, sa tauivi foi Bianca. E faapea mai ona faiaoga, “E leai se vaega e mananao ia te oe; aisea latou te filifilia ai oe nai lo se tasi o le a mafai ona siva i le Aso Sa?”
Ae sa manatua e Bianca, mai le laitiiti i le fitu tausaga, i le talatalanoa ai ma lona tina e uiga i le siva i Aso Sa. Ina ua ia misi ni suega ma siva, na fesoasoani na talanoaga ia Bianca o le faamalieina o le Atua sa sili atu ona taua.
Sa ia aoga i lana Aoga o le Marni School of Performing Art i le lotoifale seia atoa le 14 tausaga, ona maua lea o se avanoa i le Polokalama o le Pre-Professional i le Aoga o le Atunuu mo Siva i Newcastle, lea e lua itula le mamao mai le fale. Mo le tolu tausaga na sosoo ai, sa nofo Bianca i Newcastle i le lima aso o le vaiaso, o se aafiaga na saunia ai o ia e siitia atu i le Aai o Niu Ioka, ISA e nofo ai na o ia.
E ui na te le’i siva lava i le Aso Sa, i le 17 tausaga, sa talia Bianca i le Aoga Palei iloga i Sasae i Niu Ioka, lea sa na maua ai se avanoa fiafia e aoao ai le metotia Balanchine faapalei.
Sa le o se mea malie i taimi uma. “Na i ai taimi i Niu Ioka, mamao ese mai a’u uo uma ma aiga, sa ou lagona le tuua na o a’u,” na manatua ai e Bianca. “O le tagi ai i se tasi po…ou te manatua le tatalo ai i lo’u Tama Faalelagi ma aioi atu ia te Ia mo [se opo]. O le a le galo lava ia te a’u le mafanafana na faatumulia ai lo’u fatafata. E ui na faatagia atili ai a’u, ae o ni loimata moni lava o le fiafia, ma sa ou le’i toe lagonaina le tuua toatasi.”
O le toeitiiti mavae ai o le lua tausaga, na tapunia ai e le faama’i oti o le KOVITI-19 Niu Ioka ma auina atu ai Bianca i le aiga, lea sa tatau ai ona ia sueina se galuega, ae sa tumau pea i le aoaoina o lana palei. Mulimuli ane, sa ia mafaufauina ma le agaga tatalo se misiona, ae sa uunaia e masii atu i Melepone lea sa ia faamoemoe ai ina ia ofi atu i le Ausiva Palei a Ausetalia.
Ona toe amata lea o le tapunia o mea uma, ma e le’i umi ae misia e Bianca le faafiafia. Na amata ona siva o ia i le paka, tau lava ina ia alu ai i fafo, ona fautuaina lea o ia e lona tina e faataitai le siva palei i nofoaga faitele pe a toe tatala mea uma. I le taimi muamua, sa manatu Bianca e le manaia lea aitia, ae ina ua uunaia o ia e ana uo mai lotu, sa ia faataitaia loa.
Sa mamanuina ma faataitaia e Bianca ni siva i lona falemautotogi, ona alu lea i magaala e faatinoina ai. “I le taimi muamua, sa na o ni ana mea faalogo laiti i ona taliga, ae sa amata pea ona ia siva ai. Ona maua lea o a’u sipika. Mai iina, sa ou aoaoina ai faamatalaga ma togafiti uma e ala i le siva i magaala po o nofoaga faitele: i le faaaogaina o kone ma le tuuina o se manoa e poloka ai se eria e siva ai . . . faaatoatoaina o le mamanuina [o siva] . . . [faatautaia] o se aofia. O le siva ai i nofoaga faitele o se lalolagi fou atoa.”
O loo moemiti pea Bianca e ulufale atu i se ausiva palei. A o siva ai i nofoaga faitele, sa ia aoao pea ma saili sona avanoa. O se tasi o ausiva lea na foliga na manao ia te ia na fesili faapea, “Aisea e te le . . . siva ai i le Aso Sa, ona alu lea i le lotu?” O le tautino ai pea e Bianca faapea o le tausia o le Sapati e sili atu nai lo le na o le alu i le lotu, na le manuia ai lena avanoa.
“Oka so’u manao e siva faapolofesa,” na toe manatunatu i ai Bianca. I ana tatalo sa ia ta’u atu ai foi i le Tama Faalelagi le faagaeetia o le a oo i le au sisiva laiti pe afai na te maua se avanoa i se ausiva palei e anoa ma le faigaluega i Aso Sa. “I le toe tepa i tua, ua ou ata ai nei i le taumafai e ta’u atu i le Tama Faalelagi le mea e sili.”
Ua mafaufau loloto Bianca i se lesona na aoaoina e Elder D. Todd Christofferson: “E le tatau ona tatou mafaufau i le fuafuaga a le Atua o se masini faatau oloa lea tatou te (1) filifilia ai se faamanuiaga e manaomia, (2) tuu i ai le aofaiga manaomia o galuega lelei, ma le (3) ia vave ona tilivaina le oka.”1
“Ou te iloa e finagalo le Tama Faalelagi ou te siva,” o lana tala lea. “Na ou iloa e finagalo o Ia e tauivi i le mauaina o se ausiva palei, ae a o faagasolo pea tausaga, na matua manino mai ai Na te le’i folafola mai ia te a’u o le a ou siva lava i se ausiva.”
O le tulituliloaina o lana miti e siva ai i se ausiva ua avea ai Bianca ma se tagata e sili ona maoae le tomai o se tagata siva, ae ia Mati 2022, sa ia lagolagoina atoatoa o ia lava e ala i le siva ai i nofoaga faitele—o se auala e le’i mafaufauina taunuuga.
A o siva o ia i se tasi aso, sa ia manatua ai, “Sa ou vaai i foliga susulu o se teineitiiti e 13 tausaga le matua . . . sa ou avea muamua ma lena teineitiiti, ma ou te iloa lena lagona. E mafai ona ou faaataina ma faatagiina tagata; ou te le suia lava lena mea mo soo se mea . . . Sa ou manao lava e auauna atu i isi . . . o lea lava ua tuuina mai e le Tama Faalelagi ia te a’u le avanoa e auauna atu ai i se auala sili ona tulaga ese!”
“O le siva ai i se ausiva o le a musuia,” sa ia faaauau ai, “ae ou te manatu e sili atu le musuia o le a ou tausia Lana poloaiga.”
Na saunoa Peresitene Russell M. Nelson i se tasi taimi, “O le usiusitai e aumaia ai le manuia. O le usiusitai a’ia’i e aumaia ai vavega.”2
I le toe faaleoina atu o ana upu, na folafola atu ai e Bianca: “Ua Fetalai mai le Tama Faalelagi ia te a’u, ‘Afai e te tausia au poloaiga, o le a ou faaali atu ia te oe vavega’.
“Ou te faatuatuaina ea o Ia? Ioe!”