Mānava ia ’outou i roto i teienei ve’a

Te ta’ata rahi i roto i te Buka a Moromona

E rave rahi matahiti i ma’iri a’enei, ’ua ani mai tō’u mau taea’e aupuru iā’u e ’ia tuatāpapa pāpū maita’i au i te Buka a Moromona. I tō rātou hōro’ara’a mai i teie tītaura’a, ’ua ’ite au ē, noa atu ē, e tai’o ri’i au i te Buka a Moromona i te mau mahana tāta’itahi, ’aita rā vau i tuatāpapa pāpū maita’i i te reira.

’Ua fafau mai rāua iā’u i te tahi parau tei niuhia i ni’a i te mau parau a te Peresideni Ezra Taft Benson : « Tē vai ra te tahi mana pūai i roto i te [Buka a Moromona] o tei ha’amata i te tahe mai i roto i tō ’outou orara’a i te taime a ha’amata ai ’outou i te tuatāpapa ma te pāpū maita’i i te buka. E ’itehia ia ’outou te mana rahi hau atu nō te pāto’i i te fa’ahemara’a … ’ia tinai i te ’ino’ino … ’ia vai noa i ni’a i te ’ē’a tītī’āifaro ’e te piriha’o » (Te mau Ha’api’ira’a a te mau Peresideni o te ’Ēkālesia : Ezra Taft Benson [2014], 141).

’Ua fāri’i au i tā rātou tītaura’a, ’e i roto i te mau ’āva’e i muri mai ’ua ’ite au ē ’ua tupu tā rātou fafaura’a. ʼUa taui roa te reira i tōʼu oraraʼa.

Hō’ē tumu rahi e hōro’a mai te Buka a Moromona ia tātou i te mana pūai pae vārua maori rā, e ha’afātata te reira ia tātou ia Iesu Mesia. I roto i te parau pāpa’i a te Peresideni Henry B. Eyring i te ’api 4, ’ua pāpa’i ’oia ē, « ’O rātou o te tai’o ma te ’ā’au tae mau i te Buka a Moromona, e ora īa rātou nā roto i tāna mau ha’api’ira’a, ’e e pure nō ni’a i te parau mau o te reira, e ’ite īa rātou i te Vārua Maita’i ’e e fa’arahi atu ā rātou i tō rātou fa’aro’o, ’e e fa’a’ite i te ’itera’a pāpū i ni’a i te Fa’aora. »

’O Iesu Mesia te ta’ata rahi i roto i te Buka a Moromona. ’Ei hoa nō’u, ’o Madison Sinclair, e ’o vau nei ’ua fa’a’ite māua i roto i te parau pāpa’i, « Iesu Mesia i roto i te Buka a Moromona » (’api 10), e ’ua hau i te 7 000 fa’ahorora’a nō te Fa’aora i roto i te Buka a Moromona.

’Ua ’ite au ē ’ia tuatāpapa tātou i te Buka a Moromona i teie matahiti i roto i te Mai, Pe’e Mai, e ha’afātata atu ā tātou ia Iesu Mesia.

Mā te aroha,

John Hilton III

’Orometua ha’api’i i te ha’api’ira’a fa’aro’o, Fare Ha’api’ira’a tuatoru Brigham Young

Fa’ahōho’ara’a nā J. Kirk Richards