« E « ta’ata ’utuhi » ānei au ’aore rā e « ta’ata hopu » ānei ? », Liahona, Tēnuare 2024.
Mai, pe’e mai
E « ta’ata ’utuhi » ānei au ’aore rā e « ta’ata hopu » ānei ?
I roto i te moemoeā o Lehi nō te tumu rā’au o te ora (hi’o 1 Nephi 8), i tō ’outou mana’o, nō te aha te tahi mau ta’ata i fa’aru’e ai i te tumu rā’au, ’āre’a vetahi ra ’ua fa’aea noa i pīha’i iho i te tumu rā’au nō te ’amu i te hotu ? ’Ua tāiva te tahi mau ta’ata tei ’amu i te hotu, ’ua ha’amā rātou i te naho’a ta’ata tahitohito i roto i te fare rahi ’e te ’ā’ano. Hō’ē ta’a-’ē-ra’a tumu i rotopū i teie mau pupu tei te ’ohipa ïa tā rātou i rave hou ’a tae mai ai rātou i reira : Mea nāhea tō rātou tāpe’ara’a i ni’a i te ’āuri tāpe’ara’a—te parau a te Atua.
Te tāpe’ara’a ’aore rā te mau-māite-ra’a
’Ua ’ite atu Lehi i te feiā « i te haere-ti’a-ra’a mai ’ua mau ihora i te hope’ara’a o taua ’āuri tāpe’ara’a ra » ’e « i te tahi atu ā mau pupu ta’ata i te haere-ti’a-ra’a mai, ’e ’ua haere mai ra rātou ’e ’ua mau pāpū ihora i te hope’ara’a o taua ’āuri tāpe’ara’a ra » (1 Nephi 8:24, 30 ; ha’apāpūra’a i ’āpitihia atu).
’Ua parau Elder David A. Bednar nō te pupu nō te Tino ’Ahuru ma Piti ’āpōsetolo ē, e toru pupu ta’ata tei ha’amata i te haere nā ni’a i te ’ē’a, e piti ana’e rā tei tāpe’a i ni’a i te ’āuri tāpe’ara’a :
« ’Ua fāri’i ato’a [te piti o te pupu] i te ha’amaita’ira’a hau o te ’āuri tāpe’ara’a, ’e ’ua tāpe’a rātou i ni’a iho i te reira ! … ’Aita te tāpe’ara’a i ni’a i te ’āuri e parau nei iā’u e tuatāpapa noa i mau ‘taime ’ana’anatae’ ’aore rā te utuhi-noa-ra’a ma te tāmau ’ore, maoti ra ’o tē hopu-tāmau-ra’a ïa i roto i te parau a te Atua […]
« ʼUa haere ti’a atoʼa te toru o te pupu i mua ma te faʼaroʼo ʼe te pāpū ; ’āre’a rā, ʼaita e faʼaʼitera’a ē, ʼua hahi ʼē rātou… Penei a’e ʼua tai’o ’e ’ua tuatāpapa tāmau teie pupu ta’ata toru ’e ’ua ’imi i te mau pāpa’ira’a mo’a… Teie te pupu e ti’a ia ʼoutou ’e iāʼu nei ʼia ʼāmui atu ».1
E « ta’ata ’utuhi » ānei tātou ’aore rā e « ta’ata hopu » ānei, ’ia tae ana’e mai te taime nō te fa’a’ohipa i te parau a te Atua ? Noa atu ā pa’i e rari nā ta’ata to’opiti, tei ’utuhi ’e tei hopu, e fa’aea maoro a’e rā te ta’ata hopu i raro i te pape, ’e ma te tāmau a’e, e mea pāpū a’e ïa te ’oa’oara’a motu ’ore.