« Tā’u parau poro’i nō ’ō mai i te Fatu ra », Liahona, Tenuare 2024.
Hōho’a nō te faʼaroʼo
Tā’u parau poro’i nō ’ō mai i te Fatu ra
’Ua ha’api’i mai au ē, ’ua riro te ha’api’ira’a mai roto mai i te Buka a Moromona ’ei rāve’a maita’i nō te fari’i i tō’u iho ’itera’a pāpū nō te reira.
Hōho’a nā Leslie Nilsson
I te matahiti 1993, e toru mahana i muri a’e i tō’u fa’anu’ura’a i Polokwane, i ’Āfirīta Apato’a i te pae ’apato’erau, ’ua pātōtōhia mai i ni’a tā’u ’ōpani. I tō’u ’īritira’a atu, tē ti’a maira e piti misiōnare nō Te ’Ēkālesia a Iesu Mesia i te Feiā Mo’a i te mau Mahana Hope’a nei.
’Ua pa’ari au i roto i te ha’apa’ora’a fa’aro’o rahi, ’e ’ua a’o mai tō’u ’utuāfare iā’u ’ia fa’aātea ’ē atu i te mau misiōnare. Terā rā e mea maita’i rāua ’e ’ua au vau ’ia paraparau nō ni’a i te ha’apa’ora’a fa’aro’o, nō reira ’ua ani au ia rāua ’ia tomo mai.
I muri mai i te tahi fārereira’a fa’ahiahia mau, ’ua parau mai rāua iā’u : « E nehenehe ānei tā māua e hōro’a atu i te tahi Buka a Moromona ? »
« Tia’i ri’i noa hō’ē minuti », ta’u īa pahonora’a. « ’Ia mana’o ana’e vau, tē vai nei tā’u. »
I tō’u fa’a’itera’a atu i tā’u buka ’ia rāua, ’ua māere roa rāua. ’Ua fa’ata’a atu vau ē, i roto i tō’u ’oire ’utuāfare nō Cape Town e rave rahi matahiti nā mua atu, ’ua hōro’a mai te mau misiōnare iā’u i te hō’ē Buka a Moromona i te tahi fa’a’ite’itera’a. ’Ua fa’aherehere noa vau i te reira, ’e i te tahi mau taime, ’e i muriho ’ua tāpa’o vau i te mau ’api parau nā roto.
I muri a’e i tō mātou fārereira’a, ’ua ani au i te mau misiōnare ’ia ho’i mai. Terā rā, ’ua pa’ari au i roto i te tahi ’ēkālesia ’ē atu, tei reira tō’u metua ho’ovai te ’orometua-ra’a. ’Ua riro te mana’o ’ia bāpetizo-fa’ahou-hia ’ei ’ōfa’i turorira’a nō tō’u fa’afāriura’a. Noa atu ā te reira, ’ua ha’amata vau i te haere i te purera’a i roto i te ’āma’a na’ina’i ’a te ’Ēkālesia. Fātata hō’ē matahiti ’e te ’āfa, ’ua pi’i mai te peresideni ’āma’a iā’u i roto i tāna piha tōro’a.
« ’Ua hina’aro mātou ia ’oe ’ia fari’i i te hō’ē ’itera’a pāpū »
« E Davida, tē hina’aro nei au e hōro’a ia ’oe i te tahi ’airo’a », te parau īa a te peresideni ’āma’a. « Tē hina’aro mau nei mātou ’ia noa’a tō ’oe ’itera’a pāpū nō te Buka a Moromona. Tē mana’o nei au ē, e nehenehe ’oe e rave i te reira mai te mea e pi’i au ia ’oe ’ia ha’api’i i te ha’api’ira’a tumu o te ’evanelia. ’Ua ha’api’i a’e na ’oe i te fare ha’api’ira’a tuatoru, ’e ’aita ’oe e mata’u ’ia ti’a i mua i te ta’ata. »
I teie mahana, e ti’a i te mau ’orometua ha’api’i ’ia riro ’ei melo nō tē ’Ēkālesia.1 I taua taime rā, ’ua fa’auruhia te peresideni ’āma’a ’ia ani mai iā’u ’ia ha’api’i. Tē māuruuru nei au nō te reira.
« Nā reira īa », o tā’u īa i parau.
I te mau pō mahana mā’a ato’a, e tuatāpapa hu’ahu’a roa vau i te ha’api’ira’a ’ia māramarama vau, ’ia ’ite i te reira, ’e ’ia fa’atū’ati i te mau ’ā’amu ’e te mau fa’anahora’a o te Buka a Moromona. Nō’u nei, ’ua riro mau ā te ha’api’ira’a i teie buka ’ei rāve’a maita’i nō te fari’i i tō’u ’itera’a pāpū.
I te tahi sābati, i muri mai fātata hō’ē matahiti tō’u ha’api’ira’a, ’ua haere mai te peresideni misiōni nō Pretoria nō te tahi ’āmuira’a ’e ’ua ’āmui mai ’oia i roto i tā’u piha Ha’api’ira’a Sābati.
« Māuruuru e te taea’e Baxter », tāna īa parau i muri mai. « E ha’api’ira’a maita’i roa te reira. Nō hia mai ’oe ? »
I tō’u paraura’a atu iāna ē Cape Town, ’ua ’ui mai ’oia e aha te pāroisa tā’u i haere atu i reira.
« ’Aore roa vau i haere atu i te hō’ē pāroita. »
’Ua ui mai ra ’oia, « e aha te aura’a tā ’oe e parau ra ? »
« ’O vau te hō’ē tā ’outou e parau ra ē e ’Ētene ? » ’O tā’u īa i parau. « E ’ere vau i te melo nō te ’Ēkālesia. »
’Ua huru ’ē roa ’oia ’e ’ua haere rū atura ’oia e fārerei i te peresideni ’āma’a.
« E melo ’ore teie e ha’api’i ra i te mau pāpa’ira’a mo’a ? » te anira’a īa a te peresideni misiōni iāna.
« ’Oia, ’ua hape ānei te ha’api’ira’a ? »
« ’Aita. »
« E mea fa’auru ānei ’oia ? »
« ’E. »
« ’Ua ha’api’i ānei ’oia i te ha’api’ira’a tumu mau ?
« ’E. »
’Ua fa’ati’a rāua iā’u ’ia tāmau noa i te ha’api’i. Tau ’āva’e i muri mai, ’ua haere au e fārerei i tō’u ’utuāfare i Cape Town nō te ’ōro’a noela. I tō’u taera’a atu i reira, ’ua parau mai tō’u metua vahine iā’u ē, e fa’aru’e ’oia i tāna ’ēkālesia i muri mai i te pohera’a tō’u metua tāne ho’ovai. I taua iho taime ra, ’ua tauturu mai te Fatu iā’u ’ia ’ite ē, ’aita hō’ē noa a’e mana’o hapa tā’u i fāri’i nō tō’u ha’apa’o maita’i i tō’u metua vahine ’e i te ’ēkālesia i pa’ari ai au.
I tō’u ho’ira’a atu i te fare, ’ua niuniu vau i te peresideni ’āma’a.
« Tē hina’aro nei au ’ia bāpetizo-hia ananahi », tā’u īa parau iāna.
« E Davida, ’ua pāpū ānei ia ’oe ? »
« ’Ua pāpū maita’i au », tā’u ïa i parau atu. « ’Ua fāri’i au i te hō’ē poro’i nō ’ō mai i te Fatu ra. »
« ’E tao’a tā’u e hōro’a nā ’oe »
I tōu paraura’a i tō’u metua tāne fānau ē ’ua riro mai au ’ei melo nō Te ’Ēkālesia a Iesu Mesia i te Feiā Mo’a i te Mau Mahana Hope’a Nei, ’aita vau i ta’a maita’i ē nō te aha ’oia i vai hau noa ai.
« E fāri’i mai ’oe ’ia fa’ati’a atu vau ia ’oe i te tahi tuha’a o tō’u ’ā’amu », tāna ïa i parau mai.
’Ua parau mai tō’u metua tāne, o tei ’ore ā i paraparau a’enei ’iā’u nō ni’a i te ha’apa’ora’a fa’aro’o ē, i tōna ’āpīra’a, ’ua haere ’oia i roto i te pāroita nō Cumora i Cape Town. ’Ua ha’uti ’oia i roto i te pupu taora pōpō i roto i te ’ete o te pāroita. ’Ua fa’ahoa ’oia e rave rahi mau hoa piri e Feiā Mo’a i te Mau Mahana Hope’a Nei. Hō’ē o tōna mau hoa maita’i roa, e misiōnare ’oia, i muri a’e i tāna misiōni, ’ua pohe ’oia i te tama’i i te Fenua ’Ānāmī.
’Āhani ’aita te hoa ’o tō’u pāpā i mo’e, i tō’u mana’o, e riro ’oia i te tomo mai i roto i te ’Ēkālesia. E riro īa tōna orara’a ’ei ’ā’amu ta’a ’ē roa. Rave rahi matahiti i muri mai, tē vai noa ra tōna fa’atura rahi nō te Feiā Mo’a i te Mau Mahana Hope’a Nei. ’Aita noa atu ’oia i fa’a’ohipa i te tahi ha’apa’ora’a fa’aro’o, ’ua turu mau rā ’oia i tā’u fa’a’otira’a ’ia tomo i roto i te ’Ēkālesia.
Tau ’āva’e i muri mai i te pohera’a ’o tō’u metua tāne ho’ovai, ’ua fa’a’ite au i tō’u metua vahine i tō’u bāpetizora’a. ’Aita te reira i tupu maita’i. ’Āre’a rā, i tō’u haerera’a i Holane nō tē hāhaere i te mau melo o te ’utuāfare i Holane i te pae’au ’o tō’u metua vahine, ’ua fa’a’ite au i tō’u fa’afāriura’a ’ia rātou. I reira tō’u ’itera’a i te tahi tū’atira’a te ’utuāfare i te ’Ēkālesia.
I te roara’a ’o tō’u tere fārereira’a, ’ua ha’afātata mai tō’u metua tāne fēti’i ’iā’u. « E tao’a tā’u nō te hōro’a atu nā ’oe », tāna ïa i parau mai. I muri iho ’ua toro mai ’oia ’iā’u i te hō’ē nene’ira’a mātāmua nō te Buka a Moromona i roto i te reo Holane, tei piahia i te matahiti 1890.
« E buka fatu maoro-hia teie e tō tātou ’utuāfare », tāna ïa i parau mai. « ’Ua hina’aro vau ’ia fāri’i ’oe i te reira. »
’Ua tāmāhanahana maita’i teie nā tū’atira’a ’utuāfare to’opiti i te ’Ēkālesia iā’u. I teie mahana, tē poihere nei au i te Buka a Moromona i roto i te reo Holane. Tē fa’aha’amana’o mai nei te reira ’iā’u i taua mau misiōnare mātāmua ra tei haere mai e fārerei ’iā’u. Tē fa’aha’amana’o mai nei te reira ’iā’u i te faufa’a rahi nō te ha’api’ira’a i te Buka a Moromona nō tō’u fa’afāriura’ahia. Tē fa’aha’amana’o mai nei te reira ’iā’u i te fa’atura o tō’u metua tāne tei fa’aru’e mai i te ’Ēkālesia ’e te fāri’ira’a te tahi o tō’u mau tupuna i te ’evanelia tei fa’aho’i-fa’ahou-hia mai.
Tē fa’aha’amana’o ato’a mai nei te reira iā’u ē, e mana mau tō te Buka a Moromona nō tē ha’apāpū i « te ’Āti Iuda ’e te ’Etene ato’a ho’i ē, ’o Iesu tē Mesia, tē Atua Mure ’Ore, o tei fa’a’ite iāna iho i te mau nūna’a ato’a. »2