« Tā’u mau tao’a rahi roa a’e », Liahona, Tēnuare 2024.
Te reo o te feiā mo’a i te mau mahana hope’a nei
Tā’u mau tao’a rahi roa a’e
’Ua arata’i te fa’ahuara’a ’ia riro ’ei feiā mo’a i te mau mahana hope’a nei, i tō’u bāpetizora’a ’e i te hō’ē orara’a ’āpī i roto i te ’evanelia a Iesu Mesia.
Fa’ahōho’ara’a nā Ben Simonsen
Tā’u ’ohipa ’ei ta’ata fa’atere ’o tō’u ïa orara’a. ’Ua rātere au nā te ao nei ma te tunura’a i te mā’a i roto i te mau hotera moni rahi ’e i ni’a i te mau pahī rarahi uta rātere. ’Ua ’āmui atu vau i roto i te hō’ē pupu ta’ata tunu mā’a tuiro’o, tei haru mai e rave rahi rē i te pae tunura’a mā’a nā te ao nei.
I te hō’ē taime, ’aita vau i tō’u fare e toru matahiti. Pinepine tō’u metua vahine i te pi’i mai iā’u ma te roimata ’e ma te parau mai iā’u e ho’i mai i te fare.
I te hō’ē mahana i Milan, i ’Ītāria, i reira tō’u fāri’ira’a i te parau fa’aau nō te tunu i te mā’a i roto i te hō’ē hotera, ’ua fārerei atu vau i te mau misiōnare rave tāmau i roto i te hō’ē vāhi tāpe’ara’a pere’o’o auahi tei ’ī i te ta’ata. ’Ua paraparau mai rāua iā’u nō Te ’Ēkālesia a Iesu Mesia i te Feiā Mo’a i te mau Mahana Hope’a nei ’e ’ua fa’a’ite mai iā’u i te tahi mau parau tumu o te ’evanelia. ’Ua fa’ahiahia ta’a ’ē roa vau nō ni’a i te mea tā rāua i ha’api’i iā’u nō te ’utuāfare.
’Ua hōro’a mai te mau misiōnare iā’u i te hō’ē Buka a Moromona ’e ’ua ani mai iā’u ’ia pure nō te reira. ’Ua hōro’a ato’a mai rāua i te hō’ē buka iti ma te mau arata’ira’a e nāhea ’ia pure.
’Ua ho’i atu vau i tō’u hotera ma te ’oa’oa, ’ua haere atu vau i roto i tō’u piha, ’ua pure ’e ’ua ha’amata i te tai’o. Rahi noa atu tō’u tai’ora’a i te Buka a Moromona, rahi noa atu ā tō’u hina’aro e tai’o. Tē mea pe’ape’a ra, ’ua ’ōpani te ’ohipa iā’u ’ia fārerei atu i te mau misiōnare. I te hopera’a tā’u parau fa’aau i te hotera, ’ua ho’i atu vau i tō’u fare i Bari, i reira tō’u ha’amatara’a i te tunu i te mā’a i roto i te tahi atu hotera.
I te hō’ē mahana, i te fare tāmā’ara’a nō te hotera, ’ua tāmata te hō’ē ta’ata tunu mā’a, nō te mau tumu tano ’ore, e fāri’i i te hō’ē fārereira’a ’e te tahi mau tamāhine tuati mā’a. ’Ua ’ino’ino roa ’oia nō te mea ’ua pāto’i te mau tamāhine tuati mā’a, e feiā mo’a i te mau mahana hope’a nei rātou, i te haere nā muri iho iāna.
Ma te ha’amana’o i te mau misiōnare ’o tā’u i fārerei i Milan, ’ua parau atu vau i te ta’ata tunu mā’a ē, e ti’ara’a tō te mau tamāhine tuati mā’a e pāto’i iāna.
« E aha, e momoni ato’a ’oe ? », ui mai ra ’oia.
Nō tō’u here i te mau parau tumu tā te mau misiōnare i ha’api’i iā’u ’e nō te mea ’ua tae mai te mana’o i roto iā’u e ti’a e pāruru i te mau tuati mā’a, ’ua pāhono atu vau, « ’Ē ».
I te taime i muri mai ’a ’ite atu ai te ta’ata tunu mā’a i te mau tuati mā’a, ’ua parau ’oia ia rātou ē, e feiā mo’a vau nō te mau mahana hope’a nei. ’Ua ’oa’oa roa rātou. I tō mātou putuputura’a nō te tāmā’a i te avatea, ’ua ha’amata rātou i te uiui mai iā’u i te mau uira’a nō ni’a i te ’Ēkālesia i Milan. ’Ua fa’ati’a atu vau ia rātou nō ni’a i te ’oire ’e i tō’u fārereira’a i te mau misiōnare i reira. I te taera’a mai tā mātou mā’a, ’ua rave mai au i te hō’ē hāpaina uaina i ni’a i te ’aira’amā’a.
« E aha tā ’oe e rave ra i te inura’a i te uaina ? » ui mai ra te hō’ē o te mau tuati mā’a.
« Tē vai ra ānei te hō’ē fifi nō te reira ? » Tā’u ïa i parau.
« E mea ha’apa’o ānei ’oe ? » ui mai nei te tahi atu.
« E aha te aura’a ? » ’Ua parau atu vau.
« Mai te hea ’oe i te ’ahura’ahia i te mahana o tō ’oe bāpetizora’a ? » ui mai ra rātou.
« ’Aita vau e ha’amana’o ra », tā’u ïa i parau ia rātou. « E hō’ē noa ’āva’e tā’u ».
’Ua riri rahi roa rātou nō te mea ’ua mana’o rātou ē, tē fa’ao’ō’o ra vau ia rātou. ’Ua ha’apāpū atu vau ia rātou ē, e ’aita roa. ’Ua fa’a’ite atu vau ia rātou ē, e ’ere au i te melo nō te ’Ēkālesia, ’ua parau atu rā vau ia rātou, ’ua here au i te Buka a Moromona ’e te mau parau tumu o te ’evanelia ’o tā’u i ha’api’i mai. I muri iho, ’ua ui atu vau e nāhea e ti’a ai iā’u ’ia ha’api’i rahi mai ā nō ni’a i tā rātou ’Ēkālesia.
’Aita i maoro roa, ’ua ha’afārerei te mau tuati mā’a iā’u i te mau misiōnare. ’Aita rātou i ti’aturi roa tae roa i te taime ’a fa’aoti ai au i te mau ’āparaura’a ’e ’a bāpetizohia ai au.
Hōho’a ’utuāfare ma te parau fa’ati’a au a te ta’ata fatu
Nā roto i tō’u bāpetizora’a, ’ua taui roa tō’u orara’a. ’Ua ha’api’i mai au ē, e’ita ’oe e nehenehe e tu’u hō’ē ’āvae i roto i te ao nei ’e hō’ē ’āvae i roto i te ’evanelia. ’Ua ha’api’i mai au ē, e ’ere te ’ohipa i te mea faufa’a roa a’e i roto i te orara’a. ’Ua ha’api’i mai au ē, nā mua te Fatu ’e tō’u ’utuāfare. I te pae hope’a, ’ua ta’a a’era iā’u te ’oto o tō’u metua vahine nō tō’u mo’era’a i te ’utuāfare, ’e ’ua ani atu vau iāna ’ia fa’a’ore mai i tā’u hapa.
’Aita vau i rātere fa’ahou nā te ao nei, ’ua fa’aipoipohia vau i roto i te hiero nō Bern i Helevetia, ’ua ha’amata i te hō’ē ’utuāfare, ’e ’ua rave i te hō’ē ’ohipa tunura’a ma’a i te fare ma’i o te ’oire iho, i reira ’ua fa’a’ohipa vau i tō’u mau tāreni nō te tauturu i te feiā ma’i ’ia ora mai. I teienei, tē ha’apa’o nei au i te mau rāve’a tauturu nō te ta’ata i te fare ma’i. Te ’ohipara’a i te fenua iho, ’ua hōro’a mai te reira iā’u i te taime nō te ha’apa’o i tō’u ’utuāfare ’e i tō’u mau pi’ira’a i roto i te ’Ēkālesia.
Mai te mahana ’a haere ai au i te hiero ’e i te fāri’ira’a i tō’u ’ōro’a hiero e piti matahiti i muri mai i tō’u bāpetizora’a, ’ua here au i te mo’ara’a o te hiero ’e te ’ohipa e vai ra i roto. I te pohera’a tō’u metua tāne e maha matahiti i muri mai, ’ua fifi roa vau. ’O ’oia ho’i tā’u ’aito. Maoti te ’evanelia a Iesu Mesia, ’ua ’ite au ē, tē ora noa nei ā ’oia.
I tō’u tomora’a i roto i te piha tirētiera i muri a’e i te ravera’a i te ’ohipa monora’a i tō’u metua tāne, ’ua fāri’i au i tāna tauahira’a. I te reira taime, ’ua ’ite au ’ua fāri’i tō’u metua tāne i te ’evanelia ’e te here o te Fatu nō tāna mau tamari’i.
Tātou, te feiā mo’a i te mau mahana hope’a nei, e ha’amaita’ira’a nō tātou ’ia ’ite i te ’evanelia mau. Tē māuruuru nei au nō tō te reira tauira’a i tō’u orara’a. Te ’evanelia ’o te vāhi ïa vau i ’ite ai te ’oa’oa mau. ’O te ’evanelia ’e tō’u ’utuāfare tā’u mau tao’a rahi roa a’e.