Nō te aha ’aita te Atua i taui ai i tō’u orara’a ?

’Ua tāpe’a-’ōmo’e-hia te i’oa

I te hurira’a tō’u fa’aipoipora’a ’ei moemoeāra’a ’ino, ’ua ’itehia mai iā’u te mana o te ti’amāra’a ’ia mā’iti.

Hōho’a

rima e tāpe’a ra i te hō’ē tuira ’e tē pāpa’i ra i roto i te hō’ē buka mahora

I te 23ra’a o tō’u matahiti, ’ua tā’atihia vau i roto i te hiero i te ta’ata o tō’u mau moemoeā. ’Aita i ti’a iā’u ’ia ha’amana’o i te hō’ē mahana ’oa’oa a’e i roto i tō’u orara’a tā’āto’a.

Te mau mea ato’a rā ’o tā’u i tīa’i noa na nō tō’u orara’a, ’ua ha’amata te reira i te marua vitiviti i raro. ’Ua haere rahi roa te hāmani-’ino-ra’a a tā’u tāne i ni’a iā’u, i te pae tino ’e i te pae ferurira’a.

’Ua tae mai i roto iā’u te ’āhuehue ’e te māuiui. ’Aita vau i ta’a roa nō te aha ’aita tō’u ha’apa’o maita’i i fa’atupu i te hō’ē ta’a-’ē-ra’a i roto i tō’u fa’aipoipora’a. ’Ua tāvini au i te hō’ē misiōni rave tāmau, ’ua ha’apa’o i tā’u mau fafaura’a, ’ua pe’e i te mau fa’auera’a, ’e ’ua tāvini ato’a ’ei rave ’ohipa nō te hiero. Noa atu rā te huru o tā’u tāmatara’a rahi ’ia ha’afātata atu ia Iesu Mesia, ’ua fifi roa atu tō’u fa’aipoipora’a.

Ma te hi’ora’a i muri, ’ua ’ite a’era vau ē, noa atu ’ua feruri au nā roto i te pure i te rāve’a ’ia fa’aipoipo i tā’u tāne ’e ’ua ti’aturi vau e nehenehe māua e fa’atītī’aifaro i te mau fifi, ’ua tāu’a ’ore au i te mau tāpa’o o te mau fifi e tupu mai ’o tei tau mai i muri iho i roto i tō māua fa’aipoipora’a.

’Imi i te mau pāhonora’a

I muri a’e e pae matahiti te ’ōtahira’a ’e te hāmani-’ino-ra’a, tē fifi ra tō’u aura’a ’e te Metua i te ao ra ’e ia Iesu Mesia. ’Ua hahi ’ē roa tā’u mau tīa’ira’a nō tō’u orara’a ’e ’aita i te mea fa’ahiahia roa.

E au ra iā’u ’ua fatifati roa vau.

I te ’ite-pāpū-ra’a ē, ’aita tā’u tāne e hina’aro e taui, ’ua ha’amata vau i te ani i te Atua ’ia fa’aora iā’u i roto i tō’u fifi, ’aore rā ’ia fa’a’ite mai iā’u i te ’ē’a ti’a e pe’e. Terā rā, i te taime ’aita te mau pāhonora’a ’o tā’u i hina’aro i tae mai, ’ua ha’amata vau i te fa’ahapa i te Metua i te ao ra i te rirora’a ’ei tumu nō tō’u māuiui.

’Ua tāmau noa vau i te haere i te purera’a ’e i te ha’apa’o i tā’u mau fafaura’a, ’ua ’ī roa rā tō’u ’ā’au i te ’ino’ino nō te ’erera’a i te arata’ira’a.

’E i te hō’ē mahana, ’ua ’ite a’era vau ē, tei iā’u ra te pāhonora’a nō tō’u fifi—e tītauhia iā’u ’ia fa’a’ohipa i tō’u ti’amāra’a ’ia mā’iti nō te rave ’e nō te taui i tō’u huru orara’a. ’E ’ua ’ite au e aha te fa’aotira’a maita’i a’e nō’u ’e tā’u fā hope’a nō te ho’i atu i te Metua i te ao ra.

I te hope’a ’ua fa’aoti a’era vau e rave i te hō’ē ta’ahira’a i mua : ’Ua paraparau vau i tā’u tāne, ’e mai te hō’ē temeio, ’ua fa’a’ore māua i tō māua autā’atira’a ma te au māite.

Te mana nō te mā’iti

Nā teie ’ohipa fifi i tupu i tauturu iā’u ’ia ha’api’i mai nō ni’a i te mana ’e te faufa’a rahi mau o te ti’amāra’a ’ia mā’iti ’o tā te Atua i hōro’a mai ia tātou.

’Ua ha’api’i te peresideni Dallin H. Oaks, tauturu hō’ē i roto i te Peresidenira’a Mātāmua : « ’Ia hi’o tātou i muri, e ti’a ia tātou ’ia ’ite i te ta’a ’ē rahi i tupu i roto i tō tātou orara’a maoti te tahi o tā tātou mau mā’itira’a. E rave tātou i te mau mā’itira’a ’e te mau fa’aotira’a maita’i a’e, mai te mea e hi’o tātou i te mau ’ē’a i mua ia tātou ma te feruri e arata’i ti’a te reira i hea. ’A nā reira ai tātou, e pe’e ïa tātou i te parau a’o a te peresideni Russell M. Nelson, ’ia ha’amata ma te fā hope’a i roto i te ferurira’a. Nō tātou nei, tē fā hope’a, ’ia vai noa ïa i ni’a i te ’ē’a nō te fafaura’a nā roto i te hiero ē tae atu i te ora mure ’ore, te hōro’a rahi a’e i te mau hōro’a ato’a a te Atua ».¹

’Ua ’ite a’era vau ē, e’ita te Metua i te ao ra e ha’afifi i te ti’amāra’a o te hō’ē ta’ata—’ua vaiiho ’oia iā’u ’ia rave i tā’u iho fa’aotira’a ’ia fa’aipoipo i tā’u tāne. ’Aita ato’a ’oia i fa’ahepo i tā’u tāne ’ia taui, noa atu ē tē ha’apa’o nei au i tā’u mau fafaura’a, nō te mea e tītau te fa’aipoipora’a mure ’ore i te tauto’ora’a pae vārua ’e te pae tino o nā ta’ata e piti, ’a pe’e ai rāua ia Iesu Mesia.

’Ia fa’aruru ana’e tātou i te mau ’arora’a, e nehenehe tātou e fa’a’ohipa i tō tātou ti’amāra’a nō te taui i tā tātou mau hi’ora’a ātea, tō tātou mau huru ’e ia tātou iho ato’a. Terā te hōro’a hanahana o te ti’amāra’a. Tē hina’aro nei te Metua i te ao ra ’ia ’imi tātou iāna ’e i te Vārua ’e i muri iho, ’ia ti’aturi ia tātou iho nō te rave i te mau fa’aotira’a maita’i roa a’e nō tō tātou orara’a.

Te fāriura’a atu i ni’a i te Fa’aora

I te ha’amatara’a, ’ua mana’o vau e fa’aorahia ’e e haere ’oi’oi mai i rāpae’au i tō’u fa’aipoipora’a ha’avī, terā rā, ’ua taere ’e e mea fifi te ravera’a. Māoti te mau mauha’a hi’opo’ara’a, te fa’aro’ora’a i te mau parau poro’i a te mau peropheta, te tai’ora’a i te mau pāpa’ira’a mo’a, te purera’a ’e te ’itera’a i te here ’e te pāturura’a a te mau hoa ’e te ’utuāfare, ’ua roa’a iā’u te ti’aturira’a nō te hō’ē ’ananahi maita’i a’e. ’A fa’a’ohipa ai au i tō’u ti’amāra’a ’ia mā’iti nō te ’ite mai i te fa’aorara’a, tē tīa’i nei au ma te fa’aoroma’i i te hō’ē orara’a ’o tē fa’a’ohipa i te fa’a’orera’a hara ’e te mau aura’a nehenehe ’e vetahi ’ē, tē fa’aōra’a mai i te Fa’aora.

Ma te māramarama rahi atu ā nō ni’a i te fa’a’ohipara’a i te ti’amāra’a ’ia mā’iti i roto i tō’u orara’a, tō’u ’ino’ino i te Atua ’ua taui ’ei hāro’aro’ara’a, ’e ’ua ti’a i tō’u aura’a ’e ’ōna ’ia ora.

Teie te mea e vai ra i roto i te ’evanelia—te ravera’a i tā tātou iho mau mā’itira’a ’ia haere i te Mesia ra, te ravera’a i te mau parau a’o a te mau peropheta ’o tē fa’aitoito nei ia tātou ’ia fa’a’ohipa i tō tātou ti’amāra’a ’ia mā’iti, nō te ti’aturi i te Fatu ’e nō te fa’atupu i te hō’ē orara’a nehenehe tei ’ī i te fa’aro’o.

Mai tā te tuahine Camille N. Johnson, peresideni rahi nō te Sōtaiete Tauturu, i ha’api’i : « E parau mau, nā te parau tumu teitei nō te ti’amāra’a ’ia mā’iti e vaiiho ia tātou e pāpa’i i tō tātou iho mau ’ā’amu […] Terā rā, tē ti’a ineine nei Iesu Mesia nō te fa’a’ohipa ia tātou ’ei mauha’a hanahana […] nō te pāpa’i i te hō’ē mea fa’ahiahia roa […] mai te mea e fa’aro’o tō [tātou] nō te vaiiho iāna, mai te mea e vaiiho [tātou] iāna ’ei tumu nō tō [tātou] ’ā’amu.²

Te fa’a’orera’a i tō’u fa’aipoipora’a, ’o te hō’ē ïa o te mau ’ohipa māuiui roa a’e tei tupu, ’aita a’enei mai te reira. ’Ua ha’api’i mai rā vau ē, ’ia fa’aruru ana’e tātou i te mau tāmatara’a mana’o-’ore-hia i roto i te orara’a nei, e nehenehe tātou e ’imi i te arata’ira’a a te vārua ’e ’ia rave i te mau fa’aotira’a ’o tē fa’ahaere ia tātou i mua i ni’a i te ’ē’a nō te fafaura’a. Ma te pe’era’a i te Metua i te ao ra ’e ia Iesu Mesia, e nehenehe tātou e ti’aturi tāmau noa i te mau mea maita’i i muri nei ’e i tā rāua mau ha’amaita’ira’a nō te hau ’e te ’oa’oa tei fafauhia.

Tē ora nei te ta’ata pāpa’i i Chili.