« Te upo’oti’ara’a i te fā ’ore i te pae vārua—E aha tā’u e rave i teienei ? », Liahona, Tēnuare 2024.
Feiā ʼāpī paʼari
Te upo’oti’ara’a i te fā ’ore i te pae vārua—E aha tā’u e rave i teienei ?
’Ia haere ana’e tātou ia Iesu Mesia ra, e ’ore roa tātou e vai fā ’ore noa.
’Ua ’ana’anatae roa vau ’ia tomo atu i roto i te feiā ’āpī pa’ari. ’Ua ineine au nō te ha’amata i te patu i te orara’a ’o tā’u i hina’aro noa na. ’Ua tāvini au i te hō’ē misiōni i Peretīria ’e i muri iho, ’ua haere atu i te ha’api’ira’a tuatoru i tō’u ho’ira’a mai. ’Ua fa’aoti au i tā’u parau tū’ite, ’ua ’itehia mai iā’u i te hō’ē ohipa maita’i ’e ’ua tūtava vau ’ia ora ’ei pipi nā te Mesia.
’E tei roto noa ā vau i teie fāito matahiti o te orara’a. ’Ua fa’aitoito noa vau i te rave maita’i a’e nō te pe’e iāna.
’Ua māuruuru roa vau nō te mau rāve’a ’e te mau ha’amaita’ira’a tā’u i fāri’i e tae roa mai i teienei. Teie rā, ’ia hi’o ana’e au i muri ’e i te ’itera’a ē, ’ua rave au i te mau fafaura’a ato’a ’o tā’u e nehenehe e rave e tae roa mai i teie taime (ta’a ’ē atu te fa’aipoipora’a), ’e ’ua rae’ahia iā’u i te mau ta’ahira’a rarahi ’o tā’u i ’ōpua noa na, i te tahi taime e ’ite au tē maumau ri’i ra vau—’aita vau i pāpū nāhea ’ia haere i mua, i te pae vārua ihoā rā.
’Ua ’ite ato’a atu vau i te feiā ’āpī pa’ari ’ati a’e iā’u i te aro-ato’a-ra’a. ’Ua fa’aru’e ato’a te tahi pae i te ’Ēkālesia nō te mea, tē ’ite ra rātou ia rātou ma te fā ’ore ’aore rā tē fa’aruru nei i te mau tītaura’a e ’ere i te mea fa’ahiahia roa. Pinepine tā rātou mau ’ohipa i te tu’uhia i ni’a i tā’u tāpura uira’a nō te orara’a.
Teie rā, i teie taime, tā’u mau uira’a rarahi roa nā te Metua i te ao ra ’o teie ïa : Nāhea e ti’a ai iā’u ’ia upo’oti’a i ni’a i teie mana’o o te fā ore i te pae vārua ? E aha tā’u e rave i teienei ?
’A taputō noa ai au i ni’a i teie mau uira’a, ’ua ha’api’i mai au i te tahi mau parau mau faufa’a rahi, tei tauturu iā’u ’ia rātere nā roto i teie taime pāpū ’ore.
’Eiaha e vaiiho i te mau fa’anevanevara’a ’ia fa’ahahi ’ē ia ’outou
I roto i teie taime o te ta’a ’ore i hea e fāriu atu ai i muri iho, ’aore rā e aha te mea e tīa’i mai ra, ’ua ’ite a’era vau nāhea te mau fa’anevanevara’a a tō te ao nei, e nehenehe ai e ha’amata ’ōhie noa i te upo’oti’a i ni’a i te mau mea pae vārua. ’Ua parau te tuahine Rebecca L. Craven, tauturu piti i roto i te peresidenira’a rahi o te Feiā ’Āpī Tamāhine ē, « ’ua teimaha roa te ao i te mau fa’anevanevara’a e nehenehe e fa’ahema ato’a i te feiā i mā’itihia, e mea tāu’a ’ore atura rātou i te orara’a i tā rātou mau fafaura’a ».1
’Ua ’ite atu vau i te tahi atu feiā ’āpī pa’ari i te ’arora’a ’e tō rātou ’itera’a pāpū i muri a’e i tō rātou ho’ira’a mai nā tā rātou misiōni. ’Ua ’ite ato’a atu vau e mea nāhea te tahi pae i te tāpaera’a i te mau ta’ahira’a faufa’a rahi, mai te fāri’ira’a i te parau tū’ite nō te ha’api’ira’a tuatoru ’aore rā te fa’aipoipora’a ’e i te hope’a ’ua hahi ’ē i te mau mea faufa’a roa a’e, ’ia ’ore ana’e rātou e vaiiho i te vāhi nō te ’evanelia a Iesu Mesia i roto i tā rātou terera’a ’ohipa ’āpī.
’Ua fa’aruru ato’a vau i te mau taime maita’i ’e i te mau taime fifi i te pae vārua. ’Ua riro ato’a i te tahi taime e mea fifi ’ia fa’aitoito noa ’e ’eiaha ’ia fa’ahupehupe i roto i te mau peu pae vārua, i te taime ihoā rā ’aita te tahi mau ha’amaita’ira’a e tae ’oi’oi mai, mai tā’u i ti’aturi. E hina’aro noa vau e haere i mua ’e e ha’amaita’i—’aita vau e hina’aro ’ia riro ’ei ta’ata vai noa i te vāhi hō’ē i te pae vārua. I te tahi rā taime, mai te huru ra ē, tē pe’e noa ra vau i te ’ōpape ma te fā ’ore.
Nō reira, ’ia fa’ata’a ana’e au i te taime nō te Metua i te ao ra ’e nō Iesu Mesia i te mahana tāta’itahi, nā roto ihoā rā i te mau rāve’a ha’iha’i ’e te ’ōhie (hi’o Alama 37:6), e ’ite au i te tāmāhanahanara’a ’e te vai-pāpū-ra’a tā tāna ’evanelia e hōpoi mai iā’u, noa atu e mea ’āhuehue roa te ao nei.
’Ua parau te peresideni Russell M. Nelson : « Tē tāparu nei au ia ’outou ’ia vaiiho i te Atua ’ia upo’oti’a i roto i tō ’outou orara’a. ’A hōro’a iāna i te hō’ē tuha’a ti’a o tō ’outou taime. Mai te mea e nā reira ’outou, ’a hi’o i te ’ohipa e tupu i ni’a i tō ’outou haerera’a maita’i i mua i te pae vārua ».2 ’Ia mā’iti maita’i ana’e au ’ia vai te fa’aro’o ia Iesu Mesia i te mau mahana ato’a ’e ’ia rave i te taime nō taua mau peu pae vārua ra ’o tē fa’atu’ati iā’u i ni’a iāna, e ha’amana’o vau i tō’u mau taime faufa’a rahi i te pae vārua ’e e ’ite au i te hō’ē mana’o ’āpī nō te ’ōpuara’a, te ti’aturira’a nō te ’ananahi ’e te fa’aro’o.
’Imi i te mau fa’aurura’a maita’i
Te tahi atu taime ’a tupu mai ai te mana’o fā ’ore, i te taime ïa ’o tā’u matahiti hope’a nō te ha’api’ira’a tuatoru. E mea fifi roa te orara’a. I te tau ïa nō te ma’i pe’e, nō reira, ’ua hepohepo roa vau i te mau-noa-ra’a i te fare, nō te fa’aoti i te mau ha’api’ira’a. ’Ua ’ere roa vau i te arata’ira’a ’e te natira’a i roto i tō’u orara’a.
’Ua ’aro ato’a vau ’e te ’Ēkālesia i taua taime ra. Pinepine au i te fa’aru’e i te ro’i ’e tō’u ’ahu ta’otora’a nō te fa’aro’o i te purera’a ’ōro’a nā ni’a i te natirara, nō te mea o te reira ana’e te fa’aitoitora’a e ti’a iā’u ’ia ha’aputu.
I roto i te reira pu’e tau pōiri, ’ua toro atu vau i te rima i tō’u ’utuāfare ’e i tō’u mau hoa ’e ’ua fa’ata’a atu ia rātou, i tō’u mana’o rahi nō te fā ’ore ’e te hepohepo tā’u i fāri’i. ’Aita roa atu e mana’o ti’aturi tō’u nō te ’ananahi, ’e ’aita roa vau i ’ite e nāhea te mau ’ohipa ’ia tupu mai. ’E i reira tō rātou paraura’a mai iā’u ē, tē pure nei rātou nō’u ’e tē pāturu nei rātou iā’u noa atu tei te ātea ’ē rātou.
’A fa’atoro ai au i te rima i te feiā tei herehia e fa’aro’o rahi tō rātou ’e ’a pure ai i te Metua i te ao ra ma te fa’aitoitora’a ha’iha’i roa i te pae vārua, ’ua ’ite a’era vau i te pāturura’a ’e te here mau.
’Ua ’ite au ē, ’ia rotahi pūai ana’e au i ni’a i tā’u mau tīa’ira’a māuruuru ’ore, tō’u mau fē’a’ara’a, ’aore rā tā’u mau ’arora’a, e huehue tō’u fa’aro’o. E mo’ehia iā’u te mau ha’amaita’ira’a i roto i tō’u orara’a. Terā rā, nā roto i te hā’ati-itoito-ra’a iā’u i te maita’i ma te tai’ora’a i tō’u ha’amaita’ira’a pātereāreha, te fa’aro’ora’a i te mau parau poro’i nō te ’āmuira’a rahi, ’e te ravera’a i te taime i pīha’i iho i te mau ta’ata tei herehia e au ’o tē fa’auru maita’i nei iā’u, e fa’atumu fa’ahou vau i ni’a i te ta’a-’ē-ra’a temeio tā te ’evanelia a Iesu Mesia i rave i roto i tō’u orara’a.
Noa atu ā i te tahi taime ’aita tō ’outou e ’ē’a pāpū i mua ia ’outou ’aore rā ’aita te mau mea e tupu ra mai tei ’ōpuahia, tē vai noa ra ā te maita’i rahi i roto i tō ’outou orara’a ’e e rave rahi rāve’a e pūpūhia mai ia ’outou, nō te tauturu ia ’outou ’ia haere i mua i ni’a i te ’ē’a nō te fafaura’a. Tē vai noa ra te mau mea hau atu nō te ha’api’i mai ’e te mau vāhi hau atu nō te tupu i te rahi, i te pae vārua ihoā rā. ’A ani i te arata’ira’a i te Metua i te ao ra. E tauturu ’oia ia ’outou ’ia mā’imi ’e ’ia ’ite mai i te mau fa’aurura’a maita’i ’e te mau rāve’a nō te tupu i te rahi ’e nō te ha’api’ira’a mai e hā’ati nei ia ’outou (hi’o Te mau Hiro’a Fa’aro’o 1:13).
Tāmau noa i te tūtava
I te tahi taime e nehenehe tō tātou iho pae vārua e haere mai te are te huru—i ni’a ’e i raro. I te tahi taime, e nehenehe tātou e ’ite ia tātou i te ’āueue-’ore-ra’a i roto i tō tātou fa’aro’o ’e te ’oa’oa o te ’evanelia. I te tahi rā mau taime, e nehenehe tātou e ’ore e ’ite i hea ra e fāriu atu ai i muri iho. E nehenehe tātou e fāri’i i te mau tāfifira’a ’ia tae ana’e mai te mau tāmatara’a, e tae mai te mau uira’a, ’aore rā e taerehia te mau ha’amaita’ira’a, mai te mea ihoā rā tē fa’aitoito nei tātou ’ia ora i te ’evanelia. I roto i teie mau taime fifi, tē ’ite pinepine nei au i te ta’ata ’ia rave i te hō’ē o nā ’ē’a e piti : hō’ē i reira rātou e ’imi ai i te Fa’aora, ’e hō’ē i reira rātou e ’ore ai e nā reira.
I te tahi taime e fa’aau vau i teie mau taime i te ’ā’amu ’o Mose ’e te ’ōphi veo (hi’o Nūmera 21:8–9). ’A hepohepo ai te ’āti ’Īserā’ela i te ’imira’a ’ia fa’aorahia rātou i muri a’e i tō rātou hōhonira’ahia e te mau ’ōphi ta’ero, ’ua hōro’a Mose ia rātou i te hō’ē rāve’a ’ōhie nō te fa’aora ia rātou : ’ia hi’o noa i te ’ōphi veo e fa’ahōho’a ra ia Iehova. ’O te reira ana’e tā rātou e ti’a ’ia rave. Hō’ē noa hi’ora’a ’e e ora rātou. Terā rā e rave rahi tei mā’iti ’eiaha e hi’o, ’e ’ua pohe. (Hi’o 1 Nephi 17:41.)
Tē ha’aferuri nei teie ’ā’amu iā’u i te huru nō tō tātou amora’a i te tahi taime, i te teimaha ta’ero o te ’ino’ino ’e te au ’ore nō tā tātou mau tīa’ira’a māuruuru ’ore, tei mua noa iho ïa ia tātou te rā’au !
Te tāviri nō te fāri’i i te tīa’ira’a, te hau ’e te fa’aro’o nō tō tātou ’ananahi, ’o te hi’o-noa-ra’a ïa ia Iesu Mesia (hi’o Helamana 8:14–15 ; Ioane 3:14–17).
’Ua riro noa na vau ’ei ta’ata fa’a’ino rahi iā’u iho ’ia rave ana’e au i te mau hape. Nō te mea rā ’ua tūtava mau vau i te ha’api’i mai ’e i te ti’aturi i te Metua i te ao ra ’e ia Iesu Mesia, ’ua ’ite au e nehenehe noa vau e ti’aturi ia rāua, nō te fa’a’orera’a hara, nō te tupura’a i te rahi ’e nō te fa’aorara’a i roto i te mau taime fifi. ’Ua ’ite au ē, ’ia fāriu ana’e au i ni’a ia rāua nā roto i te pure, ’ia tuatāpapa vau i te Mai, pe’e mai, ’ia rave au i te taime i roto i te hiero, ’e ’ia rave maita’i au i tō’u pi’ira’a, e ’ite au i te hō’ē mana’o māuruuru ’e te fa’a’āpīra’a.
’A ’imi ai au ia rāua, e ’ite atu vau i te ’evanelia a Iesu Mesia i roto i tōna huru mau : hō’ē ha’apūra’a ’o tē hōro’a mai ia tātou te tāmāhanahanara’a, te pārurura’a ’e te fa’aorara’a i mua te mau ’ōphi o te ao nei.
’Ua fa’a’ite pāpū Elder Jeffrey R. Holland nō te pupu nō te Tino ’Ahuru ma Piti ’āpōsetolo ē : « Te hō’ē ’ana’ana pāpū nō te tīa’ira’a, fānauhia mai e te here o te Atua ’e o te ta’ata ato’a—’o terā ïa tā mātou e hina’aro nō ’outou… ’Āpitihia atu taua ti’aturira’a māramarama ra e te muhumuhu pāpū ē, ’ua here te Atua ia ’outou, ’e o te Mesia tō ’outou Arai, ’e e parau mau te ’evanelia. E fa’aha’amana’o tōna ’ana’ana ia ’outou ē, i roto i te ’evanelia tē vai noa nei ā—i te mau mahana ato’a, i te mau hora ato’a—hō’ē fāna’ora’a ’āpī, hō’ē orara’a ’āpī, hō’ē matahiti ’āpī. ’Auē ïa temeio ! ’Auē ïa hōro’a ! ’E nō te hōro’a o te Mesia, te mau mea maita’i roa a’e i roto i te orara’a nei, nō tātou ïa mai te mea e tāmau noa tātou i te ti’aturi pāpū ’e i te tāmata noa ’e i te tīa’i noa ».3
Haere i mua ia Iesu Mesia ra
E rave rahi tauira’a tā te feiā ’āpī pa’ari e hōro’a mai, e rave rahi pāpū ’ore, ’e ’oia ato’a te mau tīa’ira’a māuruuru ’ore i te tahi taime. Terā rā, e mea pāpū ’e e mea ’āueue ’ore te ’evanelia a Iesu Mesia. ’E e mea pāpū tāna mau fafaura’a ’e tā te Metua i te ao ra mai te mea e fa’aea noa tātou i ni’a i te ’ē’a nō te fafaura’a. I te tahi taime, e nehenehe te ao nei e ha’afifi i tā tātou rotahira’a i ni’a iāna. Te tu’ura’a rā i te hō’ē ta’ahira’a i mua ’o tē arata’i atu ia tātou iāna ra ’o te hō’ē haerera’a i mua ïa. ’Ia nu’u ana’e tātou i mua i te Mesia ra, ’aita tātou e vai nei ma te fā ’ore—tē nu’u ra tātou i te tīa’ira’a, te hau ’e te ’oa’oa.
Tē ora nei te ta’ata pāpa’i i Manchester, Peretāne.