Tā tātou ō maita’i a’e

Nā Dean Cooper, Washington, D.C., Fenua Marite

’Ia ha’amo’a ana’e tātou i te hō’ē hiero, tē parau nei tātou i te Fatu : « Teie tā mātou ō. Terā te maita’i a’e e ti’a ia mātou e rave ».

Hōho’a

te ’āua o te hiero

Fātata e piti hepetoma hau te ha’amo’a-fa’ahou-ra’a-hia te hiero nō Washington D.C i te ’āva’e ’Ātete 2022, ’ua ’ite atu māua tō’u paoti i te hō’ē o te mau tumu rā’au tei ma’ihia, ’o tē arata’i atu i te hiero. E mea huru varavara te rōpūra’a, ’e e mea ateatea ri’i te tahi mau ’āma’a.

’Ei ta’ata tāmā ’āua nō te hiero, ’ua pe’ape’a ri’i au i te mea ē, ’ua ineine te ’āua hiero nehenehe maori rā teie vāhi iti na’ina’i. Tei pīha’i iho te tumu rā’au i te piha’ara’a pape fātata i te tomora’a o te hiero.

E tumu rā’au mono maita’i tā mātou e tupu ra i pīha’i iho mai, ’e ’ua ’āparau māua nō ni’a i te rāve’a e mono i te tumu rā’au ma’i i te tumu rā’au maita’i. Nā mua rā, e ti’a ia māua e tātara i te ’ē’a haerera’a ’e te aihere nā te hiti, i muri iho e fa’anu’u i te mau fa’ahīra’a pape ’e te mau niuniu uira i fa’atorohia nā reira. Tō’u pe’ape’a rahi roa ra ’o te hutira’a mai ïa māua i te tumu rā’au ma’i, e tanu atu ai i te tumu rā’au mono, ’e ’aita tō māua e taime nō te fa’anehenehe i te mau mea ato’a ’ati a’e te tumu rā’au nō te ha’amo’a-fa’ahou-ra’a.

I tō’u paraura’a i tā’u vahine ia Carolyn ē, tītauhia ia māua e fa’anu’u i te tumu rā’au, ’ua pāhono mai ’oia : « ’A tāpūpū noa i te mau ’āma’a taratara, ’e e ani au i tō’u mau tuahine pāpa’ira’a mo’a nā te fenua tā’āto’a ’ia pure nō te reira. Nō te Fatu te ’āua o te hiero. E ha’amaita’i ’oia i te tumu rā’au ».

E pupu hoa tā Carolyn ’o tāna e pi’i nei tōna mau tuahine pāpa’ira’a mo’a—e mau melo nō te ’Ēkālesia e ora nei i roto i te hō’ē ā pāroita. ’Ua tuatāpapa ’āmui rātou i te Mai, pe’e mai ’e tae roa ’ua fa’anu’u ’ē rātou pā’āto’a, tē fārerei noa nei rā rātou. ’Ia hina’aro-ana’e-hia te pure, e pi’i rātou i te tahi ’e te tahi.

I muri a’e i tō Carolyn paraura’a ia rātou nō ni’a i te tumu rā’au ma’i, ’ua parau atu rātou i tā rātou mau tamari’i ’e te tahi atu mau melo o te ’utuāfare. ’Aita ’o Carolyn i ’ite i te rahira’a ta’ata tei pure nō te tumu ra’au, e fa’aro’o rā tōna e fa’aro’o mai te Metua i te ao ra i tā rātou pure.

Tau mahana noa i muri mai, ’ua ’ōteo te tumu rā’au i te mau rao’ere ’āpī, ma te fa’a’ī i te mau vāhi varavara. « ’Oia mau, e mea maita’i a’e i teienei », ’ua parau Carolyn. ’Ua hāpono atu ’oia i te mau hōho’a o te tumu rā’au i tōna mau tuahine pāpa’ira’a mo’a, ma te parau ia rātou, « ’a hi’o na, e mea nāhea tō te Fatu pāhonora’a mai ia tātou ! »

’Ua ’ite au ē, ’ua pure te mau ta’ata nō te tumu rā’au, nō reira ’aita ato’a vau i māere. ’Ua ’ite ato’a vau ē, tē fātata mai ra te taime e ha’amaita’i ai te peresideni Russell M. Nelson i te hiero ’e te ’āua o te hiero i roto i tāna pure ha’amo’ara’a. E maita’i mai te tumu ra’au.

’Ua māuruuru mātou i te Fatu i te fa’aturara’a i tā mātou ō ’e tō mātou fa’aro’o.