“ʻOku Tau Muimui ki he ʻEiki ʻo e Ngāue Fakaetauhí,” Liahona, ʻOkatopa 2024.
ʻOku Tau Muimui ki he ʻEiki ʻo e Ngāue Fakaetauhí
Ko Sīsū Kalaisi ʻa hotau faʻifaʻitakiʻanga haohaoa ʻo e ngāue fakaetauhi ʻi he manavaʻofa ki he kakai kotoa peé.
Sīpinga ʻo Kalaisí, tā fakatātaaʻi ʻe Hiram Powers, Smithsonian American Art Museum, fakatau mei he musiume ko hano fakamanatu ʻo Ralph Cross Johnson
ʻI heʻeku ʻalu ki he ngaahi konifelenisi fakasiteiki ʻi he Siasí, ʻoku ou maʻu ai ʻa e faingamālie fakaʻofoʻofa ke ʻalu mo e kau palesiteni fakasiteikí ʻo ʻaʻahi mo ngāue fakaetauhi ki he kāingalotu fakafoʻituituí mo e ngaahi fāmilí. ʻI he ngaahi ʻaʻahi ngāue fakaetauhi ko ʻení, ʻoku ou faʻa fifili ʻi he taimi ʻe niʻihi pe ko e hā te u lea ʻaki mo faí, tautautefito ki he taimi ʻoku foua ai ʻe kinautolu ʻoku ou ʻaʻahi ki aí ha ngaahi pole faingataʻá. Kehe mei heʻeku tokanga taha ki he meʻa te u lea ʻaki pe fakahokó, kuó u fakatokangaʻi ko e meʻa ʻoku tokoni lahi taha kiate au ʻi heʻeku ngāue fakaetauhi ki he niʻihi kehé ko e tokanga taha ki he ʻEiki ʻo e ngāue fakaetauhí—ʻa hotau Fakamoʻui ko Sīsū Kalaisí.
Hangē ko e ngaahi meʻa lelei kotoa pē, ko Ia hotau faʻifaʻitakiʻanga haohaoá. ʻI he taimi ʻoku tau mavahe ai mei hotau ngaahi ʻapí—pea mavahe mei he ngaahi meʻa ʻoku tau fiemālie aí—ke ngāue fakaetauhi kiate kinautolu ʻoku tau feohí ʻo hangē ko ia naʻá Ne mei faí, ʻe tataki kitautolu ʻe he Fakamoʻuí ʻi heʻetau ngaahi feingá. ʻE mahuʻingamālie ange leva ʻetau ngāue fakaetauhí ʻi ha toe meʻa te tau lava ʻo lea ʻaki pe fai ʻiate kitautolu pē.
ʻOua Naʻá ke Fakalaka
ʻI hono fehuʻi, “Ko hai hoku kaungāʻapí?” (Luke 10:29), naʻe fakaʻaongaʻi ʻe Sīsū ʻa e faingamālié ke vahevahe ha talanoa fakatātā. Naʻá Ne fakamatala kau ki ha tangata fononga mei Selusalema ki Selikoó ʻa ia naʻe “moʻua ia ki he kau kaihaʻá” pea naʻe kaihaʻasi ʻene ngaahi meʻá, tā pea liʻaki kuó ne “mei maté” ʻi he halá (Luke 10:30).
Ne ʻikai fuoloa kuo haʻu ha taulaʻeiki. Pau pē naʻe ʻiloʻi ʻe he taulaʻeikí ʻoku ʻi ha tuʻunga fakatuʻutāmaki ʻa e tangatá, ka naʻe ʻikai ke ne tuʻu ʻo tokoni. Naʻá ne “ʻalu ki he kauhala ʻe tahá” (Luke 10:31). Hokó, naʻe “mamata” ha Līvai ki he kovi ʻo e kafo ʻa e tangatá. Peá ne “ʻalu ia” (Luke 10:32). Naʻe fononga atu leva ha tangata Samēlia. Naʻe fakamatalaʻi ʻe Sīsū ʻa e tangata Samēliá naʻá ne maʻu ha meʻa naʻe ʻikai maʻu ʻe he taulaʻeikí mo e tangata Līvaí: naʻe “manavaʻofa lahi [ʻa e tangata Samēliá ki he tangatá]” (Luke 10:33) peá ne “ʻalu [kiate ia], … ʻo nonoʻo hono laveá, … ʻo ne tauhi ia” (Luke 10:34).
Le Bon Samaritain (Ko e Samēlia Leleí), tā fakatātaaʻi ʻe François Sicard
Ko e talanoa fakatātā ʻo e Samēlia leleí ʻoku ʻikai fekauʻaki pē ia mo e kau taulaʻeikí, kau Līvaí, pe kau Samēliá. ʻOku fekauʻaki moʻoni ia mo kitautolu. ʻOku ʻi ai hotau ngaahi tokoua mo e tuofāfine kuo kafo ʻi he veʻe hala ʻo e moʻuí. Te nau lava pē ʻo hoko ko ha faʻahinga taha pē—kaungāmeʻa, fāmili, kaungāʻapi, kāinga ʻo e koló, pea naʻa mo kinautolu ʻoku tau tangutu fakataha mo ia ʻi he falelotú ʻi he Sāpaté. ʻOku tau sio nai kiate kinautolu pea fakalaka atu? Pe ʻoku tau ngāue fakaetauhi kiate kinautolu ʻi he ʻofa ʻo hangē ko ia naʻe fai ʻe he Samēlia leleí? Ko e lahi taha ʻo e niʻihi ʻoku tau vakai ki aí ʻoku ʻikai hāsino mai honau ngaahi kafó. ʻOku faingataʻaʻia fakalongolongo pē ha tokolahi pea ʻikai ke nau kole ha tokoni. Ko e founga pē ke fakapapauʻi aí ko e fetaulaki mo e niʻihi kehé ʻi he ʻofa mo e manavaʻofa naʻe fakahaaʻi ʻe he Samēliá. ʻOku ʻuhinga ʻa e ngāue fakaetauhi faka-Kalaisí ki he manavaʻofa ki he kakai kotoa pē.
Lotu ke ʻIlo e Ngaahi Fiemaʻu ʻa e Niʻihi Kehé
Lolotonga ʻa e hāʻele ʻa Sīsū ʻi ha haʻofanga kakaí, naʻe ala atu kiate Ia ha fefine naʻá ne maʻu e tuí, ʻa ia naʻá ne faingataʻaʻia ʻi ha taʻu ʻe 12 ʻi he ʻau totó. ʻI heʻene ala ki he tapa ʻo e kofu ʻo Sīsuú, naʻá Ne ongoʻi naʻe ʻalu ha “mālohi [meiate Ia].” Naʻe tafoki ʻa Sīsū ki he fefiné mo pehē ange, “Ke ke fiemālie: kuo fakamoʻui koe ʻe hoʻo tuí; ʻalu ʻo fiemālie” (vakai, Luke 8:43–48).
ʻI he taimi naʻe ʻomi ai “ʻa e tokotaha naʻe mahaki teté” kia Sīsū ʻo tukuhifo ʻe hono ngaahi kaungāmeʻá mei ha ʻato, naʻe ʻuluaki fakamoʻui fakalaumālie ʻe Sīsū ʻa e mahaki teté. Naʻá Ne folofola, “Foha, kuo fakamolemole hoʻo ngaahi angahalá.” Ko hono talí, naʻe tukuakiʻi ʻe he kau tangata tohí ʻa Sīsū ʻoku fie ʻOtua. Ke tokoni kiate kinautolu naʻe ʻi aí ke mahino ʻokú Ne maʻu ʻa e “mālohi ʻi māmani ke fakamolemole ʻa e angahalá,” naʻe folofola ʻe Sīsū ki he tangatá, “Tuʻu hake, ʻo toʻo ho mohengá, mo ke ʻalu ki ho falé.” ʻI he taimi pē ko iá, naʻe “tuʻu hake [ʻa e tangatá] … ʻi he ʻao ʻo kinautolu kotoa pē” (vakai, Maʻake 2:3–12). Ko e mālohi ko ia ʻo Kalaisi ke fakamoʻui fakatuʻasino ʻa e mahakí, ko e mālohi tatau pē ia naʻá Ne fakaʻaongaʻi ke fakamoʻui ʻa e mahaki fakalaumālié.
ʻOku fakahaaʻi ʻe he ongo meʻá ni—mo ha ngaahi meʻa lahi kehe—ʻoku ʻafioʻi ʻe he Fakamoʻuí ʻa e ngaahi fiemaʻu fakatuʻasino mo fakalaumālie fakatouʻosi ʻa e niʻihi kehé pea ngāue fakaetauhi kiate kinautolu ʻo fakatatau mo e ngaahi fiemaʻu ko iá. Te tau lava ʻo fai ʻa e meʻa tatau. Neongo ʻoku ʻikai ke tau lava ʻo ʻiloʻi haohaoa ʻa e ngaahi fiemaʻu ʻa e niʻihi kehé, ʻo hangē ko e Fakamoʻuí, ka te tau lava ʻo lotua ke tau malava ʻo ʻiloʻi ʻa e ngaahi fiemaʻu ko iá, ke maʻu ha fakahinohino ʻi he founga ke tokangaekina ai kinautolú, pea mo hoko ko e tali ki he lotu ʻa ha taha kehe.
ʻI heʻetau fakatokangaʻi pē iá, kuo pau ke tau ngāue foki ʻi he manavaʻofa. Ko e hā ʻa e ʻaonga ʻo e ʻiloʻí kapau ʻoku ʻikai ke tau fai ha meʻa? Kapau te tau sio pē pea ʻikai fai ha meʻa, ʻe lava ke mole meiate kitautolu ʻetau vīsone fakalaumālié. ʻI heʻetau ngāué, naʻa mo e fanga kiʻi founga īkí, te tau maʻu lahi ange ai e maama ʻa e Fakamoʻuí ke tau mamata mo ngāue fakaetauhi lelei ange ki he niʻihi ʻoku tau feohí.
ʻI Ai mo Kinautolu
Mahalo te tau momou ke tokoni ki he niʻihi kehé ʻi he ngaahi taimi ʻe niʻihi. Mahalo te tau hohaʻa pe ko e hā ʻa e fakafeangai ʻa e niʻihi kehé mo ʻenau ongó. Kuo hoko ʻeni kiate au. ʻI he ngaahi momeniti ko iá, ko e meʻa mahuʻinga taha te tau lava ʻo faí ko ʻetau feohi mo kinautolu pea ʻofa ʻiate kinautolu. Ko e Fakamoʻuí ʻa hotau faʻifaʻitakiʻanga haohaoá.
Kimuʻa pea hā ʻa e Fakamoʻui kuo toetuʻú ki he kau Nīfaí, naʻa nau aʻusia ha ngaahi faingataʻa mo ha fakapoʻuli lahi. Naʻa nau fuʻu fiemaʻu ha fiemālie. Naʻe mei lava pē ke folofola ʻa e Fakamoʻuí kiate kinautolu mei he langí mo fakahā ange ʻa e meʻa naʻe fiemaʻu ke nau fanongo ki aí (vakai, 3 Nīfai 9–10), ka naʻá Ne hā kiate kinautolu ʻo hāʻele atu ʻi honau lotolotongá. Naʻá Ne akoʻi mo lotu fakataha mo kinautolu pea lotu maʻanautolu. (Vakai, 3 Nīfai 11–19.)
Naʻe fehuʻi ange foki ʻe he Fakamoʻuí “ʻOku ʻi ai ha mou niʻihi ʻoku puke ʻiate kimoutolu? Mou ʻomi ʻa kinautolu ki heni. ʻOku ʻi ai hamou niʻihi ʻoku ketu, pe kui, pe heke, pe pipiki, pe kilia, pe mate ha kupu ʻo honau sinó, pe tuli, pe puke ʻi ha mahaki ʻe taha? ʻOmi ʻa kinautolu ki heni pea te u fakamoʻui ʻa kinautolu, he ʻoku ou ʻofa mamahi kiate kimoutolu; ʻoku fonu hoku lotó ʻi he ʻaloʻofa. …
“Pea naʻe hoko ʻo pehē ʻi he hili ʻene folofola peheé, naʻe ō mai fakataha ʻa e fuʻu kakaí kotoa pē …pea mo kinautolu kotoa pē naʻa nau puke ʻi ha faʻahinga mahakí; pea naʻá ne fakamoʻui ʻa kinautolu kotoa pē ʻi he ʻomi ʻa kinautolu kiate iá” (3 Nīfai 17:7, 9; naʻe tānaki atu ʻa e fakamamafá).
Kapau ʻokú ke taʻepauʻia pe hohaʻa fekauʻaki mo e ngāue fakaetauhi ki he niʻihi kehé, ʻoua te ke fuʻu hohaʻa ki he meʻa ke ke lea ʻaki pe faí. Kamata ʻaki hoʻo ʻi ai peé. Kuo akoʻi ʻe Palesiteni Lāsolo M. Nalesoni, “ʻOku tuʻunga ʻa e ueʻi fakalaumālie leleí ʻi he fakamatala leleí.” ʻI hoʻomou ʻiate kinautolú, te mou ako mo ʻiloʻi ʻa e taimi ke mou ʻaʻahi atu ai ʻi heʻenau puké, taimi ke foaki mo fakahoko ai ʻa e ngaahi tāpuaki ʻo e lakanga fakataulaʻeikí, taimi ke fakafanongo mo “fefuaʻaki [ai] ʻa hoʻomou ngaahi kavengá, koeʻuhí ke nau maʻamaʻa,” “tangi fakataha mo kinautolu ʻoku tangí; … fakafiemālieʻi ʻa kinautolu ʻoku ʻaonga ki ai ʻa e fakafiemālié” (Mōsaia 18:8–9), pea fiefia fakataha mo kinautolu ʻoku fiefiá! ʻOua naʻá ke momou. ʻE ueʻi fakalaumālie koe ʻi he meʻa ʻoku fiemaʻu ʻe he Fakamoʻuí ke ke lea ʻaki mo fai ʻi hoʻo ngāue fakaetauhí.
Muimui ʻi Heʻene Sīpingá
Ko e fuofua meʻa naʻe fai ʻe he Fakamoʻuí ʻi Heʻene hā ki he kau Nīfaí ko ʻEne folofola kiate kinautolu ke “tuʻu hake pea ʻunuʻunu mai kaite [Ia]” pea ke “ʻai [honau] nimá ki [Hono] vakavaká, pea … ala foki ki he mataʻi faʻo ʻi [Hono] nimá mo [Hono] vaʻé” (3 Nīfai 11:14).
Naʻe ʻikai fiemaʻu ʻe he Fakamoʻuí ke nau vakai ʻataʻatā pē kiate Ia. Kuo nau fakamoʻoni ki Heʻene “hāʻele hifo mei he loto langí … ʻo tuʻu ʻi honau haʻohaʻongá” (3 Nīfai 11:8). Naʻá Ne finangalo ke nau omi kiate Ia pea ke ala mo ʻiloʻi Ia mo e meʻa kuó Ne fai maʻá e māmaní kotoa. “ʻO nau fai ʻeni, mo ʻalu atu taki taha kae ʻoua kuo ʻalu atu kotoa pē” (3 Nīfai 11:15; tānaki atu hono fakamamafaʻí).
Naʻá Ne ui foki mo ha kau ākonga ʻe toko hongofulu mā ua pea “tuku kiate kinautolu ʻa e mālohi ke fai papitaisó” (3 Nīfai 11:22) mo akoʻi ʻa e tokāteline ʻo e papitaisó (vakai, 3 Nīfai 11:23–27). Naʻá Ne fekau leva ki he kau Nīfaí ke taʻofi ʻa e fakakikihi kotoa pē. Naʻá Ne folofola, “Vakai ʻoku ʻikai ko ʻeku tokāteliné ʻeni, ke ueʻi ʻa e loto ʻo e kakaí ke feʻiteʻitani; ʻiate kinautolu; ka ko ʻeku tokāteliné ʻeni ke fakangata hono fai ʻo e ngaahi meʻa peheé” (3 Nīfai 11:30).
ʻI he ngaahi founga lahi, ʻoku hoko ʻa e ngāue fakafaifekau ʻa e Fakamoʻuí ʻi he Tohi ʻa Molomoná ko ha sīpinga ki heʻetau ngāue fakaetauhí. Te tau lava ʻo tokoniʻi hotau ngaahi tokouá mo e tuofāfiné ke nau haʻu kia Sīsū Kalaisi, poupouʻi kinautolu ke papitaiso pea maʻu ʻa e ngaahi ouau kehe ʻo e fakamoʻuí, pea ʻofa ʻiate kinautolu mo hoko ko ha kau faʻa fakalelei, ʻo hangē ko ia kuo akoʻi mai ʻe he palōfitá kiate kitautolú.
He ʻikai faingofua ke tokoni ki he niʻihi kehé ʻi he taimi ʻe niʻihi. ʻE lava ke hanga ʻe hotau ngaahi ʻahiʻahí ʻo ʻai ke faingataʻa ange ʻetau ongoʻi ʻa e fakaʻaiʻai ke ngāue fakaetauhi ʻi he founga ʻa e Fakamoʻuí. Naʻe hoko e ngaahi ʻahiʻahí mo e faingataʻá ki he Huhuʻí ʻi Heʻene ngāue fakafaifekaú. ʻI heʻetau toʻo kiate kitautolu Hono huafá pea tuʻu ko e kau fakamoʻoni kiate Iá (vakai, Mōsaia 18:9), ʻe kole mai ke tau ʻaʻeva ʻo hangē ko ia naʻá Ne faí pea tau alanima atu ʻo ʻofa ʻiate kinautolu ʻoku tau feohi mo iá.
Kapau te tau muimui ʻia Sīsū Kalaisi—ʻa e ʻEiki ʻo e ngāue fakaetauhí—pea ngāue fakaetauhi ki he niʻihi kehé ʻo hangē ko ia naʻá Ne mei faí, te Ne fakamālohia mo fakaivia kitautolu. ʻI heʻetau ngāue fakaetauhí, te tau lava ʻo faitāpuekina e moʻui ʻa e niʻihi kehé mo maʻu ha nonga mo ha fiefia moʻotautolu.