“Ko e Kau Ākonga Kitautolu ʻa Sīsū Kalaisi,” Liahona, ʻOkatopa 2024.
Maʻá e Ngaahi Mātuʻá
Ko e Kau Ākonga Kitautolu ʻa Sīsū Kalaisi
Siʻi Ngaahi Mātuʻa,
ʻOku ʻofa ʻa e ʻEikí ʻi hoʻomou fānaú pea ʻokú Ne finangalo ke nau lava ʻo fanongo kiate Ia. ʻE lava ke tataki kimoutolu ʻe he ngaahi fakamatala ʻi he makasini ko ʻení ʻi hoʻo akoʻi hoʻo fānaú ki he founga ke maʻu mo ʻiloʻi ai ʻa e fakahā fakatāutahá. ʻE lava ke ke fakaʻaongaʻi ʻa e ngaahi fakakaukau ko ʻení ke tokoni ki hoʻo fānaú ke fakatupulaki ha vā fetuʻutaki vāofi ange mo ʻenau Tamai Hēvaní pea mo e Fakamoʻuí.
Fealēleaʻaki ʻi he Ongoongoleleí
Te Tau Lava Fēfē ʻo Maʻu ʻa e Uouangatahá?
ʻOku ʻomi ʻi he fakamatala ʻa Palesiteni Nalesoni ʻi he peesi 2 ha ngaahi tefitoʻi moʻoni ʻe fitu ʻe tokoni ke tau fakahoko e fekau ʻa e ʻEikí ke “taha peé” (Tokāteline mo e Ngaahi Fuakava 38:27). Ko e fē ʻi he ngaahi tefitoʻi moʻoni ko ʻení te ke lava ʻo aleaʻi mo hoʻo fānaú? Hangē ko ʻení, ʻoku fakatupu fēfē ʻe hono fakahoko mo tauhi ʻo e ngaahi fuakavá ʻa e uouangataha mo e niʻihi kehé?
Toʻo Hono Huafá kiate Koe ʻo fakafou ʻi he Ngāue Fakaetauhí
ʻOku akoʻi ʻe he fakamatala ʻa ʻEletā Vilā ʻi he peesi 8 ʻa e founga naʻe ngāue fakaetauhi ai ʻa e Fakamoʻuí lolotonga Hono taimi ʻi he māmaní. Te mou lava ʻo lotu fakafāmili ke ʻiloʻi pe ko hai ʻoku fiemaʻu tokoní mo e founga ʻoku fiemaʻu ke tokoniʻi ai kinautolú. Aleaʻi mo hoʻo fānaú ʻa e ongo ʻoku nau maʻu hili ʻa e lotú. Tokoniʻi kinautolu ke nau ʻiloʻi ʻa e ngaahi tali naʻa nau maʻú.
ʻOku Fie Folofola Atu ʻa e ʻEikí kiate Koe
Fakaʻaongaʻi ʻa e fakamatala “Ko e Meʻa ʻi Hoʻo Tuí, Kuó Ke Vakai Aí” (peesi 20) ke akoʻi hoʻo fānaú fekauʻaki mo e maʻu fakahaá. ʻOku fakamatala ʻa e tokotaha faʻutohí ki he founga ʻe lava ai ʻe he ʻEikí ʻo tākiekina kitautolu ki he misiona ʻo ʻetau moʻuí ʻo fakafou ʻi ha tāpuaki fakapēteliake. Te ke lava ʻo vahevahe ʻa e founga kuo tākiekina ai koe ʻe hoʻo tāpuaki fakapēteliaké.