“Ko e Fānau ʻa Kitautolu ʻo e Fuakavá,” Liahona, ʻOkatopa 2024.
Haʻu, ʻo Muimui ʻIate Au
Ko e Fānau ʻa Kitautolu ʻo e Fuakavá
Kotoa Hono Fakaʻeiʻeikí, tā fakatātāʻi ʻe Yongsung Kim, ʻi he angalelei ʻa e Havenlight
ʻOku tau lau ʻi he 3 Nīfai 20–21 fekauʻaki mo e ngaahi fuakava kuo fai ʻe he ʻOtuá mo ʻEne fānaú. Naʻe akoʻi ʻe Sīsū Kalaisi ʻEne kau ākonga ʻi he Ongo ʻAmeliká:
“ʻOku mou kau ʻi he fuakava naʻe fai ʻe he Tamaí mo hoʻomou ngaahi tamaí, ʻo ne folofola kia ʻĒpalahame: Pea ʻe monūʻia ʻi ho hakó ʻa e ngaahi faʻahinga kotoa pē ʻo e māmaní.
“… Ko e fānau ʻa kimoutolu ʻo e fuakavá” (3 Nīfai 20:25–26).
Kuo toutou fakamamafaʻi ʻe Palesiteni Lāsolo M. Nalesoni ʻa e mahuʻinga ke manatuʻi ʻa e foʻi moʻoni maʻongoʻonga ko ʻení.
ʻOku ʻuhinga ki he hā ke hoko ko e fānau ʻo e fuakavá?
ʻOku fakahoko ʻe he fānau ʻo e fuakavá ʻa e ngaahi fuakava tatau, pe ngaahi talaʻofa toputapu mo e Tamai Hēvaní mo Sīsū Kalaisi ʻa ia naʻá Na fai mo ʻĒpalahamé (vakai, ʻĒpalahame 2:8–11).
Naʻe folofola ʻa e ʻEikí ʻi he 1843 kia Siosefa Sāmita:
“Naʻe maʻu ʻe ʻĒpalahame ʻa e ngaahi talaʻofa ʻo kau ki hono hakó, pea mo e fua ʻo hono manavá—ʻa ia ko hono manavá kuó ke tupu mei aí … ; pea ko e meʻa kia ʻĒpalahame mo hono hakó, … te nau kei hokohoko atu ai pē ʻi he māmaní pe ʻi he hili ʻa e māmaní ʻo taʻefaʻalaua ʻo hangē ko e ngaahi fetuʻú. …
“ʻOku ʻamoutolu foki ʻa e talaʻofá ni, koeʻuhí he ko hoʻomou tupu meia ʻĒpalahame” (Tokāteline mo e Ngaahi Fuakava 132:30–31).
ʻOku toe ʻaonga foki kiate kitautolu ʻa e ngaahi tāpuaki kuo talaʻofa maí. Naʻe akoʻi ʻe Palesiteni Nalesoni ʻoku kau ʻi he ngaah talaʻofá ʻa e “totonu ke maʻu e kakato ʻo e ongoongoleleí, fiefia he ngaahi tāpuaki ʻo e lakanga fakataulaʻeikí, pea taau ke maʻu e tāpuaki mahuʻinga taha ʻa e ʻOtuá—ʻa ia ko e moʻui taʻengatá.”
Fēfē kapau ʻoku ʻikai ko ha hako au ʻo ʻĒpalahame?
ʻI he taimi ʻoku papitaiso mo hilifakinima ai kitautolu ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau hoko ai ko ha konga ʻo e fāmili ʻo ʻĒpalahamé. ʻOku tau hoko leva ʻo “lau ko e ngaahi foha mo e ngaahi ʻofefine ʻo Sīsū Kalaisi, ko ʻEne fānau ʻi he talangofua ki he ongoongoleleí.”
Ko e hā ʻoku fuakava ʻe he Tamai Hēvaní mo ʻEne fānaú?
ʻOku fuakava ʻa e Tamai Hēvaní ʻe lava ke tau toe foki ʻo nofo fakataha mo hoko ʻo hangē ko Iá, tuʻunga ʻi he huhuʻi mo e toetuʻu ʻa Sīsū Kalaisí. Ko e taumuʻa ʻeni ʻo e palani ʻo e fakamoʻuí. Naʻe akoʻi ʻe Palesiteni Nalesoni: “ʻOku fakaʻatā kitautolu ʻe he palani ʻa e Tamai Hēvaní maʻa ʻEne fānaú ke tau nofo ʻi he feituʻu mo e founga ʻokú Ne moʻui aí pea iku ʻo hoko ʻo hangē ko Iá. ʻOku ʻomi ʻe Heʻene palaní ʻa e ngaahi tāpuaki maʻongoʻonga taha ʻo e taʻengatá kiate kitautolu, kau ai ʻa e malava ke tau hoko ko e ʻkaungā ʻea-hoko fakataha mo Kalaisíʼ [Loma 8:17].”
Haʻu, ʻo Muimui ʻIate Au, tā fakatātaaʻi ʻe Kolby Larsen, ʻoua naʻa hiki hano tatau
Ko e hā ʻoku tau fakahoko ai ha ngaahi fuakava mo e Tamai Hēvaní?
ʻOku tau foki ki heʻetau Tamai Hēvaní ʻaki hono fakahoko mo tauhi e ngaahi fuakavá. Ko e meʻa ʻeni ʻoku ui ʻe he kau palōfitá ko e ʻaʻeva ʻi he hala ʻo e fuakavá. Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku tau kamata fononga ʻi he halá ʻi heʻetau fou he matapā ʻo e papitaisó. … ʻI he fonongaʻanga ʻo e hala ʻo e fuakavá … ,ʻoku tau maʻu ai e kotoa ʻo e ngaahi ouau mo e ngaahi fuakava ʻoku fiemaʻu ki he fakamoʻuí mo e hakeakiʻí.”
Ko e hā ʻa e fuakava foʻou mo taʻengatá?
Ko e hingoa ʻe taha ki he fuakava faka-ʻĒpalahamé ko e fuakava foʻou mo taʻengatá. ʻOku foʻou ia ʻi he fakakaukau naʻe fakafoki mai ia ʻo fakafou ʻia Siosefa Sāmita ko e kakato ʻo e ongoongolelei ʻo Sīsū Kalaisí. ʻOku taʻengata ia he ko e fuakava tatau pē ia kuo fai ʻe he ʻOtuá mo ʻEne fānaú ʻi he taimi kotoa pē ʻoku loto-fiemālie ai ʻa e kakaí ke maʻu iá.
Ko e fuakava kotoa pē ʻoku tau faí ko ha konga ia ʻo e fuakava foʻou mo taʻengatá, kau ai ʻa e papitaisó, maʻu ʻo e Lakanga Taulaʻeiki Faka-Melekisētekí maʻá e houʻeiki tangatá, pea mo e ʻenitaumeni ʻi he temipalé mo e silá (mali taʻengatá).