Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní

Ko e Fanafana ʻOfa ʻa e Laumālie Māʻoniʻoní

Fai ʻe Barry Wells, ʻĀkenisoa, ʻIunaiteti Siteiti ʻo ʻAmeliká

Naʻá ku fakapapauʻi ʻoku ʻikai ke ʻi māmani ʻa e Siasi ʻo e ʻEikí, kae ʻoua kuó u fakatokangaʻi ʻa e ngaahi fua ʻo e Laumālié.

Tā fakatātā ʻa Michael J. Bingham

Naʻe ʻikai ke u tupu hake mo hoku uaifi ko Lupí ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka ʻi he kei finemui ʻa Lupí, naʻá ne vakaiʻi ha ngaahi siasi mo ha ngaahi akonaki kehekehe. Naʻá ne ʻiloʻi e ngaahi akonaki naʻá ne ongoʻi ʻoku moʻoní, ʻo fakafou ʻi haʻane lotu faivelenga maʻu pē, ʻo ne fokotuʻutuʻu ha ngaahi tui mei he ngaahi akonaki ʻa ha ngaahi siasi faka-Kalisitiane kehekehe. Naʻá ku tupu hake ʻi ha siasi pē ʻe taha pea naʻe siʻi ʻeku ʻilo ki ha toe siasi kehe.

Hili ʻema malí, naʻá ma maʻulotu fakataha, ka naʻe kamata ke u fehuʻia ʻa e tui naʻe ohi hake ai aú peá u ʻeke ki hoku uaifí ha ngaahi fehuʻi fekauʻaki mo e tokāteliné. Naʻá ne tali mai ʻi he fakapotopoto mo e mahinongofua, “Kuó ke ʻosi lau nai e Tohi Tapú?”

Naʻe teʻeki ai, ko ia ne ma lau fakataha ʻa e Tohi Tapú. ʻI heʻema laú, naʻá ku hiki hifo ha ngaahi fehuʻi naʻe teʻeki tali. Ne ma kamata fekumi ki ha siasi naʻá ne akoʻi e meʻa kotoa pē ne ma ʻiló. Lolotonga ʻo e taʻu ʻe ua hono hokó, naʻá ma ʻaʻahi ki ha ngaahi siasi lahi, kole ha ngaahi tohi, laukonga fekauʻaki mo e fakakaukau fakapotó mo e tui fakalotú, pea mo lotu. Naʻá ku tui fakapapau naʻe ʻikai ke ʻi he māmaní ʻa e Siasi ʻo e ʻEikí.

Naʻá ma masiva ʻi he potó pea naʻá ma fiemaʻu ha tokoni fakalangi (vakai, Siosefa Sāmita Hisitōlia 1:11–13). Ko ia, naʻá ma lotu fakataha fakamātoato, ʻo kole ki he ʻOtuá ke Ne fakahinohino mai ʻa e halá. Hili ha taimi nounou mei heʻema lotú, ne ʻasi mai ha ongo faifekau mei he Siasí ʻi homa matapaá. Naʻe ongoʻi ʻe Lupi ʻi he taimi pē ko iá ʻa hono moʻoni ʻo e meʻa naʻá na akoʻí. Naʻe ongo kia Lupi ʻena ngaahi akonakí pea naʻe fenāpasi ia mo e ngaahi tali naʻá ne maʻu ʻi he ngaahi taʻu lahi kimuʻá, ʻi he taimi naʻá ne lotu ai ʻi heʻene kei finemuí. Naʻe tali kotoa foki ʻe he ongo faifekaú ʻeku ngaahi fehuʻí, ka naʻá ku loto ke fakapapauʻi. Naʻá ku lau e Tohi ʻa Molomoná, Tokāteline mo e Ngaahi Fuakavá, mo e ngaahi tohi kehe ʻa e Siasí.

Naʻá ma maʻulotu foki ʻi he uike kotoa pē mo moʻui ʻaki ʻa e ngaahi akonaki ʻo e ongoongoleleí. Naʻe faifai peá u fakatokangaʻi ʻa e ngaahi fua ʻo e Laumālie ʻo e ʻOtuá ʻi heʻeku moʻuí (vakai, Kalētia 5:22) peá u maʻu ha fakamoʻoni mālohi. Naʻe papitaiso kimaua, maʻu ʻa e meʻa-foaki ʻo e Laumālie Māʻoniʻoní, peá ma sila kimui ange ʻi he temipalé.

Kuo teʻeki ai ke ma fakaʻiseʻisa ʻi he kau ki he Siasí. Kuó ne pukepuke ʻema nofo-malí ke mālohi lolotonga e ngaahi taimi faingataʻá, pea ʻoku hokohoko atu ʻi heʻema fānau ʻe toko onó ʻa e tukufakaholo ʻo e moʻui ofi ki he Laumālie ʻo e ʻOtuá.

Kiate kinautolu ʻoku fāifeinga ke maʻu ha fakamoʻoni ki he Tohi ʻa Molomoná pe Siasi ʻo Sīsū Kalaisi kuo fakafoki maí, te u pehē, “Hokohoko atu e lotú, laukongá, mo fakafanongo ki he ngaahi fanafana ʻofa ʻa e Laumālie Māʻoniʻoní.”