“Ko ʻEku Fiemaʻu ha Fakamoʻuí,” Liahona, ʻOkatopa 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko ʻEku Fiemaʻu ha Fakamoʻuí
Naʻe akoʻi au ʻe he Laumālié ʻo fakafou ʻi ha himi sākalamēniti fekauʻaki mo e foaki mo hono tali ʻo e fakamolemolé.
Tā fakatātā ʻa Michael J. Bingham
Naʻá ku tangutu ʻi he lotú ʻi ha Sāpate ʻe taha, mo ha loto-ʻita mo e loto-foʻi. Naʻá ku taʻefemahinoʻaki mo hoku husepāniti ko ʻĒloné ʻi he pō kimuʻá, pea naʻá ku haʻu ki he lotú ʻoku ou kei ongoʻi taʻefiemālie pē mo loto-mamahi. Naʻá ku kei ʻita pē kia ʻĒlone ʻi he kamataʻanga ʻo e houalotú ʻo aʻu ki he himi sākalamēnití mo fakakaukau, “ʻOku fiemaʻu ke ne kole fakamolemole mai.”
ʻI heʻemau teuteu ke maʻu ʻa e sākalamēnití, naʻe hivaʻi ʻe homau haʻofangá ʻa e himi “As Now We Take the Sacrament.” Naʻá ku kei ʻita pē ʻi he veesi ʻuluakí. Pea ʻi he kamata ʻa e veesi hono uá: “[ʻI heʻetau toe vakai ki he kuohilí, ʻoku tau ilo kuo pau ke tau fakatomala].”
Naʻe tuʻu ʻeku hivá. Naʻá ku fanongo ki he hokohoko atu e hiva ʻa hoku husepānití, fānaú, mo e kāingalotu ʻo e uōtí: “[Ko e hala ki he ʻafioná ko e māʻoniʻoni—ʻa e sīpinga hoʻo moʻuí].”
Naʻe molū hoku lotó. Mahalo ko ʻeku ongoʻi taʻefiemālié naʻe ʻikai fekauʻaki ia mo hoku husepānití. Mahalo naʻe fekauʻaki ia mo au.
Naʻe hoko atu ʻa e himí ʻo pehē:
[Ko e fakatomalá ko ha meʻaʻofa mei he ʻafioná
ʻOku tau kumia ʻi he loto-haohaoa.
ʻI he fakapapau ke fai hoʻo ngāué,
ʻOku mau maʻu ai ʻa e sākalamēnití.]
Kuó u loto-mamahi, lolotonga iá ʻoku fiemaʻu ke u loto-fakatōkilalo mo fekumi ki ha fakamolemole mei he Tamai Hēvaní—ko ha meʻaʻofa naʻe fakafaingamālieʻi ʻe Hono ʻAlo ko Sīsū Kalaisí.
Naʻá ku ongoʻi māfana ʻi heʻeku sio atu ki homau ʻotu seá ki heʻema fānau īkí. Naʻe mole kotoa ʻa e ʻita mo e mamahi kotoa pē naʻá ku ongoʻí, ʻa e tukuakiʻi mo e tāufehiʻa kotoa pē naʻá ne fakatupu ʻeku loto-ʻitá. Naʻe fekauʻaki ʻa e momeniti ko ʻení mo e meʻa naʻe fiemaʻu ke u fai ke u liliu ai kae lava ke u fekumi mo maʻu ha fakamolemole mei heʻeku Tamai Hēvaní mo Sīsū Kalaisí. Naʻe akoʻi mahino au ʻe he Laumālié ʻo fakafou ʻi ha himi fekauʻaki mo e fakamolemolé pea mo ʻeku fiemaʻu ke fakatou maʻu mo foaki iá.
Kuo pehē ʻe Palesiteni Lāsolo M. Nalesoni: “ʻOku ou kōlenga atu ke mou haʻu kiate Ia ke Ne lava ʻo fakamoʻui ʻa kimoutolu! Te Ne fakamoʻui ʻa kimoutolu mei he angahalá ʻi hoʻomou fakatomalá. Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení.”
ʻI heʻeku tangutu ʻo fanongo ki he fakalea ʻo e himí mo hono maʻu ʻo e sākalamēnití, naʻá ku ongoʻi ʻeku fiemaʻu ha fakamoʻuí, pea naʻá ku ʻiloʻi ʻa e meʻa naʻe fiemaʻu ke u tafoki ki aí. Naʻe ʻomi au ʻe he ngaahi moʻoni ne u ako fekauʻaki mo e fakamolemolé lolotonga e fakataha ko iá ke u ofi ange ai ki he ʻEikí mo hoku husepānití.