“Te Tau Ngāue Fakaetauhi Fēfē Nai ʻo hangē ko e Fakamoʻuí?,” Liahona, ʻOkatopa 2024.
Haʻu, ʻo Muimui ʻIate Au
Te Tau Ngāue Fakaetauhi Fēfē Nai ʻo hangē ko e Fakamoʻuí?
Naʻá Ne Fakamoʻui ha Ngaahi Mahaki Kehekehe, tā fakatātaaʻi ʻe J. Kirk Richards, ʻoua naʻa hiki hano tatau
Naʻe fakaafeʻi ʻe he Fakamoʻuí ʻEne kau ākongá ke nau tokoni ki he niʻihi kehé ʻo hangē ko ia naʻá Ne faí (vakai, 3 Nīfai 18:30; 27:21). ʻI Heʻene ʻaʻahi ki he kau Nīfaí, naʻá Ne ngāue fakaetauhi kiate kinautolu taha taha (vakai, 3 Nīfai 11; 17). Naʻá Ne ngāue fakaetauhi kiate kinautolu koeʻuhí he naʻá Ne ʻofa ʻiate kinautolu mo fiemaʻu moʻoni kinautolu—mo kitautolu takitaha—ke tau fiefia, ke tau maʻu ha ʻamanaki lelei, mo maʻu ʻEne fakafiemālié.
Ko ia ai, ʻi he taimi ʻoku tau feinga ai ke ngāue fakaetauhi mo hoko ko ha ākonga lelei ange ʻa Sīsū Kalaisí, ko e hā ʻoku totonu ke tau kamata aí?
ʻOku fakahaaʻi mai ʻe he sīpinga haohaoa ʻa e ʻEikí ko e ngāue fakaetauhí, ʻi hono uhouhongá, ʻoku mahulu hake ia ʻi ha ngāue pē ʻi he Siasí. Ko e ngāue fakaetauhí ko hono tokoniʻi ia ʻo e niʻihi kehé ʻo hangē naʻe mei fakahoko ʻe he Fakamoʻuí. Ko e ngāue fakaetauhí ko ha konga ia ʻo hono tauhi ʻetau fuakava ʻi he papitaisó (vakai, 2 Nīfai 31:13–14; Mōsaia 18:10, 13; Tokāteline mo e Ngaahi Fuakava 20:37). Kuo akoʻi kitautolu ʻe Palesiteni Lāsolo M. Nalesoni “ko e taha ʻo e founga faingofua taha ke ʻilo ai ha tokotaha muimui moʻoni ʻo Sīsū Kalaisí ko e manavaʻofa ʻa e tokotaha ko iá ki he kakai kehé” (“Fiemaʻu ha Kau Faʻa Fakalelei,” Liahona, Mē 2023, 98).
ʻI heʻetau feinga ke fakafonu hotau lotó ʻaki ʻa e manavaʻofa moʻoni lahi angé, te tau ʻilo kuo tau ofi ange ki he Fakamoʻuí—pea ofi ange ke hangē ko e Fakamoʻuí. Te ke fakatupulaki fēfē hoʻo manavaʻofá, lotua ʻa e niʻihi kehé, mo ngāue fakaetauhi ʻo hangē ko e Fakamoʻuí?
|
Ngaahi Founga Naʻe Ngāue Fakaetauhi Ai ʻa e Fakamoʻuí |
Te ke lava ʻo faʻifaʻitaki ki he Fakamoʻuí ʻaki … |
|
“ʻOku fonu hoku lotó ʻi he ʻofa mamahi kiate kimoutolu” (3 Nīfai 17:6). |
… hono maʻu ha manavaʻofa moʻoni ki he kakai ʻokú ke tokoniʻí? |
|
“ʻOmi ʻa kinautolu ki heni pea te u fakamoʻui ʻa kinautolu” (3 Nīfai 17:7). |
… hono poupouʻi ʻo e mahakí mo e faingataʻaʻiá? |
|
“Naʻa mau fanongo ai ki heʻene hūfekina ʻa kimautolu ki he Tamaí” (3 Nīfai 17:17). |
… hono lotua ʻa e niʻihi kehé? |
|
“ʻOku mou monūʻia koeʻuhí ko hoʻomou tuí. Pea ko ʻeni vakai, ʻoku kakato ʻa ʻeku fiefiá” (3 Nīfai 17:20). |
… ʻa e fiefia ʻi he taimi ʻoku tali ai ʻe kinautolu ʻokú ke ngāue fakaetauhi ki aí hoʻo tokoní? |
|
“Naʻá ne fua hake ʻa ʻenau fānau īkí, taki taha, ʻo ne tāpuakiʻi ʻa kinautolu” (3 Nīfai 17:21). |
… ʻa e tokanga ki he kakaí fakafoʻituitui mo tokoniʻi taha taha kinautolu? |