“Ko e Melinó ʻa e Maná,” Liahona, ʻOkatopa 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko e Melinó ʻa e Maná
Hili hoku siví, naʻá ma tokanga ki he ʻEikí koeʻuhí ke ma lava ʻo mamata ki homa ngaahi tāpuakí.
Tā fakatātā ʻa Michael J. Bingham
ʻI he taimi ne u ʻilo ai mo hoku husepāniti ko Tēvitá he ʻikai lava ke ma maʻu ha fānaú, naʻá ku tangi. ʻI he 2016 leva, naʻe fetuʻutaki mai ʻa e toketaá ke u foki ange ki hono ʻōfisí hili ha sivi fakafaitoʻo mo ha fakaʻata angamaheni. Hili ha ngaahi sivi lahi ange, ne hoko e meʻa naʻá ne ʻuluaki fakakaukau ko ha kiʻi palopalema siʻisiʻí ko ha palopalema lahi: kanisaá.
Ko ha meʻa fakaʻohovale ia, pea ne ma maʻu ha ngaahi ʻaho kovi. Kimuʻa peá ma ʻiloʻi e meʻa ʻe iku ki aí, naʻá ku talaange ki he Tamai Hēvaní, “Kapau ko e ngataʻanga ʻeni kiate aú, kātaki ʻo tokangaʻi ʻa Tēvita.”
Naʻá ku lava ʻo kātaki fakaeloto lolotonga ʻo e ʻahó, ka ʻi he hoko mai ʻa e poʻulí pea lōngonoa ʻa e meʻa kotoa peé, naʻe tō hoku loʻimatá. Ka ko e taimi foki ia naʻá ku ongoʻi ai ʻo fakafou ʻi he Laumālie Māʻoniʻoní ʻe lelei ʻa e meʻa koto pē—ʻo ʻikai koeʻuhí he te u moʻui ka koeʻuhí naʻe ʻi ai ʻa e Tamai Hēvaní. Ko ia, ʻi he lolotonga ʻo ʻeku faitoʻó, naʻá ma laka ki muʻa ʻi he foʻi laka takitaha.
Naʻe fakaʻau ke mahuʻingamālie ange ha ngaahi himi mo ha potufolofola ʻe niʻihi. Naʻe ongo moʻoni kiate au ʻa e Tokāteline mo e Ngaahi Fuakava 122:8: “Naʻe ʻalu hifo ʻa e Foha ʻo e Tangatá ʻo māʻulalo ange ʻiate kinautolu kotoa pē. ʻOkú ke lahi ange koe ʻiate ia?”
Naʻá ku ʻiloʻi, ʻoku ʻikai, ʻoku ʻikai ke u lahi ange au ʻiate Ia. Kapau naʻe hanga ʻe heʻeku foua e paʻá mo e kanisaá ʻo ʻai ke u lava ʻo fakahoungaʻi lelei ange ʻa e Fakamoʻuí mo ʻEne feilaulau fakaleleí, naʻá ku loto-fiemālie pē.
Naʻá ma tukutaha ʻema tokangá ki he ʻEikí koeʻuhí ke ma lava ʻo mamata ki homa ngaahi tāpuakí, kau ai ha timi tokoni fakaofo. Naʻe fakaʻofoʻofa ʻeku palesiteni Fineʻofá. Naʻe fakahoko ʻe he kakai mei he akoʻanga ne u faiako aí ha kiʻi lue fakaʻapaʻapaʻi ʻo e kanisaá maʻaku. Naʻe ʻomi ʻe haku kaungā-ngāue naʻá ne fiemaʻu ke u ʻiloʻi ʻokú ne tokangá ha peni lanu pingikī. ʻI he ngaahi momeniti peheé, ʻokú te pehē, “Naʻá ke hoko ko ʻeku ʻāngeló ʻi he ʻahó ni. Naʻá ke hoko ko ʻeku fakamoʻoni ʻoku ʻafioʻi ʻe he ʻOtuá ʻoku ou fiemaʻu ha fāʻofua pe peni lanu pingikī.”
ʻOku siofi kitautolu ʻe he kakaí ko e kāingalotu ʻo e Siasí. ʻOku nau fie ʻilo pe ko e hā ʻoku tau foua ai ʻa e ngaahi meʻa faingataʻá ka tau kei malimali peé.
Naʻe faʻa fehuʻi mai ʻe he kakaí, “ʻOku fēfē hoʻomo kei fakakaukau leleí?” Naʻá ma fakamatalaʻi ange ko e nonga naʻá ma ongoʻí naʻe maʻu ia mei heʻema tuí, mei heʻema ʻofa ki he Tamai Hēvaní, pea mo ʻema falala ki Hono finangalo maʻamauá. Naʻe fakamālohia kimaua ʻi hono vahevahe ʻema tuí.
Naʻe ʻikai hoko mai ʻa e nongá ʻi he taimi pē naʻe mahino ai hoku siví, ka naʻe hoko mai. Ko e melinó ʻa e maná.