“Fononga mo e ʻOtuá,” Liahona, ʻOkatopa 2024.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Fononga mo e ʻOtuá
“Taʻofi!” ko e kaila ia ʻa e sōtiá mo fakahanga ha meʻafana lahi ki heʻeku tamaí.
Tā fakatātā ʻa Michael J. Bingham
Hili e Tau Lahi ʻa Māmani Hono II, naʻe loto ʻeku ongomātuʻá ke kau fakataha mo e Kāingalotu ʻi ʻAmeliká. Ka naʻe fiemaʻu ke na ʻuluaki hola mo ʻena fānau ʻe toko nimá mei Siamane Hahake ki Siamane Hihifo.
Naʻe ʻalu toko taha pē ʻeku tamai ko Uolotaá ke fakapapauʻi ʻa e feituʻu naʻe malu taha ke kolosi ai ʻi he kauʻāfonuá. Naʻá ne fononga mo ha uta maʻamaʻa pē ka naʻá ne ongoʻi naʻe ueʻi ia ke ʻalu mo ʻene vaioliní. ʻI heʻene hoko ko ha taha tā vaiolini leleí, naʻá ne maʻu ha ueʻi fakalaumālie ʻe tokoni ʻene vaioliní ʻi heʻene fonongá.
ʻI Fēpueli ʻo e 1949, naʻe heka lēlue ai ʻa Teti ki ha kolo naʻe kei lau maile mei he kauʻāfonuá. Hili ʻene tūʻuta ki aí, naʻá ne mavahe mei he koló, ʻo ne fononga ʻi ha hala naʻe fakatau ki ha vaoʻakau. Ka ʻi ai ha taha ʻe maʻu ʻoku fononga ʻo fakahuʻunga ki he kauʻāfonua ʻo Siamane Hihifó ʻe ʻosi pehē pē ko ʻene hola pea ʻe puke pōpula ia.
Lolotonga e fononga ʻa Tetí, naʻá ne fakatokangaʻi ha tangata ʻe taha naʻe feinga ke hola ki Siamane Hihifo. Naʻá na fakakaukau ke na kaungā-fononga. ʻE lelei ange ke na kaungā-fononga ʻi he fononga toko tahá.
Naʻá na fononga tokanga atu ʻi heʻena fakalaka ʻi he taua leʻó. Fakafokifā pē kuo puna hake ha sōtia Lūsia mei ha vao ʻi muí ʻo kaila, “Taʻofi!”
Naʻe tuʻu maʻu ʻeku tangataʻeikí mo hono kaungāmeʻa foʻoú ʻi he ilifia ʻi hono fakahanga atu ʻe he sōtiá ha meʻafana lahi kiate kinaua. Naʻe talaange ʻe he sōtiá ʻe puke pōpula kinaua.
Naʻe fakaava māmālie hake ʻe he kaungāmeʻa foʻou ʻo ʻeku tangataʻeikí ʻene katoletá, ʻo ne fakaʻaliʻali ange ha ngaahi meʻakai lelei lahi. Naʻá ne talaange ki he sōtiá te ne lava ʻo maʻu kinautolu kapau te ne tukuange ke na ʻalu, ka naʻe ʻikai tokanga ki ai ʻa e sōtiá.
Naʻe talaange ʻe heʻeku tamaí ʻi he lea faka-Siamane naʻe ʻikai fuʻu lelei ʻokú ne manako ʻi he mūsika faka-Lūsiá. Naʻá ne tuhu ki heʻene kato vaioliní peá ne talaange ʻokú ne fie tā ha hiva maʻana.
Naʻe toʻo hake ʻe Teti ʻene vaioliní pea kamata ke ne tā ha foʻi fasi faka-Lūsia. Hili ha kiʻi taimi nounou, naʻá ne fakatokangaʻi ha loʻimata ʻoku ʻasi mei he fofonga ʻo e talavoú. ʻI he ʻosi hono tā ʻe Teti ʻa e fasí, naʻe ʻeke ange ʻe he sōtiá pe ʻokú ne ʻilo mo ha toe ngaahi foʻi hiva faka-Lūsia kehe.
Naʻe toe tā leva ʻe Teti ha fasi ʻe taha. ʻI he ʻosi ʻene taá, naʻe tangi ʻa e sōtiá. ʻI hono tukuhifo ʻe he sōtiá ʻene meʻafaná naʻá ne pehē ange ʻi he lea faka-Lūsiá, “Fononga mo e ʻOtuá.” Naʻá ne tuku leva ke hoko atu e ongo tangatá ki he Hihifó.
Naʻe ʻikai fuoloa kuo foki lelei mai ʻeku tangataʻeikí ki Siamane Hahake, mo fakamālō ʻi he ueʻi fakalaumālie naʻá ne maʻu ke maluʻi iá. Hili ha taʻu ʻe tolu mei ai, naʻá ne hola mo hono fāmilí ʻaki ʻenau fononga ki Pealini Hahake ʻo kolosi ʻi he kauʻāfonuá ki Pealini Hihifo.