“Naʻá Ku Fie Foki ki he ʻOtuá—ka Te U Lava Nai?,” Liahona, ʻOkatopa 2024.
Naʻá Ku Fie Foki ki he ʻOtuá—ka Te U Lava Nai?
Neongo naʻá ku tui kia Sīsū Kalaisi, ka naʻá ku tui he ʻikai lava ke fakamolemoleʻi au ʻi he meʻa kuó u faí.
Tā fakatātā ʻa Mark Smith
Naʻá ku tangutu ʻi hoku loki ʻi he mōtelé ʻi ha pō sinou ʻi Sānuali, mo ha loto-foʻi moʻoni. Ko ʻeku toki ʻatā mai ia mei pilīsone hili haʻaku ngāue pōpula ʻo laka hake ʻi he taʻu ʻe 34 koeʻuhí ko ha ngaahi hia mamafa mo ha fakalavea, pea naʻá ku fakakaukau ke fai ha meʻa ke toe fakafoki pē au ki he feituʻu ne u toki ʻi aí. Naʻe ʻikai ngāue ʻeku ngaahi palaní talu mei hono tukuange aú—pea ʻi he siʻisiʻi ʻeku ngaahi maʻuʻanga tokoní mo e hangē naʻe ʻikai tali ʻeku ngaahi lotú, naʻe hangē naʻe fakangatangata pē ʻa e ngaahi meʻa ke u fili mei aí.
Naʻe maʻu ʻeku tokangá ʻe ha ongo mei tuʻa. ʻI heʻeku sio ki tuʻa ʻi hoku matapā sioʻatá, naʻá ku fakatokangaʻi atu ʻoku sāvolo toko taha mai pē ʻe he tokotaha ʻaʻana ʻa e mōtelé ʻa e sinou ʻi he tauʻanga meʻalelé. Naʻá ku fakakaukau, “ʻOi, ʻoku ʻikai tonu ia,” ko ia ne u tokoni kiate ia. Naʻe ʻikai ke u fakakaukau lahi ki heʻeku ngāue tokoni ʻi he pō ko iá. Ka naʻá ku ʻohovale, ʻi he ʻaho hono hokó naʻe holoki ʻe he taha ʻaʻana ʻa e mōtelé ʻa e totongi ki hoku lokí. Pea lolotonga ʻeku nofo ai ʻi he uike ʻe nima hono hokó, naʻe ʻikai ke ne teitei ʻeke mai ʻa e totongi kakato ʻo ʻeku nofó.
Naʻe mahulu hake ʻene ʻofá ʻi ha tāpuaki fakapaʻanga naʻá ku fuʻu fiemaʻu moʻoni. Naʻe hoko foki ʻene angaʻofá ko ha tali ki heʻeku lotú ʻi he taimi ne siva ai ʻeku ʻamanakí. Naʻe fakafou ʻiate ia ʻa e mahino kiate au naʻe ʻafioʻi au ʻe he ʻOtuá—pea naʻe fiemaʻu ke u fai ha ngaahi meʻa ke u foki ai kiate Ia.
Ko ha Hala ke Foki Ai
ʻI he ngaahi taʻu lahi kimuʻa ʻi he pō Sānuali ko iá, naʻe ʻikai haʻaku fie fengāueʻaki mo e ʻOtuá. ʻI hono fakahū au ki he fale fakapōpula ʻa e siteití naʻá ku taʻu uongofulu mā ua pea naʻá ku loto-ʻita, mamahi mo puputuʻu, naʻá ku fai e meʻa kotoa pē naʻá ku lavá ke ilifiaʻi mo fakaʻapaʻapaʻi au ʻe hoku kaungā pōpulá. Naʻá ku tui foki he ʻikai lava pe totonu ke ʻofa ha taha ʻiate au—naʻa mo e ʻOtuá—koeʻuhí he naʻá ku tui ne u fakalaka ʻi ha tuʻunga he ʻikai lava ke u toe tafoki pea naʻe ʻikai ha ʻamanaki lelei ki hoku huhuʻí.
Kuó u ʻilo ʻeni naʻe hala ʻeku maʻú; te tau lava maʻu pē ʻo fakatomala pea foki ki he ʻOtuá. Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
“ʻOku loto ʻa Setane ke tau pehē ʻi he taimi kuo tau faiangahala aí, kuo tau fakalaka ʻi he ‘tuʻunga ʻo e tapu tafokí’—pea kuo fuʻu tōmui ke tau tafoki. …
“Ne hifo mai ʻa Kalaisí ke fakamoʻui kitautolu. Kapau ne tau fai ha meʻa hala, ʻe lava ke fakapapauʻi mai ʻe he Fakalelei ʻa Sīsū Kalaisí ʻoku ʻikai ha tuʻunga ia he angahalá ʻe tapu ke te toe foki mei ai. ʻE lava pē ha foki lelei mei ai ʻo kapau te tau muimui ki he palani ʻa e ʻOtuá maʻa hotau fakamoʻuí.”
Naʻe kamata ʻeku foki ki he ʻOtuá hili ha taʻu ʻe hongofulu tupu ʻeku nofo pilīsoné. Naʻe ʻomi ʻe haku kaungāmeʻa naʻe ʻaʻahi mai kiate au ʻi he fale pōpulá ʻi ha ngaahi taʻu lahi ha Tohi ʻa Molomona peá ne fakaafeʻi au ke u lau ia. Neongo naʻá ku palōmesi te u fai ia, ka naʻá ku toutou fakatoloi pē ia. ʻI he fakaʻosinga ʻo ha uike ʻe taha, naʻe ʻaʻahi mai hoku kaungāmeʻá ʻo ʻeke mai pe kuó u toʻo hake nai ʻa e tohí. ʻIo kuó u fai ia! Kuó u toʻo hake ia ʻi he taimi kotoa pē ʻoku ou fakamaʻa ai hoku kiʻi loki nofoʻangá. Ka naʻe teʻeki ai ke u lau ia—pea naʻe toki hoko ia ʻi haʻaku talanoa fakamātoato mo hoku kaungāmeʻá, ʻa ia naʻá ne fakamamafaʻi mai hono mahuʻinga ke u tauhi ʻeku palōmesí, pea faifai peá u kamata lau ia.
Naʻá ku ʻilo ha ngaahi talanoa mālie lahi ʻi he Tohi ʻa Molomoná, ka naʻá ku pehē loto pē ko ha ngaahi talanoa pē ia. Naʻá ku aʻu leva ki he Molonai 10:4. Te u tala atu pē naʻe ʻikai ke u fie “kole ʻi he loto-fakamātoato, mo e loto-moʻoni, ʻo maʻu ʻa e tui kia Kalaisi” pe naʻe moʻoni ʻa e tohí; naʻe ʻikai ke u fie fakakaukau ki he ngaahi nunuʻa ki ha taha hangē ko aú kapau naʻe moʻoni. ʻIkai ngata aí, kapau ko e folofola ʻeni ʻa e ʻOtuá, tā naʻe moʻoni ʻa e Fakalelei ʻa Sīsū Kalaisí, pea naʻá ku fehiʻa ke fakakaukau ki he founga kuo fakalahi ai ʻe heʻeku ngaahi tōʻongá ʻEne mamahí.
Ka neongo ia, ne u lotu. Naʻe ʻikai ke u sio ki ha meʻa-hā-mai pe fanongo ki ha leʻo ʻoku pehē mai ʻoku moʻoni ʻa e tohí. Ka ʻi heʻeku vakai atu ki tuʻa ʻi hoku matapā sioʻatá ʻi ha ʻaho tafitonga ʻo e faʻahitaʻu māfaná, naʻe ngaʻunu mai ha fuʻu konga ʻao lahi ʻi he langí. Naʻe ʻikai ha ʻuha—ko ha havili mālohi pē—pea hangē ko e vave ʻene ngaʻunu maí, naʻe toe fakalaka hake ʻa e konga ʻaó. Pea ne u ʻiloʻi ai. Hangē pē ko e palōmesi ʻa Molonaí, naʻe fakamoʻoniʻi ʻe he Laumālié ki hoku lotó ʻoku moʻoni ʻa e Tohi ʻa Molomoná—pea naʻe fiemaʻu ke u liliu.
Naʻe kamata ke u ako fakamātoato ange ʻa e folofolá pea naʻe fakaʻatā ai ke u kamataʻi ha kulupu ako ʻo e Tohi ʻa Molomoná mo hoku kaungā-pōpulá. Naʻe akoʻi foki au ʻe he ongo faifekaú fakataha mo ha niʻihi kehe ʻi he fale fakapōpulá. ʻI he taʻu ʻe 15 hono hokó, naʻá ku fanongo ai ki he ngaahi lēsoni ʻa e ongo faifekaú, pea ʻi he toenga ʻo hoku taimi ʻi he pilīsoné, naʻá ku feinga ke u moʻui ʻi ha founga kehe. Naʻe ʻikai faingofua ʻeni ʻi he ʻātakai ko iá. Ka naʻe malava ia koeʻuhí ko hoku Fakamoʻuí, ʻa ia naʻá Ne poupouʻi mo tataki au ʻi he aʻusia ko iá pea ki he sitepu hoko ʻo ʻeku moʻuí (vakai, Mōsaia 24:15).
Ko Hono Kolea ha Fakamolemolé
He ʻikai toe ngalo ʻiate au ʻa e ʻaho naʻá ku fetaulaki ai mo ʻeku pīsopé hili ʻa e pō fakataʻelata ko ia ʻi Sānuali ʻi hoku loki ʻi he mōtelé. Naʻe tokoniʻi au ʻe hoku kaungāmeʻa naʻá ne ʻomi kiate au ʻa e Tohi ʻa Molomoná ke u fetuʻutaki mo ia. ʻI heʻeku fakataha mo e pīsopé ʻi hono ʻōfisí kimuʻa he lotú, naʻá ku fakamatala ange fekauʻaki mo hoku kuohilí, pea naʻá ku mateuteu ke ne talamai ʻoku ʻikai ke nau fiemaʻu ha taha hangē ko aú ʻi honau uōtí.
Ka naʻá ne fakaafeʻi au ke u ʻalu ki he houalotu sākalamēnití.
Naʻá ku fai leva ia. Naʻá ku fakapapauʻi ʻe hāsino atu pē meiate au ko ha faihia au pea ʻi heʻeku hū atú, ʻe fakaʻehiʻehi ʻa e taha kotoa meiate au. Ka naʻe ʻikai ke hoko ia. Ka naʻá ku fetaulaki mo e kakai talitali lelei taha kuó u fetaulaki mo iá. ʻI he Sāpate hono hokó, naʻá ku toe ʻalu pē. Naʻe ʻikai fuoloa mei heʻeku kamata maʻulotú, naʻe kole mai ʻe ha tokoni ʻi he kau pīsopelikí pe te u fie lea fekauʻaki mo e fakamolemolé ʻi he houalotu sākalamēnití.
“ʻA au? Ke u lea fekauʻaki mo e fakamolemolé?” Ko ʻeku fehuʻí ange ia. Ka ʻi heʻene fakapapauʻi mai ko ʻene fakamātoató, ne u tali ke u lea. ʻI he taimi naʻá ku lea ai ki he haʻofangá, naʻá ku ʻiloʻi fakapapau te nau sio pē kiate au ko ha tokotaha naʻe faihia. Ka ko e fuoloa ange ʻeku leá, ko e lahi ange ia ʻeku loto-falalá, pea hili iá naʻe ʻofa ʻa e kāingalotu ko ʻení ʻiate au, naʻa nau fakafeʻiloaki kiate au ʻaki haʻanau fāʻofua mai kiate au pe lulululu mo au. Naʻá ku ongoʻi moʻoni ʻi he ʻaho ko iá ʻa e ʻuhinga ʻo e “ʻofa ki ho kaungāʻapí ʻo hangē pē ko koé” (Mātiu 22:39).
Kae hiliō aí, naʻe faifai pea mahino kiate au ko e taimi naʻe mamahi ai ʻa e Fakamoʻuí ʻi he Ngoue ko Ketisemaní pea tautaʻa toto ʻi he ava kotoa ʻo Hono kilí (vakai, Mōsaia 3:7; Tokāteline mo e Ngaahi Fuakava 19:18–19), naʻá Ne tautaʻa toto foki maʻaku. Naʻe hoko ʻeni ko ha liliuʻanga—neongo ne u tali ʻa e moʻoni ʻo e Tohi ʻa Molomoná pea kuó u fakaafeʻi ʻa Sīsū Kalaisi ki heʻeku moʻuí, ka naʻá ku tui he ʻikai fakaafeʻi au ki hēvani. He ʻikai lava ke fakamolemoleʻi au. Naʻe fakataumuʻa ʻEne Fakaleleí maʻá e tokotaha kotoa pē, kae ʻikai maʻaku—koeʻuhí ko e meʻa kuó u faí.
Ka ʻi he momeniti ko ʻení, naʻá ku ʻiloʻi ʻe lava ke fakamolemoleʻi au. Naʻe tokoniʻi au ʻe he ʻilo ko ʻení ke u laka ki muʻa ʻi heʻeku moʻuí. Hili ha ngaahi fakataha lahi ange mo e kau faifekaú, naʻe papitaiso au ʻi Māʻasi 2012—ko ʻeku fuofua sitepu ia ʻi he hala ʻo e fuakavá. Neongo naʻe ʻikai ke u pehē ʻe au kimuʻa ʻe malava, ka naʻá ku lava ʻo mali mo ha fefine lelei mei hoku uōtí. Naʻe silaʻi kimaua ʻi he Temipale Sōlekí ʻi Sune 2013.
Kuó u ako mo hoku uaifí ke ma tui kia Sīsū Kalaisi. ʻOkú ma fakafalala ki Heʻene Fakaleleí, ʻo tui “koeʻuhí ne ʻaʻeva toko taha pē ʻa Sīsū ʻi ha hala lōloa mo fakataʻelata, he ʻikai fiemaʻu ke tau toe foua ia ʻe kitautolu.” ʻI heʻetau hoko ko e faʻahinga ʻo e tangatá, ʻoku ʻikai ke tau haohaoa. ʻI he taimi ʻe niʻihi te tau tūkia—ʻo aʻu pē ki heʻetau tō. Ka neongo ʻetau fakakaukau ʻoku tau taʻetaau pe ʻikai toe lava ke fakahaofí, ʻoku ʻikai foʻi ʻa Kalaisi ʻiate kitautolu; ʻokú Ne finangalo maʻu pē mo mateuteu ke tokoniʻi kitautolu ke tau foki lelei ki ʻapi.