Fakaʻilekitulōnika Pē
Tui ʻo ʻikai ke Mamata—Ngaahi Fakakaukau mei he Kāingalotu ʻi he Funga ʻo e Māmaní
Te tau lava fēfē ʻo tui ki he Fakamoʻuí kapau ʻoku teʻeki ke tau mamata kiate Ia?
Naʻe hoko moʻoni ʻa e ʻaʻahi ʻa e Fakamoʻuí ki he kakai ʻo e Ongo ʻAmeliká ko ha meʻa liliu moʻui maʻanautolu kotoa naʻa nau sio tonu ʻi Heʻene ngaahi ngaahi maná. Ka ʻoku maʻu fēfē ʻe kinautolu naʻe teʻeki ai pē ke nau mamata kia Sīsū Kalaisí ha fakamoʻoni fakataautaha kiate Ia?
Meʻamālié, naʻe fekauʻi ʻe he Fakamoʻuí ʻa e kakai naʻá Ne ʻaʻahi ki aí ke hiki ʻenau ngaahi aʻusiá ke fakamālohia ʻa kinautolu he ʻikai ke nau mamata kiate Iá (vakai, 3 Nīfai 16:4). Pea neongo he ʻikai mamata ʻa e tokolahi taha ʻo kitautolú ki he Fakamoʻuí ʻaki hotau mata fakatuʻasinó, ka naʻe akoʻi ʻe ʻEletā Tēvita B. Haiti (1906–2004) ʻi he taimi te tau mamata ai ki he Fakamoʻuí, ʻoku lahi ha “ngaahi ʻuhinga ʻo e foʻi lea ko e mamatá, hangē ko e kamata ke maheni mo Ia, ʻiloʻi Ia, fakatokangaʻi Ia mo ʻEne ngāué, ʻiloʻi Hono mahuʻingá, pe kamata ke Ne mahino lelei kiate kitautolu.”
Ko ia, ko e hā leva ʻa e meʻa ʻokú ne tokoniʻi koe ke ke maʻu ha fakamoʻoni ki he Fakamoʻuí mo ʻEne ongoongolelei kuo fakafoki maí, neongo kapau ʻoku teʻeki ke ke mamata fakatuʻasino kiate Ia?
Ko ha ngaahi tali ʻeni ʻe niʻihi mei he kāingalotu ʻi he funga ʻo e māmaní:
Ko Hono Fakamoʻoniʻi ʻo e Ola ʻo ʻEne Ngaahi Akonakí
“ʻOku hoko ʻa e nonga mo e fiefia ʻoku maʻu ʻi he muimui ki Heʻene ngaahi akonakí ko ha fakamanatu maʻu pē ʻo Hono ivi tākiekiná ʻi heʻeku moʻuí. ʻOku faʻa poupouʻi ʻa e tui kia Sīsū Kalaisí ʻe ha ngaahi aʻusia fakataautaha, fakapapau fakalaumālie, ako ʻo e folofolá, lotú, feohi fakakoló, mo fakamoʻoniʻi ʻa e ola lelei ʻo ʻEne ngaahi akonakí ʻiate kita mo e niʻihi kehé.”
Nefi Siteitī, Pounea, Hōlani Kalipiané
Moʻui ʻi he Tuí
“ʻOku ʻuhinga ʻa e tui ʻo ʻikai ke mamatá ki he moʻui ʻi he tuí. Mahalo te tau ongoʻi ʻoku ʻahiʻahiʻi kitautolu ke tau fehuʻi ki he ʻEikí pe ʻokú Ne ʻi ai moʻoni koā, ka ʻoku ou tui moʻoni ʻoku tau ofi taha ki he ʻEikí ʻi he taimi ʻoku tau ngāue ʻaki ai ʻa e tuí. Neongo ʻoku teʻeki ke u mamata kiate Ia, ka ʻoku ou kei ʻiloʻi pē hoku tuʻunga ko ha ʻofefine au ʻo e ʻOtuá mo ha ākonga ʻa Sīsū Kalaisi. Ko Ia ʻa hoku Fakamoʻuí, pea ʻoku ʻikai ke teitei ngata ʻEne ʻofá. Te u lava ʻo moʻui ʻaki ʻa e tuí, ʻo ʻikai mamata.
“Naʻá ku ako ʻo kau ki he moʻoni ʻo e ongoongoleleí ʻi hoku taʻu 19. Koeʻuhí ko ʻeku tuí, ʻoku mohu tāpuekina ʻeku moʻuí ʻi he taimí ni. ʻOku tāpuekina ʻeku moʻuí ʻe he ngaahi folofolá, ngaahi akonaki mei he kau palōfitá, mo e ngaahi lea ʻoku lea ʻaki ʻi he konifelenisi lahí ʻi he ʻaho kotoa pē pea ʻokú ne ʻomi kiate au ha loto-toʻa ke hokohoko atu ʻeku tuí. Neongo ʻoku ʻikai ke u lava ʻo mamata kia Kalaisi, ka ʻoku ou mamata ki Heʻene māmá ʻi heʻeku moʻuí.”
ʻAni Vū, Hanoi, Vietinemi
Ko e Falala ki he ʻOtuá lolotonga ʻa e Ngaahi Taimi Faingataʻá
“Naʻe akonaki ʻa e ʻAposetolo ko Paulá ʻo pehē, ‘Ko e tuí ko e tuʻunga ia ʻo e ngaahi meʻa ʻoku ʻamanaki lelei ki ai, ko e fakamoʻoni ʻo e ngaahi meʻa taʻe hā mai’ (Hepelū 11:1). ʻI he taimi ʻoku tau tui ka ʻoku ʻikai ʻi ai ai ha fakamoʻoní, ʻoku tau fakaʻatā kitautolu ki ha ngaahi tuʻunga malava ʻoku ʻikai hano ngataʻanga. Te u pehē, ko e tuí ko ha fakamoʻoni ia ki ha mālohi ʻo ʻetau uluí, pea ʻoku fakatupulaki ʻe he ʻilo ko iá ʻeku malava ke fakakaukau fakasilesitialé.
ʻI Sune ʻo e 2023, naʻa ku tō ʻo fasi lahi hoku tuiʻinimá lolotonga ʻa e mamaʻo hoku husepanití ʻi ha fatongia fakalotu ʻi ʻIukanitā. Naʻe tokoniʻi lahi au ʻe hoku fāmilí mo e ngaahi kaungāmeʻá. Ka ʻi he taimi naʻá ku fakatokangaʻi ai ʻa e lahi ʻo e tokoni naʻá ku fiemaʻu ke fai ʻaki ʻa e fanga kiʻi meʻa faingofuá, naʻe lōmekina au ʻe ha ongoʻi fakaʻofaʻia pē ʻiate au. Naʻe fakamanatu mai ʻe hoku ʻofefiné ʻoku ʻafioʻi kimautolu ʻe he ʻOtuá pea ʻoku fiemaʻu ke u falala ki he ʻEikí.
Naʻe hanga ʻe heʻeku falala ki he ʻOtuá lolotonga ʻa e taimi faingataʻa ko iá ʻo ʻomai ha ʻamanaki lelei kiate au, ʻo fakaʻatā au ke u tui he ʻikai ke Ne tuku mai ha faingataʻa lahi ange ʻi he meʻa te u malava ʻo matuʻuakí. ʻI heʻeku ʻiloʻi ʻoku ou maʻu maʻu pē ʻa Hono Laumālié, naʻá ku maʻu ai ha ʻamanaki lelei mo ha nonga lolotonga ʻa e ngaahi taimi faingataʻá. Ko e hili ʻeni ha māhina ʻe fitu mei ai, pea ʻoku ʻikai loko ʻilonga naʻá ku kafo.”
Sosefina Petitō, Nailopi, Kēniá
Ko Hono Fakatokangaʻi Hono Ivi Tākiekiná ʻi he Niʻihi Kehé
“Kuó u mamata ki he ivi tākiekina ʻo e ʻEikí ʻi heʻeku moʻuí ʻo fakafou mai ʻi he niʻihi kehé. ʻOku ʻi ai ʻa e ngaahi taimi ʻoku ou ongoʻi ai hangē ʻoku ʻafioʻi ʻe he ʻEikí ʻa ʻeku faingataʻaʻia ke tui ʻoku lelei pe faitotonu ha taha ʻi he taimi ʻoku ʻikai ke mahino ai ʻoku moʻoni pe ʻikaí. Ka ʻi heʻeku vakai ki heʻeku moʻuí, naʻá ku lava ke fakatokangaʻi ʻa Hono ivi tākiekiná mei he niʻihi kehe kuo nau tokoniʻi au ke u ako ke falala kiate au mo sio kiate au ʻo tatau mo e anga ʻo ʻEne ʻafio mai kiate aú.
“ʻOku ou sio ki he tokoni ko ia mei he ʻOtuá ʻoku fakafou mai ʻi heʻeku ongomātuʻa naʻá na ohi hake aú, hoku ngaahi kaungāmeʻa naʻa nau tokoniʻi au ʻi he ngaahi feliliuaki ʻi he ʻunivēsití, hoku ngaahi hoa ngāue fakafaifekau naʻa nau tataki au ʻi heʻeku ngāue fakafaifekaú, pea mo ʻeku kau palōfesa ʻi he kolisí naʻa nau tokanga moʻoni ki heʻeku akó mo e tuʻunga leleí.
“Ko e taimi kotoa pē ʻoku nau tokoniʻi ai aú, ʻoku ou ongoʻi ʻoku ʻi ai foki mo e Fakamoʻuí.”
Maikolo ʻAvalosi, ʻAitahō, USA
Falala ki Heʻene Taimí
“Kuo tuʻo lahi ʻeku mamata ki he toʻukupu ʻo e ʻEikí ʻi heʻeku moʻuí, ka ʻoku maʻu ʻeku fakamoʻoni lahi tahá mei ha faingataʻa naʻá ku kātekina ʻi ha taʻu ʻe 10.
Naʻa ku feitama ʻi hoku ʻofefine fika uá ka naʻá ku tamatō pē ʻi he uike hono fitú. ʻOku ou manatuʻi ʻeku tangi mo tautapa ki he ʻEikí mo fakakaukau, ʻKo e moʻoni ʻoku ʻi ai ha palani lahi ange ʻa hotau Fakamoʻuí ki he pēpeé ni ʻi he meʻa ʻoku ou fiemaʻu ʻi he taimi ní.’ Naʻá ku toe feitama ʻi he taʻu hono hokó ka naʻá ku toe tamatō pē. Naʻá ku fehuʻi ʻo pehē, ‘Ko hoku ʻOtua, ko e hā kuó ke liʻaki ai aú?’ (Mātiu 27:46).
Naʻe faifai atu pē pea hoko ha mana ʻo u toe feitama ʻo fanauʻi mai ha kiʻi pēpē fefine moʻui lelei.
Ka naʻe ʻikai ke ʻosi ai ʻa e faingataʻa ko ʻení. Ko e meʻapangó, he naʻá ku toe tamatō hokohoko tuʻo fā.
Hili ʻeku hiki ki ha feituʻu foʻou ʻo maʻu ha kautaha faitoʻo foʻou, naʻe ʻiloʻi ai ko ʻeku palopalemá ko e ʻau totó. Mei he fakamatala ko ʻení, naʻá ku faʻufaʻu leva mo ʻeku toketaá ha palani. Naʻá ku toe maʻu ha fānau matuʻaki moʻui lelei e toko ua!
ʻOku haohaoa ʻa e taimi ia ʻa e ʻEikí. Ko e lēsoni faingataʻa taha ʻeni kuó u fou mai aí. ʻOkú Ne teuteuʻi ho halá pea tuku mai ha kakai mo ha ngaahi aʻusia ki hoʻo moʻuí ke ne fakamālohia koe.”
Viki Masano, Veisinia, USA