“Ngaahi Lea ʻOku Ongo ki he Lotó,” Liahona, ʻOkatopa 2024.
Ngaahi ʻAta ʻo e Tuí
Ngaahi Lea ʻOku Ongo ki he Lotó
Mei hoku fakafeʻiloaki ki he Siasí ki he ngāue ʻoku ou fai ke tokoniʻi ʻa e Kāingalotú ke nau fanongo mo hivaʻi e ngaahi himí ʻi heʻenau lea fakafonuá, kuo mahuʻinga moʻoni ʻa e mūsiká ʻi heʻeku moʻuí pea kuo hoko ia ko ha tāpuaki maʻongoʻonga ʻi hoku fāmilí.
Faitā ʻa Christina Smith
Kuo hoko maʻu pē ʻa e hivá ko ha konga mahuʻinga ʻo ʻeku fakamoʻoní. Naʻe fakafou hoku fuofua fakafeʻiloaki ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha ngaahi fāmili ne nau fakatahataha ʻo hivaʻi ʻa e himi “Fānau Au ʻa e ʻOtuá” (Ngaahi Himí, fika 193). Naʻá ku fakakaukau, “ʻOku hangē ʻeni ko hēvaní he ʻoku nau fuʻu fiefia. ʻOku peheni ʻa e ngaahi fāmili fiefiá.”
Kiate aú, ko e konga fakaʻofoʻofa taha ʻo e ongoongoleleí ko e ngaahi fāmilí. ʻI he taimi ʻoku ou fakakaukau ai ki he meʻa kotoa pē naʻe fiemaʻu ke hoko ki hoku fāmilí ke nau ʻilo ʻa e ongoongoleleí, ʻoku ou manatu ai ʻoku ʻi ai ha palani ʻa e ʻOtuá maʻá e fāmili kotoa pē.
Mei Pēma ki ʻInitia
Ko ʻeku faʻeé mei Pēma, ka koeʻuhí ko e moveuveu fakapolitikalé, naʻá ne hola ai ki ʻInitia mo ʻene ongomātuʻá mo hono ngaahi tokoua ʻe toko tolú. Naʻa nau siʻaki ʻa e meʻa kotoa pē. Meʻapangó, he naʻe hili ʻenau tūʻuta ki ʻInitiá, naʻe mālōlō e ongomātuʻa ʻa Mamí. ʻI he hoko ʻeku Mamí ko e lahi tahá, naʻe pau ke ne tokangaʻi hono ngaahi tokoua ʻe toko tolú.
Ne iku ʻo nofo ʻa e fānaú ʻi ha nofoʻanga maʻá e kau paeá. ʻI he taʻu 18 ʻeku fineʻeikí, naʻá ne fakakaukau ke ʻalu ki Niu Teli ʻo kumi ha ngaahi faingamālie lelei ange maʻana mo hono ngaahi tehiná. Naʻe fakafeʻiloaki ai ia kia ʻAsima Sauteli, ko e puleako ʻo ha ʻunivēsiti ʻoku nau tokoniʻi ʻa e kau finemuí. Naʻe ʻave ʻe ʻAsima ʻeku faʻeé ʻo tauhi peá ne hoko ia ko e faiako ʻeku fineʻeikí. Hili e ʻosi ʻeku faʻeé mei he ʻunivēsití, naʻá ne hoko ko ha tokoni kia ʻAsima. Naʻe fakaʻau ke na vāofi ʻaupito.
Ko ha fānau ʻe toko 10 naʻe haʻu mei ai ʻa ʻAsimá, ko e siʻisiʻi taha ʻiate kinautolú ko Lesa, naʻe ʻikai talanoa ha taha fekauʻaki mo ia. Naʻe lau ia ko e fakakina taha ʻi he fāmilí. Naʻe kau ʻa Lesa ki he Siasi kuo fakafoki maí hili ʻene feʻiloaki mo e kau faifekau taimi kakató lolotonga ʻene ako ʻi ha ʻunivēsiti ʻi ʻIngilani. ʻI he taimi ko iá, naʻá ne hoko ko ha mataotao fakaako Mosilemi, pea ʻi he taimi naʻá ne mavahe ai mei he ʻIsilamí ke kau ki he Siasí, ko ha ha fili faingataʻa ia.
Lolotonga ʻa e nofo ʻa Lesa ʻi Tolonitō, Kānatá, naʻá ne misi ʻoku fiemaʻu ke ne foki ki ʻInitia ʻo fetuʻutaki ki hono tuofefine ko ʻAsimá. Kimuʻa peá ne folaú, naʻá ne misi foki fekauʻaki mo ha fefine naʻe teʻeki ke na fetaulaki. Koeʻuhí naʻá ne sio maʻu pē ki hono fofongá ʻi heʻene ngaahi misí, naʻá ne ongoʻi ha fiemaʻu vivili ke foki ki ʻInitia.
Ka neongo ia, naʻe hohaʻa ʻa Lesa, koeʻuhí naʻe fehiʻanekinaʻi ia ʻe hono fāmilí. Ka ʻi heʻene fetuʻutaki kia ʻAsima ʻi Niu Telí, naʻe talaange ʻe ʻAsima, “ʻOku ou ʻofa atu kiate koe. ʻOku totonu ke ke haʻu.”
Naʻe ʻikai ke ʻi Niu Teli ʻeku fineʻeikí ʻi he taimi ko iá, ko ia naʻe tā ʻa ʻAsima ki ha taha ʻo e ngaahi tokoua ʻeku faʻeé ko ʻAsia. Naʻá ne kole ange “Te ke lava nai ʻo haʻu? ʻE lelei ange kapau ʻe ʻi heni ha kakai kehe ke ʻoua te ma kē.”
Ko ia, naʻe ʻalu leva ʻa ʻAnitī ʻAsia. ʻI heʻene aʻu atú, naʻe fakatokangaʻi ia ʻe Lesa he taimi pē ko iá ko e fefine ʻi heʻene ngaahi misí. Naʻe vave ʻena feʻofaʻakí peá na mali. ʻI heʻena hiki ki Tolonitoó, naʻe kamata ke fehuʻi ange ʻe heʻeku ʻAnitī ko ʻAsiá kia Lesa fekauʻaki mo e Siasí, ʻuhinga naʻá ne mavahe ai mei ʻInitiá, pea mo e ʻuhinga naʻá ne loto-fiemālie ai ke fehiʻanekinaʻi ia ʻe hono fāmilí.
Naʻe tali ʻe Lesa ʻene ngaahi fehuʻí mo vahevahe ʻene fakamoʻoni ki he ongoongolelei kuo fakafoki maí. Naʻe ʻikai fuoloa kuo kau mo e tokoua ʻeku faʻeé ki he Siasí.
Mei toʻohema ki toʻomataʻu: faʻē ʻa Tahilá ko Seni Seni Nu; ko Lesa Sā; ko e tokoua ʻene faʻeé ko ʻAsia Sā; Tahila ʻi heʻene kei finemuí; pea mo ʻAsima Sauteli.
“ʻOku ou Fie ʻIlo Lahi Ange”
ʻI he taimi ko iá, naʻá ku nofo mo ʻeku fineʻeikí ʻi Niu Teli. Naʻá ku feohi vāofi mo ʻAsia, pea ʻi hoku taʻu 11, naʻá ku ʻalu ke ʻaʻahi kiate ia mo Lesa ʻi Tolonitō ʻi he faʻahitaʻu māfaná. Lolotonga ʻeku ʻi aí, naʻe fakaafeʻi au ʻe ʻAsia ki he lotú. ʻI heʻeku fuofua maʻulotú, naʻá ku saiʻia ke sio ki hono hivaʻi fakataha ʻe he ngaahi fāmilí ʻa e ngaahi himí. Kuo teʻeki ai ke u aʻusia ha meʻa pehē.
“Ko e hā ʻa e feituʻú ni?” Naʻá ku ʻeke ange kia ʻAsia hili ʻa e fakatahá. “ʻOku fiefia mo anga fakakaumeʻa e taha kotoa. ʻOku ou fie ʻilo lahi ange.”
Naʻe haʻu ha ongo sisitā ʻo akoʻi mai ʻa e ngaahi lēsoní. Naʻá ku ʻiloʻi naʻá ku fie kau ki he meʻa naʻá ku akó. Naʻá ku fiefia ʻi he ongoongoleleí, pea naʻá ku fie kau ki he Siasí, ko ia naʻá ku kau leva ki ai.
Tahila mo e tokoua ʻene fineʻeikí ko ʻAsiá ʻi hono papitaisó, ko Lesa, pea mo Sisitā Seini Lousa, ʻa ia naʻá ne akoʻi ʻa e ongoongoleleí kia Tahilá.
Naʻá ku ako nofomaʻu ʻi heʻeku kei tupu haké, ko ia ne faʻa taimi lōloa ʻeku tutuku ʻi he faʻahitaʻu māfaná. Naʻe ngāue ʻeku faʻeé pea naʻe māvae ʻeku ongomātuʻá, ko ia ne u kamata ʻalu leva ki Kānata ʻi he faʻahitaʻu māfaná. Naʻe hangē pē ʻa ʻAsia mo hono husepānití ko ha ongomātuʻa hono ua kiate aú.
Naʻe saiʻia ʻa Lesa, ʻa ia ko ʻene haʻú mei Pakisitani, ʻi hono liliu ʻo e ngaahi himi ʻa e Siasí ki he lea faka-Hinitií mo e faka-ʻEitú. Naʻa mau faʻa hivaʻi ʻi he houalotu sākalamēnití ʻa e ngaahi himi naʻá ne ʻosi liliú.
Ko Lesa, ʻa ia ʻoku hā ʻi ʻolunga mo e tokotaha faʻutohí, ʻi hono liliu ʻo e ngaahi himi ʻa e Siasí ki he lea faka-Hinitií mo e faka-ʻEitú. ʻOku pehē ʻe Tahila, “ʻI he houalotu sākalamēnití, naʻa mau faʻa hivaʻi ʻa e ngaahi himi naʻá ne liliú.”
Naʻe faifai pea fie ʻilo lahi ange ʻeku faʻeé ki he siasi kuo kau ki ai hono ʻofefiné mo hono tokouá. Naʻá ne feʻiloaki mo e ongo faifekaú pea naʻe ʻikai fuoloa kuó ne papitaiso ia. Naʻe fakapapauʻi ʻe heʻeku faʻeé mo hono tokouá naʻá ku ʻalu ki Tolonitō ʻi he faʻahitaʻu māfana kotoa pē ke u lava ʻo ʻalu ki he lotú mo kau ʻi he ngaahi ʻekitivitī ʻa e Siasí.
ʻI he hokosia e taimi ke u fili ai ha ʻunivēsití, naʻe tokoniʻi au ʻe ʻAsia mo hono husepānití ke u hū ki he ʻUnivēsiti Pilikihami ʻIongí, ʻa ia ne u fetaulaki ai mo hoku husepānití, ʻa ia ʻoku haʻu ia mei ʻĀsenitina. ʻOku ou faʻa fakakaukau ki he meʻa ʻokú ne fakatahatahaʻi hotau ngaahi fāmilí. Koeʻuhí ko e Siasí, naʻe fetaulaki ai ha talavou mei ʻĀsenitina peá ne mali mo ha finemui mei ʻInitia.
ʻI he hoko ʻa Tahila ko e supavaisa ʻo e hivá ʻi he timi liliu himi ʻa e Siasí, ʻokú ne pehē ai, “ʻOku ou vahevahe ʻa e ongoongoleleí ʻo fakafou ʻi he ngaahi himí.”
Faitā ʻa Christina Smith
Ko ha Tukufakaholo ʻo e Mālohí mo e Fakamoʻoní
ʻI he ʻaho ní, ko au ʻa e supavaisa ʻo e hivá ʻi he timi liliu himi ʻa e Siasí. ʻOku ou ngāue ki ha ngaahi polōseki ʻi ha ngaahi lea fakafonua kehekehe ʻe ono. ʻOku ou lolotonga ngāue ki hono liliu ʻo e ngaahi himí ki he lea faka-Nepoló mo e Pēmisí, ʻa ia ko e lea fakafonua ia ʻa ʻeku faʻeé. ʻOku fakafiefia mo mahuʻinga ia. ʻOku ou ngāue foki ki he lea faka-ʻAmalikí mei ʻItiopea, faka-Tuí mo e faka-Fanité mei Kana, mo e faka-Sinihalá mei Sulī Langikā.
ʻOku ou saiʻia ʻi heʻeku ngāué koeʻuhí he kuó u toe foki ki he mūsiká ko e meʻa ne u manako ai kimuʻa ʻi heʻeku moʻuí. Naʻe hoko ʻa e mūsiká ko hoku fakafeʻiloaki ia ki he Siasí. ʻOku ou fakakaukau ʻi he taimí ni pe ko e kakai ʻe toko fiha ʻe fanongo ki he ngaahi himí ʻi honau lea fakafonuá pea nau maʻu ha ueʻi fakalaumālié. ʻOku ou vahevahe ʻa e ongoongoleleí ʻo fakafou ʻi he ngaahi himí, pea ʻoku mahino kiate au ʻa e founga ʻoku fakahoko ai ʻe heʻeku ngāué ʻa e ngaahi talaʻofa naʻe fai ʻi hoku tāpuaki fakapēteliaké.
Kuo mālōlō ʻa e tokoua ʻeku faʻeé mo hono hoá, ka ʻoku ou ongoʻi ʻi he ngaahi himí ʻa e tukufakaholo ʻo hona mālohí mo e fakamoʻoní. Naʻe manako ʻa Lesa ke vahevahe ʻene fakamoʻoní ʻi he hivá.
Naʻá ne pehē, “ʻE ʻi ai e ʻaho ʻe fanongo mo hivaʻi ai ʻe he kāingalotu ʻo e Siasí ʻa e ngaahi himi ko ʻení ʻi heʻenau lea fakafonuá. ʻE mahino ki he kakaí ʻa e meʻa ʻoku lea ʻaki ʻe he ngaahi himí, pea ʻe ongo ʻa e ngaahi leá ki honau lotó.”
ʻOku ou kau ʻi he ngāue ko iá. Kuo hoko ia ko ha tāpuaki maʻongoʻonga ki hoku fāmilí.
Ko e tokotaha faʻutohí mo hono fāmilí ʻi honau ʻapí ʻi Peisoni, ʻIutā, ʻIunaiteti Siteiti ʻo ʻAmeliká.
Faitā ʻa Christina Smith