“Sōsiua ko e Paionia,” Ko e Kaumeʻá, ʻOkatopa 2024, 10–11.
Sōsiua ko e Paionia
Naʻe pehē ʻe Teti, “Ko e paioniá ko e fuofua tokotaha ia ke ne fai ha meʻa.”
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe hopohopo ʻa Sōsiua ʻi he saitiuoká ʻi heʻene lue mo hono fāmilí ki ʻapi mei he lotú. Naʻá ne pehē ange, “Mateʻi mai ha meʻa? ʻOku ou lea he Palaimelí ʻi he Sāpate kahaʻú!”
Naʻe pehē ange ʻe Mami, “Ko e Sāpate hokó ko e ʻAho Paioniá ia, ko e taimi ia ʻoku tau fakamanatu ai ʻa e kau paionia naʻa nau omi ki he Teleʻa Sōlekí. Mahalo te ke lava ʻo lea fekauʻaki mo e kau paioniá.”
Naʻe maʻu ai ʻe Sōsiua ha fakakaukau. ʻI heʻene aʻu ki ʻapí, naʻá ne huke hake ʻa e makasini Ko e Kaumeʻá. Naʻá ne sio ʻi ha ʻekitivitī “Tā Fakatātā” naʻe fakaʻaliʻali ai e founga ke tā ha saliote fakafale mo ha fanga pulu, ʻo hangē ko e meʻa naʻe fakaʻaongaʻi ʻe he kau paioniá ʻi heʻenau kolosi ʻi he ngaahi toafa tokaleleí. Naʻá ne loto ke tā ha fakatātā ʻo e kau paioniá ke ne pukepuke lolotonga ʻene leá. Naʻe toʻo hake ʻe Sōsiua ʻene ʻū kalá peá ne ngāue leva.
Hili e tā fakatātā ʻa Sōsiuá, naʻe tokoniʻi ia ʻe Teti ke ne hiki ʻene malangá. “Ko e hā e meʻa ʻokú ke fie lea ʻaki fekauʻaki mo e kau paioniá?” Ko e fehuʻi ange ia ʻa Tetí.
Naʻe manatuʻi ʻe Sōsiua ha foʻi hiva naʻa nau ako ʻi he Palaimelí fekauʻaki mo e kau paioniá. Naʻá ne pehē ange, “Ko e kau paioniá ko ha kakai ia naʻe lue mo lue mo lue.”
Naʻe pehē ange ʻe Teti, “ʻOkú ke moʻoni! Naʻe lue mamaʻo ʻaupito ʻa e Kāingalotu naʻa nau kolosi ʻi he ngaahi toafa tokaleleí. Ka naʻá ke ʻiloʻi nai ko ha paionia foki mo koe?”
Naʻe mataʻi fakafehuʻi ʻa Sōsiua. “Koeʻuhí ʻoku ou faʻa lue ki he akó he taimi ʻe niʻihi?”
Naʻe kata ʻa Teti. Naʻá ne pehē ange, “Ko e paionia koe koeʻuhí ʻokú ke fai ha ngaahi meʻa faingataʻa. Pea ʻokú ke fili ki he totonú, neongo ʻoku ʻikai ke faingofua maʻu pē ia.”
Naʻe pehē ange ʻe Sōsiua, “Fakalata.” Naʻe ongo makehe ʻa e hoko ko ha paioniá!
Naʻe pehē ange ʻe Teti, “Ko e paioniá ko e fuofua tokotaha foki ia ke ne fai ha meʻa. ʻI he taimi naʻá ke hoko ai ko ha konga ʻo homau fāmilí, naʻá ke ako ai fekauʻaki mo e ongoongoleleí peá ke fili ke muimui ʻia Sīsū Kalaisi. ʻOkú ke hoko leva ai ko ha paionia foki!”
Naʻe pusiakiʻi mai ʻa Sōsiua. Naʻá ne kei ʻaʻahi pē ki hono fāmili totonú pea fai mo ha ngaahi meʻa fakafiefia mo kinautolu. Ka ʻi heʻene haʻu ke nofo mo Mami mo Tetí, naʻá ne ako ai fekauʻaki mo Sīsū Kalaisi pea mo e Tohi ʻa Molomoná. Naʻá ne ʻalu ʻo lotu mo kinaua. Naʻe aʻu ʻo ne ʻalu ki he temipalé ke silaʻi ia ki hono fāmili foʻoú.
Naʻe malimali ʻa Sōsiua. Naʻá ne maʻu ha fakakaukau ki he meʻa ke lea ʻaki ʻi heʻene malangá.
Naʻe akoako ʻe Sōsiua ʻa e meʻa te ne lea ʻakí ʻi he uiké kakato.
“ʻOkú ke fiemaʻu ke u ʻalu mo koe ki muʻa ʻi he taimi te ke fai ai hoʻo leá?” Ko e fehuʻi ange ia ʻa Tetí.
Naʻe pehē ange ʻe Sōsiua, “ʻOku ou tui te u lava pē ʻo lau e meʻa kotoa ne u tohí ʻiate au pē. Ka te ke lava nai ʻo puke hake ʻa e fakatātā naʻá ku taá?”
Naʻe malimali ʻa Teti. “ʻIo.”
ʻI he aʻu ki he Sāpaté, naʻe mateuteu ʻa Sōsiua. Naʻá ne tuʻu mei muʻa he loki Palaimelí. Naʻe tuʻu ʻa Teti ʻi hono tafaʻakí ʻo pukepuke hake ʻa e fakatātaá.
Naʻe pehē ʻe Sōsiua, “Ko e ʻAho Paionia ʻeni. Ko e kau paioniá ko ha kakai ia naʻa nau lue mamaʻo ʻaupito. Hangē ko e Kāingalotu naʻa nau kolosi ʻi he ngaahi toafa tokaleleí.”
Naʻe tuhu ʻa Sōsiua ki he fakatātā naʻe pukepuke ʻe Tetí.
Naʻá ne pehē, “Ka ko e paioniá foki ko e fuofua tokotaha ia ke ne fai ha meʻa.”
Naʻe sio ʻa Sōsiua kia Mami. Naʻá ne malimali mai kiate ia mei mui he lokí.
Naʻe pehē ʻe Sōsiua, “Ko ha paionia au. Ko e taimi te u papitaiso aí, te u hoko ko e fuofua tokotaha ʻi hoku fāmili totonú ke kau ki he Siasí.” Naʻá ne malimali. “Te tau lava kotoa ʻo hoko ko ha kau paionia ʻi heʻetau fai e ngaahi meʻa faingataʻá mo fili ke muimui ʻia Sīsuú. ʻI he huafa ʻo Sīsū Kalaisí, ʻēmeni.”
Naʻe ongoʻi fiefia ʻa Sōsiua ʻi heʻene lue ke tangutu mo ʻene kalasi Palaimelí. Naʻá ne fiefia ke hoko ko ha paionia!
ʻŪ tā fakatātā ʻa Melissa Manwill Kashiwagi