“Ko Ha Fekumi Mahuʻinga,” Ko e Kaumeʻá, ʻOkatopa 2024, 36–37.
Ko Ha Fekumi Mahuʻinga
Naʻe hangē ʻa e hisitōlia fakafāmilí ko ha keimi vitiō mo ha fekumi mahuʻinga ʻaupitó!
Naʻe hoko ʻa e talanoá ni ʻi Mekisikou.
Naʻe saiʻia ʻa Havi ʻi he ako ke fai ha ngaahi meʻa foʻoú. Naʻá ne saiʻia he ako ke vaʻinga peisipoló. Naʻá ne saiʻia he ako tā-kītaá. Naʻá ne saiʻia he ako ke vaʻinga ʻi ha ʻū keimi vitiō foʻoú. Ko ia ko e taimi naʻe ʻeke ange ai ʻe Papa pe naʻá ne fie ako ha meʻa foʻoú, naʻe mateuteu ʻa Havi.
Naʻe sio ʻa Havi ki he fakaava ʻe Papa ʻene komipiutá pea ʻalu ki ha saiti ʻoku ui koe “FamilySearch.”
Naʻe pehē ange ʻe Papa, “Te u akoʻi koe ke ke kumi e ngaahi hingoa ʻo ʻetau ngaahi kuí. Naʻe moʻui honau tokolahi he taimi fuoloá, pea naʻe ʻikai ke nau maʻu ʻa e ongoongoleleí. ʻI heʻetau maʻu honau hingoá, te tau lava ʻo ʻalu ki he temipalé ke papitaiso maʻanautolu. Te nau maʻu leva ha faingamālie ke tali ʻa e ongoongoleleí.”
Naʻe manatuʻi ʻe Havi ʻa e fiefia naʻá ne ongoʻi ʻi he taimi naʻe papitaiso ai iá. Kapau te ne lava ʻo tokoni ki heʻene ngaahi kuí ke nau ongoʻi ʻa e ongo tatau, naʻá ne fie ʻilo ki he foungá!
Naʻe sio ʻa Havi ki he fakaʻaliʻali ange ʻe Papa ʻa e meʻa ke ne faí. Naʻe ʻave leva ʻe Papa ʻa e komipiutá kia Havi. “Ko koe ʻeni!”
Naʻe malimali ʻa Havi. Naʻá ne akoako hono lomi mo lau e ngaahi hingoá mo e ngaahi ʻahó. Ko hono fāmilí ʻeni!
ʻI he ngaahi pō hono hokó, naʻe tokoni ai ʻa Mama mo Papa kia Havi ke ako lahi ange fekauʻaki mo hono fakahoko ʻo e ngāue hisitōlia fakafāmilí. Naʻe kamata ke ako foki mo hono tuofefine lahi ko Lilí. Naʻe hangē ia ha vaʻinga ʻi ha keimi vitiō mo ha fekumi mahuʻinga moʻoní!
ʻI ha Sāpate ʻe taha, naʻe fanongonongo ai ʻe he pīsopé ʻoku fakahoko ʻe he siteikí ha tukupā makehe. ʻE tuku mai ha ʻaho ʻe 60 ke kumi ai ʻe he kāingalotu ʻo e siteikí ʻa e hingoa lahi taha te nau lavá ke ʻave ki he temipalé. Ko e taumuʻá ke maʻu ha hingoa fakakātoa ʻe 5,000. ʻI he fakaʻosinga ʻo e ʻaho ʻe 60, ʻe fai ai ha paati lahi ke fakafiefiaʻi. ʻE ʻi ai foki mo ha pale ki he kakai naʻa nau maʻu e hingoa lahi tahá.
ʻI heʻenau foki ki ʻapi mei he lotú, naʻe talaange ʻe Havi, “ʻOku ou fie tokoni.”
“Mo au pē!” Ko Lili ange ia.
“Fēfē kapau te mo kamata he taimí ni?” Ko Papa ange ia. “Sio pe ko e hingoa ʻe fiha te mo lava ʻo maʻu kimuʻa he kai efiafí.”
Naʻe lova ʻa Havi mo Lili ki he loki ʻi muʻá. Naʻe fakaava ʻe Lili ʻa e FamilySearch ʻi heʻene telefoní, pea ngāue ʻa Havi ʻi he komipiuta ʻa Papá. Naʻe ʻikai fuoloa kuó ne maʻu ha lekooti ʻo e tokoua ʻo ʻene kui tangata hono uá. Naʻe lisi foki ai mo ha fānau ʻe toko tolu naʻe teʻeki ai ke nau papitaiso. Naʻe fakaulu ʻa Havi. Kuó ne maʻu ha hingoa ʻe tolu ke ʻave ki he temipalé!
Naʻe fakaʻaongaʻi ʻe Havi ha konga lahi ʻo hono taimi ʻataá ʻi ha foʻi ʻaho ʻe 60 ke fakahoko ʻa e hisitōlia fakafāmilí. Naʻá ne kumi ha ngaahi hingoa ʻi he meimei pō kotoa pē he tuku ʻa e akó. ʻI he ʻaho Sāpaté, naʻá ne ngāue fakataha ki ai mo hono fāmilí kotoa.
ʻI he fakaʻosinga ʻo e ʻaho ʻe 60, naʻe ʻalu ʻa Havi mo hono fāmilí ki he ʻapisiasí ki he pātí. Naʻe ʻi ai e tako, mūsika, mo ha kakai tokolahi. Naʻe fakalata ʻaupito!
Naʻe faifai pea tuʻu hake ʻa e palesiteni fakasiteikí.
Naʻá ne pehē, “ʻOku ou tanganeʻia ʻi he tokotaha kotoa pē. Naʻe maʻu ʻe hotau siteikí ha hingoa ʻe 10,000 ki he temipalé!”
Naʻe fiefia ʻa e tokotaha kotoa pē. Naʻe ʻohovale lahi ʻa Havi. Naʻe liunga ua ia ʻi he meʻa ne nau taumuʻa ki aí!
Naʻe fakahā leva ʻe he palesiteni fakasiteikí ʻa e kau ikuná. Ko e tokotaha naʻe ikuna ʻi he kakai lalahí ko ha fefine naʻe ʻikai ʻiloʻi ia ʻe Havi, ka ko e ikuna mei he toʻu tupú ko Lili!
“Sai ko e fānaú leva ʻeni. Naʻe ʻi ai ha taha naʻá ne ʻave ha hingoa ʻe 216,” ko e fakahā mai ia ʻe he palesiteni fakasiteikí. Naʻe pasipasi leʻolahi ʻa e kakaí ʻo ʻikai lava ai ʻa Havi ʻo fanongo ki he meʻa naʻe lea mai ʻaki ʻe he palesiteni fakasiteikí.
Naʻe kamo atu e tamai ʻa Haví kiate ia. “Havi, naʻá ne ui mai ho hingoá.”
Naʻe ʻikai faʻa tui ʻa Havi ki ai. Naʻá ne ʻave moʻoni nai ha hingoa ʻe 216?
Naʻe lue atu ʻa Havi ki muʻa. Naʻá ne malimali ʻi he lulululu ange ʻa e palesiteni fakasiteikí mo ʻoange ha tohi fakamoʻoní. Naʻe tohi hono hingoá ai!
Naʻe fehuʻi ange ʻe he palesiteni fakasiteikí, “Ko e hā e ongo ʻokú ke maʻu he ikuná?”
Naʻe pehē ange ʻe Havi, “Sai ʻaupito.”
Naʻe ongo fakafiefia ʻa e ikuná. Pea naʻe ongo fakafiefia moʻoni ke ako ha founga ke tokoniʻi ai ha kakai tokolahi!
Tā fakatātā ʻa Josh Talbot