“Ko e Haʻinga Matalaʻisiolaʻaá,” Ko e Kaumeʻá, ʻOkatopa 2024, 40–41.
Ko e Haʻinga Matalaʻisiolaʻaá
Naʻe fie tokoni ʻa ʻAmaile. Ka ʻe founga fēfē?
Naʻe hoko ʻa e talanoá ni ʻi Tenimaʻake.
Naʻe muimui ʻa ʻAmalie ʻi heʻene ongomātuʻá ʻo hū ʻi he matapā ʻo e falelotú. Naʻe ongona ʻi he falelotú hono tā ʻe he pianó ʻa e ngaahi himí. Naʻe maʻu ʻe ʻAmaile mo hono fāmilí ha sea pea nau tangutu ai.
Naʻe kamata ʻa e houalotu sākalamēnití, pea naʻe ikai fuoloa kuo hivaʻi ʻe he koló kotoa ʻa e himi kamatá. Lolotonga e hivá, naʻe fakatokangaʻi ʻe ʻAmaile hono kaungāʻapí, ko Sisitā ʻAisa, ʻokú ne tangutu ofi mai. Ka naʻe ʻikai ke hiva ʻa Sisitā ʻAisa. Naʻá ne fakafulofula.
Naʻe angalelei maʻu pē ʻa Sisitā ʻAisa kia ʻAmaile. Ka naʻá ne mataʻi loto-mamahi maʻu pē. Naʻe ʻiloʻi ʻe ʻAmaile naʻá ne nofo toko taha pē. Mahalo pē naʻá ne taʻelata.
Naʻe fakaʻamu ʻa ʻAmalie naʻá ne lava ʻo fai ha meʻa ke tokoni. Ka ko e hā ha meʻa te ne fai?
ʻI he uike hono hokó, naʻe heka pasikala ʻa ʻAmaile ʻi ha hala lōloa. Naʻá ne lele ʻo fakalaka ʻi ha loto ʻataʻatā lahi lanu mata. Naʻe fakamāfanaʻi ʻe he laʻaá hono kilí.
Naʻe ʻikai fuoloa kuó ne aʻu mai ki ha ngoue siolaʻā. Naʻe vilingia ʻa e matalaʻiʻakau lanu engeengá ʻi he havilí pea naʻe hanga ia ki he laʻaá. Naʻa nau māʻolunga mo lalahi ʻaupito!
Naʻe pehē ʻe ha fakaʻilonga he tafaʻaki ʻo e ngoué, Siolaʻā taʻetotongi! Toʻo e lahi taha ʻokú ke fiemaʻú.
Naʻe sio fakamamaʻu ʻa ʻAmaile ki he loto ʻataʻataá. Naʻe hangē mai ʻa e matalaʻiʻakaú ko ha ʻōseni engeenga ʻoku malimali ki he langí.
Naʻá ne tau ʻene pasikalá peá ne paki ha ʻū matalaʻiʻakau. Te ne lava ʻo foaki ia kia Mami! Naʻe saiʻia ʻa Mami he matalaʻiʻakaú. Ka naʻe lahi feʻunga ʻa e matalaʻiʻakaú ke lava ʻo paki mai ha meʻa lahi ange maʻa ha taha kehe.
Naʻá ne fakakaukau ki ha hingoa: Sisitā ʻAisa. Mahalo ʻe lava ke tokoni e ʻū matalaʻiʻakau ko ʻení ke ne fiefia ai.
Naʻe pehē loto pē ʻe ʻAmaile, “ʻOfa pē ʻoku saiʻia ʻi he siolaʻaá.” Ka naʻá ne kiʻi tailiili. Fēfē kapau ʻe fakakaukau ʻa Sisitā ʻAisa ʻoku ngali kehe ia?
Naʻe ʻikai toe paki ʻe ʻAmaile e matalaʻiʻakaú. Naʻá ne milimilihi ʻa e matalaʻiʻakaú. Mahalo ʻoku ʻikai totonu ke ne ʻave ha matalaʻiʻakau kia Sisitā ʻAisa.
Naʻe fakakaukau ʻa ʻAmaile, ʻIkai. Naʻá ne ʻiloʻi ʻoku totonu ke ne ʻave ia kia Sisitā ʻAisa. Mahalo he ʻikai ke nau ʻai e meʻa kotoa ke sai. Ka naʻe kei fie tokoni pē ʻa ʻAmaile, neongo ko ha kiʻi founga siʻisiʻi. Te ne lava ʻo foaki e matalaʻiʻakaú kia Sisitā ʻAisa ʻi he lotú ʻapongipongi.
Naʻe fakaʻaongaʻi ʻe ʻAmaile ha taimi lahi ke paki ʻa e matalaʻiʻakau lelei tahá. Naʻá ne fakatahatahaʻi kinautolu pea faʻo fakalelei ia ki heʻene kato he pasikalá. Naʻá ne heka leva ki heʻene pasikalá ʻo ʻaka ki ʻapi. Naʻe hā fakaʻofoʻofa mai e lanu engeenga ʻo e matalaʻiʻakaú ʻi he ʻasi mai e lanu mata mālohi ʻo e vaotaá mei mui.
ʻI he aʻu ʻa ʻAmaile ki ʻapí, naʻá ne haʻi ʻaki ha līpine e ongo haʻinga matalaʻiʻakaú takitaha. Naʻá ne ʻoange ha haʻinga ʻe taha kia Mami.
Naʻe malimali fiefia ʻa Mami ʻi heʻene sio ki aí. “Mālō ʻaupito! ʻOku fakaʻofoʻofa ia.” Naʻá ne fokotuʻu e matalaʻiʻakaú ʻi ha vaasi ʻi he funga tēpilé.
ʻI he ʻaho hono hokó, naʻe ʻave ʻe ʻAmaile e haʻinga matalaʻisiolaʻā ʻe tahá ki he lotú. Naʻá ne ʻilo ʻa Sisitā ʻAisa ʻokú ne tangutu toko taha pē ʻi ha sea.
Naʻá ne pehē ange ʻe ʻAmaile, “Mālō e lelei. Naʻá ku paki ha matalaʻisiolaʻā maʻau.”
Naʻe toʻo hake ʻe ʻAmaile ʻa e matalaʻiʻakaú. ʻI he sio ʻa Sisitā ʻAisa ki aí, naʻá ne malimali. Kuo fuoloa ʻa e teʻeki ke sio ʻa ʻAmaile ʻokú ne malimali. Naʻe ʻilonga mei hono fofongá ʻa ʻene fiefiá.
Naʻe pehē ange ʻe Sisitā ʻAisa, “Mālō.” Naʻá ne fāʻofua kia ʻAmaile. “Ko e matalaʻiʻakau ʻeni ʻoku ou saiʻia taha aí.”
Naʻe malimali foki mo ʻAmaile. Naʻe ʻikai ke ne ʻiloʻi ko e matalaʻiʻakau ia ʻoku saiʻia taha ai ʻa Sisitā ʻAisá! Ka naʻe ueʻi ia ʻe he Laumālie Māʻoniʻoní ke ne ngaohi ha haʻinga matalaʻiʻakau maʻa Sisitā ʻAisa, pea naʻe houngaʻia ʻa ʻAmaile ʻi heʻene talangofuá.
Tā Fakatātaaʻi ʻe Toby Newsome