“Naʻe Tāpuekina Taha Taha ʻe Sīsū,” Ko e Kaumeʻá, ʻOkatopa 2024, 26–27.
Ngaahi Talanoa ʻo e Folofolá
Naʻe Tāpuekina Taha Taha ʻe Sīsū
ʻŪ tā fakatātā ʻa Andrew Bosley
Naʻe akoʻi ʻe he kau palōfitá ʻa e kakai Nīfaí fekauʻaki mo e ngaahi fakaʻilonga ʻo e pekia ʻa Sīsū Kalaisí. ʻI he taimi naʻá Ne pekia aí, naʻe fakapoʻuli ʻa e fonuá ʻi ha ʻaho ʻe tolu. Kimui ange aí, naʻe fanongo ʻa e kakaí ki he leʻo ʻo e Tamai Hēvaní ʻoku folofola mai mei he langí.
Naʻe folofola ʻa e Tamai Hēvaní, “Vakai ki hoku ʻAlo ʻOfaʻangá” (3 Nīfai 11:7). Naʻe hā ʻa Sīsū ki he kakai Nīfaí. Naʻá Ne toetuʻu! Naʻá Ne akoʻi ha ngaahi meʻa lahi ki he kakai Nīfaí. Naʻá Ne folofola ke nau fakatomala pea muimui ʻiate Ia.
Naʻá Ne kole ki he kakaí ke ʻomi ʻa kinautolu ʻoku puké kiate Ia ke Ne fakamoʻui kinautolu. Naʻá Ne tāpuakiʻi kinautolu.
Naʻá Ne tāpuakiʻi taha taha foki ʻa e fānaú. Naʻe takatakaiʻi ʻe he kau ʻāngeló ʻa e fānaú.