“Angaʻofa ʻi he Kemí,” Ko e Kaumeʻá, ʻOkatopa 2024, 30–31.
Angaʻofa ʻi he Kemí
Naʻe ʻiloʻi ʻe Kati ʻa e ongo ko ia ʻokú ne makehé.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe milimilihi ʻe Kati hono nima loí ʻi heʻene loto-siʻí lolotonga e fakaʻuli atu ʻa Mami ʻi he hala kelekelé. “ʻE Mami, ʻoku ou ilifia.”
Naʻe malimali loto-ʻofa ange ʻa Mami kiate ia. “ʻOku ou ʻiloʻi. Ka ʻoku ou tui te ke saiʻia ʻi he kemi he faʻahitaʻu māfaná, ʻofaʻanga. Fakakaukau ki he tamaiki foʻou kotoa te ke fetaulaki mo iá.”
Naʻe ʻikai lea mai ʻa Kati, ka naʻá ne pehē loto pē, Ko e meʻa ia ʻoku ou manavasiʻi ki aí.
Naʻe ʻikai fuoloa kuó na aʻu atu ki he faiʻanga kemí. Naʻe ʻalu ʻa Mami mo Kati ke talanoa ki heʻene faifaleʻi ʻi he kemí, ko Palaieni. Naʻe talaange ʻe Mami, “Naʻe tuʻusi e nima ʻo Katí ʻi heʻene kei pēpeé. He ʻikai uesia ai ʻene vaʻingá, ka ko e taimi ʻe niʻihi ʻoku kiʻi faingataʻa ai ke ne feʻiloaki mo e kakai foʻoú.”
Naʻe pehē ange ʻe Palaieni, “ʻOua te ke tokanga ki ai Kati. ʻOku mau fiefia kotoa hoʻo ʻi hení.”
Naʻe fiefia ʻa Kati ʻi he feʻiloaki mo e kauleka ʻi heʻene kulupú. Naʻa nau fakahingoa kinautolu ko e fanga Taika Vāletí. Naʻa nau kaka moʻunga, kai siisi mo e mā pakupaku, pea naʻa nau lova. Naʻe kau ʻa Kati he oma taha ʻi he kulupú.
ʻI he fakaʻosinga ʻo e ʻahó, naʻe fanongonongo ʻe Palaieni te nau feʻauhi mo ha kulupu ʻe taha ʻi ha lova tangai. Naʻe fakaʻamu ʻa Kati ʻe ikuna ʻa e kau Taika Vāletí!
ʻI he aʻu ki he taimi ke lele ai ʻa Katí, naʻá ne fusi hake ʻa e tangaí ki hono tuí pea kamata ke ne puna. Ka naʻe faingataʻa ke puke ʻa e tangaí ʻaki ha nima pē ʻe taha, pea naʻá ne humu ʻi he mamafa ʻa e tangaí. Naʻe tō ʻa Kati ʻo teka ʻi he musié. ʻI he taimi naʻá ne tuʻu hake ai ki ʻolungá, kuo ʻosiki ʻe he timi ʻe tahá ʻa e lová. Kuo foʻi e timi ʻa Katí.
ʻI he maʻu meʻatokoni efiafi ʻo e efiafi ko iá, naʻe talaange ʻe Kati ki heʻene ongomātuʻá ʻa e meʻa naʻe hoko ʻi he lova tangaí. Naʻá ne pehē ange, “ʻOku ʻikai ke u toe fie foki au ki he kemí. Naʻe foʻi e timí koeʻuhí ko au. He ʻikai ke nau loto ke u toe foki ange.”
“Kātaki pē ʻofaʻanga.” Naʻe fāʻofua ʻa Mami kia Kati. “ʻOku ou tui ʻoku kei ʻofa pē ho ngaahi kaungāmeʻa foʻoú ʻiate koe. Pea ʻokú ke ʻiloʻi e tokotaha ‘e ʻofa maʻu pē ʻiate koe ʻo tatau ai pē pe ko e hā?”
“Ko koe.” Naʻe kiʻi malimali ʻa Kati.
“ʻIo. ʻOkú ma ʻofa ʻiate koe! Pea ʻoku pehē pē mo hoʻo Tamai Hēvaní. Ko ʻEne fānau foki mo koe, manatuʻi?”
Naʻe pehē ange ʻe Teti, “ʻOku hangē naʻá ke fiefia pē kimuʻa ʻi he lova tangaí. Ko e hā ʻoku ʻikai ke ke toe ʻalu tuʻo taha ai pē ki he kemí?”
Naʻe kamokamo pē ʻa Kati. “ʻIo.”
Naʻe malimali ʻa Teti. “Feinga ke ke fakatokangaʻi e taimi ʻoku angalelei atu ai e kakaí kiate koé. Pea kumi ha ngaahi founga ke angalelei ai ki he niʻihi kehé. ʻOku tokoni maʻu pē ia kiate au ʻi he taimi ʻoku ou faingataʻaʻia aí.”
ʻI he ʻaho hono hokó ʻi he kemí, naʻe talitali lelei ʻa Kati ʻe he fānau mei heʻene kulupú ʻaki ha tā-nima mo e fāʻofua. Naʻe ʻikai talanoa ha taha ki he lova tangaí, pea naʻe ngalo ʻia Kati ʻene loto-hohaʻá. Naʻá ne talanoa fakakata mo hono ngaahi kaungāmeʻa foʻoú lolotonga ʻenau talitali ke kamata e ngaahi ʻekitivitií.
Naʻe lue atu leva ʻa e Faifaleʻi ko Palaiení ki he kulupú. Naʻe ʻi hono tafaʻakí ha kiʻi tamasiʻi naʻe ʻi he toʻu ʻo Katí. Naʻe pehē ange ʻe Palaieni, “Kau Taika Vāleti, ʻoku ʻi ai haʻatau kaungāmeʻa foʻou he ʻahó ni. Ko hono hingoá ko Lotiliko. ʻOku lea faka-Sipeini pē ʻa Lotiliko, pea ʻoku mau feinga leva ke kumi ha faifaleʻi ʻoku lea faka-Sipeiní ke tokoni kiate ia.”
Naʻe ako lea faka-Sipeini ʻa Kati ʻi he akó, ka naʻe siʻisiʻi pē ʻene ʻilo ki he leá. Naʻá ne fuʻu ilifia ke feinga ke talanoa kia Lotiliko.
Naʻá ne sio kia Lotiliko. Naʻá ne mataʻi ilifia foki mo ia. Naʻá ne fakakaukau, Pau pē ʻoku faingataʻa ʻa e ʻikai ke lea ʻi he lea fakafonua tatau mo e tamaiki kehé. Naʻá ne ʻilo lelei e ongo ko ia ʻo e makehe mei he niʻihi kehé.
Naʻe manatuʻi ʻe Kati hono talitali lelei ia ʻe hono ngaahi kaungāmeʻa foʻoú ki he kulupú. Naʻa nau ʻai ke ne ongoʻi ʻoku ʻofaʻi ia, ʻo hangē pē ko e meʻa naʻe mei fai ʻe Sīsuú. Naʻá ne loto ke fai e meʻa tatau kia Lotiliko.
Naʻe manatuʻi ʻe Kati ʻa e lea faka-Sipeini ki he “mālō e leleí.” Naʻá ne mihiʻi leva ʻene mānavá peá ne lue atu kia Lotiliko. Naʻá ne malimali mo pehē ange, “Hola.”
Naʻe mole atu e mataʻi hohaʻa ʻa Lotilikó, peá ne malimali. Naʻe hiki hake ʻe Kati hono nima loí.
Naʻá ne fehuʻi ange, “¿Amigos?” Kaungāmeʻa?
Naʻe malimali lahi ange ʻa Lotiliko. Naʻá ne puke hono nimá ʻo lulululu ki ai. “Amigos.”
Tā fakatātā ʻa Flavia Drago