“Ngaahi Hiva ʻOfa ʻa Meisí,” Ko e Kaumeʻá, ʻOkatopa 2024, 14–15.
Ngaahi Hiva ʻOfa ʻa Meisí
Naʻe pehē ange ʻe Kulenipā, “Neongo ʻokú ke siʻisiʻi, ka ʻoku lahi e ʻofa ʻokú ke maʻú.”
Naʻe hoko ʻa e talanoa ko ʻení ʻi he ʻOtu Motu Filipainí.
Naʻe talaange ʻe Meisi ki heʻene kui fefiné, “ʻOku ou ʻofa kia Kulenipā.” Naʻá ne ui ʻene ongo kuí ko Kulenipā mo Kulenimā. “Talu ʻene ʻalu ki falemahaki mo ʻeku fakaʻamu ke tokoni kiate ia. Ka ʻoku ʻikai ke u ʻilo pe ʻe founga fēfē.”
Naʻe teke holo ʻe Meisi ʻa e meʻakaí ʻi heʻene peletí. Ko e kai pongipongi ia ʻokú ne saiʻia taha aí—ʻa e laisé, fuaʻimoá, mo e sōsisí. Ka naʻá ne ongoʻi fuʻu loto-mamahi ke kai.
Naʻe puke mai ʻe Kulenimā ʻa Meisi. “ʻOku mahino kiate au. Ko e taimi ʻe niʻihi ʻoku tau ongoʻi vaivai ʻi he taimi ʻoku foua ai ʻe ha taha ʻoku tau ʻofa ai ha taimi faingataʻa. Kae manatuʻi, ʻoku ʻi ai ha ongomeʻa ʻokú na ʻofa ʻiate kitautolu ʻo lahi ange ʻi he meʻa ʻoku tau malava ke fakakaukau ki aí.
“Ko hai?” Ko e fehuʻi ange ia ʻa Meisí.
Naʻe pehē ange ʻe Kulenimā, “Tamai Hēvaní mo Sīsū Kalaisi. Ko e taimi ʻoku tau tui ai kiate Kinauá, ʻokú Na tataki kitautolu mo ʻomi ha mālohi.”
ʻI he fanongo ʻa Meisí, naʻá ne ongoʻi ha ʻamanaki lelei. Naʻá ne ʻiloʻi ʻe lava ke tokoniʻi ʻe he Tamai Hēvaní mo Sīsū ʻa Kulenipā.
ʻI he pō ko iá, naʻe tūʻulutui ʻa Meisi ʻi hono veʻe mohengá ʻo kuikui hono matá.
“Tamai Hēvani, kātaki ʻo tokangaʻi ʻa Kulenipā pea tokoniʻi ia ke ne ongoʻi fiemālie. ʻOku ou ʻofa ʻiate ia, pea ʻoku ou ʻofa foki ki he ʻAfio ná. Kātaki ʻo tokoni mai ke u ʻiloʻi ʻa e meʻa te u lava ʻo fai maʻaná.”
ʻI he pongipongi hono hokó, naʻe ʻā hake ʻa Meisi ki he ulo mai ʻa e laʻaá ʻi heʻene puipuí. Naʻá ne maʻu ha fakakaukau! Naʻe hoko hono hivaʻi e ngaahi hiva Palaimelí mo e ngaahi himi ʻa e Siasí ko e taha ia e ngaahi meʻa naʻá ne saiʻia ke fakahoko fakataha mo Kulenipaá. Mahalo pē te ne ongoʻi fiemālie ai!
Naʻá ne tuʻu hake, fai ʻene lotu pongipongí, peá ne kole kia Kulenimā pe ʻe lava ke ne ʻaʻahi kia Kulenipā. Ne ʻikai fuoloa kuó na fononga ki he falemahakí. Naʻá ne fiefia ke faifai peá ne toe sio kia Kulenipā pea fakatauange pē te ne lava ʻo ʻai ke fiefia ʻa Kulenipā.
ʻI he taimi naʻe hū atu ai ʻa Meisi ki he loki he falemahakí, naʻe tangutu mai ʻa Kulenipā ʻi hono mohengá ʻoku fakakafuʻi hono ongo vaʻé. Naʻá ne mataʻi helaʻia. Ka ʻi heʻene sio pē kia Meisí, naʻá ne mata fiefia. Naʻe lele atu ʻa Meisi ʻo fāʻofua kiate ia.
“Mālō ʻetau maʻu e pongipongí ni, Kulenipā!”
“Ko e hā ho meʻa ʻoku fai hení, Meisi lengi-lengi?”
ʻOku ʻuhinga ʻa e lengi-lengí ki he “ʻofa.” Ko e hingoa fakatenetene ia ʻoku saiʻia taha ai ʻa Kulenipā ke ui ‘aki ‘a Meisí.
Naʻe pehē ange ʻe Meisi, “ʻOku ou fie hiva atu kia koe.” Naʻá ne tangutu ʻi he veʻe mohengá ʻo fakaava hake ʻene tohi hivá. Naʻá ne kamata hiva, “Fānau au ʻa e ʻOtua, kuó ne fekau mai …”
Naʻe fakatē-loʻimata ʻa Kulenipā ʻi heʻene fiefiá. Naʻá ne kamata hiva foki mo ia.
“… ke u haʻu ki he māmaní mo e ongomātuʻá.”
Naʻe ongona hona leʻó ʻi he kiʻi loki siʻisiʻi ʻo e falemahakí. Ne ʻikai fuoloa kuo kau foki mo Kulenimā he hivá. Naʻe ongoʻi ʻe Meisi ha nonga ʻi hono lotó ʻi heʻenau hiva fakatahá.
ʻI he ʻosi ʻenau hivá, naʻe mafao atu ʻe Meisi hono nimá, pea naʻe puke maʻu ia ʻe Kulenipā.
“Kulenipā, tau lotu.”
Naʻa nau lotu fakataha, pea naʻe kole ʻe Meisi ki he Tamai Hēvaní ke tāpuakiʻi ʻa Kulenipā ʻaki ha mālohi mo ha fakamoʻui.
Hili e lotú, naʻe sio hake ʻa Kulenipā kia Meisi. “Fakamālō atu ʻi hoʻo hiva mo e lotu fakaʻofoʻofá. Kuó ke tokoniʻi au ke u ongoʻi fiemālie ange. Neongo ʻokú ke siʻisiʻi, ka ʻoku lahi e ʻofa ʻokú ke maʻú.”
Naʻe malimali ʻa Meisi. Naʻá ne fiefia naʻe tokoni ʻene ʻofá mo e tuí ke ongoʻi fiemālie ai ʻa Kulenipā. Naʻá ne ʻiloʻi ʻe ʻi ai maʻu pē ʻa e Tamai Hēvaní mo Sīsū Kalaisi ke tokoniʻi hono fāmilí ʻi he ngaahi taimi faingataʻá.
Ngaahi tā fakatātā ‘a Chrisanne Serafin