Ko e Ako ke Lotú

Fai ʻe ʻEletā Michael A. Dunn

ʻO e Kau Fitungofulú

Mei ha ʻinitaviu mo Lepeka Siakimani mo Peletilī Salamoniti III.

ʻI heʻeku kei siʻí, naʻe ʻalu hoku fāmilí ki ha lotu. Ka naʻe ʻikai akoʻi au ke u lotu. Naʻá ku ako ke u lotu ʻaki ʻeku fakafanongo ki he lotu ʻeku ongo kuí.

Naʻe māvae ʻeku ongomātuʻá ʻi heʻeku kei siʻí. Naʻe faʻa fakaafeʻi ʻe heʻeku ongo kuí ʻeku faʻeé, ngaahi tokouá mo e tuofāfiné, pea mo au ke mau kai efiafi he Sāpaté. Naʻá ku saiʻia he fanongo ki he lotu ʻeku kui fefiné mo ʻeku kui tangatá kimuʻa ʻi he maʻu meʻatokoní. Naʻe ʻomi ʻe heʻena lotú ha ongo māfana ʻi hoku lotó.

ʻOku ou manatuʻi ha pō ʻe taha ʻi hoku taʻu nimá nai. Naʻá ku fakaʻamu ke u lotu ki he Tamai Hēvaní. Ko e taimi ʻe niʻihi naʻe faingataʻa ke mahino ʻa e ngaahi meʻa ne u ako fekauʻaki mo e ʻOtuá. Ka naʻá ku ʻiloʻi naʻá Ne moʻui. Ko ia naʻá ku lotu kiate Ia. Naʻá ku fakamālō kiate Ia koeʻuhí ko hoku ngaahi tāpuakí peá u kole kiate Ia e meʻa naʻá ku fiemaʻú. Naʻá ku ongoʻi mālohi mo fiefia koeʻuhí he naʻá ku ʻiloʻi naʻe ʻofa ʻa e Tamai Hēvaní ʻiate au.

ʻI he hili ha ngaahi taʻu lahi mei ai, ne u ako fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe akoʻi lahi ange au ʻe he ongo faifekaú fekauʻaki mo e Tamai Hēvaní pea mo e lotú. Naʻá ku ʻiloʻi naʻe moʻoni ʻa e meʻa naʻá na lea ʻakí. Naʻá ku papitaiso.

ʻOku ou fakatauange te ke fokotuʻu ha vā fetuʻutaki mo e Tamai Hēvaní pea ʻiloʻi ʻokú Ne moʻui. ʻOkú Ne ʻafioʻi koe mo fakafanongo kiate koe ʻi he taimi ʻokú ke lotu aí. ʻE tokoni hoʻo ʻiloʻi ko hai koé pea mo e Tamai Hēvaní ke ke ongoʻi ʻEne ʻofá.

Founga ʻOku Ou Lotu Aí

Te ke lava ʻo lotu ʻi ha faʻahinga taimi pē, ʻi ha feituʻu pē, pea ʻe fanongo mai maʻu pē ʻa e Tamai Hēvaní. Muimui ʻi he ngaahi ueʻí ke ke tā fakatātā mo tohi fekauʻaki mo e founga ʻoku tokoniʻi ai koe ʻe he lotú.

Ko e fē feituʻu ʻokú ke saiʻia ke lotu aí?

Ko e hā e ongo ʻokú ke maʻu he taimi ʻokú ke lotu aí?