Ngaahi ʻEkitivitī ʻo e Haʻu, ʻo Muimui ʻIate Aú

Ki he efiafi ʻi ʻapí pe ako folofolá—pe ke maʻu pē ha fiefia!

30 Sepitema–6 ʻOkatopa

Puha Koloá

Ki he 3 Nīfai 12–16

Naʻe folofola ʻa Sīsū Kalaisi, “He ko e potu ʻoku ʻi ai hoʻomou koloá, ʻe ʻi ai foki mo homou lotó” (3 Nīfai 13:21). Teuteuʻi ha puha ʻaki ha ngaahi foʻi haati mo ha ʻū fakatātā ʻo e Fakamoʻuí. Hili iá peá ke hiki pe tā ha ngaahi meʻa te ke lava ʻo fai ke ke hangē ai ko Iá pea faʻo ia ki hoʻo puha koloa foʻoú. Te ke lava ʻo sio ki hoʻo loto puhá ʻi he Sāpate kotoa pē ke fakamanatu atu ke ke muimui kia Sīsū ʻi he uike ko iá!

Maʻá e fānau iiki angé: Tokoniʻi hoʻo fānaú ke nau kumi e tā honau mafú pe ko e tā ho mafú. Talanoa ki he founga ʻoku ʻikai ke tau lava ai ʻo sio ki hotau mafú ka te tau lava ʻo ongoʻi iá. ʻOku pehē pē ʻa e ʻikai ke tau lava ʻo mamata ki he ʻOtuá ka te tau lava ʻo ongoʻi ʻEne ʻofá.

7–13 ʻOkatopa

Ko hono Manatuʻi ʻo Sīsū Kalaisí

Ki he 3 Nīfai 17–19

Naʻe ʻave ‘e Sīsū Kalaisi ‘a e sākalamēnití ki he kakai Nīfaí. Naʻá Ne akoʻi ke nau toʻo ia koeʻuhí ke nau maʻu maʻu ai pē ʻa Hono Laumālié (vakai, 3 Nīfai 18:7). ʻAlu ki he peesi 19 ke ngaohi ha ngāue fakameaʻa ke tautau he matapaá ke tokoni atu ke ke manatuʻi ʻa Sīsū lolotonga e uiké.

Maʻá e fānau iiki angé: Lau leʻolahi e 3 Nīfai 18:7 ki hoʻomou fānau īkí. Talaange ke ʻai honau nimá ki honau mafú ʻi he taimi kotoa pē ʻoku nau fanongo ai ki he foʻi lea ko e “manatu.” Talanoa ki he founga te mou lava ai ʻo manatuʻi ʻa Sīsū Kalaisí.

14–20 ʻOkatopa

Ko Hono Tauhi ha Lekōtí

Ki he 3 Nīfai 20–26

Naʻe folofola ʻa e Fakamoʻuí ki he kau Nīfaí ke nau tauhi ha lekooti ʻo e meʻa naʻá Ne akoʻi kiate kinautolú pea mo e ngaahi meʻa naʻe hoko kiate kinautolú (vakai, 3 Nīfai 23:4, 7–13). Tā fakatātaaʻi pe tohi ha meʻa lelei naʻe hoko kiate koe ʻi he uiké ni. Kuo tāpuekina fēfē koe ʻe he Tamai Hēvaní?

Maʻá e fānau iiki angé: Hivaʻi ʻa e foʻi hiva “Ko e Fāmilí ke Taʻe Ngata” (Tohi Hiva ʻa e Fānaú, 98). Fakaafeʻi hoʻo fānau īkí ke nau vahevahe ha meʻa ʻe taha ʻoku nau ʻofa ai fekauʻaki mo honau fāmilí.

21–27 ʻOkatopa

ʻOku ʻOmi ʻe Sīsū ʻa e Fiefiá

Ki he 3 Nīfai 27–4 Nīfai

ʻI he 4 Nīfaí, naʻe fiefia ʻa e kakai Nīfaí koeʻuhí ko ʻenau muimui ʻia Sīsū Kalaisí (vakai, 4 Nīfai 1:15–16). Taufetongi ʻi hono fakatātaaʻi fakalongolongo e ngaahi meʻa ʻokú ke fai ke muimui ai ki he Fakamoʻuí ʻa ia ʻokú ne ʻai koe ke ke fiefiá. ʻAi ke mateʻi ʻe he taha kotoa ʻa e meʻa ʻoku fakatātaaʻi ʻe he tokotaha ko iá.

Maʻá e fānau iiki angé: Fakaʻaliʻali ki hoʻo fānau īkí ha ʻū fakatātā ʻo ha kakai ʻoku malimali. Fakaafeʻi ke nau ʻahiʻahi fakahaaʻi honau ngaahi fofonga fiefiá! Talanoa fekauʻaki mo e fiefia ʻa e kakai Nīfaí ʻi heʻenau muimui ʻia Sīsū Kalaisí.

ʻŪ tā fakatātā ʻa Katy Dockrill