Bulataka na Nomu Dodonu
Vulica na sala me rawa kina cakacaka vakalotu ni matabete kei na yalayala ni veiyalayalati me vakatara na kaukauwa ni Kalou me drodrova na nomu bula.
Na watiqu o Greg, a ciqoma wale ga qo edua na macala ni vakadidike vakavuniwai e gadrevi kina na veisele kei na vica na vula ni kimocerapi. Me vaka ni levu oni sa sotava oti na veika oqo, eda dau masuta sara vakatotolo na veivuke mai lomalagi kei na kaukauwa ni Kalou. Na Sigatabu ni oti nona sele o Greg, e kau yani na sakaramede kina neirau rumu e valenibula.
Ena gauna oya, au vakayagataka duadua ga na sakaramede. Dua na tiki ni madrai. Dua na bilo wai. E valenilotu, na noqu vakanananu edau vakanamata vakalevu kina ivakarau ni votai ni sakaramede—kena vakarautaki, masulaki, kei na kena votai. Ia ena yakavi oya, au vakananuma na isolisoli ni kaukauwa ni Kalou ka tiko ena cakacaka vakalotu tabu vaka oya kei na yalayala ni veiyalayalati au cakava niu taura na tiki ni madrai kei na bilo wai oya. Oqo e dua na gauna au gadreva dina na kaukauwa mai lomalagi. E mosi vakalevu na yaloqu, oca, kei na veilecayaki, au vakananuma na isolisoli oqo, ka na vakatara vei au meu rawata kina na kaukauwa mai Vua, kau a gadreva vakalevu sara. Na vakayagataki ni sakaramede ena vakalevutaka na noqu veitokani kei na Yalo ni Turaga, ka rawarawa kina meu rawata na isolisoli ni kaukauwa ni Kalou, oka kina na nodra veiqaravi na agilosi kei na veivakaukauwataki ni iVakabula meu qaqa.
E matata vinaka vei au ni sega walega ni bibi o cei e vakaitavi ena cakacaka vakalotu—e gadrevi tale ga me vakanamata ka kauwaitaka na cava na cakacaka vakalotu kei na noda veiyalayalati Na cakacaka vakalotu ni matabete kei na yalayala ni veiyalayalati e vakatara vua na Kalou me savai keda ka cakava na veika veivakurabuitaki ena noda bula. Ia ena yaco vakacava na ka oqo?
iMatai, ke gadrevi me vakaraitaki mai na kaukauwa ni Kalou kina noda bula mai na dua na cakacaka vakalotu, e dodonu me vakayacori ena lewa mai vua na Luve ni Kalou. Na ivakarau ni kena soli mai e bibi. Na Tamada e solia vei Jisu Karisito na idola kei na lewa me wanonova na kena vakayacori na cakacaka vakalotu ni Nona matabete. Ena Nona veidusimaki, ena loma ni ituvatuva ni Nona matabete, o ira na luve ni Kalou era sa tabaki mera tu me isosomi ni Luve ni Kalou.
iKarua, eda sega walega ni caka yalayala ni veiyalayalati—e dodonu meda maroroi ira. Ena vuqa na cakacaka vakalotu ni kosipeli, eda caka veiyalayalati tabu kei na Kalou; e yalataka o Koya me vakalougatataki keda nida maroroya na veiyalayalati oqori. Eda kila beka ni kena cokotivata na cakacaka vakalotu ni matabete vata kei na maroroi ni yalayala ni veiyalayalati, ena rawa kina vei keda meda rawata na kaukauwa mai vua na Kalou?
Ena yakavi oya au vakananuma se o au, edua na luvena yalewa ni veiyalayalati na Kalou, au sa kila vinaka sara na sala me rawati kina na isolisoli ni kaukauwa ni Kalou mai na cakacaka vakalotu ni matabete se au sa kila vakaidina sara na sala e cakacaka kina e lomaqu na kaukauwa ni Kalou.
Ena 2019 e vakatetei kina edua na veisureti vaka parofita vei ira na yalewa ena Lotu, ka vakavulici vei keimami na sala me vakadrodroi mai kina na kaukauwa ni iVakabula kina neimami bula. A sureti keimami o Peresitedi Russell M. Nelson me vulica na Vunau kei na Veiyalayalati 25, edua na ivakatakila ka soli vei Ema Simici mai Amoni , Penisilivenia. Na ciqomi ni veisureti oya e veisautaka na noqu bula.
Ena vula sa oti e noqu na madigi sega ni namaki meu gole ki Harmony. E kea, ena ruku ni vei vunikau, a vakalesui mai kina na matabete vei Josefa Simici kei Oliva Kauderi. E voleka kina veivunikau oya na mata ni katuba ni vale i Josefa Simici kei Ema. Veibasai ena vanua ni vakatakata e tiko kina edua na katubaleka. Au duri ena katubaleka oya ka vakananuma se cava a vakananuma o Ema ni rai yani kina vei vunikau.
Ena Julai ni 1830, e yabaki 26 kina o Ema; se gone sara kina. Oti e tolu veimama na yabaki ni nona vakamau. A mai takali vua edua na luvena gonetagane lailai—nona ulumatua. Na nona ibulubulu lailai e tiko ena dua na gaunisala volekata na nona vale. Niu duri ena katubaleka oya, e sega ni dredre vei au meu raitayaloyalotaka se cava e vakasinaita tu na nona vakasama. Io ena lomaleqataka dina na nodratou bula vakailavo, me baleta na veivakacacani levu ka yaco tiko vei iratou. ka baleta na nodratou veisiga ni mataka. Ia na cakacaka ni Kalou e yaco tiko ena veivanua wavoliti iratou. E vakananuma tale beka ga o koya na kena yaga ena ituvatuva, na nona lalawa ena Nona matanitu, kei na ka ena rawa ni rawata e mata ni Kalou?
Au nanuma nia vakakina.
Voleka e kea, na isolisoli ni lewa kei na idola ni matabete ni Kalou e vakalesui tale mai ki vuravura. Oqo e dua na gauna a gadreva dina kina o Ema na kaukauwa mai lomalagi. Ena loma ni mosi levu ni yalo, oca, kei na veilecayaki, au nanuma ni vakataroga o Emma na isolisoli oqo ni matabete ni Kalou me rawata kina mai Vua na kaukauwa ka gadreva vakalevu sara o koya.
Ia o Ema e sega walega ni duri tu e katubaleka ka vakasama tiko.
Ena gauna a vakavulici tiko kina na Parofita o Josefa baleta na idola, itutu, cakacaka vakalotu, kei na sala me veivuke kina ena veiqaravi ni matabete, na Turaga vakaikoya, mai vua na Nona parofita, a solia edua na ivakatakila vei Ema. Sega nio Ema na peresited-ni Soqosoqo-ni Veivukei mai-Nauvooi—na ivakatakila oqo a soli vei Ema e harmony ni se qai yabaki 26. Ena vuku ni ivakatakila, ena vulica kina o Ema me vakasavasavataki na lomana kei na isema ni veiyalayalati ena vakalevutaka na igu ni veicakacaka vakalotu ni matabete oqori me cakacaka ena nona bula.
iMatai, na Turaga a vakananumi Ema me baleta na nona itutu ena Nona ituvatuva, oka kina se o cei o koya kei cei e taukeni koya—edua na luvena yalewa ena Nona matanitu. E sureti me “lako ena sala ni caka dodonu,” na sala e okati kina na cakacaka vakalotu ka na rawa ni dolava na kaukauwa ni Kalou ke yalodina tiko o Ema kina nona veiyalayalati.
iKarua, ena gauna ni nona lolosi titobu, a solia vua na Turaga na nona inaki. A sega walega ni dabe toka ena idabedabe e liu ni Veivakalesui mai o Ema; e vakaitavi tiko ena cakacaka bibi ka vakayacori tiko. Ena qai tabaki me “vakamacalataka na ivolanikalou, ka veivakauqeti vei ira na lewenilotu.” Ena vakayagataki na nona gauna “ena volavola, ka vakakina ena vuli ka vakalevu.” E soli vei Ema edua na itavi tabu ena nodra vukei na Yalododonu me vakavakarau kina sokalou; na nodra sere vua na Turaga ena ciqomi me vaka na masu “ka na saumi vei ira ena veivakalougatataki ki uludra.”
iOtioti, Na Turaga a tuvanaka edua na iwalewale ni kena vakasavasavataki na lomada ka na vakarautaki Ema kina bula vakacerecerei. “Ia vakavo ga kevaka ko na vakayacora na veika oqo” a tukuna vua na Turaga, “ko na sega ni lako rawa mai kina vanua kau sa tiko kina.”
Kevaka eda wilika na wase e 25 vakavinaka, eda na raica ni yaco kina edua na ituvatuva bibi. Ena tubu o Ema mai na dua na goneyalewa ena matanitu ki na dua na “marama digitaki” kina dua na ranadi. Na cakacaka vakalotu ni Matabete i Eroni kei na Matabete i Melikiseteki, ka cokotivata kei na maroroi ni yalayala ni veiyalayalati ena vakalevutaka na nona veitokani vata kei na Yalo Tabu kei ira na agilosi, ka vakaukauwataki koya me liutaka na nona bula ena veidusimaki vakalou. Ena Nona kaukauwa vakalou, na Kalou ena vakabula na lomana, vakalevutaka nona igu, ka veisautaki koya kina tamata ka kila o Koya ni na rawa ni vakataka. Ka ena vuku ni cakacaka vakalotu ni Matabete i Melikiseteki, “[ena] vakatakilai mai na kaukauwa ni bula vakalou” kina nona bula ena tawasea na ilati na Turaga me rawa kina vua me ciqoma na kilaka mai Vua. Oqo na ka ena basika ni cakacaka e lomada na kaukauwa ni Kalou.
A vakatavulica o Peresitedi Russell M. Nelson:
“Na veika kece a yaco mai [Harmony] e bibi sara ka yaga ena nomu bula. Na vakalesui mai ni matabete, kei na ivakasala ni Turaga vei Ema, e rawa ni dusimaki ka vakalougatataki kemuni vakayadua.
“Na nomu rawata na kaukauwa ni Kalou ena nomu bula e gadrevi kina na veika vata a vakarota na Turaga vei Ema kei [keda] yadua meda cakava.”
E yaco tiko eso na ka bibi ena yasa ruarua ni katubaleka oya mai Harmony, oka kina na ivakatakila a soli vua na marama digitaki ka kaciva na Turaga—na ivakatakila ena vakaukauwataki, vakayaloqaqataki, ka dusimaki Ema Simici na luvena yalewa na Kalou.
Ena gauna a vakayacani ka vakalougatataki kina na makubui keirau yalewa o Isabelle, a vakalougatataki koya o tamana ena nona kila vinaka na matabete; ni na tubu o koya me kila na veivakalougatataki ena solia kina nona bula; ka tubu na nona vakabauta na matabete, ke tomana tiko me tubu ena kilaka.
E sega ni vakawasoma me dua na goneyalewa lailai e vakalougatataki me kila vakavinaka na matabete ka vulica na sala era na vukei koya kina na veicakacaka vakalotu ni matabete oqori kei na yalayala ni veiyalayalati, me rawata kina na kaukauwa ni Kalou. Ia au nanumi Ema ka vakasamataka, Na cava me kua kina? Na goneyalewa lailai oqo e tiko vua na igu mena yaco me dua na marama digitaki ena Nona matanitu ka yaco sara me dua na ranadi. Ena vuku ni cakacaka vakalotu ni Nona matabete kei na maroroi ni yalayala ni nona veiyalayalati, na kaukauwa ni Kalou ena cakacaka vua me vukei koya me rawa na veika sotavi ni bula ka yaco me vaka na marama e kila na Kalou ni na rawa ni yaco me vakataka. Oqo edua na ka au vinakata mera kila na vei goneyalewa yadua ena matanitu.
Vulica na sala ena rawa kina kina cakacaka vakalotu ni matabete kei na yalayala ni veiyalayalati me vakatara na kaukauwa ni Kalou me drodrova na nomu bula ka vakayacoka vakalevu, cakacaka vei iko, vaqaqacotaki iko ka vakaiyaragitaki iko mo rawata na nomui naki kei na kemu ituvaki dina.
Vulica ka vakananuma vakatitobu na cakacaka vakalotu ni Matabete i Eroni kei Melikiseteki, na yalayala ni veiyalayalati eda cakava kei rau, kei na kaukauwa ni Kalou eda rawata ena vuku ni veicakacaka vakalotu oqori.
Mo nanuma, ni sega ni bibi cei e vakaitavi ena cakacaka vakalotu; e gadrevi talega meda vakanamata kina cava ena vakarautaka vei keda na cakacaka vakalotu kei na nomu yalayala ni veiyalayalati.
Na vakayagataki ni madrai kei na wai e veimacawa e ivakananumi ni Nona kaukauwa me vukei keda meda rawata. Na daramaki ni qameni ni matabete savasava e vakananuma vei iko e veisiga na isolisoli ni Nona kaukauwa ni cakacaka tiko vei iko me vukei iko mo gumatua.
Eda rawa kece ni rawata na isolisoli ni kaukauwa ni Kalou.
E veigauna kece eda vakayagataka kina na sakaramede.
E veigauna kece eda kosova kina na ilago ni dua na valetabu.
Oqo sa ilutua ni noqu Siga ni Vakacecegu. Oqo na vuna au vakamareqeta kina na noqu ivolatara ni valetabu.
“Ena vakatakilai mai na kaukauwa ni bula vakalou ena kena cakacaka vakalotu.”
Au vakadinadinataka na isolisoli oqo ena yaca i Jisu Karisito, emeni.