Rokova na iSolisoli ni Veivutuni ni Turaga
Meda kua ni waraka me levu na veika ni bera ni lesu vua na Kalou. Meda kua ni waraka na icavacava ni noda bula meda qai veivutuni vakaidina.
Au vakadinadinataka na Tamada Vakalomalagi dauloloma. Ena koniferedi raraba ni Epereli 2019, au se qai tokoni oti ga kina noqu ilesilesi vou ni Vakaitutu Raraba ena Vitusagavulu , a lagata na matasere na “I Stand All Amazed” e tara saraga na utoqu kei na yaloqu.
Niu rogoca na veivosa oya, au qoroqoro ga. Au vakila ni veitalia na dredre eso e tu vei au, e vakalougatataki au na Turaga meu kila “au rawa ni kitaka na ka kecega ena Nona kaukauwa.”
Na vakilai tu ni dredre, malumalumu, se tawakilikili madaga e tatavutuvutu tu kina e vuqa vei keda ena so na gauna. Au sotava tu ga na bolebole, au vakila ena siga au kacivi kina. Au vakila ena vuqa na gauna, au vakila tu ena noqu vosa tiko yani vei kemuni. Ia, au vulica niu sega ni tu duadua ena veika au vakila tiko oqo. Vakaidina, sa vuqa sara na italanoa ena ivolanikalou me baleti ira ka via vakila tu na veika vataga. Me vakataki, eda nanumi Nifai e dua na dauveiqaravi yalodina ka talairawarawa ni Turaga. Vuqa na gauna, e vakatovolei na yalona ni sega ni taucoko, malumalumu, ka sega ni taucoko.
A tukuna: “Ia e dina ga ni sa rui vinaka vakaoti na Turaga ena nona vakaraitaka vei au na nona cakacaka lelevu ka talei, sa kaya vakaoqo na yaloqu: A tamata vakaloloma dina koi au! Io, sa rarawa na yaloqu ena vuku ni noqu itovo vakayago; sa yaluma na yaloqu ena vuku ni noqu caka cala.
E dau tukuna vakawasoma na Parofita Josefa Simici ni dau vakila me “vesuki,” ena nona bula vakaitabagone, “na [nona] malumalumu kei nona tawakilikili.” Ia na vakanananu ni dredre kei na lomaleqa i Josefa sa tiki ni ka e muataki koya me vakasama, vuli, kila, ka masu. O na rairai nanuma tu, nona a laki masu ena veikau volekata nona vale me kunea na dina, vakecegu, kei na veivosoti. A rogoca ni kaya vua na Turaga: “I Josefa, na luvequ, sa bokoci na nomu ivalavala ca. Lako ena nomu sala, tiko ena noqu lawa, ka muria na noqu ivunau. Raica, o au na Turaga ni lagilagi. Au a vakamatei ena vuku i vuravura, me rawata na bula tawamudu o ira ka vakabauta na yacaqu.”
Na gagadre dina i Josefa me veivutuni ka qara na vakabulai ni yalona e vukei koya ni torovi Jisu Karisito ka rawata na veivosoti ni nona caka cala. Na veika oqo e tadolava na katuba ni kena tomani tiko ga na Veivakalesui ni kosipeli i Jisu Karisito.
Na ka matalau a sotava oqo na Parofita o Josefa Simici sa vakaraitaka ni rawa ni vukea na noda nanuma na keda ituvaki druka na vakilai ni noda malumalumu kei na dredre. Nida yalomalumalumu, na veika oqo erawa ni vukei keda me kila na noda veiwekani kei Jisu Karisito ka me yavalata na yaloda na gagadre merai vua na iVakabula ka veivutunitaka na noda ivalavala ca.
Kemuni na noqu tokani, na veivutuni na marau! E kamikamica nida veivutuni e veisiga, “vosa ena vosa, vunau ena vunau,” e vakatavulica na Turaga meda bulataka na bula e yavutaki ena nona ivakavuvuli. Vakataki Josefa kei Nifai, rawa nida “tagi vua na [Kalou] me yalololoma; sa qaqa o koya me veivakabulai.” E rawa ni vakayaco gagadre se sasaga donu cavaga ka rawa ni walia na mavoa cavaga ena noda bula.
Ena i iVola i Momani, E Dua Tale na iVakadinadina i Jisu Karisito, daru rawa ni kunea e vuqa na veika meda vulica meda lesu Jisu Karisito ena veivutuni vakaidina.
Au via wase vei kemuni edua na ivakaraitaki i nona loloma uaisvi na TUraga ena veika e yaco ena neitou vuvale mai Puerto Rico.
Ena neitou taoni e Ponce a navuca edua na marama ena lotu, o Celia Cruz Ayala, me solia na iVola i Momani kina dua na itokani. A ologa ka gole me lai solia na iloloma, e talei vei koya mai na daimani kei na rupi. Ni lako voli, a sotavi koya e dua na daubutako, dreta na nona baosi, ka drotaka kei na iloloma vakamareqeti eloma.
Ni talanoataka o koya e valenilotu, e kaya nona itokan, “O cei e kila? De nomu madigi oqori ni wasea na kosipeli!”
Ia, ni oti e vica na siga, o kila na cava e qai yaco? Ciqoma o Célia e dua na ivola. Au taura na tu ivola, ka solia vei au o Célia, vei au nikua. E tukuna:
“O Mrs. Cruz:
“Vosoti au, vosoti au. O na sega ni kila na noqu madua niu butakoci iko tu Ia ena vuku ni ka oya, na noqu bula sa veisau ka sa na vaka tu ga kina.
“Na ivola oya [na iVola i Momani] e vukei na noqu bula. Na tadra ni tamata ni Kalou oya e yavalati au. Au vakasuka na nomu lima na [dola], niu sega ni rawa ni vakayagataka. Au vinakata mo kila ni sa vaka tu me serau na kemu irairai. E vaka me tarovi au na rarama oya [ena vakararawataki iko, kau] dro tani kina.
“Au vinakata mo kila nio na raici au tale, ia ni sa vakakina, o na sega ni kilai au, au sa na ganemu tu. Eke, ena vanua au tiko kina, meu na raica taumada na Turaga ka gole kina lotu o lewena tu.
“Na ka o vola tu ena ivola oya e vakaturuwainimata vei au. Mai na bogi ni Vukelulu au sega ni cegu na wilika tiko. Au masu ka kerea vua na Kalou me vosoti au [au] sa kerei iko mo vosoti au. Au nanuma ni sa dua na ka rawa ni volitaki tu na nomu iloloma olo. [Ia,] e vakavuna tu me caka [veisau] kina noqu bula. Vosoti au, vosoti au, au kerei iko.
Kemuni na taciqu kei na ganequ, na rarama ni iVakabula e rawa ni yacovi keda taucoko, se vakacava na keda ituvaki. “O sega ni rawa ni dromu tu ena serau ni rarama tawavakaiyalayala ni Veisorovaki i Karisito,” a kaya o Peresitedi Holland.
Ena loloma sega ni navuci vei Célia’s, na iVola i Momani, na turaga oqo a vakadinadinataka e levu na nona loloma levu na Turaga. Dina ga ni taura na gauna me vosoti koya kina na turaga oqo, a kune reki o koya ni veivutuni. Sa dua dina na cakamana! Dua na marama yalodina, dua na iVola i Momani, veivutuni vakaidina, kei na kaukauwa ni iVakabula a muataka na taucoko ni marau ni veivakalougatataki ni kosipeli kei na veiyalayalati tabu ena vale ni Turaga. Era qai muri na vo ni vuvale ka ciqoma na itavi tabu ena nona were na Turaga, wili kina na cakacaka vakadaukaulotu.
Nida lako vei Jisu Karisito, na sala ni noda veivutuni vakaidina ena muataki keda vakaoti kina valetabu ni iVakabula.
Sa dua na digidigi vinaka meda bula savasava—mo bula kilikilitaka na veivakalougatataki taucoko e rawa tu mai vua na Tamada Vakalomalagi kei na Luvena ena veiyalayalati tabu ni valetabu! Na veiqaravi wasoma ena vale ni Turaga kei na maroroi tu ni veiyalayalati tabu eda kitaka kina ena vakalevutaka na noda gagadre kei na madigi me sotavi kina na veisau ni lomada, vakasama, kei na yalo e veiganiti kei na noda vakataka tu na iVakabula. A vakadinadinataka o Peresitedi Russell M. Nelson, “Sega na ka ena tadolavi lomalagi vakalevu mai na sokalou tu ena valetabu]. E sega sara!”
Kemuni na itokani lomani, o sa veilecayaki tu li? O vakila nio sega ni bula kilikili? O lomalomarua tiko beka? De o rairai lomaleqa ka taroga: Au sa veiganiti kaya li? Au sa rairai bera li? Cava na vuna au lutu tiko kina niu saga tiko meu vinaka sara?
Kemuni na taciqu kei na ganequ, eda na caka cala vakaidina ena noda bula lako voli. Yalovinaka mo nanuma, me vaka a vakatavulica o Elder Gerrit W. Gong, “Na veisorovaki ni noda iVakabula sa tawavakaiyalayala ka tawamudu. Eda lakosese ka yala koso tu. Eda na rairai gole tani ena so na gauna. Sa vakadeitaka tu vei keda na Kalou [ni] vanua cava ga eda tiko kina se ka eda sa kitaka, se sega ni yaga na lesu tale. Sa wawa tu o Koya me mokoti keda.”
Me vaka e vakavulici au kina na watiqu lomani, Cari Lu, e dodonu meda veivutuni, taleva lesu, ka tekivu tale “saiva na kaloko” ena veisiga kece. ,
Ena yaco mai na veika dredre. Meda kua ni waraka me levu na veika ni bera ni torovi ni Kalou. Meda kua ni waraka na icavacava ni noda bula meda qai veivutuni vakaidina. Ia, meda vakanamata ga, se vakacava na yasa ni sala ni veiyalayalati eda sa tiko kina oqo, kina kaukauwa veivueti i Jisu Karisito kei na gagadre ni Tamada Vakalomalagi ni lesu tale tu ki Vua.
Na vale ni Turaga, Nona ivolanikaou tabu, Nona Parofita kei na apositolo era vakauqeti keda meda toso tiko ga iliu ena noda vakatabuya na noda bula ena nona ivakavuvuli i Karisito.
A kaya o Nifai: “Ia oqo, raica, oi kemudou na wekaqu lomani, sai koya oqo na sala; ia sa sega sara e dua tale na sala se na yaca sa soli e rukui lomalagi me ra vakabulai kina na tamata ki na matanitu ni Kalou. Ia oqo, raica, sai koya oqo na ivakavuvuli i Karisito, ka sa ivakavuvuli dina duadua ga i Tamada, kei na Luvena, kei na Yalo Tabu, na Kalou e duabau ga, ka sega ni mudu.”
Na ivalavala ni noda “dua-vata-tu” kei na Kalou ena veibolei. Ia, oiko kei au e rawa ni daru wawa, tu vakadua, rai vua na iVakabula, vakasaqara ka cakava na ka e vinakata o Koya meda cakava meda veisau kina. Nida cakava ena vu ni yaloda taucoko, eda na vakadinadinataka na Nona veivakabulai. Ka nanumi ira na noda kawa ni mataka mera vakalougatataki nida karona na iloloma ni veivutuni ni Turaga!
Na Dautulikuro Liu,e vakavulici tamaqu, e moici ka vakayagovinakataki keda, e rawa ni dredre. Ia, na Dauveivakabulai Levu ena vakasavasavataki keda. Au sotava ka sotava tiko ga na kaukauwa ni veivakabulai oya. Au vakadinadinataka ni lako mai ena vakabauti Jisu Karisito kei na veivutuni e veisiga.
Au vakadinadinataka na loloma ni Kalou kei na kaukauwa tawavakaiyalayala ni Nona Veisorovaki na Luvena. Eda rawa ni vakila vakalevu ni da veivutuni vakaidina ka vakataucoko.
Kemuni na itokani, au ivakadinadina bula ni Veivakalesui ni lagilagi ni kosipeli mai vua na Parofita o Josefa Simici kei na veituberi tabu oqo ni iVakabula mai vua na Nona parofita o Peresitedi Russell M. Nelson. Au kila nio Jisu Karisito e bula tiko, nio Koya na dau ni Veivakabulai levu ni yaloda. Au kila ka vakadinadinataka ni dina na veika oqo, ena yaca tabu i Jisu Karisito, emeni.