Liaona
Vauci vei Jisu Karisito: Yaco mo Masima kei Vuravura
Noveba 2024
10:49

Vauci vei Jisu Karisito: Yaco mo Masima kei Vuravura

Mai vei Elder José A. Teixeira

Ena Mataveiliutaki ni Vitusagavulu

Nida sa vauci tu vua na Turaga, na noda bula ena vakavotuya na Nona rarama, kada na yaco meda masima kei vuravura.

E vakatavulica na iVakabula ni gauna eda “sa kacivi kina [Nona] kosipeli tawavakaiyalayala, ka veiyalayalati ena dua na veiyalayalati tawavakaiyalayala, [eda] sa na okati kina me[da] masima kei vuravura.” Ni caka na masima e waki vata e rua na ka. E sega ni rawa nida masima vakaikeda; kevaka meda masima kei vuravura, sa dodonu meda vauci vua na Turaga, oqori na veika au raica niu veimaliwai kei ira na lewe ni Lotu ena veiyasai vuravura—era lewe ni Lotu yalodina vauci vua na Turaga, yalodei kina nodra sasaga me veiqaravi vei ira na tani ka mera masima kei vuravura.

Na nomu yalodina sega ni yavalati rawa sa dua na ivakaraitaki vinaka. Na nomu veiqaravi e kauwaitaki ka vakamareqeti.

Na noda itabagone era vakaraitaka na yaloqaqa vakasakiti kei na yalodina. Era ciqoma ena marau na cakacaka ni tuvakawa, kei na nodra sikova vakawasoma na vale ni Turaga sa dua na ivakadinadina ni nodra yalodina. Na nodra gagadre mera solia na nodra gauna kei na kaukauwa kina qaravi kaulotu ena veiyasai vuravura e vakaraitaka e dua na vakabauta e titobu ka tudei. Era sega walega ni vakaitavi tiko ia era liutaka na sala me yaco me tisaipeli vauci kivei Jisu Karisito. Na nodra veiqaravi e serauna na rarama kei na inuinui, ka tara na bula sega ni wiliki rawa. Kivei kemuni, na itabagone ni Lotu, keitou vakaraitaka na neitou vakavinavinaka kina nomuni veiqaravi veivakauqeti. Oni na sega walega ni isakisaki ni veisiga ni mataka ni Lotu ia ena gauna talega oqo. Oni sa masima dina kei vuravura!

Au lomana na Turaga o Jisu Karisito au kalougata ena madigi meu veiqaravi vata kei kemuni ena Lotu ni Turaga. Na noda duavata kei na kaukauwa, e yavutaki ena noda vakabauta vata, vakadeitaki keda nida sega ni tiko duadua ena ilakolako oqo. Ni tu vata, eda rawa ni tomana na tara ni matanitu ni Kalou yavutaki ena veiqaravi, loloma, kei na vakabauta sega ni yavalati rawa.

Ni veivakavulici ena Wasawasa mai Kaleli o Jisu Karisto, edau vakayagataka okoya vakawasoma na veika e veisiga era kila o ira na vakarorogo vua me vakaraitaka na veika bibi e dina vakayalo. E dua na veika oqo na masima. Ni vunautaka o Jisu, “Oi kemudou na masima kei vuravura,” e dua na tukutuku vutuniyau ena kena ibalebale ka kilai tani, vakabibi vei ira na tamata ena Nona gauna ka kila vinaka na kena vakamareqeti na masima.

Na cakacaka makawa ni soqoni masima mai Algarve, na ceva ni noqu vanua mai Potukali, e suka lesu me vica na udolu na yabaki sa oti kina nodra gauna na Matanitu na Roma. E vakasakiti, ni iwalewale era vakayagataka na daucaka masima, era kilai me marnotos, e sega ni levu sara na kena veisau mai na gauna oya. Era matai ka yalodina era vakayagataka na iwalewale vakavanua, qarava na nodra cakacaka ena ligadra, ka maroroya na veika era kilai tani kina ena veisenitiuri.

Na iwalewale makawa oqo e vakatokai me “senikau ni masima.” Meda vakavinavinakataka na cakacaka vakamareqeti ni kena soqoni na senikau ni masima, e dodonu me kilai na ituvaki ni vanua e qaravi kina. Na baravi mai Algarve e dau suasua ena gauna ni ualevu ka mamaca ena gauna ni mati, e vakarautaka na ituvaki vinaka duadua ni caka masima. Na waitui e muataki kina vei tobu matia, e kilai me loga ni masima, ka biu tu kina mera sigani ena siga me mamaca. Ni maca na wai, na senikau ni masima e bulia na karisitala malumu ena dela ni loga ni masima. Na karisitala oqo e savasava sara ka duatani na kena ivakarau, ka matata. Era dau takia vakamalua na karisitala o ira na marnotos mai na dela ni wai ka vakayagataka na iyaya ni cakacaka e veiganiti, ka gadrevi kina na maqosa ni kila kei na dodonu. Mai Potukali, na masima vinaka oqo e kilai tani me “kirimu ni masima” baleta ni rawa ni takici laivi vakamalua me vaka na kirimu ni sucu ni vude icake. Na masima matailalai oqo e dau vakamareqeti ena vuku ni kena savasava kei na vakasakiti ni kena ikanakana, ka vakavuna me dua na masima saulevu ka mareqeti ena buturara ni vakasaqa.

Me vakaga nira solia kece na nodra igu na marnotos ena kena rawa ni soqoni mai na masima vinaka duadua, e vaka kina o keda, nida tamata veiyalayalati ni Turaga, meda dau solia na noda vinaka taucoko ka mena noda dauloloma kei na noda ivakaraitaki esa, ena veigauna kece, ivakaraitaki savasava ni iVakabula, Jisu Karisito.

Ena gauna eliu, na masima e sega walega ni yaga ena vakasaqa—e dau veitaqomaki kina kakana maroroi vakabalavu ka ivakatakarakara ni savasava kei na veiyalayalati. Na tamata era kila na bibi ni masima kei na kena yaga ni dau maroroi na kakana me bula dede ka vakaikanakanataki ni kakana. Era kila talega na ibalebale bibi ni sa yali na ikanakana ni masima se tuituina se sa veicurumaki kei na duka se waicala.

Me vaka ni rawa ni vakayalia na masima na kena isaluwaki, keda rawa talega ni vakayalia na noda kaukauwa vakayalo kevaka meda vakaweleweletaka na noda vakabauti Jisu Karisito. E rawa ni tautauvata na keda irairai itautuba, ia kevaka e sega na vakabauta kaukauwa iloma, keda vakayalia na noda rawa ni cakava e dua na veisau e vuravura ka kauta mai na kena vinaka duadua vei ira era tu wavoliti keda.

Me vakakina, e rawa vakacava meda vagolea na noda igu kei na kaukauwa me rawa ni dua na veisau e gadreva na vuravura edai? E rawa vakacava meda maroroya na bula vakatisaipeli ka tomana tiko na veivakayarayarataki vinaka?

Na vosa ni noda parofita lomani e voqa e na noqu vakasama: “Na Kalou e vinakata meda cakacaka vata ka veivukei vakai keda. O ya na vuna e talai keda mai kina ki vuravura o Koya vaka matavuvale ka tuvanaki keda vaka tabanalevu kei na iteki. O ya na vuna e kerei keda kina o Koya meda veiqaravi ka veirairaici vakai keda. O ya na vuna e kerei keda kina o Koya meda bula e vuravura ia ka kakua ni vakavuravura.

Ni vakasinaiti na noda bula ena inaki kei na veiqaravi, eda levea na vucesa vakayalo; ena yasana kadua, ni vakuwai na noda bula mai na inaki vakalou, veiqaravi vakaibalebale vei ira na tani, kei na madigi tabu ni vakasama vakatitobu ka raica lesu, eda na qai luvuci ena noda itaviqaravi kei na veika e talei vei keda ga, ka rawa ni yali na tuituina. Na kena iwali ni veika oqo me tomana tikoga na veiqaravi—vakaitavi ena cakacaka vinaka kei na noda vinaka cake kina itikotiko eda bula tiko kina.

Na taciqu kei na ganequ lomani, e dua na kalougata dina e dai nida lewena na Lotu i Jisu Karisito ka tu na madigi meda veiqaravi ena Nona Lotu. Na noda ituvaki e rawa ni duidui, ia e rawa ni da vakaitavi kece me yaco na veisau.

Nanumi ira na daucakamasima na marnotos; era vakayagataka na iyaya ni cakacaka rawarawa me soqona na karisitala vinaka duadua, na masima vinaka duadua! Eda rawa ni cakava talega na veika rawarawa, ena sasaga tudei ena cakacaka lalai ka vakaibalebale, e rawa ni vakatitobutaka na noda bula vakatisaipeli kei na yalodina vei Jisu Karisito. Oqo e va na sala rawarawa ka bibi eda rawa ni sasaga meda masima kei vuravura:

  1. Na maroroi ni vale ni Turaga e ka bibi ni noda sokalou. Ena gauna oqo ni sa voleka tu na valetabu vakatauvatani kei na veigauna sa oti, na vakaliuca wasoma na sokalou ena vale ni Turaga ena vukei keda meda vakanamata ki na veika e bibi duadua ka maroroya na noda bula vei Karisito. Ena valetabu, eda kunea na uto ni noda vakabauti Jisu Karisito kei na yalo ni noda sokalou Vua.

  2. Na kena nakiti ena noda sasaga me da vaqaqacotaki ira na tani ena noda bulatakavata na kosipeli. E rawa nida vaqaqacotaka na noda matavuvale ena noda sasaga tudei ka nakiti me kauta mai na ivakavuvuli ni kosipeli kina noda bula kei na noda itikotiko.

  3. Na ciqomi ni veikacivi kei na lomasoli kina veiqaravi ena Lotu. Na veiqaravi ena ivavakoso ni noda vanua e vakatarai keda meda veitokoni vakai keda ka tubu vata. E sega beka ni dau matau na veiqaravi, ia e dau veivakalougatataki.

  4. Kena iotioti, vakainaki na vakagayataki ni iyaya ni veitaratara ena monalivaliva. Nikua, na iyaya ni veitaratara ena monalivaliva e vakatarai keda meda veisemati vakarawarawa sara. Me vakatakae levu vei kemuni, au dau vakayagataka na iyaya oqo meu veisemati vei ira na taciqu kei na ganequ e na Lotu vata kei na noqu matavuvale kei na itokani eso. Niu veisemati kei ira, au vakila niu volekati ira; e rawa nida veiqaravi vakataki keda ena gauna eda vakaleqai tu kina ena gauna eda sega ni rawa ni tiko vakatamata. Na veiyaragi era veivakalougatataki dei, ia na veiyaragi vata oqo era rawa ni yaraki keda vakatitobu ena veimaliwai vinaka ka rawa ni qai vakavuna meda sa laudre tu yani kina so na ka ena yaco me ivakarau ni bula vakalusi gauna kei na itavi qaravi sega ni vakaibalebale. Na sasaga meda masima kei vuravura e oka kina e levu cake mai na saravi ni iyaloyalo ena sikirini ono na idi (15cm).

Nida maroroya na vale ni Turaga me ka bibi ena noda bula, eda na vakaqaqacotaki ira na tani ena noda bulataka na kosipeli, ciqoma na veikacivi meda veiqaravi, ka vakayagataka vakainaki na iyaya vakalivaliva, ka rawa nida maroroya na noda bula vakayalo. Me vaka na masima ena kena ituvaki savasava sa tu na kena kaukauwa me vakalevutaka ka maroroya, sa vakakina na noda vakabauti Jisu Karisito ni sa vakani ka taqomaki ena noda yalodina kina veiqaravi kei na loloma Vakarisito.

Nida sa vauci tu vua na Turaga, na noda bula ena vakavotuya na Nona rarama, kada na yaco meda masima kei vuravura. Ena sasaga oqo, keda sa sega ga ni vakatorocaketaka na noda bula ia e vakaukauwataka talega na noda matavuvale kei na noda itikotiko. Meda saga tikoga meda na vauci dei tiko vua na Turaga, ka sega ni yali na keda isaluwaki, ka yaco meda kirisitala lalai ni masima sa vinakata na Turaga meda vakakina. Ena yacai Jisu Karisito, emeni.