iTukutuku ni Lotu

Marautaka o Peresitedi Nelson Nai Ka 100 ni Siganisucu

Era a veitomani yani na iliuliu ni Lotu i Jisu Karisito ni Yalododonu Edaidai vei ira na matavuvale kei na itokani enai ka 9 ni Sepiteba, 2024, me ra rokova kina na parofita ka Peresitedi ni Lotu o Russell M. Nelson enai ka 100 ni nona siganisucu.

A vakayacori na soqo oqo mai Salt Lake City ka kaburaki yani e vuravura raraba. E vakayacori kina na sere bula, vidio ni veivakacaucautaki mai vei ira na iliuliu ni vakabauta eso, vosa mai vei ira na iliuliu ni Lotu kei ira na lewe ni matavuvale nei Peresitedi Nelson, kei na vidio mai vei ira na lewe ni Lotu ena nodra wasea na nodra veiqaravi vua e dua.

A vakavinavinakataka o Peresitedi Nelson na matavuvale, itokani, kei ira na Yalododonu Edaidai ena nodra yalovinaka kei na veitokoni. A wasea na nona vakavinavinaka me baleta na itukutuku ni siganisucu e sega ni wiliki rawa kei na isaunitaro e vuravura raraba ki na nona veisureti “99 +1“, ka vakayaloqaqataki ira kina na tamata “me ra dolele yani vei ‘koya‘ ena noda bula ka ra sa vakila tiko beka na yali se galili“ (Facebook, 1 ni June, 2024, facebook.com/russell.m.nelson).

A vakamatatataka na parofita na bibi ni vakabauta, e dua na rai tawamudu me baleta na bula, kei na isoro ni veisorovaki i Jisu Karisito. “Kemuni na taciqu kei na ganequ lomani, na balavu ni nomu bula e sega ni bibi me vaka na mataqali bula o bula tiko kina,“ e kaya o Peresitedi Nelson. “Vei keda yadua, me baleta mada ga e dua na turaga qase sa yabaki 100, e totolo sara na toso ni bula. Sa noqu masu mo ni vakatara na Kalou me qaqa ena nomuni bula. Eda caka veiyalayalati kei Koya. Mo tiko ga ena salatu ni veiyalayalati. Vakarautaki iko mo lesu mo laki bula vata tale kei Koya.“

Erau a wasea o Peresitedi Dallin H. Oaks kei Henry B. Eyring, na daunivakasala nei Peresitedi Nelson ena Mataveiliutaki Taumada, na nodrau vakadidike mai na nodrau cakacaka vata kei na parofita me ono veimama na yabaki. Erau vakamatatataka na itovo malua nei Peresitedi Nelson, nona dau dokai ira na tamata, kei na ivakarau Vakarisito.

“Me tiko ena dua na rumu se ena dua na soqoni se ena dua na veivosaki vata kei Peresitedi Nelson e solia ga vei iko na madigi mo sotava na veika ena vaka me da tiko vata kei na iVakabula,“ e kaya o Peresitedi Oaks. “O koya na mata ni iVakabula. Sai Koya na noda ivakaraitaki.“