Ena Loma ni Vica Walega na Yabaki
Kevaka eda sega ni yalodina ka talairawarawa, sa rawa meda moica na kalougata ni sautu e solia na Kalou me dokadoka veivakarusai e vagolea ka matavulotaki keda.
Kemuni na taciqu kei na ganequ lomani, ni dabe tiko e cake, au sarava vakatolu na kena sinai na Vanua ni Koniferedi oqo, ena imatai ni ni oti na COVID. Oni tidsaipeli yalodina i Jisu karisito ka gadreva me vuli. Au vakavinavinakataki kemuni ena nomuni yalodina. Kau lomani kemuni.
A veiqaravi o Ezra Taft Benson vaka Peresitedi ni Lotu i Jisu Karisito ni Yalododonu Edaidai mai na Noveba 1985 kina Me 1994. Au se qai yabaki 33 ena gauna a Peresitedi kina ni Lotu o Peresitedi Benson ka yabaki 42 ena gauna a takali kina. A vakauqeti au na nona veivakavulici kei na ivakadinadina ena sala bibi ka qaqaco vinaka.
Dua na isakisaki ni veiqaravi nei Peresitedi Benson oya nona raicamatua na inaki kei na bibi ni iVola i Momani. E vakamatatataka o koya ni iVola i Momani “sa vatudei ni noda lotu—na vatudei ni noda ivakadinadina, na vatudei ni noda vunau, ka vatudei ni noda vakadinadina na noda Turaga ka iVakabula.” E dau vakamatatataka na veivakavulici kei na ivakaro baleta na ivalavala ca ni viavialevu e kunei nikua ena ivakadinadina baleti Jisu Karisito.
E dua na veivakavulici nei Peresitedi Benson a tarai au sara vakalevu ka vakauqeti au tikoga meu vulica na iVola i Momani. A kaya o Koya:
“Na iVola i Momani a volai me baleta na noda gauna nikua. A sega vei ira na Nifai na ivola oqo, ka vakakina o ira na Leimani ena gauna makawa. A baleti keda sara ga. A volavola o Momani ni sa cava tiko na nodra kawa na Nifai. Ena veivakauqeti ni Kalou, o koya e raica na ka kecega mai na ivakatekivu, a vakalekataka o [Momani] na itukutuku ni veisenitiuri, digitaka na italanoa eso, vosa, kei na veika a yaco ka na veivuke vakalevu vei keda.”
Tomana o Peresitedi Benson “O ira yadua era volavola vakalevu ena iVola i Momani era vakadinadinataka ni a vola baleti ira na kawatamata ni veisiga ni mataka. Kevaka era raica na noda siga edai, ka digitaka na veika oqori ka rna yaga beka vakalevu me noda, sa sega beka na sala e dodonu meda vulica kina na iVola i Momani? E dodonu meda tarogi keda tiko, ‘Na cava na vuna a vakauqeti Momani kina na Turaga me okata [kina na itukutuku oqo] ena nona ivola? Na lesoni cava au rawa ni vulica mai na [ivakasala oqo] me vukea na noqu bula tiko nikua kei na yabaki?’”
E vukei keda na itukutuku nei Peresitedi Benson meda kila vinaka na iVola i Momani ni sega walega ni itukutuku makawa taumada e vakadeuca mai na ka sa oti. Ia, na ivola oqo ni ivolanikalou e raica na veika sebera mai e tiko kina na ivakavuvuli cecere, ivakaro, kei na veilesoni sa baleta tiko na veiituvaki kei na ibolebole ni noda gauna oqo. Koya gona, na iVola i Momani sa ivola ni noda veimataka kei na veigauna eda bulataka tiko oqo kei na bula se bera.
Au masuta na veivuke ni Yalo Tabu nida mai tugana oqo na veilesoni veiganiti baleti keda nikua mai na ivola i Ilamani ena iVola i Momani.
O ira na Nifaiti kei na Leimanaiti
Na itukutuku kei Ilamani kei rau na luvena tagane e tukuna tiko e dua na mataqali tamata era namaka tiko na sucu i Jisu Karisito. Na veimama ni senitiuri e tukuni tiko ena ivolanikalou e kena usutu tiko na nodra veisau mai kei na nodra yalododonu na Leimanaiti kei na nodra ivalavala ca, vuki tani, kei na cala na Nifaiti.
Na veika eso e rau tautauvata ka duidui kina na Nifaiti kei na Leimanaiti e tukuni tiko ena itukutuku makawa oqo e ivakaro bibi vei keda nikua.
“Ka ra sa dua na iwase levu ni Leimanaiti era sa tamata yalododonu, io era sa yalododonu cake vei ira na Nifaiti baleta ni ra sa dei sara ka tu vakadodonu ena vakabauta.
“[Ka] raica, era sa lewevuqa na Nifaiti era sa yalokaukauwa ka sega ni via veivutuni, ka ra sa ca vakalevu sara, era sa cata kina na vosa ni Kalou, kei na ivunau kei na parofisai kecega e lako yani ena kedra maliwa.”
“Eda sa raica eke ni ra sa malumalumu mai ena tawavakabauta ko ira na Nifaiti, ka sa tubu cake na nodra caka ca ka itovo vakasisila, ia ko ira na Leimanaiti era sa tubu vakalevu sara ena nodra kila na nodra Kalou; io era sa muria na nona lawa kei na nona ivunau ka lako ena dina kei na dodonu e matana.
“Ia eda sa raica eke ni sa tekivu me vakasuka mai vei ira na Nifaiti na Yalo ni Turaga ena vuku ni nodra caka ca kei na kaukauwa ni lomadra.
“Ia eda sa raica eke ni sa tekivu me sovaraka yani na Yalona na Turaga vei ira na Leimanaiti, ni ra sa yalorawarawa ka ra vinakata me ra vakabauta na nona vosa.”
E veivakurabuitaki ka veilauti sara ni ituvaki ni nodra luluqa yani kina vuki tani na Nifaiti sai koya sara ga ni “sa yaco vei ira na caka cala kece oqo ena loma ni vica walega na yabaki .”
Era Vuki Tani na Nifaiti mai Vua na Kalou
A rawa vakacava kina dua-na mataqali tamata ivalavala dodonu mera yalokaukauwa ka caka cala ena dua ga na gauna lekaleka? A rawa vakacava vei ira na tamata mera guilecava vakatotolo na Kalou e dau vakalougatataki ira vakalevu sara?
Ena dua na sala kaukauwa ka cecere sara, e yaco na nodra ivakaraitaki ca na Nifaiti me vakaroti keda tiko nikua.
“Na qaciqacia … sa tekivu me curu mai … kina yalodra na tamata era kaya ni ra lewe ni lotu ni Kalou … ka sa baleta ni sa levu sara na nodra iyau kei na nodra tiko sautu ena vanua.”
“[Era] sa [domona] na iyau kei na veika wale ni vuravura” “ena vuku ni dokadoka [era] … sa vakatara me curu ki [lomadra] ka sa … laveti [ira] cake [mera] ulabaleta na ka e vinaka ena vuku ni levu ni [nodra] iyau!”
Na voqa mai na kuvu ni soso ni gauna e liu e vakamasuti keda meda vulica na lesoni tawayalani oqo: sautu, vakaiyau, kei na wele ni umanaka e dua na iwaki kaukauwa e rawa ni muataki ira mada ga na dodonu mera gunuva na gaga ni dokadoka.
Nida vakatara na dokadoka me curuma na yaloda ena rawa me vakavuna noda vosabeca na veika tabu; tawa vakabauta na yalo ni parofisai kei na ivakatakila; buturaka e yavada na ivunau ni Kalou; cakitaka na vosa ni Kalou; cemuria, vosacataka, ka saqati ira na parofita; ka guilecava na Turaga na Kalou ka “sega ni vinakata me lewai ira na [noda] Turaga na Kalou, ka a buli [keda], e lewa ka liutaki taki [keda].”
Koya gona, eda sega ni yalodina ka talairawarawa, sa rawa meda moica na kalougata ni sautu e solia na Kalou me dokadoka veivakarusai e vagolea ka matavulotaki keda mai na dina tawamudu kei na veika bibi vakayalo me vakaliuci. Sa dodonu ga meda taqomaki keda mai na uqe dokadoka kei na yalo vakacerecerei koya ga, na nanuma cala meda bula rawati keda ga, ka vakasaqaqara me noda ga ka sega ni loloma yani.
Nida raici keda cake tikoga vakadokadoka, eda rawai talega ena mataboko vakayalo ka calata e vuqa, ka vakalevu, se rairai koya oqo sa yaco tiko e loma ka voliti keda tiko. Eda sega ni rawa meda rai ka vakanamata vei Jisu Karisito me “maka” eda raici keda tikoga.
Na mataboko vakayalo oqo ena rawa nida gole tani kina mai na salatu ni ivalavala dodonu, lutu yani kina salatu vakatani, eda yali yani. Nida sa mataboko ka “muria ga na [lomada] ” ka muria na sala tani veivakarusai, ena rawa meda muria ga na noda kila vakaikeda, ka boletaka na noda dui kaukauwa, ka vakararavi ga kina noda dui vuku.
E vakamcalataka vaka lekaleka o Samuela na Lemanaiti na nodra vukitani na Nifaiti mai vua na kalou: “Ko ni sa vakasaqara ena veisiga kece ni nomuni bula na ka o ni na sega ni taukena tu vakadua; ko ni vakasaqara na marau ena nomuni caka cala, io na ka sa sega ni salavata kei na ivalavala dodonu i koya na noda iLiuliu Tawamudu ”
A raica vakamatua na parofita oMomani, “A ra sa tiko ga na iwase levu cake ni tamata ena nodra qaciqacia kei na nodra caka ca, ka ra sa caka dodonu tiko ena mata ni Kalou na iwase lailai sobu.”
Era sa Vuki na Leimanaiti Vua na Kalou
Ena iVola i Ilamani, na nodra torocake tiko ena ivalavala dodonu na Leimanaiti sa vakarautaka e dua na duidui levu kina nodra luluqa sobu tikoga vakayalo na Nifaiti.
Nira sa gole na Leimanaiti ki vua na Kalou era sa qai kila kina na dina ena nodra sa vakabauta kina na veivakavulici e tiko ena ivolanikalou tabu kei ira na parofita, ka ra sa vakabauta na Turaga o Jisu Karisito, ka veivutunitaka na nodra ivalavala ca, ka vakila e dua na veisau levu ni yalodra.
“O koya gona, o ira kece era sa yacova mai oqo ko ni sa kila vakai kemuni, ni ra sa kaukauwa ka tudei tu ena vakabauta kei na veivakabulai era sa sereki kina.”
“Ia au gadreva moni kila ni lewevuqa cake vei ira [na Lemanaiti] era sa vakayacora tiko na nodra itavi, era sa lako vakadodonu tiko ena mata ni Kalou ka ra sa raica mera muria na nona ivunau, kei na nona ilesilesi kei na nona lewa.”
“Era sa sasagataka sara tiko vagumatua ena yalodina mera vakatavulici ira na wekadra me ra kila na dina”
Sa yaco kina o “[ira na Leimanaiti] era sa yalododonu cake vei ira na Nifaiti, baleta ni ra sa dei sara ka tu vakadodonu ena vakabauta.”
E Dua na iVakaro kei na Dua na Yalayala
A kaya o Moronai: “Raica, sa vakaraitaka vei au na Turaga na veika lelevu ka talei sa voleka ni yaco mai, ena yaco ena siga sa yaco kina vei kemudou na veika kece oqo.
“Raica, au sa vosa vei kemudou me vaka sara ga dou sa tiko dina oqo, ka dou sa sega ga. Ia raica, sa vakaraitaki kemudou vei au ko Jisu Karisito, kau sa kila kina na veika dou sa kitaka.”
Yalovinaka moni nanuma tiko ni iVola i Momani e rai yani ki liu ka ra tiko kina na ivakavuvuli bibi, ivakaro, kei na vei lesoni e baleti au kei iko ena veiituvaki kei na ibolebole ni noda gauna oqo.
Na vuki tani e rawa ni yaco ena rua na yavu taumada—vakaisoqosoqo kei na tamata yadua. Ena yavu vakaisoqosoqo, na Lotu i Jisu Karisito ni Yalododonu Edaidai ena sega ni lakosese ena vuki tani se kau tani mai vuravura.
E kaya na Parofita o Josefa Simici: “Ena sega ni dua na liga tawasavasava ena rawa ni tarova na kena toso na cakacaka oqo; … ia na dina ni Kalou ena lako yani ena doudou, vakaturaga, ka tu vakaikoya, me yacova ni sa curubasikata yani na veiyasana yadudua, sikova na veivanua, curuma yani na veimatanitu, ka rogovaki ena veidaliga yadudua me yacova ni sa vakacavari na veinaki ni Kalou, ka na qai kaya ko Jiova sa Cecere ni sa qaravi oti na cakacaka.”
Ni yavutaka na tamata yadua, o keda yadua meda “qarauni [keda] me [da] kakua ni yaloviavialevu, de [da] na yaco me vakataki ira na Nifaiti ena gauna e liu.”
Au mai kaya kina ni kevaka me daru vakabauta tiko nida sa kaukauwa vinaka tiko ka qaqa meda levea na veicavilaki ni viavialevu, sa qai tauvi keda oti tiko beka na mate vakayalo rerevaki oqo. Vakarawarawa sara, kevaka me daru sega ni vakabauta ni rawa me tauvi kedaru na viavialevu, eda sa qai vakaloloma ka rusa vakayalo. Ena loma ni vica walega na siga, macawa, vula, se yabaki, eda rawa ni biuta laivi na noda dodonu vakayalo ni sucu me isosomi ni dua na veleti kakana lailai.
Kevaka, me daru na vakabauta ni rawa me takavi kedaru na viavialevu, me da sa qai cakava tikoga na veika lalai ka rawarawa ni na veitaqomaki ka vukei keda meda sa “vaka na gone yalomalumalumu, dauvosota, sinai ena loloma, ka ciqoma na veika kece sa raica na Turaga ni dodonu [meda] sotava.” “Era sa kalougata kina ko ira era vakayalomalumalumutaki ira ga ka sega ni vakasaurarataki me ra yalomalumalumu.”
Nida muria na ivakasala i Peresitedi Benson ka tarogi keda na vuna a vakauqeti Momani kina na Turaga me okata ena ivola i Ilamani na itukutuku, veivunauci, kei na ivakaro, au yalataka eda na kila na yaga ni veivakavulici oqo ki na veituvaki matalia ni noda dui bula yadua kei na vuvale ena gauna oqo. Nida vulica ka tugana na itukutuku veivakauqeti oqo, eda na vakalougatataki me raica na matada, rogoca na daligada, ka vakadeitaka na noda vakasama, kei na yaloda me kila vinaka na lesoni e dodonu meda vulica meda “qarauna na qaciqacia, [meda] kakua kina ni rawai ena veitemaki.”
Au reki niu vakadinadinataka ni Kalou na Tamada Tawamudu e Tamada. Jisu Karisito na Luvena e Duabau ga ka Luvena Daulomani. O Koya na noda iVakabula. Au vakadinadinataka nida lako tu ena yalomalumalumu ni yalo ni Turaga, eda na levea ka valuta rawa na viavialevu ka rawa na Nona vakacegu. Au vakadinadinataka ena yaca tabu ni Turaga o Jisu Karisito, emeni.