E Sega ni Cegu na Liwa ni Cagi
Eda rawa ni vukei ira na tani mera tubu ena nodra ilakolako mera ciqoma na veivakalougatataki ni Kalou.
Ena 2015, ena yasana o Pernambuco, e Brazil, e 62 na loya era lewe ni J. Reuben Clark Law Society era cakacaka vata kei na Tabana ni Veibeitaki Vakamatanitu ena vaqaqai ni bolebole vakalawa era sotova tiko na vakaitikotiko ena va na itikotiko duidui ni veiqaravi vei ira na malumalumu. Ena lima na auwa ena dua na siga Vakarauwai, era veivakatarogi vakayadudua, na loya oqo vei ira e sivia na 200 na lewe ni itikotiko oqo, o ira yadua era sa guilecavi tu mai vei ira na wekadra.
Ena gauna ni veivakatarogi, era kunea e vica na cala ni kena basuki na lawa e yaco vei ira na lewe ni itikotiko qase me vaka na biliraki, ivalavala kaukauwa, vakayagataki vakailawaki ni nodra ilavo. Edua na tiki bibi ni isoqosoqo ni loya oqo oya na nodra qaravi na dravudravua kei na vakaleqai. Oti ga e rua na vula, e ratou biuta na dauniveibeitaki na kedratou jaji na mata isoqosoqoera vakaitavi kina.
Na nodra veivuke e ivakaraitaki uasivi ni ivakavuvuli ni o Tui Penijamini oya “nio sa qarava tiko na nomuni Kalou ena gauna oni qaravi ira tiko kina na wekamuni.”
E dua au vakatarogi koya ena gauna ni veiqaravi bole edua na marama yalovinaka yabaki 93 na yacana o Lúcia. Ena nona marautaka na neitou veiqaravi, e veiwalitaka mai, “Vakamautaki au!”
Ena kurabui, au sauma yani: “Rai mada i kea vua na goneyalewa totoka oya! Oya na watiqu ka dauveibeitaki ni matanitu.”
A sauma vakatotolo mai: “Me cava kina? Se gone o koya, totoka, e rawarawa na nona vakawati tale. O iko ga mo noqu!”
A sega ni wali kece ena siga oya na nodra leqa na lewe ni itikotiko totoka oya. A sega ni vakabekataki nira na sotava tiko vagauna na dredre me vakataki ira na Jeretaiti e loma ni nodra waqa ena ilakolako dredre kina vanua yalataki, “mera buluti e loma ni waitui, ena vuku ni ua lelevu sa vaka na ulunivanua ka robaki ira.”
Ia ena Siga Vakarauwai oya, era a kila kina na lewe ni itikotiko ni malumalumu se veitalia na nodra tawakilai tu vei vuravura, era kilai vakayadudua mai vua na Tamada Vakalomalagi dauloloma, e Dua ka dau sauma vakarawarawa na noda masu.
Na nodra Turaga na vei turaga a vakaliwava “edua na cagi kaukauwa” me biligi ira yani na Jeretaiti kina veivakalougatataki yalataki. Sa vakakina, e rawa meda digitaka meda veiqaravi vaka edua na cagi liwa malumalumu ena liga ni Turaga. Me vaka ni “sega vakadua ni cegu na liwa ni cagi” vei ira na Jeretaiti kina vanua yalataki, eda rawa ni vukei ira na tani mera toso i liu ena nodra ilakolako ka ciqoma na veivakalougatataki ni Kalou.
Ena vica na yabaki sa oti, ena gauna keirau a vakatarogi kina kei na watiqu daulomani, o Chris, ena noqu veikacivi vaka bisopi, a kerei au na neitou peresitedi ni iteki meu nanuma ena masumasu eso na yaca mera vakatututaki mera daunivakasala. Ni rogoca oti na veiyaca au a vakatura, a kaya ni dodonu meu kila e vica na ka me baleta edua vei ira na turaga.
iMatai, na turaga oqo a sega ni kila na wili ivola. iKarua, a sega na nona motoka me na dau sikovi ira kina na lewenilotu. iKatolu, ena—dau—daramaka tu ga na matailoilo ni siga ivalenilotu. Dina ga ni kauwai vakalevu kina o peresitedi, au vakila vakaidina ni dodonu meu vakatututaki koya me noqu daunivakasala ka qai tokona o peresitedi ni iteki.
Na Sigatabu au tokoni kina kei rau noqu daunivakasala ena soqoni ni sakaramede, e kunei votu na kidroa e matadra na lewenilotu. E gole cake mai vakamalua kina dabedabe na turaga oqo, ka cilava lesu mai na nona matailoilo ni siga na rarama ni cina e cake.
Ni dabe e yasaqu, au tarogi koya sara, “Baraca, e leqa tiko beka na matamu?”
“Sega,” a kaya.
“Qai cava o dau tokara tu ga kina ivalenilotu na matailoilo ni siga?” Au taroga. “Noqu itokani, o ira na lewenilotu era gadreva mera raica na matamu, ka dodonu mo raici ira vakavinaka talega.”
Ena gauna vata oya, e luvata na nona matailoilo ni siga ka sega tale vakadua ni tokara ivalenilotu.
Na turaga daulomani oqo keirau veiqaravi tu me yacova noqu vagalalataki mai na itutu vakabisopi. Nikua, e tomana tiko na nona veiqaravi yalodina ena Lotu ka dua na ivakaraitaki ni gugumatua kei na yalodina vua na Turaga ko Jisu Karisito. Ia, ena vica na yabaki sa oti, e dua o koya na dauvakamatailoilo tawakilai ka dau guilecavi ni dabe toka ena idabedabe e valenilotu. Au dau vakataroga vakalevu, “Se vica beka na baraca kei na sisita yalodina era dabe ka guilecavi toka ena keda maliwa nikua?”
Se eda kilai-levu se da guilecavi, na veivakatovolei ena yaco dina mai vei keda vakayadua. Nida gole vua na iVakabula, ena “vakatabuya ko koya na [noda] rarawa [meda] rawata kina na vinaka” ka vukei keda meda sotava na noda vakatovolei ena sala ena toroi cake kina na noda tubu vakayalo. Se iraena itikotiko ni malumalumu, na lewe ni Lotu lewai vakatawadodonu, se edua ga, eda rawa ni “cagi [ka] sega vakadua ni cegu ni liwa tiko,” ka kauta mai na inuinui ka tuberi ira na tani kina salatu ni veiyalayalati.
Na noda parofita lomani, o Peresitedi Russell M.Nelson, e vakatetea edua na veisureti marautaki ka veivakauqeti vei ira na itabagone: “Au vakadeitaka tale vakaukauwa na nona kerekere na Turaga, na cauravou bula kilikili yadua sara ka tu vinaka tu nona bula, me vakavakarau ka lako yani ki kaulotu. Vei ira na cauravou ni Yalododonu Edaidai, na veiqaravi vakadaukaulotu e itavi vakamatabete. Vei kemuni na yalewa gone ka tu vinaka na nomuni bula, na kaulotu talega e dua na madigi kaukauwa, ka vakatau, vei kemuni.”
Ena veisiga, e udolu na cauravou kei na goneyalewa era sauma na veikacivi vakaparofita ni Turaga mera veiqaravi vakadaukaulotu. Sa tu vei kemuni na kila kei na vuku, me vaka a kaya o Peresitedi Nelson, ka rawa “moni vakayacoka vakalevu e vuravura ni vakatauvatani kei na veitabatamata taumada!” E sega ni kena ibalebale oya ni koni sa na vakarau vinaka tu ena gauna oni butuka kina koronivuli ni kaulotu.
Ia, ona rairai vakataki Nifai, nio “liutaki mai vua na Yalo, ka sega ni kila rawa tiko yani na ka [mo] na cakava. Ia [ko] a lako ga yani.”
E rairai ona yalolailai beka vakai Jeremaia ka via tukuna, “Raica, kau sa sega ni kila vosa: niu sa gone ga koi au.”
Ona rawa ni raica beka na nomu malumalumu ka via tagi vakai Mosese: “Kemuni na noqu Turaga, kau sa sega ni rawata na vosa: niu sa dauvosa vakamalua, ka yame berabera.”
Ke dua vei kemuni na cauravou kei na goneyalewa lomani oni nanuma tiko vakaoya ena gauna sara ga oqo, nanuma ni a kaya na Turaga, “Mo kakua ni kaya, au se gone ga koi au: nio na lako vei ira kecega au sa talai iko kina” E yalataka o Koya, “Ia oqo, mo lako, kau na tiko kei na gusumu, ka vakavulici iko ena ka mo kaya.”
Na nomu veisau mai na tamata vakavuravura kina tamata vakayalo ena yaco ena “vosa ena vosa, na ivunau ena ivunau” nio saga ena nomu igu mo qaravi Jisu Karisito ena buturara ni kaulotu ena veivutuni e veisiga, vakabauta, talairawarawa vakaidina, ka cakacaka vakaukauwa mo “vakasaqara e veigauna, vakavulica na veivutuni, ka papitaisotaki ira na saumaki mai.”
E dina nio tokara tiko edua na itoka ni yaca, so na gauna ona vakila nio tawakilai ka guilecavi. Ia, e dodonu mo kila ni tiko edua na Tamada Vakalomalagi vinaka, ka kilai iko vakavinaka, kei na dua na iVakabula e lomani iko. Ena tiko na nomu iliuliu ni kaulotu, ka dina ni na tiko na nodra malumalumu, ia era na qaravi iko me vaka “na cagi [ka] na liwa tikoga” mera tuberi iko ena nomu ilakolako ni saumaki vakataki iko.
Ena “vanua sa dave kina sucu kei na oni” ka ona veiqaravi kina ena nomu kaulotu, ona sucuvou tale vakayalo ka yaco mo tisaipeli i Jisu Karisito ena bula taucoko nio toro voleka vei Koya. Ena qai yaco mo kila nio sega vakadua ni guilecavi.
E dina ni so era sa wawa tu “vakadede” me vakacegui, ni “sega edua na tamata” e rawa ni veivuke, na Turaga o Jisu Karisito sa vakavulici keda ni sega ni dua ena guilecavi mai vei Koya. Ena kena veibasai, o Koya e ivakaraitaki uasivi ni nona vakasaqarai na dua, ena vei tiki ni gauna kece ni Nona veiqaravi e vuravura.
O keda yadua—kei ira era tu wavoliti keda—eda sotava na noda dui cava ni veisaqasaqa kei na ua ni veivakatovolei ka dau luvuci keda e veisiga. Ia na “cagi [ena] sega ni cegu ni liwa tiko vaka ki na vanua yalataki; [eda] sa biligi kina ka muria yani na mata ni cagi”
O keda yadua eda rawa ni tiki ni cagi oqo—na cagi vata ga ka a vakalougatataki ira na jeretaiti ena nodra ilakolako kei na cagi vata ga ka, ena noda veivuke, ena vakalougatataki ira na tawakilai kei na guilecavi mera yacova na nodra vanua yalataki.
Au vakadinadinataka nio Jisu Karisito sa noda Dauniveivukei vei Tamada. O Koya e bula ka vaka edua na cagi kaukauwa ka na dau tuberi keda tikoga ena salatu ni veiyalayalati. Ena yacai Jisu Karisito, emeni.