Na iNaki ni Bula Oqo!
Se mani vacava na bolebole eso, m na Tamada Vakalomalagi dauloloma,e vakarautaka edua na ituvatuva ni marau meda kua ni druka.
Loma ni vica na yabaki au lesi meu dauniveituberi vua edua na marama qase ena noqu tabanalevu. A sega ni rawarawa na nona bula. A tauvi koya tu eso na leqa ni bula vakayago ka sotava tu e dua na bula rarawa ena vuku ni dua na vakacalaka ena rara ni qito nia se gone. A veisere ni yabaki 32 kei na va na gone me susuga ka vakarautaka na veika e ratou gadreva, a vakawati tale ni sa yabaki 50. Na ikarua ni watina tagane a takali ni yabaki 66 o koya, ka bula tiko vaka dawai na marama oqo me 26 tale na yabaki.
Ena dela ni veibolebole eso ni nona bula, e yalodina tiko ga kina nona veiyalayalati me yacova na nona mate. Na marama oqo e dau e taleitaka na tuvakawa, gole i valetabu, ka dau vakumuna ka vola na itukutuku makawa ni matavuvale. E dina ni sotava e vuqa na veivakatovolei dredre, ka sega ni vakabekataki ni so na gauna e vakila na rarawa kei na galili, ia e dau matamamarau tu ga ka taleitaki na nona ivakarau.
Ni oti e ciwa na vula mai na nona takali, e dua vei iratou na luvena tagane e sotava e dua na ka vakasakiti ena loma ni valetabu. E vulica ena kaukauwa ni Yalo Tabu ni tiko vei tinana e dua na itukutuku me nona. E veitaratara kei koya, ia sega ena raivotu se ena vosa rogoci. Na itukutuku tawacala oqo mai vei tinana a basika kina vakanananu nei luvena tagane: “Au vinakata mo kila ni inaki ni bula vakayago e mana, au vinakata mo kila niu sa mai kila oqo na vuna e yaco kina [ena noqu bula] na veika kece ena sala a yaco kina—au sa ciqoma.”
E vakasakiti vakalevu cake sara na itukutuku oqo nida vakasamataka na veika a sotava na marama oqo kei na dredre eso a lako curuma ka valuta rawa.
Taciqu kei na ganequ, na cakacaka ni bula oqo! E tuvai me cakacaka! Se mani vacava na bolebole eso, mosi ni yalo, kei na dredre eda sotava kece, na Tamada Vakalomalagi dauloloma, vuku, ka uasivi sara e vakarautaka nai tuvatuva ni marau meda kua ni druka. Na Nona ituvatuva e vakarautaka e dua na sala vei keda meda ulabaleta kina na noda druka ena bula vakayago. E kaya kina na Turaga, “Ia raica oqo na noqu cakacaka kei na noqu lagilagi—meu vakavuna na tawa mate rawa kei na bula tawamudu ni tamata.”
Ia, kevaka eda vinakata me yaga vei keda na “cakacaka kei na nona lagilagi” na Turaga, vakakina na “tawa mate rawa kei na bula tawamudu,” e dodonu meda namaka meda na vuli ka vakavulici, ka lako curuma na nona bukawaqa dauveivakasavasavtaki—so na gauna ena kena ivakatagedegede e cake. Ni levei taucoko na veileqa, bolebole eso, kei na dredre ni vuravura oqo, eda na calata kina na ituvatuva ka gadrevi vakaidina me mana kina na inaki ni bula vakayago.
O koya gona meda kua ni kurabui ni na yaco mai vei keda na veigauna dredre. Eda na sotava eso na ituvaki ka na vakatovolei keda vata kei ira era vukei keda meda vakatovotovotaka na loloma uasivi kei na dauvosota. Ia e gadrevi meda tusaqata na noda veidredre eso ka nanuma, ni kaya na Turaga:
“Ia ko koya sa solia na nona bula ena noqu cakacaka, ena vuku ni yacaqu, ena kunea tale, io na bula tawamudu.
“O koya, mo dou kakua kina ni rerevaki ira na nomudou meca [se na nomu leqa, bolebole, se veivakatovolei ni bula oqo], raica au sa lewa oti …, sa kaya na Turaga, niu na vakatovolei kemudou ena ka kecega, se dou na dei tikoga ena noqu veiyalayalati … io me kunei kina ni dou sa kilikili.”
Nida lomaleqa se nuiqawaqawa me baleta na noda leqa se vakila nida ciqoma e levu cake sara na veika dredre ni bula mai vei ira eso, e rawa nida nanuma na ka a tukuna na Turaga vei ira na Isireli:
“Ia moni nanuma na [vei]sala kecega sa kauti kemuni kina ko Jiova na nomuni Kalou, ena vanua liwa, ena yabaki e vasagavulu sa oti oqo, me vakamalumalutaki kemuni, me vakatovolei kemuni, me kila kina na ka [sa tiko] e lomamuni, se oni [na] vakabauta na noqu vunau, se segai.”
Me vaka a vakavulica o Liai vei Jekope na luvena tagane:
“Ko sota kaya na leqa kei na veika rarawa e vuqa. … Ka, … na vakatabuya ko koya [Kalou] na nomu rarawa mo rawata kina na vinaka. … O koya, au kila kina ni ko sa vueti, ena vuku ni nona yalododonu na nomu Dauveivueti.”
Baleta ni bula oqo e vanua ni vakatovolei ka da “bikai ena o ni rarawa ka bolei ena bula dredre,” ena veivuke meda katona na ivakasala kei na yalayala ka kunei ena Mosaia 23 me baleta na veibolevole ni bula: “ko koya yadua sa vakararavi vua [na Turaga] ena laveti cake ena siga mai muri.”
Niu se cauravou, au sotava edua na mosi levu ni yalo kei na madua ena vuku ni nona ivakarau tawadodonu e dua tale na tamata, ka a vakayaco ka ena vuqa vata na yabaki kina kequ yaga vakai au kei na ituvaki ni noqu bula kilikili e mata ni Turaga. Ia, au vakadinadinataka vakai au ni Turaga e rawa ni vaqaqacotaki keda ka laveti keda cake ena veidredre kecega sa lesi meda sotava ena noda ilakolako ena buca ni tagi oqo.
Eda kila na veika a sotava o Paula:
“Ia deu vakalevulevui sara ni sa levu sara na veivakarairai [au sa ciqoma], sa dua na voto ni kau sa vakalauti kina na lewequ, e dua na italaki i Setani me vakararawataki au, deu vakalevulevui sara.
“Ena vuku ni ka oqo, kau a masu vakatolu vua na Turaga, me kau tani vei au.
“A sa kaya vei au ko koya, Sa rauti iko na noqu loloma: ni sa vakalevui na noqu kaukauwa, ni sa malumalumu e dua. O koya oqo sa yaloqu sara kina meu rekitaka na noqu malumalumu, me tiko kina vei au na kaukauwa i Karisito.”
Eda sega ni kila na “voto ni kau” e cokai Paula tiko. A digitaka me kua ni vakamacalataka se mosi vakayago, mate ni vakasama se yalo, se dua na veitemaki. Ia e sega ni gadrevi meda kila na veika matailalai oya meda kila ni sasaga ka kerea vua na Turaga na veivuke ka vaka kina, na kaukauwa kei na mana ni Turaga sa ikoya na ka e vukei koya mai kina.
Me vakataki Paula, ena vuku ni veivuke ni Turaga a qai vaqaqacotaki e muri na lomaqu kei na yaloqu, kau qai mai kila ni oti e vuqa vata na yabaki, ni dua tiko na kequ yaga kau kilikili kaya na veivakalougatataki ni kosipeli. E vukei au na iVakabula meu lako curuma na vakanananu niu sega ni kilikili ka vakaraitaka na nona vosoti ira vakaidina na caka cala. Au qai kila ni Veisorovaki ni iVakabula e iloloma vakatabakidua vei au ka lomani au vakataucoko sara o Tamaqu Vakalomalagi kei Koya na Luvena. Ena vuku ni Veisorovaki ni iVakabula, e mana kina na inaki ni bula vakayago.
Niu mai vakalougatataki meu kila na sala e vueti au kina na iVakabula ka tokoni au ena veigauna oqori, e matata kina vei au ni veika tawakilikili a yaco vei au niu se itabagone e a noqu meu vuli kina ena ilakolako oqo, kau na sega ni rawa ni vakatauvatana na ka e yaco vei au vata kei na veika era sotava tiko eso ka tomani tiko na nodra rarawa ena vuku ni nodra ivakarau tawadodonu na tani.
Au kila rawa ni veika sotavi ni bula—vinaka se ca—e rawa ni vakavulica vei keda eso na lesoni yaga. Au sa mai kila ka vakadinadinataka oqo ni inaki ni bula vakayago e mana! Au nuitaka ni ena vuku ni veika au sotava ena noqu bula—vinaka se ca—au na lomani ira kina era sega ni kila nira tudaitaki ena vuku ni nona ivakarau edua tale, ka yalololoma vei ira era butuki sobu.
Au nuitaka ena vuniyaloqu ni ena vuku ni veika au sotava ena noqu bula—vinaka se ca—au na yalololoma cake kina vei ira na tani, ivalavala vinaka vei ira na tani me vaka ena cakava na iVakabula, kilai ira vinaka na ivalavala ca, ka meu tamata yalodina sara. Nida vakararavi kina loloma soliwale ni iVakabula ka maroroya na noda veiyalayalati, eda na rawa ni vakaraitaka vei ira na tani na vakayaco ka mana ni Veisorovaki ni iVakabula.
Meuwasea na ioitoit ni ivakaraitaki ni yagai na bula vakayago.
Nona nei o Elder Hales, ois VandenBosch, kei nona na, Klea VandenBosch.
A sega ni rawarawa vei tinaqu na nona ilakolako ena bula vakayago. A sega ni ciqoma o koya edua na icocovi se koroi ena veika ni vuravura ka a sega ni lako sivia na vuli torocake. A tauvi polio ni se gone, ka dau mosi ka logaloga ca kina na yavana imawi ena gauna ni nona bula. Ni sa qase mai, e sotava e vuqa sara na veibolebole vakayago ka vakailavo talega ia e a yalodina tiko ga kina nona veiyalayalati ka lomana na Turaga.
Ni yabaki 55 o tinaqu, e takali o ganequ qase, ka biuta tu mai na vugoqu oya na luvena yalewa vulawalu, me sega ni vakatinani. Ena vuku ni veika eso, e susuga cake na vugoqu o Nana ena loma ni 17 na yabaki ka tarava, ka vakavuqa ena loma ni veituvaki dredre eso. Ia, ena veigauna vakaoqo, a dau qarava ena marau kei na lomasoli na nona matavuvale, ira na tiko tikivi koya, kei ira na lewe ni tabanalevu ka veiqaravi vakaliganicakacaka e valetabu me vuqa sara na yabaki. Ena iotioti ni veiyabaki ni nona bula, e yacovi Nana na malumalumu ni vakasama, dau veilecayaki vakawasoma, ka mani curu kina dua na itikotiko ni malumalumu. E ka ni rarawa ni tiko taudua ena nona a takali vakasauri.
Ni oti e vica na vula mai na nona takali, au tadra edua na tadra au na sega ni guilecava rawa. Ena noqu tadra, au dabe tiko ena noqu valenivolavola ena Valenivolavola ni Veiqaravi ni Lotu. E curu mai o Nana i valenivolavola. Au kila ni lako mai na vuravura ni yalo. Au na dau nanuma tu ga na veika au vakila. E sega ni tukuna edua na ka, ia e solia mai e dua na iserau totoka vakayalo au se bera ni bau sotava vakadua ka dredre meu vakamacalataka.
Sa totoka dina na kena irairai kei na kena ituvaki! Au vakasamataka niu kaya vua, “I Nana, o sa rui totoka vakaoti!” au tukuna tiko na nona kaukauwa kei na nona totoka vakayalo. E deguvacu mai vei au—ia e sega ni vosa. Au vakila na nona loloma vei au, kau kila e kea ni marau tiko ka sa vakabulai mai na kauwai ki na veika vakavuravura kei na bolebole eso ka wawa tiko ena nanamaki kina “dua na tucaketale lagilagi.” Au kila vei Nana, e cakacaka na bula vakayago—e vaka ina veikeda kece.
Na cakacaka kei na Nona lagilagi na Kalou sai koya me vakavuna na tawa mate rawa kei na bula tawamudu ni tamata. Na veika e sotavi ena bula vakayago era tiki ni ilakolako me rawa kina nida tubu ka rawata na tawa mate rawa kei na bula tawamudu oya. Eda sega ni talai mai ike meda mai druka ia meda rawa ka ena ituvatuva ni Kalou vei keda.
Na Tui Penijamini a vakavulica: “Ka dua tale, au gadreva moni vakasamataka na ituvaki ni bula kalougata ka mamarau e nodra oira era muria na ivakaro ni Kalou. Ia raica, era sa vakalougatataki ena veika kece sara, na veika vakayago kei na veika vakayalo; ka kevaka era sa yalodina tiko me yacova na ivakataotioti era na curu ki lomalagi, mera tiko marau kina vata kei na Kalou me tawamudu.” Se eda rawa ni kaya, ni mana na inaki ni bula vakayago!
Au vakadinadinataka nida ciqoma na cakacaka vakalotu ni kosipeli, veiyalayalati vata kei na Kalou ka maroroi ira na veiyalayalati oqori, veivutuni, qaravi ira na tani, ka vosota kina vakataotioti, ena rawa ni noda na veivakadeitaki kei na vakararavi taucoko vua na Turaga ni mana na inaki ni bula vakayago! Au vakadinadinataki Jisu Karisito kei na noda veisiga ni mataka lagilagi vata kei na Tamada Vakalomalagi e rawati ga ena loloma soliwale kei na Veisorovaki ni iVakabula. Ena yacai Jisu Karisito, emeni.