Nuitaka na Tamada
E nuitaki keda na Kalou meda cakava na digidigi bibi ena veika kecega, e kerei keda o Koya meda nuitaki Koya.
Ena 1 ni June, 1843, a biuti Nauvu, Ilinoi, o Addison Pratt me vunautaka na kosipeli ena vei yanuyanu e Hawaii, ka biuta tu mai na watina o Louisa Barnes Pratt, me qarava na nodratou matavuvale gone.
E Nauvoo, e kaukauwa na veivakacacani, era vakasaurarataki na Yalododonu mera gole, ka qai tarava e Winter Quarters nira vakarau toki i Salt Lake Valley, a sotava o Louisa na digidigi me lako se sega. E rawarawa beka me tiko ka waraka na nona lesu mai o Addison me qai lako.
Ena gauna ruarua oqo, e vakasaqara okoya na ivakasala mai vua na parofita, o Brigham Young, ka vakayaloqaqataki koya me gole. Dina ga ni dredre vakalevu kei na nona lomalomarua, ia e vakayacora rawa na ilakolako ena veigauna.
Taumada, e sega ni marautaka o Louisa na nona ilakolako. Ia, e tekivu me taleitaka okoya na co drokadroka ni bucabuca, senikau ni veikau rokarokataki, kei na tiki ni qele ena bati ni uciwai. “E seavu yani vakamalua na butobuto ni noqu vakasama,” e vola okoya, “au sa yalewa mamarau duadua ena ilawalawa taucoko.”
E vakauqeti au sara ga vakalevu na italanoa nei Louisa. Au qoroya na nona tu vakarau me biuta vakatikitiki na veika e vinakata, na nona rawa ni nuitaka na Kalou, kei na nona vakayagataka na nona vakabauta a vukei koya me raica na duidui ni veika e sotavi.
E vakananumi au okoya ni tiko e dua na Tamada mai Lomalagi dauloloma ka dau kauwaitaki keda ena vanua cava ga eda tiko kina ka sa rawa nida vakabauti Koya vakalevu cake mai vei ira kecega se dua tale na ka.
Na iVurevure ni Dina
Na Kalou e nuitaki keda meda cakava na digidigi bibi, ena veika kecega, e kerei keda o Koya meda nuitaki Koya. E dredre sara oqo ni duidui na noda vakatulewa se nanuma raraba me duidui mai na Nona lewa mai vei ira na Luvena.
Eso era vakatura ni dodonu meda droinitaka tale na laini ena kedrau maliwa na ka e dodonu kei na ka e cala baleta nira kaya nirau veiwekani na dian oya, na dina e kilai koya ga, se sa rui lomasoli na Kalou ka sega ni kauwaitaka na veika eda cakava.
Nida vaksaqara meda kila ka ciqoma na nona lewa na Kalou, ena vinaka meda nanuma tiko ni iyalayala ni dodonu kei na cala e sega ni noda meda vakamacalataka. Na Kalou sa vakadeitaka oti na iyalayala oqo vakai Koya, yavutaki ena veidina tawamudu me yaga ka vakalougatataki keda.
Na gagadre me veisautaka na dina tawamudu ni Kalou e balavu na kena itukutuku. E tekivu ni sebera ni tauyavu na vuravura, na gauna e talaidredre kina o Setani ena Nona yavu na Kalou, ena gauna a vorata kina o Setani na ituvatuva ni Kalou, ka vakasaqara ena kocokoco me vakarusa na galala ni digidigi vakatamata Muria tiko na ituvatuva oqo, era veibataka na tamata vakai Seremi, Neori, kei Korio ni vakabauta e lialia, na ivakatakila e sega ni yaga, kei na veika ga eda via cakava e donu. E ka ni rarawa, ni vakavuqa na veisei oqo mai na dina ni Kalou e vakavuna na rarawa levu.
Dina ni eso na ka e vakatau ena kena ituvaki, ia e sega ni ka kecega. E dau vakavulica wasoma o Peresitedi Russell M. Nelson ni dina veivakabulai ni Kalou e taucoko, tu vakataki koya, ka na Kalou e vakamacalataka Vakaikoya.
Noda Digidigi
Sa dua na digidigi bibi ni bula oya nida digitaka ocei meda nuitaka. E vakaroti ira na nona tamata o Penijamini na Tui, “Vakabauta na Kalou; vakabauta ni sai koya; vakabauta ni tu vua na yalomatua kecega; vakabauta ni tamata ena sega ni vakasamataka rawa na veika kece e rawa ni vakasamataka na Turaga.”
Kalougata, ni sa tu vei keda na ivolanikalou kei na veidusimaki mai vei ira na parofita bula me vukei keda meda kila na dina ni Kalou. Kevaka e gadrevi na veivakadodonutaki mai na veika sa tu vei keda, na Kalou ena vakarautaka mai vei ira na nona parofita. Ena sauma o Koya na noda masu yalodina ena Yalo Tabu nida vakasaqara meda kila na dina eda sega sara ni kila vakavinaka.
E vakavulica e dua na gauna o Elder Neil L. Anderson meda kua ni kidacala “kevaka e sega ni dau duavata kei na ivakavuvuli ni parofita ni Turaga eso na [noda] rai. Oqo e gauna ni vuli,” e tukuna “yalomalumalumu, ena gauna eda tekiduru kina ena masu. Eda toso tiko i liu ena vakabauta, ka nuitaka tiko na Kalou, ka kila ni na yaco mai na gauna meda ciqoma kina na veika e vakamatatataki mai vua na Tamada Vakalomalagi.”
Ena veigauna kece, edau veivuke meda nanuma na ivakavuvuli i Alama ni Kalou ena solia na Nona vosa vakatau ena noda vakarorogo kei na sasaga eda dau solia kina. Kevaka da muria na vosa ni Kalou, eda na ciqoma e vuqa tale; kevaka eda vakawalena na Nona ivakasala, ena lailai sobu na veika eda ciqoma me yacovi sara ni sa sega. Na yali ni kilaka oqo e sega ni baleta ni a cala na dina; ia, e vakaraitaka nida sa vakayalia na noda rawa ni kila kina.
Rai vua iVakabula
Mai Kapenaumi, a vakavulica na iVakabula me baleti Koya kei na Nona ilesilesi. E dredre vei ira e lewe vuqa mera rogoca na Nona vosa, ka vakavuna mera suka tani ka “a ra sa sega tale ni lako vata kaya.”
Cava na vuna era suka tani kina?
Baleta era sega ni taleitaka na veika e tukuna o Koya. O koya gona, nira nuitaka na nodra vakatulewa ga, era sa lako tani, ka cakitaka na veivakalougatataki ena yaco mai kevaka era a tiko ga.
E rawarawa sara me lako mai vei keda kei na dina tawamudu na noda viavialevu. Na gauna eda sega ni kila, eda rawa ni cegu mada, vakameautaka na yaloda, ka digitaka na sala cava eda na sauma lesu kina. Sa vakauqeti keda na iVakabula meda, “vakararavi tiko mai vei [Koya] ena vakasama kece; kakua ni vakatitiqa, ka kakua ni rere.” Nida vakanamata vua na iVakabula, sa rawa ni uabaleta na noda lomaleqa na noda vakabauta.
E vakauqeti keda o Elder Dieter F. Uchtdorf meda: “Yalovinaka, vakatitiqataka na nomu vakatitiqa ni bera nio vakatitiqataka na nomu vakabauta. Meda kua ni vakatara na vakatitiqa me vesuki keda ka tarovi keda mai na loloma vakalou, vakacegu, kei na isolisoli eso ka lako mai ena vakabauta na Turaga o Jisu Karisito.”
Na Veivakalougatataki e Yaco vei Ira Era Tiko
Ena siga era sa suka tani kina o ira na tisaipeli ni iVakabula, e qai tarogi iratou na Nona Le Tinikarua, “Dou sa via lako tani talega koi kemudou?”
E sauma ko Pita:
“Kemuni na Turaga, keitou na lako vei cei? Sa tu ga vei kemuni na vosa ni bula tawamudu.
“Ia keitou sa vakabauta ka kila ni sai kemuni na Karisito, na Luve ni Kalou bula.”
Oqo, era bula vata na Apositolo, era sotava talega na veika era sotava na tisaipeli era sa lako sese. Ia, ena gauna oqo, eratou digitaka na nodratou vakabauta ka nuitaka na Kalou, ka maroroya na veivakalougatataki e solia na Kalou vei ira era tiko ga.
De dua o iko, me vakataki au, o na kunei iko ena so na gauna e yasana ruarua ni vakatulewa oqo. Ni dredre vei keda meda kila se ciqoma na loma ni Kalou, sa veivakacegui meda nanuma tiko ni lomani keda o Koya ena keda ituvaki, se vanua cava ga eda tiko kina. Ka sa vakarauta oKoya vei keda e vuqa na ka e vinaka cake. Kevaka eda sasaga Vua, ena vukei keda o Koya.
E rui dredre beka na noda toro yani Vua, me vaka tama e vakasaqara me vakabulai na luvena mai vua na iVkabula, ni “Sa rawarawa na ka kecega vua sa vakabauta,” Ena noda gauna ni dredre, eda rawa talega ni tagicaka, “Vukea na noqu tawa vakabauta.”
Solia na Noda Lewa me Nona
A vakavulica o Elder Neal A. Maxwell ena dua na gauna, “Na nona soli koya e dua sai koya duadua na ka e noda ka rawa meda biuta ena nona icabocabo ni soro na Kalou.” Sa rauta me sa gugumatua sara o Penijamini na Tui mera yaco na nona tamata vaka na “gone lailai, me talairawarawa, yalomalua, yalomalumalumu, dauvosota, sinai ena loloma, ka ciqoma na veika kece sa raica na Turaga ni dodonu me sotava, me vaka na gone sa talairawarawa vua na tamana.”
Me vaka e veigauna, e tuvana na iVakabula na ivakaraitaki vinaka sara vei keda. Ena yalo bibi, eda kila na mosi ni cakacaka e cakava o Koya, a soli Koya kina lomai Tamana, ka vakayacora na Nona ilesilesi vaka-Mesaia ka dolava na yalayala ni tawamudu vei iko kei au.
Na noda digidigi meda soli keda kina loma ni Kalou sa dua na ivakaraitaki ni vakabauta ka tiko ena uto ni noda bula vakatisaipeli. Nida digitaka oqori, eda na raica ni noda galala ni digidigi e sega ni vakalailaitaki; ia, e vakalevutaki ka vakaicovitaki ena iserau ni Yalo Tabu, o koya e kauta mai na inaki, reki, vakacegu, kei na inuinui eda na sega ni kunea ena dua tale na vanua.
Vica na vula sa oti, o au kei na peresitedi ni iteki a sikova e dua na sisita kei na luvena tagane qase ena nona iteki. Ni oti e vica vata na yabaki na nona yawa mai na Lotu, veilakoyaki voli ena sala dredre ka sega ni taleitaki, sa lesu tale mai okoya. Ena neirau veisiko, keirau tarogi koya se cava na vuna e lesu mai kina.
“Au vakacacana na noqu bula,” e tukuna okoya, “ia au kila na vanua au sa gadreva meu tiko kina.”
Au mani tarogi koya se cava e vulica ena nona ilakolako.
Ena yalo bibi, a wasea ni sa vulica ni dodonu me balavu na nona lako ki lotu me voroka kina na itovo ni sega ni lako ka gadrevi me tiko ga me yacova na gauna e vinakata okoya me tiko kina. E sega ni rawarawa na nona lesu mai, ia ni sa cakacakataka na nona vakabauta ena ituvatuva ni Tamada, sa vakila ni sa lesu mai na Yalo.
A Qai kuria okoya, “Au vulica vakai au ni dau vinaka tu ga na Kalou kei na Nona sala e uasivi mai na noqu.”
Au vakadinadinataka ni Kalou, na Tamada Vakalomalagi, e lomani keda; kei na Luvena, o Jisu Karisito, e vakabulai keda. E rau kila na noda mosi kei na ibolebole. E rau na sega vakadua ni biuti keda ka kila vakavinaka sara na sala me vukei keda kina. E rawa nida dau mamarau ka nuitaki Rau vakalevu cake mai vei duatale se duatale na ka. Ena yaca tabu i Jisu Karisito, emeni.