Daku ni Veika e Yaco ena Koniferedi Raraba: Vakarautaki ni Vale ni Koniferedi

Ni da vakanananutaka na koniferedi raraba, eda na rairai raitayalotaka na itutu ni vunau kei na nodra idabedabe na iliuliu ni Lotu ena mata ni paipo ni oqani. Ia na vatavata ni Vale ni Koniferedi e sega ni rairai vaka oqori ena loma ni yabaki taucoko.

E vakayacora na Vale ni Koniferedi e vuqa na soqo ka gadrevi kina e duatani na kena ituvatuva, ka taura e vica vata na auwa me vakarautaki kina na buturara (ka dau vakatokai me “itutu ni vosa“) me baleta na koniferedi raraba. E dua na timi ni 10 na tamata era vakayagataka e rauta ni tolu na macawa me ra rawata na buturara, loma ni vale, kei na iyauqaqa tale eso ni Vale ni Koniferedi ka ra vakarautaki tu me ra marautaka na vulagi na koniferedi raraba.

Oqo eso na ka dina taleitaki:

• E 18 na gacagaca lelevu e bulia na vuloa levu ni vakatasuasua, ka 1.5–4 na tani na kena bibi.

• Na gacagaca bibi oqori e tosoi ena ilokoloko ni cagi tabaki ka coqa yani na buturara, me rawarawa kina na kena toso na veigacagaca oqo.

• E rauta ni 500 na tikina lalai, me vaka na kaukamea balavu kei na penali, era sa vakuri talega.

• E tadola na katuba 80 na fute (24 na mita) na kena balavu me rawa kina ni toso na gacagaca levu duadua ki na kena tikina donu.

• Era na vakarautaka talega na timi ni buturara na iyauqaqa baleta na veitaqomaki, daukaulotu, kei na vakayacori—ena sivia na 600 na iwiliwili ni itavi.

O Joel Wright, na supavaisa ni timi ni ivakavakarau, sa veivuke oti ena 50 na koniferedi raraba. E vakatoka na nona timi me “tamata qaqa sega ni kilai” e vakasakiti na nodra cakacaka. E kaya o koya, ”E sega soti ni levu na lagilagi ena kena vakarautaki e dua na idabedabe se dua na teveli se biuta vata na iyauqaqa.” Ia kevaka era sega, e kaya, ena sega ni vaka me dua na koniferedi.

Na iliuliu ni caka ni buturara o Brandon Urry e tukuna ni na taura e ”vuqa na tamata duidui mai na duidui ni ivakarau ni kila kei na ivakatagedegede” me rawati kina na nodra cakacaka—”me kaburaki na loloma ni Turaga kei na vosa e dodonu me wasea vei ira na tamata kecega.”

E kaya o Brandon ni ra gadrevi ira kece na tamata era duidui na nodra kila me ra “lako vata mai ena dua na inaki.” Me vaka ni sa vakatabakiduataki na inaki oqori vei Jisu Karisito, era vakila na timi oqo na nona wavoliti ira ka raica na Nona cakamana.

Robert Simpson, e dua talega na iliuliu ni caka buturara, e kaya: ”au vakila ni sa curu mai na Yalo ni Turaga ki na noda soqoni ka sa tiko e kea me vukei keda me vakacavara [na cakacaka]. Ena so na gauna eda dau vakataroga se da na walia vakacava na veika kece oqo. Ia eda masu ka kerea na veivuke ni Tamada Vakalomalagi.”

Me vaka e kuria o Joel: ”Ena vosota, ena gugumatua, ena tomani tikoga ni cakacaka vakaukauwa, [na buturara] sa tu vakarau, ka sa vakarau tu me cakacaka ena mataka ni koniferedi raraba.” E vakatoka o Joel me ”veivakauqeti” baleta ni cakamana e lako mai vei Jisu Karisito.