Vakaduavatataki ni Keda kina Nona Lewa
Noda muria na lewa ni Turaga ena noda bula ena rawa kina vei keda meda kunea na mataniciva talei duadua e vuravura—na matanitu vakalomalagi.
Ena dua na gauna, tukuna o Jisu me baleta e dua na tamata dauveivoli ka vakasaqara tiko na “mataniciva vinaka.” Ena nona vakasaqaqara voli na dauveivoli, a kunea e dua e “talei sara.” Ia, me rawa ni taura na mataniciva talei, e dodonu me volitaka na nona i yau kece na tamata oqo, ka a cakava totolo ka marautaka.
Mai na vosa vakatautauvata lekaleka ka vakavure vakasama oqo, a vakavulica kina vakavinaka na iVakabula ni matanitu vakalomalagi e vakatauvatataki kei na dua na mataniciva talei, na iyau talei duadua e dodonu me gadrevi mai vei ira kece sara. E dina ni volitaka vakatotolo na dauveivoli na nona iyau kece me rawata kina na mataniciva talei oya e vakaraitaka vakamatata ni dodonu meda vakaduavatataka na noda vakasama kei na gagadre kina loma ni Turaga ka cakava ena lomasoli na veika kece eda rawata ena noda ilakolako vakayago meda rawata na veivakalougatataki tawamudu ni matanitu ni Kalou.
Meda kilikili ena isau cecere oqo, eda gadreva vakaidina, ena maliwa ni veika tale eso, meda sasagataka vakavinaka sara meda biuta vakatikitiki na sasaga vakai-keda kece sara ka biuta laivi na veika veivesuki e tarovi keda lesu mai na noda yalodina taucoko vua na Turaga kei na Nona sala cecere ka savasava cake. E tukuna na Apositolo o Paula na sasaga veivakasavasavataki oqo me “lomai Karisito.” Me vaka e vakaraitaka o Jisu Karisito, e kena ibalebale oqo meda “[kitaka] tiko ga na veika e vinakata [na Turaga]” ena noda bula, se me vaka era kaya eso edaidai, oqo na noda “kitaka tiko ga na veika e cakacaka vua na Turaga.”
Ena dua na vakasama vakosipeli, na noda “[kitaka] tiko ga na veika sa vinakata [na Turaga]” e semati kina noda solia na noda lewa me Nona lewa. A vakavulica ena vakasama na iVakabula na bibi ni ivakavuvuli oqo ena nona dusimaki ira tiko na Nona tisaipeli:
“Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai.
“Ia sa ikoya oqo na lomai Koya sa talai au mai, meu kakua ni vakayalia e dua vei ira sa solia mai vei au ko koya, ka meu vakatura cake tale ena siga maimuri.
“Ia sa ikoya oqo na loma i Tamaqu, mera rawata yadua na bula tawamudu ko ira sa raica na Luvena, ka vakabauti koya: ia au na vakaturi koya cake e na siga maimuri.”
A rawata na iVakabula e dua na ivakatagedegede taucoko ka vakalou ni talairawarawa vua na Tamana ni sa duavata ga na Nona lewa kei na lomai Tamana. A kaya o Koya, “Ia sa tiko vata kei au ko koya sa talai au mai: sa sega ni biuti au ko Tamaqu meu tiko duadua ga; niu sa kitaka tikoga na ka sa vinakata ko koya.” Ena nona vakavulica na Parofita o Josefa Simici me baleta na rarawa kei na mosi ni Veisorovaki, a kaya kina na iVakabula:
“Ia raica, koi Au na Kalou, au sa vakararawataki oti ena veika oqo ena vukudra kece, mera kakua kina ni sotava na rarawa kevaka era sa veivutuni;
“Na rarawa sa vakavuna vei au, na Kalou sara mada ga, ko Koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagoqu, ka sa rarawa sara kina na yagoqu kei na yaloqu—au gadreva meu kua ni gunu mai na bilo wiwi, ka vakasuka—
“Ia me vakalagilagi ga ko Tamaqu, au sa gunuva na bilo ka vakacavara na noqu vakavakarau vei ira na luve ni tamata.”
Ena noda tiko voli ena bula oqo, eda sasaga vakawasoma kei na veika eda nanuma nida kila, na veika eda nanuma e vinaka duadua, kei na veika eda nanuma ni cakacaka vei keda, ka sega ni kila na veika e kila dina sara tu na Tamada Vakalomalagi, na veika e vinaka duadua me tawamudu, kei na veika e cakacaka vakaidina vei ira na gone ena Nona ituvatuva. Na sasaga levu oqo e rawa ni yaco me vereverea sara, vakabibi ni vakasamataki na parofisai e tiko ena ivolanikalou me baleta na noda gauna oqo: “Mo kila talega na ka oqo, ena veisiga maimuri nira na daulomani ira walega na tamata, era na lomana vakalevu na marau era na lomani koya na Kalou vakalailai.”
E dua na ivakatakilakila ka vakaraitaka na kena vakayacori na parofisai oqo sa ikoya na ivakarau sa tubu cake tikoga e vuravura edaidai, era taura e vuqa, ni tamata era sa vakaogai ira ka tukuna tikoga, “Veitalia na cava, au bulataka ga na noqu dina se au cakava ga na ka e cakacaka vei au.” Me vaka a kaya o Paula na iApositolo, era “sa vakasaqara na nodra ka ko ira kecega, ka segai na ka nei Jisu Karisito.” Na ivakarau ni vakasama oqo e dau vakadonui me “ka dina” mai vei ira era dau vakaogai ena veika baleti ira ga, veika era vinakata, se vinakata me vakadonuya eso na mataqali itovo ka sega ni dau veidonui wasoma kei na ituvatuva loloma ni Kalou kei na Nona lewa me baleti ira. Kevaka eda vakatara na yaloda kei na lomada me ciqoma na ivakarau ni vakasama oqo, eda na rawa ni bulia na buloko bibi eso ni veivakatarabetaki me baleti keda ena noda rawata na mataniciva talei duadua sa vakarautaka tu na Kalou ena loloma me baleti ira na Luvena—na bula tawamudu.
E dina nida dui lakova yadua e dua na ilakolako ni bula vakatisaipeli yadua ena salatu ni veiyalayalati, ka segata me vakanamata tikoga na yaloda kei na lomada vei Karisito Jisu, e dodonu meda qarauna ka yadrava tikoga meda kakua ni temaki meda muria na veika vakavuravura vakaoqo ena noda bula. A kaya o Elder Quentin L. Cook “nida Vakarisito e lalawa bibi cake mai na vakaitaukeitaki.”
Kemuni na noqu itokani lomani, nida digitaka meda vakatara na Kalou me veivakayarayarataki kaukauwa duadua ena noda bula mai na noda sasaga ni qaravi keda ga, e rawa nida toso i liu ena noda bula vakatisaipeli ka vakalevutaka cake na noda rawa ni vakaduavatataka na noda vakasama kei na yaloda vata kei na iVakabula. Ena yasana kadua, nida sega ni vakatara na sala ni Kalou me qaqa tiko ena noda bula, eda sa biuti keda tu ga vakai keda, ka kevaka e sega na veidusimaki veivakauqeti ni Turaga, sa rawa meda vakadonuya e voleka ni veika kece eda cakava se sega ni cakava. E rawa talega nida vakaiulubale ena noda cakava na veika ena noda sala, ka kaya, “Au sa cakava tikoga na veika ena noqu sala.”
Ena dua na gauna, ni vakaraitaka tiko na iVakabula na Nona ivunau, eso na tamata, vakabibi o ira na Farisi na dau vakadonui ira ga, era cata na Nona itukutuku ka tukuna ena doudou nira luvei Eparama, ka tukuna tiko ni nodra kawa ena solia vei ira na madigi digitaki ena mata ni Kalou. Na vakasama oqori a vakavuna mera vakararavi kina nodra kilaka ga ka sega ni vakabauta na veika a vakavulica tiko na iVakabula. Na nodra rai na Farisi vei Jisu sa ivakadinadina matata ni nodra ivakarau ni viavialevu a sega ni biuta kina e yalodra na tikina me baleta na vosa ni iVakabula kei na sala ni Kalou. A sauma, o Jisu ena yalomatua kei na yaloqaqa ka tukuna ni kevaka mera luve dina ni veiyalayalati i Eparama, era na cakava na cakacaka nei Eparama, vakabibi ni sa tu e matadra na “Kalou i Eparama” ka vakavulica tiko vei ira na dina ena gauna sara ga o ya.
Kemuni na taciqu kei na ganequ, me vaka oni sa raica rawa, na cakacakataki ni vakasama oqo ni “ka e cakacaka vei au” kei na kitaka “tikoga na veika sa vinakata na Turaga” e sega ni dua na ivakarau vou ka duatani kina noda gauna. Oqori e dua na vakasama makawa ka sivia na veisenitiuri ka dau vakamatabokotaki ira sa vuku-e-matadra-ga era veilecayaki ka oca kina e vuqa na luve ni Kalou. Na vakasama oqo, na kena dina, e dua na ilawaki makawa ni meca; e dua na sala veivakacalai ka na kauti ira tani vakamalua na luve ni Kalou mai na salatu dina ka yalodina ni veiyalayalati. E dina ni dau vakayarayarataka na noda ilakolako na ituvaki vakatamata, vanua, kei na bolebole vakayago kei na vakasama, ena veika e bibi dina, e tiko e dua na vanua e loma eda galala kina meda digitaka se da vakatulewataka meda muria se sega na ivakarau sa vakarautaka tu na Turaga me baleta na noda bula. E dina, “A vakaraitaka na sala ka liutaka na ilakolako, ka vakadikeva na veitikina kece [vakamatailalai].”
Nida tisaipeli i Karisito, eda gadreva meda muria na sala a vakatakilakilataka vei keda o Koya ena Nona veiqaravi e vuravura. Eda sega walega ni gadreva meda cakava na Nona lewa kei na veika kece ena vakamarautaki Koya ia eda saga meda vakatotomuri Koya. Nida saga meda dina kina veiyalayalati kecega eda cakava ka bulataka “na vosa kecega sa lako mai na gusu ni Kalou,” eda na taqomaki mai na noda lutu tani kina ivalavala ca kei na cala ni vuravura—cala ni vuku kei na ivunau ka na kauti keda tani mai na mataniciva talei duadua oqori.
Au vakauqeti se na sala cava erawa kina nio soli iko vakayalo vua na Kalou ka veisautaka na nomu bulavakatisaipeli yalodina i Karisito ena nodra digitaka mera kitaka na ka e cakacaka ka taleitaki ena mata ni Turaga. Au kila e dua na cauravou e lomaleqataka voli me kaulotu a vakauqeti me lako ka qarava na Turaga ena nona vakarorogo vua e dua na iliuliu qase ni Lotu ka wasea na nona ivakadinadina vakai koya kei na veika tabu a sotava ena veiqaravi vakadaukaulotu.
Ena nona vosa, na cauravou oqo, ni lesu mai na nona kaulotu, a kaya: “Niu vakarorogo kina ivakadinadina ni dua na Apositolo ni iVakabula o Jisu Karisito, au vakila rawa na loloma ni Kalou me baleti au, au gadreva meu wasea na loloma oqori vei ira tale eso. Ena gauna oya au kila ni dodonu meu lai kaulotu dina ga niu a rere, vakatitiqa, ka kauwai voli. Au yalodei sara ena veivakalougatataki kei na yalayala ni Kalou me baleti ira na Luvena. Nikua, au sa tamata vou; Au vakadinadinataka ni dina na kosipeli oqo ka sa vakalesui mai na Lotu i Jisu Karisito e vuravura.” Na cauravou oqo a digitaka na sala ni Turaga ka yaco me ivakaraitaki ni dua na tisaipeli dina ena veika kecega.
A lewa e dua na goneyalewa yalodina me kakua ni vakaweleweletaka na nona ivakatagedegede ena gauna a kerei kina me vakaisulu tawa kilikili me ganita na tabana ni bisinisi ni kabani ni isulusulu a cakacaka voli kina. Ni kila ni yagona e isolisoli tabu mai vua na Tamada Vakalomalagi ka vanua e rawa ni tiko kina na Yalotabu, a vakauqeti o koya me bula ena dua na ivakatagedegede cecere cake mai na kena vakavuravura. E sega walega ni rawata na nodra yalodei o ira era raici koya ni bula tiko ena dina ni kosipeli i Jisu Karisito, ia a maroroya talega na nona cakacaka, ena loma ni dua na gauna rerevaki. Na nona lomasoli me kitaka na ka e cakacaka ena mata ni Turaga, ka sega ni ka e cakacaka me baleti vuravura, a solia vua na yalodei ni veiyalayalati ena loma ni digidigi dredre oya.
Taciqu kei na ganequ, eda dau sotava tikoga na vakatulewa vata oqori ena noda ilakolako e veisiga. E gadrevi e dua na yalo e yaloqaqa ka lomasoli me tu mada ka vakasaqara e dua na vakasama dodonu ka yalomalua me kila kina na tiko ni malumalumu vakayago eso ena noda bula ka na rawa ni vakataotaka na noda rawa ni soli keda vua na Kalou, ka qai vakatulewataka meda muria na Nona sala ka sega ni noda. Na veivakatovolei cecere ni noda bula vakatisaipeli e kunei ena noda lomasoli meda biuta laivi ka vakayalia na yaloda makawa ka solia na yaloda taucoko sara vua na Kalou me yaco kina me noda na Nona lewa.
E dua na gauna lagilagi duadua ni bula oqo e yaco nida kunea na reki e vakilai nida kitaka tikoga na veika e “cakacaka vua ka taleitaka na Turaga” kei na “ka e cakacaka vei keda” ni rau sa yaco me duabau ga ka tautauvata! Me sega ni veisautaki rawa ka sega ni vakatitiqataki na kena vakayacori na loma ni Turaga me noda e gadrevi kina na bula vakatisaipeli cecere ka qaqa! Ena gauna cecere oya, eda sa vakatabui kina vua na Turaga, ka solia vakataucoko sara Vua na noda lewa. Na veivakamalumalumutaki vakayalo vakaoqo, ni tukuni vaka vosa, e totoka, kaukauwa, ka veisautaki yalo.
Au vakadinadinataka vei kemuni ni noda muria na loma ni Turaga ena noda bula ena rawa kina vei keda me da kunea na mataniciva talei duadua e vuravura—na matanitu vakalomalagi. Sa noqu masu nio keda yadua, ena noda gauna, ena rawa nida tukuna, ena yalodei ni veiyalayalati, vua na Tamada Vakalomalagi kei na iVakabula o Jisu Karisito ni “ka sa cakacaka vei Kemuni, sa cakacaka vei au.” Au cavuta na veika oqo ena yaca ni iVakabula o Jisu Karisito, emeni.