Lesona 2

Aoao Faatasi o ni Soo Filemu o Iesu Keriso

Na saunoa Peresitene Dallin H. Oaks o le Au Peresitene Sili, “O le ‘tamā o le finauga’ o le tiapolo lea; o le Faaola o le Aloalii o le Filemu” (“Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 26). I le taimi o lenei vasega, ma i o latou olaga atoa, o le a fetaiai ai tagata aoga ma ni manatu eseese. I lenei lesona o le a mafaufau ai tagata aoga pe mafai faapefea ona latou auai i talanoaga e uiga i aoaoga faavae, aoaoga, aiaiga faavae, ma le talafaasolopito o le Ekalesia i se agaga o le alofa faaKeriso, faaaloalo, ma le agalelei.

Fautuaga mo le Aoao Atu

Faaleleia o Lo Tatou Aoao Atu ma le Aoaoina

Valaaulia tagata aoga e saili le Agaga. I le kosi lenei, o le a saili ai e tagata aoga ni punavai eseese e sue ai tali i a latou fesili. Faamanatu atu ia i latou o le Agaga Paia o le punavai tupito lea o le upumoni ma e taua i la latou sailiga mo tali i fesili o le talalelei. Ua Ia molimau mai e uiga i le Tama ma le Alo (tagai 3 Nifae 28:11), ua faaalia mai le moni o mea uma (tagai Moronae 10:5), ma fesoasoani ia i tatou ia iloa pe faapefea ona faaaoga mea ua tatou aoaoina (tagai Mataupu Faavae ma Feagaiga 11:12). I le gasologa o le kosi, ia faamalosia le upumoni lenei na aoao mai e Elder David A. Bednar o le Korama a Aposetolo e Toasefululua: “O le valaauliaina o le Agaga Paia e avea ma faiaoga o se faamoemoega tutotonu lea i mamanu uma a le Alii mo le aoaoina” (“Aoaoina i le Ala a le Alii,” Liahona, Oke. 2018, 4).

“O A Ni Mea Fou?”

O nei gaoioiga ua mamanuina e tuuina atu ai i tagata aoga uma se avanoa e faasoa mai ai se mea na latou mauaina mai le Newsroom a le Ekalesia po o le polokalama o Talafou a le Ekalesia. Mo lenei mafuaaga, e sili ai le galulue o tagata aoga i ni vaega toalaiti (tolu i le toalima tagata) mo lenei gaoioiga. O lenei gaoioiga e aoao ai o se talanoaga e faaosofia e tagata aoga e uunaia ai le mauaina, faasoa atu, ma le fesootaiga. Atonu e te manao e tuu atu i tamaiti ni nai minute e sauniuni ai a o lei amata ona latou faasoa mai. O le gaoioiga lenei e tusa ma le 10 minute e alu ai.

Faamanatu atu i tagata aoga o le sauniuniga mo le vasega sa valaaulia ai i latou e sue se tala fou mai le saite o le Newsroom po o le polokalama o talafou a le Ekalesia e fiafia i ai. Afai e tatau ai, tuu atu i tagata aoga ni nai minute e saunia ai. Ona fai atu lea i tagata aoga e fai ni vaega toalaiti ma faasoa mai mea na latou maua. E mafai ona e faaali atu pe faasoa atu se kopi o fesili nei e fesoasoani e faafaigofie ai le talanoaga:

• Aisea e taua ai ia te oe lea tala? O le a se mea na e aoaoina?

• O le a se mea na e matauina e uiga i le auala na faaaoga i le faalauiloaga o lenei talafou po o le tala?

• E faapefea ona utuvai mai lenei talafou po o le tala i aoaoga o le talalelei a Iesu Keriso?

• A o e faitau ma mafaufau e uiga i lenei tala, pe na e mauaina ni manatu po o ni uunaiga mai le Agaga Paia? Afai o lea, na faapefea ona latou faatosinaina oe?

• O ai e te iloa e mafai ona faamanuiaina e ala i faamatalaga i lenei talafou faalauiloa po o le tala? O le a se auala sili ona lelei e faasoa atu ai ia i latou?

Faafaileleina o se lagona o le auai

Mafaufau e tuuina atu le ata faataitai lenei po o se tasi e te lagona atonu e sili atu ona talafeagai i au tagata aoga:

I le taimi o se vasega inisitituti, e aumai ai e le faiaoga le autu o le faaipoipoga o le itupa e tasi. O se tasi o tagata aoga, o Marcel, na vave lava ona lagonaina le popole. O lona uso, o lē ua faailoa mai o se tagata e fiafia i le itupa e tasi [gay], ua le toe auai i le lotu ona e le ioe o ia i aoaoga a le Ekalesia e uiga i lenei autu. Na sii i luga e Marcel lona lima ma fesili atu, “E te manatu o le a iu ina suia e le Ekalesia lona tulaga i le faaipoipoga faa-itupa e tasi?” A o lei mafai ona tali atu le faiaoga, ua fai mai ma le malosi se tagata o le vasega, “E leai lava! Pe e te manatu moni ea e suia e le Atua Ana tulafono ona o faiga i malo?” Na faafuasei lava, ona tali mai se isi tagata ma se leo ita, “Ou te manatu e sese oe! E faapefea ona e iloa le mea o le a faia e le Atua i le lumanai? Atonu e le tatau ona e taofiofi mamau!” A o faalogologo atu Marcel i lenei talanoaga, sa ia faanoanoa i le fai atu o lana fesili.

• O a ni faafitauli o e vaaia i lenei talanoaga?

• O le a se mea e mafai ona tupu i le faatuatua ma le molimau a Marcel pe afai na te le lagonaina le saogalemu e talanoaina ana fesili faamaoni ma isi tagata o le Ekalesia?

• O a ni lagona o isi o loo auai mai i lenei vasega?

Faaali atu le faamatalaga le uma lenei i luga o le laupapa: E mafai ona tatou lagonaina le saogalemu i le faia o fesili faigata ma talanoaina ni autu maaleale pe afai …

Valaaulia tagata aoga e fai ni vaega toalaiti ma suesue fuaitau o mau nei, ma vaavaai mo auala eseese e mafai ona latou faauma ai le faamatalaga ua faaalia: Faataoto 15:1; Efeso 4:15; Mosaea 18:21; 3 Nifae 11:29; Moronae 7:3–4; Moronae 7:45.

A uma ua lava se taimi mo se talanoaga, fai atu i nisi o tagata aoga e faasoa mai pe na faapefea ona faamaea e la latou vaega le faamatalaga o i le laupapa. A o faasoa mai tagata aoga, e mafai ona e tusia a latou mataupu faavae i luga o le laupapa. (Atonu e te manao e tusifaamaumau nei upumoni ona faaali atu lea ma toe faamanatu i le kosi atoa.)

Ina ia uunaia faatinoga amiotonu, e mafai ona e fai atu nisi o fesili nei:

• E mafai faapefea ona faamanuiaina la tatou vasega pe afai tatou te taliaina ma faataitai nei mataupu faavae?

• Na faapefea ona faataitai mai e Iesu Keriso nei mataupu faavae? (Afai e lava le taimi, atonu e te manao e faitau ma talanoaina le Ioane 8:1–11.)

• O anafea na e vaaia ai le aoga o nei mataupu faavae i se talanoaga e taulima ai se fesili faigata po o se autu maaleale?

• O fea o nei upumoni e manaomia ona e malamalama lelei i ai ma faaaoga atoatoa atili i lou olaga? (Tuu atu i tagata aoga se taimi e mafaufau loloto ma tusifaamaumau ai o latou manatu.)

Mafaufau e faaiu i le faasoa atu o le faamatalaga lenei mai ia Peresitene Oaks:

O soo o Keriso e tatau ona avea ma faataitaiga o le amio lelei. E tatau ona tatou alolofa atu i tagata uma, avea ma tagata e faalogo lelei, ma faaalia le popole mo o latou talitonuga faamaoni. E ui lava atonu tatou te le ioe i nisi manatu, ae e le tatau ona tatou le fiafia. O o tatou tulaga ma talanoaga e uiga i ni autu feteenai e le tatau ona tupu ai ni finauga. (Dallin H. Oaks, “Ola Faatasi ma Alolofa atu i Isi e Eseese o Tatou Talitonuga,” Liahona, Nov. 2014, 27)

Mo Le Isi Taimi

Faamanatu i tagata aoga o lesona 7–14 o le a tatou talanoaina ai autu e filifili e le vasega. Valaaulia tagata aoga e tusi i lalo se fesili se tasi o ia i latou e uiga i le aoaoga faavae, aoaoga, aiaiga faavae, po o le talafaasolopito o le Ekalesia ma aumai i le isi vasega e sosoo ai. Atonu e te manao e faaaoga nisi o nei fesili e fesoasoani ia te oe e filifili ai autu e talanoaina mo na lesona mulimuli ane.