Faatomuaga i Punaoa Faaperofeta: O Le Meaalofa Paia o le Alofa Tunoa

“Lesona 4 Anomea a le Faiaoga: Faatomuaga i Punaoa Faaperofeta: O Le Meaalofa Paia o le Alofa Tunoa,” Taliina o A‘u Fesili o le Talalelei Anomea a le Faiaoga (2022)

“Faatomuaga i Punaoa Faaperofeta: O Le Meaalofa Paia o le Alofa Tunoa,” Taliina o A‘u Fesili o le Talalelei Anomea a le Faiaoga

Lesona 4 Anomea a le Faiaoga

Faatomuaga i Punaoa Faaperofeta: O Le Meaalofa Paia o le Alofa Tunoa

Pe a sailia ni tali mo a tatou fesili o le talalelei, e taua le taulai atu ma tuu atu le faamuamua i le afioga a le Atua. O tusitusiga paia ma aoaoga a aposetolo ma perofeta o aso nei o ni punavai autu ia e maua ai Lana afioga paia. I lenei lesona, o le a faataitai ai e tagata aoga le faaaogaina o le Taiala i Tusitusiga Paia ma lauga o le konafesi aoao e iloa ai po o a mea na aoao mai e tusitusiga paia ma aposetolo ma perofeta o aso nei a le Alii i le autu o le alofa tunoa. O le a faailoa atu foi i le faataitaiga lenei e aoao ai lea o le a faaaogaina i le kosi atoa lenei: (1) talanoa i le taua o le autu, (2) faaloloto le malamalama, (3) faamatala, ma le (4) manatunatu ma faamaumau.

Fautuaga mo le Aoao Atu

E faavae i manaoga o tagata aoga, e mafai ona e amataina le vasega i se tasi o mea nei:

O se aoaoga laiti mai le faaopoopoga A
O se talanoaga “O Le A Se Mea Fou?” e uiga i lipoti o talafou mai le Potu o Talafou a le Ekalesia (tagai i le pepa e tufa atu 1 i le faaopoopoga E)
O se talanoaga e uiga i le autu o le aso

Talanoa i le Taua o le Autu

Mafaufau e faasoa atu se ata faataitai e pei o lenei:

Manatu faapea o loo e talanoa e uiga i mea tau lotu ma se uo mamae e le auai i lo tatou faatuatuaga. I le taimi o le talanoaga, ua oo mai ai le autu o le alofa tunoa. I se tasi taimi ua fai mai ai lau uo, “Ua ou taliaina Iesu Keriso o lo‘u Faaola ma ua faaolaina a’u i Lona alofa tunoa. Sa ou faalogo o tagata o la outou ekalesia e le talitonu latou te manaomia le alofa tunoa o Keriso ina ia faasaoina ai. Nai lo lena, e te talitonu e mafai ona e maua lou faaolataga e ala i galuega lelei. E sao? O le a le mea o loo aoao mai e lau lotu e uiga i le alofa tunoa?”

Valaaulia nisi o tagata aoga e faasoa mai o latou uluai manatu e uiga i lenei tulaga faataitai. Ona mafai ai lea ona e fesili atu:

O fea e mafai ona e alu i ai e maua ai aoaoga a le Alii i le alofa tunoa?
Aisea e ono taua ai le aoao muamua po o a mea o tau mai e tusitusiga paia ma aposetolo ma perofeta o aso nei e uiga i le alofa tunoa, e ui lava e mafai ona tatou maua aoaoga a le toatele o isi tagata e uiga i ai? (E mafai ona e fai atu i tagata aoga e faitau le 1 Nifae 15:23–24 ma le Mataupu Faavae ma Feagaiga 1:37–38.)

Faamalamalama atu o le Gospel Library o loo i ai le tele o punaoa taua e faaleleia ai le suesue ma le aoaoina. Peitai, talu ai o i latou ua valaauina e le Alii o ni perofeta ma aposetolo, i aso anamua ma ona po nei, ua i ai se valaauga faapitoa ma se meaalofa e “tautino atu ai le mafaufau ma le finagalo o le Atua i lona nuu,” o a latou upu e tatau ona maua le faamuamua i isi punaoa uma (D. Todd Christofferson, “O Le Aoaoga Faavae a Keriso,” Liahona, Me 2012, 87). I lenei lesona o le a tatou faaaogaina ai le Taiala i Tusitusiga Paia ma lauga o konafesi aoao o se auala taua e iloa ai mea ua faaalia mai e le Alii e ala mai i Ana perofeta ma aposetolo.

Faaloloto le Malamalama

Valaaulia tagata aoga e galulue i ni vaega toalaiti. Tuu atu i nisi o tagata o le vaega e saili le “Alofa Tunoa” i le Taiala i Tusitusiga Paia ma isi e saili le “Alofa Tunoa” e faaaoga ai le meafaigaluega o Autu o le Konafesi Aoao. A o saili e tagata aoga a latou punaoa e faatatau i ai, fautuaina i latou e vaavaai mo tali i le fesili “O le a se mea o aoao mai e la outou ekalesia e uiga i le alofa tunoa?”

A uma ona tuuina atu se taimi mo suesuega, valaaulia tagata o le vaega e faasoa atu i le tasi ma le isi ia mau ma faamatalaga mai le konafesi aoao e mafai ona fesoasoani e tali ai le fesili o loo i luga.

Ona e fai atu lea o fesili nei i le vasega:

O le a se mea na e aoaoina na fesoasoani ia te oe e malamalama atili ai i le alofa tunoa?
Na faapefea e lau suesuega i le alofa tunoa ona tosina ai lou faatuatua ma le molimau ia Iesu Keriso?

Faamatala

Filifili se tasi o gaoioiga nei mo au tagata aoga e fai, pe fatu sau oe lava gaoioiga, ina ia mafai ai e tagata aoga ona faataitai le faamatalaina o mea ua latou aoaoina e uiga i aoaoga a le Alii e uiga i le alofa tunoa. E mafai ona e tuuina atu faatonuga mo soo se tasi o gaoioiga muamua e lua i tagata aoga e fai ma pepa e tufa atu.

Tali atu i se tasi e le ioe i ai. I le galulue ai ma se paga, vaai faalemafaufau e te feiloai i se tasi o fai mai, “Ou te le faalogo i tagata o lau ekalesia o talanoa e uiga i le alofa tunoa. E te le talitonu i ai?” E faavae i mea ua e aoaoina, faasoa atu se tali e atagia ai aoaoga a le Faaola i lenei autu. E mafai foi ona outou talanoaina auala eseese e ono malamalama sese ai o tatou talitonuga e uiga i le alofa tunoa ma le auala sili e taulimaina ai na malamalamaaga sese.

Faasoaina atu o se vaaiga aoao e lua minute. I ni vaega toalaiti, talanoa i auala eseese e ono le malamalama ai tagata o le Ekalesia i le aoaoga faavae o le alofa tunoa. Mo se faataitaiga, o le a se malamalamaaga sese o le alofa tunoa e ono faaataata mai i faamatalaga nei: “E le lava lo‘u lelei.” “O le a le avea lava a‘u ma se tagata e selesitila.” Ona vaai faalemafaufau lea faapea ua talosagaina oe e tuuina atu se vaaiga aoao puupuu o aoaoga a le Ekalesia e uiga i le alofa tunoa i le aufono a lau uarota po o le paranesi. O le utuvai mai i mea ua e aoaoina i le asō, tuu atu i tagata taitoatasi o le vaega e saunia se vaaiga aoao e lua minute ua pue ai mea na aoao mai e le Alii e uiga i Lona alofa tunoa. Ona filifili lea o tagata eseese i le vaega e faamatala mai. A uma ia aoaoga taitasi, e mafai e isi tagata o le vaega ona fai atu i le tagata se fesili se tasi pe lua. Faataga tagata uma o le vaega e faasoa mai a latou lava vaega o le vaaiga aoao e lua minute pe a lava le taimi.

Fai atu ma le taliina o fesili. Valaaulia tagata aoga e tusi i luga o se fasipepa se fesili e ono i ai i se tasi e le auai i la tatou faatuatuaga e uiga i le alofa tunoa. Ao mai fesili a tagata aoga, ma tuu i totonu o se koneteina. Filifili soo se fesili, ma valaaulia se tagata aoga e faasoa mai se tali e ogatusa ma aoaoga a le Ekalesia. Talanoaina le malosi o le tali ma pe mafai faapefea ona faaleleia, ona sei mai lea o se isi fesili mo se isi tamaitiiti aoga e tali. Ia toe fai e tusa ma le lava o le taimi.

Mafaufau ma Faamaumau

Tuu atu i tagata aoga se taimi e mafaufau loloto ai i mea sa latou aoaoina ma lagonaina mai lenei lesona. Ina ia uunaia tagata aoga, e mafai ona e faaali atu nisi o fesili nei po o nisi o au lava fesili. Ona mafai lea ona e valaaulia tagata aoga e taulai atu i le fesili po o fesili e sili ona talafeagai ia i latou ma tusifaamaumau o latou manatu:

O le a se mea na e aoaoina i le asō na fesoasoani ia te oe e malamalama atili ai i aoaoga a le Ekalesia e uiga i le alofa tunoa? O a ni uunaiga na e maua mai le Agaga Paia?
O ai e mafai ona e faasoa atu i ai lenei malamalama faateleina? O anafea ma e mafai faapefea ona e faasoa atu ia i latou i se ala faaKeriso mea sa e aoaoina ma lagonaina?
O a ni auala na fesoasoani ai aafiaga o le vasega i le asō e faamalosia lou faatuatua ia Iesu Keriso ma Lana Ekalesia toefuataiina? O le a se isi mea e mafai ona e faia e faateleina ai lou malamalama ma le faatuatua e faatatau i lenei autu?
Ua faapefea e lenei aafiaga ona faateleina lou talitonuga o loo taitaia i tatou e perofeta soifua o e maua faaaliga mai le Alii?

Pe a talafeagai ai, valaaulia ni nai tagata aoga e faasoa mai ni mea na latou aoaoina mai le latou aafiaga i le asō. Mafaufau e molimau atu i mea ua e lagonaina pe aoaoina i le asō. E mafai foi ona e molimau atu i le alofa tunoa o le Alii lea o le a auai i tagata aoga i la latou sailiga faifai pea mo tali o le talalelei i a latou fesili.

Mo Le Isi Taimi

Faasoa atu i tagata aoga o le vasega e sosoo ai o le a tatou talanoaina ai punaoa taua i le faafetauia o ponokalafi o loo maua i le vaega Fesoasoani o le Olaga o le Potutusi o le Talalelei. Valaaulia tagata aoga e faaalu sina taimi i le aluga o le vaiaso e suesue ai lenei punaoa.