Aoaoga laiti 7

Auala e Faamalosia ai le Faatuatua ia Iesu Keriso e ala i le Tuuina Atu o le Molimau

Faamatalatala

Faamalamalama atu a tatou molimau atu, tatou te valaaulia le mafutaga a le Agaga Paia ma faalatalata atu isi ia Iesu Keriso. Faaali atu ma faitau saunoaga nei a Peresitene M. Russell Ballard ma Elder Gary E. Stevenson o le Korama a Aposetolo e Toasefululua:

E faigofie ona faaupu, o le molimau—molimau moni lava, e tuuina mai i le Agaga ma faamaonia e le Agaga Paia—e suia ai olaga. (M. Russell Ballard, “Molimau Mama Atoatoa,” Liahona, Nov. 2004, 40)

Pe a tatou faasoa atu lo tatou malamalama faaleagaga po o la tatou molimau faaleagaga i isi, tatou te “tuuina atu la tatou molimau.” E faapena foi, pe a matauina e isi a tatou amioga amiotonu, faatinoga, po o galuega, o se auala foi lea tatou te “tuuina atu ai a tatou molimau.” O le tuuina atu o a tatou molimau i upu po o galuega o se auala lea e faasoa atu ai upumoni manino ma taua o le talalelei i isi. O se valaaulia mo isi ia “o mai ia Keriso.” … O avanoa e tuuina atu ai molimau e tele i soo se mea. (Gary E. Stevenson, “Testimony: Sharing in Word and Deed,” New Era, Mat. 2019, 4, 5)

Saunia le pepa e tufa atu mo tagata aoga.

Faasoa Atu o Lau Molimau i le Faigofie ma Masani ai

Taliina o A‘u Fesili o le Talalelei—Aoaoga laiti 7: Auala e Faamalosia ai le Faatuatua ia Iesu Keriso e ala i le Tuuina Atu o le Molimau

Ia faafaigofie. O se molimau e le manaomia ona amata i se fuaitau, “Ou te fia tuuina atu lau molimau,” ma e le manaomia ona faaiu i le, “i le suafa o Iesu Keriso, amene.” O se molimau o se faailoaga lea o mea tatou te talitonu i ai ma iloa e moni e ala i le molimau a le Agaga Paia.

Faafetaui le gasologa o le talanoaga masani. Afai tatou te naunau e faasoa atu, e tele avanoa o loo siomia ai i tatou e faafetaui ai le molimau i talanoaga o aso uma. Pe a fesili se tasi pe aisea e te le inu ai i le ava malosi, mo se faataitaiga, e mafai ona e faasoa atu pe na faapefea ona faamanuiaina lou olaga i le ola ai i le Upu o le Poto.

Faasoa ou aafiaga. E masani ona tatou talanoa e uiga i o tatou luitau. Pe a tau atu e se tasi e uiga i mea o loo latou feagai, e mafai ona e faasoa atu se taimi na fesoasoani ai le Atua i ou faigata ma molimau atu e te iloa e mafai ona fesoasoani foi le Atua ia i latou.

Ia tumau le faatotonugalemuina i le Faaola ma Lana aoaoga faavae. Sa faamamafa mai e Peresitene M. Russell Ballard e faapea “e le mafai ona taofiofia le Agaga pe a tuuina mai se molimau mama a‘ia’i ia Keriso” (“Molimau Mama Atoatoa,” Liahona, Nov. 2004, 41; tagai foi “How to Share Testimony More Naturally,” Ensign, Mat. 2019, 8–11).

© 2022 Puletaofia e le Intellectual Reserve, Inc. Ua taofia aia tatau uma.

Faasoa Atu o Lau Molimau i le Faigofie ma Masani ai

Ituaiga

Matamata pe faitau le vaega muamua o le lauga a Sister Sheri Dew “Will You Engage in the Wrestle?” ([Faigalotu a le Brigham Young University–Idaho, 17 Me, 2016], byui.edu; faailotaimi 0:50–4:25). Valaaulia tagata aoga e vaavaai pe na faapefea ona faasoa atu e Sister Dew lana molimau i se auala faigofie ma masani ai. Pe a uma ona matamata i le vitio, valaaulia ni nai tagata aoga e faasoa mai ni mea na latou aoaoina mai le faataitaiga a Sister Dew.

Faaaoga

Valaaulia tagata aoga e galulue ma se paga ma faaaoga mataupu faavae o i le pepa e tufa atu “Faasoa Atu Lau Molimau i le Faigofie ma Masani ai” e tali atu ai i tulaga nei (pe filifili ni tulaga e te talitonu o le a sili atu ona talafeagai mo au tagata aoga):

• Ua fesili atu se tagata e te lua faigaluega po o le a lau mea na fai i le faaiuga o le vaiaso. E te tali atu …

• Ua faasoa mai e se uo ua maliu se tagata o lona aiga i se faalavelave faafuasei i le vaiaso ua te‘a. E te tali atu …

• Ua fesili se tagata o le aiga, “Aisea e lelei ai i taimi uma ou lagona e uiga i le olaga?” E te tali atu …

• Ua le mautonu se tagata e te lua faigaluega faatasi i le mafuaaga ua e naunau ai e faamavae mai lau galuega ma auauna atu i se misiona e totogi lava e oe. E te tali atu …

Afai e i ai se taimi i le faaiuga o lenei faiga, valaaulia se tagata aoga se toatasi pe toalua e faasoa mai mea na la aoaoina mai lenei aafiaga ma pe faapefea ona la faaaogaina lenei tomai o le faasoa atu o a la molimau i se tulaga faigofie ma mamana i se tulaga o loo loma.