Aoaoga laiti 5

Auala e Avea ai ma se Tagata e Faalogo Mataalia

Faamatalatala

Faaali atu le saunoaga lenei a Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

Atonu e sili atu le taua o le faalogo nai lo le tautala. … Sa ta‘u mai e [Peresitene] Russell M. Nelson ia te au i se tasi taimi o se tasi o uluai tulafono o le fesili faafomai o le “Fesili atu i le tagata ma’i po o fea e tiga. O le tagata ma‘i,” sa ia fai mai ai, “o le a avea ma ou taiala sili ona lelei i se suesuega sa’o ma se fofo o le gasegase.” Afai tatou te faalogo ma le alofa, e le tatau ona tatou tau manatunatu pe o le a le tala e fai. O le a tuuina mai ia i tatou—e le Agaga ma a tatou uo. (Jeffrey R. Holland, “Molimau ia Te A’u,” Ensign po o le Liahona, Me 2001, 15)

Saunia le pepa tufa atu lenei mo tagata aoga.

O Auala e Lima e Avea ai o se Tagata e Faalogo Lelei

Taliina o A‘u Fesili o le Talalelei—Aoaoga laiti 5: Auala e Avea ai ma se Tagata e Faalogo Mataalia

Tuu atu i tagata le taimi. Ia onosai ma tuu atu i tagata se taimi e mafaufau ma tautatala ai a o lei faia ma pe a uma ona latou fai atu se tala. Aua le fefe i le leai o se tali.

Ia gauai atu. Faalogo moni ia malamalama, ma aua nei vave faia ni faaiuga pe mafaufau i luma e uiga i mea o le a e fai atu ai.

Faamanino. Fai atu ni fesili manino e faaali ai le fiafia i mea o loo fai mai ai le tagata ma ia mautinoa e te lei malamalama sese.

Tomanatu. Toe fai atu pe toe faamatala mea e te lagona o loo fai mai ai le tagata. O lenei mea e maua ai e le tagata o saunoa se avanoa e lagona ai le faamaoniaina ma ia faamanino pe a manaomia.

Sue mea e tutusa ai Ia malilie faatasi ma le tagata i le tele e mafai ai, e aunoa ma le tauseseina o ou lava lagona, e fesoasoani e fausia le lotogatasi ma faaitiitia ai soo se popolega po o le taupunipuni. (Sii mai le “Five Things Good Listeners Do,” Ensign, Iuni 2018, 6–9)

© 2022 Puletaofia e le Intellectual Reserve, Inc. Ua taofia aia tatau uma.

O Auala e Lima e Avea ai o se Tagata e Faalogo Lelei

pepa tufa atu a le faiaoga

Iloilo faatasi o se vasega nei tomai e lima, ma valaaulia tagata aoga e mafaufau po o le fea e sili ona manaomia ona latou galulue i ai.

Ituaiga

Fesoasoani i tagata aoga e mafaufau pe faapefea ona faaaoga nei tomai o le faalogo mataalia e ala i le matamata i se vaega o le vitio “Everyday Example: When Beliefs Are Questioned” (faataitaiga le lelei: taimi 0:00–3:08; faataitaiga lelei: taimi 7:35–12:48). Ona fesili atu lea:

• E faapefea ona e faamatalaina tomai o le faalogo o nei tamaitai e toalua?

• O le toe manatuaina o seti o tomai e lima lea faatoa uma ona tatou talanoaina, o le a se mea na mafai ona fesoasoani i nei tamaitai e faalogo lelei ai le tasi i le isi?

Faaaoga

Valaaulia tagata aoga e fai ni vaega taitoatolu ma filifili se autu latou te mananao e talanoaina. Tuu atu i se tagata se toatasi e faaalu se minute se tasi e faasoa mai ai o latou lagona e uiga i le autu ua filifilia. Tuu atu i le tagata lona lua e faataitai le faalogo e faaaoga ai se tasi pe sili atu foi o tomai o le faalogo lelei na talanoaina muamua. Tuu atu i le tagata lona tolu e matau ma tuuina mai ni manatu faaalia i tomai o le faalogo sa latou matauina. Ona tuu atu lea i tagata o le vaega e sui matafaioi ma toe fai le gaoioiga. A uma ona faataitai e tagata aoga, valaaulia se tagata aoga se toatasi pe toalua e faasoa mai mea sa latou aoaoina.